গণিতৰ বাবে কিয় দিয়া নহয় নোবেল বঁটা ?
১৯০১ চনত প্ৰথমবাৰৰ বাবে প্ৰদান কৰা বিশ্বৰ অন্যতম সন্মানীয় বঁটা নোবেল বঁটা । ২০২৫ চনৰ নোবেল বঁটা বিজয়ীসকলৰ ঘোষণাও ইতিমধ্যে আৰম্ভ হৈছে । ২০২৫ বৰ্ষৰ বাবে চিকিৎসা বিজ্ঞান, পদাৰ্থ বিজ্ঞান আৰু ৰসায়ন বিজ্ঞানৰ নোবেল বঁটা ঘোষণা কৰা হৈছে । উল্লেখ্য যে, পদাৰ্থ বিজ্ঞান, ৰসায়ন বিজ্ঞান, শৰীৰবিজ্ঞান বা চিকিৎসা, সাহিত্য, শান্তি, অৰ্থনীতি আদি ছটা শাখাৰ বাবে নোবেল বঁটা প্ৰদান কৰা হয় । কিন্তু গণিতৰ বাবে নোবেল বঁটা কিয় দিয়া নহয় । জানক ইয়াৰ কাৰণ ।
কোনে আৰম্ভ কৰিছিল নোবেল বঁটা ?
ছুইডেনৰ ৰসায়নবিদ, অভিযন্তা আৰু উদ্যোগিক আলফ্ৰেড নোবেলে নোবেল বঁটা স্থাপন কৰিছিল, যিয়ে মৃত্যুৰ পূৰ্বে নিজৰ সম্পত্তিৰ বেছিভাগেই নোবেল বঁটা আৰু নোবেল ফাউণ্ডেশ্যন প্ৰতিষ্ঠা কৰিবলৈ দান কৰিছিল । তেওঁৰ মৃত্যুৰ পিছত ১৯০১ চনত তেওঁৰ ১৮৯৫ চনৰ উইলৰ ভিত্তিত প্ৰথম নোবেল বঁটা প্ৰদান কৰা হয় ।
গণিতত কিয় নোবেল বঁটা দিয়া নহয় ?
গণিতক নোবেল বঁটাত অন্তৰ্ভুক্ত কৰা হোৱা নাই । কাৰণ আলফ্ৰেড নোবেলৰ উইলত নিয়ম আছিল যে জনসাধাৰণক প্ৰত্যক্ষভাৱে উপকৃত কৰিব পৰা ব্যৱহাৰিক আৱিষ্কাৰৰ বাবেহে পুৰস্কাৰ প্ৰদান কৰা হ’ব । নোবেলে গণিতক অতি তাত্ত্বিক আৰু ব্যৱহাৰিক নহয় বুলি গণ্য কৰিছিল । কিন্তু গণিতত নোবেল বঁটা নাপালেও আন আন সন্মানীয় বঁটা যেনে এবেল বঁটা আৰু ফিল্ডছ মেডেল গণিতজ্ঞক দিয়া হয় ।
১২০ বছৰ পূৰ্বে প্ৰতিষ্ঠা হৈছিল নোবেল বঁটা-
উল্লেখ্য যে, আলফ্ৰেড নোবেলে ১২০ বছৰ পূৰ্বে নোবেল বঁটা প্ৰতিষ্ঠা কৰিছিল । প্ৰথম ভাৰতীয় নোবেল বঁটা বিজয়ী কবি, সাহিত্যিক, দাৰ্শনিক ৰবীন্দ্ৰনাথ ঠাকুৰে ১৯১৩ চনত সাহিত্যৰ নোবেল বঁটা লাভ কৰিছিল । একে সময়তে বিশ্বৰ প্ৰথমটো নোবেল বঁটা এজন ব্যক্তিক নহয়, বিভিন্ন ক্ষেত্ৰত কেইবাজনো বিজয়ীক ১৯০১ চনত প্ৰদান কৰা হৈছিল । ইয়াৰ ভিতৰত আছিল এক্স-ৰে আৱিষ্কাৰৰ বাবে পদাৰ্থ বিজ্ঞানত উইলহেম ৰণ্টজেন, ৰসায়ন বিজ্ঞানত জেকবাছ হেনৰিকাছ ভান ‘ট হফ, শৰীৰ বিজ্ঞান বা চিকিৎসা বিজ্ঞানত এমিল ভন বেহৰিং, সাহিত্যত ছালি প্ৰুডহম, আৰু শান্তিৰ বাবে জিন-হেনৰী ডুনাণ্ট আৰু ফ্ৰেডেৰিক পেচিক এই বঁটা দিয়া হৈছিল ।
লগতে পঢ়ক : ডিচেম্বৰ অধিবেশনৰ ইউ জি চি নেট পৰীক্ষাৰ বাবে পঞ্জীয়ন আৰম্ভ; জানক সবিশেষ
