শনিবাৰে পশ্চিম বংগত উপস্থিত হৈ ৰাজ্যখনক জংঘলৰাজৰ পৰা মুক্ত কৰিব লাগিব বুলি মন্তব্য কৰে প্ৰধানমন্ত্ৰী মোদীয়ে । লগতে তেওঁ জনসাধাৰণক ৰাজ্যখনত ডাবল ইঞ্জিন চৰকাৰ গঠনৰ বাবেও আহ্বান জনায় ।
শনিবাৰে পশ্চিম বংগৰ তাহেৰপুৰ হেলিপেডত অৱতৰণ কৰাৰ চেষ্টা ব্যৰ্থ হয় প্ৰধানমন্ত্ৰী নৰেন্দ্ৰ মোদীৰ হেলিকপ্টাৰ । অঞ্চলটোত ঘন কুঁৱলীৰ বাবে দৃশ্যমানতা অতি কম হোৱাৰ বাবে প্ৰধানমন্ত্ৰীগৰাকীৰ হেলিকপ্টাৰখন কিছু সময়ৰ বাবে হেলিপেডৰ ওপৰত উৰি থকাৰ পিছত কলকাতা বিমানবন্দৰলৈ উভতি আহে । তেওঁ ভাৰ্চুৱেলি বিমানবন্দৰৰ পৰাই ৰাইজক সম্বোধন কৰে । লগতে বতৰ বেয়া হোৱাত ৰেলী স্থলীত উপস্থিত হ’ব নোৱাৰাৰ বাবে ৰাইজৰ ওচৰত ক্ষমা বিচাৰে ।
বংকিম চন্দ্ৰ চেটাৰ্জীলৈ প্ৰধানমন্ত্ৰী মোদীৰ শ্ৰদ্ধাঞ্জলি-
সভাত ভাৰ্চুৱেল ভাষণত প্ৰধানমন্ত্ৰী মোদীয়ে মহান সাহিত্যিক বংকিম চন্দ্ৰ চেটাৰ্জীক শ্ৰদ্ধাঞ্জলি জনাই কয় যে বন্দে মাতৰম ব্ৰিটিছ শাসনৰ বিৰুদ্ধে সংগ্ৰামৰ মন্ত্ৰ । প্ৰধানমন্ত্ৰী মোদীয়ে কয় যে বন্দে মাতৰম ৰাষ্ট্ৰ-নিৰ্মাণৰ মন্ত্ৰ হ’ব লাগিব ।
বংগক জংঘল ৰাজৰ পৰা মুক্ত কৰিব লাগিব- প্ৰধানমন্ত্ৰী মোদী
প্ৰধানমন্ত্ৰীয়ে উল্লেখ কৰে যে কেন্দ্ৰীয় চৰকাৰে দেশৰ নাগৰিকৰ সৈতে কান্ধ মিলাই কাম কৰি আছে । তেওঁ কয় যে জি এছ টিয়ে সমগ্ৰ দেশকে ধৰি বংগবাসীক যথেষ্ট সকাহ দিছে আৰু দুৰ্গা পূজা আৰু অন্যান্য উৎসৱৰ সময়ত সমগ্ৰ দেশৰ জনসাধাৰণ যথেষ্ট উপকৃত হৈছে । প্ৰধানমন্ত্ৰী মোদীয়ে অভিযোগ কৰে যে বংগত অনুপ্ৰৱেশকাৰী টি এম চিৰ দ্বাৰা সুৰক্ষিত । প্ৰধানমন্ত্ৰীগৰাকীয়ে কয় যে গংগা বিহাৰৰ মাজেৰে বংগলৈ বৈ যায় আৰু বিহাৰে বংগক বাট দেখুৱাইছে । তেওঁ কয় যে বংগক জংঘলৰাজৰ পৰা মুক্ত কৰিব লাগিব । প্ৰধানমন্ত্ৰীয়ে পুনৰ কয় যে তেওঁ সম্পূৰ্ণ হৃদয়েৰে বংগবাসীৰ প্ৰতি উৎসৰ্গিত আৰু ৰাজ্যখনৰ বাবে পুঁজি আৰু নীতিৰ অভাৱ নাই ।
