নিউজীলেণ্ডৰ বিৰুদ্ধে অনুষ্ঠিত হবলগা এদিনীয়া আৰু টি-২০ শৃংখলাৰ বাবে ঘোষণা কৰা হৈছে ভাৰতীয় দল । অহা বছৰ ১১ জানুৱাৰীৰ আৰম্ভ হ’ব এই শৃংখলা ।
২০২৬ চনৰ ফেব্ৰুৱাৰী মাহৰ পৰা আৰম্ভ হ’বলগীয়া আই চি চি পুৰুষ টি-২০ বিশ্বকাপৰ বাবে ঘোষমা কৰা হৈছে ভাৰতীয় দল । শনিবাৰে মুম্বাইত মুখ্য নিৰ্বাচক অজিত আগৰকাৰৰ নেতৃত্বত এই দলটো ঘোষণা কৰা হয় । লগতে ভাৰত আৰু নিউজীলেণ্ডৰ মাজত অনুষ্ঠিত হ’বলগীয়া শৃংখলাৰ বাবেও ভাৰতীয় দল ঘোষণা কৰা হৈছে । বিশ্বকাপৰ বাবে নিৰ্বাচিত একেটা দলেই এই শৃংখলাতো খেলিব ।
টি-২০ বিশ্বকাপৰ পূৰ্বে নিউজীলেণ্ডে ভাৰতৰ বিৰুদ্ধে তিনিখন মেচৰ এদিনীয়া শৃংখলা আৰু তাৰ পিছত পাঁচখন টি-২০ শৃংখলা খেলিব । ১১ জানুৱাৰীৰ পৰা এদিনীয়া শৃংখলা আৰম্ভ হোৱাৰ বিপৰীতে ২১ জানুৱাৰীৰ পৰা আৰম্ভ হ’ব টি-২০ শৃংখলা । এই টি-২০ শৃংখলাটো গুৰুত্বপূৰ্ণ হ’ব কাৰণ টি-২০ বিশ্বকাপৰ বাবে প্ৰস্তুতি চলোৱাৰ এইটোৱেই হ’ব ভাৰতীয় দলৰ শেষ সুযোগ । এই শৃংখলাৰ পিছত পোনপটীয়াকৈ বিশ্বকাপলৈ যাত্ৰা কৰিব টিম ইণ্ডিয়াই ।
নিউজীলেণ্ড শৃংখলা আৰু টি-২০ বিশ্বকাপৰ বাবে ১৫ জনীয়া ভাৰতীয় দল : সূৰ্যকুমাৰ যাদৱ (অধিনায়ক), অক্ষৰ পেটেল (সহঃ অধিনায়ক), অভিষেক শৰ্মা, তিলক বাৰ্মা, হাৰ্দিক পাণ্ডিয়া, শিৱম ডুবে, সঞ্জু চেমচন (উইকেটকীপাৰ), কুলদীপ যাদৱ, বৰুণ চক্ৰৱৰ্তী, যশপ্ৰীত বুমৰাহ, অৰ্শদীপ সিং, ৰিংকু সিং, হৰ্ষিত ৰানা, ৱাশ্বিংটন সুন্দৰ আৰু ঈশান কিষণ (উইকেটকীপাৰ)।
নিউজীলেণ্ডৰ বিৰুদ্ধে শৃংখলাৰ সম্পূৰ্ণ সূচী-
১১ জানুৱাৰীত বদোদৰাত অনুষ্ঠিত হ’ব শৃংখলাৰ প্ৰথমখন এদিনীয়া । দ্বিতীয়খন এদিনীয়া ১৪ জানুৱাৰীত ৰাজকোটত অনুষ্ঠিত হ’ব আৰু ১৮ জানুৱাৰীত ইন্দোৰত অনুষ্ঠিত হ’ব তৃতীয় তথা অন্তিমখন এদিনীয়া ।
ইফালে ২১ জানুৱাৰীত নাগপুৰত প্ৰথমখন টি-২০, দ্বিতীয়খন টি-২০ ৰায়পুৰত, ২৫ জানুৱাৰীত গুৱাহাটীত তৃতীয় টি-২০, ২৮ জানুৱাৰীত বিশাখাপট্টনমত চতুৰ্থ টি-২০ আৰু ৩১ জানুৱাৰীত কেৰালাত চূড়ান্ত টি-২০ মেচ অনুষ্ঠিত হ’ব ।
উল্লেখ্য যে, ভাৰত আৰু শ্ৰীলংকাই যৌথভাৱে আয়োজন কৰিব টি-২০ বিশ্বকাপ । ৭ ফেব্ৰুৱাৰীৰ পৰা আৰম্ভ হ’বলগীয়া এই প্ৰতিযোগিতাখনৰ ২০ মাৰ্চত অনুষ্ঠিত হ’ব ফাইনেল । ডিফেণ্ডিং চেম্পিয়ন ভাৰতক এই প্ৰতিযোগিতাখনৰ বাবে গ্ৰুপ এলৈ টানি অনা হৈছে, য’ত আমেৰিকা যুক্তৰাষ্ট্ৰ, নামিবিয়া, নেদাৰলেণ্ড, পাকিস্তান অন্তৰ্ভুক্ত আছে ।
ভাৰত বনাম নিউজীলেণ্ডৰ সম্পূৰ্ণ সূচীঃ
১১ জানুৱাৰী : প্ৰথম এদিনীয়া, বদোদৰা
১৪ জানুৱাৰী : দ্বিতীয় এদিনীয়া, ৰাজকোট
১৮ জানুৱাৰী : তৃতীয় এদিনীয়া, ইন্দোৰ
২১ জানুৱাৰী : প্ৰথম টি-২০, নাগপুৰ
২৩ জানুৱাৰী : দ্বিতীয় টি-২০, ৰায়পুৰ
২৫ জানুৱাৰী : তৃতীয় টি-২০, গুৱাহাটী
২৮ জানুৱাৰী : চতুৰ্থ টি-২০, বিশাখাপট্টনম
৩১ জানুৱাৰী : পঞ্চম টি-২০, তিৰুৱনন্তপুৰম
লগতে পঢ়ক : শুভমান গিল আউট,ঈশান কিষাণ ইন; টি-২০ বিশ্বকাপৰ বাবে ঘোষণা ভাৰতীয় দল
