শীঘ্ৰেই এছিয়া কাপৰ বাবে ঘোষণা হ’ব টিম ইণ্ডিয়া
এছিয়া কাপ ২০২৫ৰ বাবে ভাৰতীয় দল নিৰ্বাচনৰ কাউণ্টডাউন আৰম্ভ হৈছে । এইবাৰ যুৱ বেটছমেন যশস্বী জয়ছোৱাল, শুভমন গীল আৰু ছাই সুদৰ্শনৰ দাবীয়ে গতি লাভ কৰিছে । আগষ্ট মাহৰ তৃতীয় সপ্তাহত দলটো নিৰ্বাচিত হোৱাৰ সম্ভাৱনা আছে ।
যোৱা কেইখনমান টি-২০ মেচত দেখা নোপোৱা গীল আৰু জয়ছোৱালে ইংলেণ্ডৰ বিৰুদ্ধে ৫ খন টেষ্টৰ ক্লান্তিকৰ শৃংখলাৰ পিছত এমাহৰ জিৰণি লাভ কৰিছে । এতিয়া দুয়োজন ফিট আৰু নিৰ্বাচনৰ বাবে উপলব্ধ । আনহাতে, ছাই সুদৰ্শনে ধাৰাবাহিকভাৱে ভাল প্ৰদৰ্শন কৰি নিৰ্বাচকসকলৰ আত্মবিশ্বাস অধিক শক্তিশালী কৰি তুলিছে ।
বি চি চি আইৰ বাছনি সমিতিয়ে সকলো সম্ভাৱনা মনত ৰাখি দলটো প্ৰস্তুত কৰি আছে । যদি ভাৰতে ২৮ ছেপ্টেম্বৰত এছিয়া কাপৰ ফাইনেলত প্ৰৱেশ কৰে, তেন্তে তাৰ মাত্ৰ চাৰিদিন পিছত অৰ্থাৎ ২ অক্টোবৰৰ পৰা ৱেষ্ট ইণ্ডিজৰ বিৰুদ্ধে ঘৰুৱা টেষ্ট শৃংখলা আৰম্ভ হ’ব । এনে পৰিস্থিতিত খেলুৱৈৰ কামৰ বোজাৰ ভাৰসাম্য ৰক্ষা কৰাটো এটা ডাঙৰ প্ৰত্যাহ্বান হ’ব ।
ব’ৰ্ডৰ এগৰাকী জ্যেষ্ঠ বিষয়াই কয়, ‘সঞ্জু চেমছন আৰু অভিষেক শৰ্মাৰ ফৰ্ম অতি উত্তম, কিন্তু পাঁচ সপ্তাহৰ বিৰতি আৰু শীৰ্ষ অৰ্ডাৰৰ স্থিতিশীলতাক বিবেচনা কৰিলে জয়ছোৱাল, গীল আৰু সুদৰ্শনক অগ্ৰাধিকাৰ দিব পাৰি । ৬খন মেচৰ এই প্ৰতিযোগিতাখনে খেলুৱৈসকলৰ ওপৰত বিশেষ বোজা নেপেলাব ।’
শীৰ্ষ অৰ্ডাৰৰ বাবে ডাঙৰ দায়িত্ব-
এছিয়া কাপ ইউ এ ইত অনুষ্ঠিত হ’ব, য’ত পিটচসমূহ লেহেমীয়া আৰু স্পীন ফ্ৰেণ্ডলী বুলি গণ্য কৰা হয় । লগতে, অহা ছমাহত অনুষ্ঠিত হ’বলগীয়া টি-২০ বিশ্বকাপৰ কথা মনত ৰাখি নিৰ্বাচকসকলে এনে বেটছমেন বিচাৰে যিয়ে দলটোক বিদেশী পৰিস্থিতিত ভাল আৰম্ভণি দিব পাৰে । এই ক্ষেত্ৰত জয়ছোৱাল, গীল আৰু সুদৰ্শন আটাইকেইজনেই শক্তিশালী প্ৰতিদ্বন্দ্বী ।
ফিটনেছ টেষ্টৰ ওপৰত নিৰ্ভৰ বুমৰাহ-চিৰাজৰ প্ৰত্যাৱৰ্তন-
দল নিৰ্বাচনৰ পূৰ্বে বেষ্ট বলাৰ যশপ্ৰীত বুমৰাহ আৰু মহম্মদ চিৰাজৰ ফিটনেছ ৰিপৰ্টেও গুৰুত্বপূৰ্ণ ভূমিকা পালন কৰিব । যোৱা কেইমাহমানত দুয়োজনকে বিভিন্ন ফৰ্মেটত সাৱধানে ব্যৱহাৰ কৰা হৈছে । নিৰ্বাচনৰ পূৰ্বে তেওঁলোকৰ ফিটনেছ মূল্যায়ন কৰা হ’ব, যাতে ভৱিষ্যতৰ কৌশল স্পষ্ট হ’ব পাৰে ।
লগতে পঢ়ক : ভাৰত-ইংলেণ্ড টেষ্ট শৃংখলাত গঢ়িল এই ১০টা ডাঙৰ অভিলেখ…