“বংগত ডাবল ইঞ্জিন চৰকাৰ গঠন হওক”
প্ৰধানমন্ত্ৰীয়ে কয় যে ৰাজ্য চৰকাৰৰ বাবে পশ্চিম বংগৰ বহু উন্নয়নমূলক প্ৰকল্প বাকী আছে । তেওঁ কয় যে টি এম চিয়ে যদি বিজেপিৰ বিৰোধিতা কৰিব বিচাৰে তেন্তে তেওঁলোকে কৰিব পাৰে, কিন্তু ৰাজনৈতিক লাভালাভৰ বাবে উন্নয়ন স্থবিৰ কৰি ৰখাটো বুজি পোৱাৰ বাহিৰত । প্ৰধানমন্ত্ৰী মোদীয়ে ৰাইজক বিজেপিক সুযোগ দি ডাবল ইঞ্জিন চৰকাৰ গঠন কৰিবলৈ অনুমতি দিবলৈ আহ্বান জনাই তেওঁৰ চৰকাৰে বংগৰ উন্নয়নৰ প্ৰতি সম্পূৰ্ণ দায়বদ্ধ হৈ থাকিব বুলি আশ্বাস দিয়ে ।
ভাষণৰ পূৰ্বে প্ৰধানমন্ত্ৰী মোদীয়ে ৩,২০০ কোটিৰ ৰাষ্ট্ৰীয় ঘাইপথ প্ৰকল্প উদ্বোধন কৰে । পুৱা প্ৰায় ১০:৪০ বজাত দিল্লীৰ পৰা কলকাতাত উপস্থিত হয় প্ৰধানমন্ত্ৰী মোদী । তাৰ পৰা হেলিকপ্টাৰেৰে তাহিৰপুৰলৈ উৰা মাৰে তেওঁ । কিন্তু প্ৰচণ্ড কুঁৱলীৰ বাবে হেলিকপ্টাৰ অৱতৰণত ব্যৰ্থ হোৱাৰ পিছত পুনৰ কলকাতালৈ উভতি যায় তেওঁ ।
বংগক ৩২০০ কোটি টকা উপহাৰ- প্ৰধানমন্ত্ৰী মোদী
উল্লেখযোগ্য যে বংগ ভ্ৰমণৰ সময়ত প্ৰধানমন্ত্ৰীয়ে প্ৰায় ৩২০০ কোটি টকাৰ দুটা ৰাষ্ট্ৰীয় ঘাইপথ প্ৰকল্পৰ উদ্বোধন আৰু আধাৰশিলা স্থাপন কৰে । তেওঁ নাদিয়া জিলাৰ ৩৪ নং ৰাষ্ট্ৰীয় ঘাইপথৰ ৬৬.৭ কিলোমিটাৰ দৈৰ্ঘ্যৰ বৰজাগুলি-কৃষ্ণনগৰ অংশৰ চাৰিলেনিং উদ্বোধন কৰাৰ লগতে উত্তৰ ২৪ পৰগনা জিলাৰ ১৭.৬ কিলোমিটাৰ দৈৰ্ঘ্যৰ বৰাছাট-বৰজাগুলি অংশৰ চাৰিলেনিংৰ আধাৰশিলা স্থাপন কৰে । এই প্ৰকল্পসমূহে কলকাতা আৰু শিলিগুৰিৰ মাজত এক গুৰুত্বপূৰ্ণ সংযোগ সংযোগ প্ৰদান কৰি ৰাজ্যখনৰ দক্ষিণ আৰু উত্তৰ অংশৰ বাণিজ্য, পৰ্যটন, আৰু অৰ্থনৈতিক কাৰ্যকলাপ বৃদ্ধি কৰিব বুলি আশা কৰা হৈছে ।
লগতে পঢ়ক : দুদিনীয়া কাৰ্যসূচীৰে অসমত উপস্থিত প্ৰধানমন্ত্ৰী নৰেন্দ্ৰ মোদী, মুকলি কৰিলে বৰঝাৰ বিমানবন্দৰৰ নতুন টাৰ্মিনেল
