পাকিস্তানৰ বৰ্তমান পৰিস্থিতিয়ে ৰাজনৈতিক সমীকৰণৰ নাটকীয় পৰিৱৰ্তনৰ দিশে আঙুলিয়াই দিছে।পেহেলগাম সন্ত্ৰাসবাদী আক্ৰমণৰ পিছত ভাৰতৰ সৈতে বৃদ্ধি পোৱা উত্তেজনা আৰু সম্ভাৱ্য সামৰিক সঁহাৰিৰ মাজতে পাক সেনা প্ৰধান অসীম মুনীৰ আৰু প্ৰধানমন্ত্ৰী শ্বাহবাজ শ্বৰীফে কাৰাগাৰত বন্দী প্ৰাক্তন প্ৰধানমন্ত্ৰী ইমৰাণ খানৰ পৰা সহায় বিচাৰিছে।
সূত্ৰ অনুসৰি, চাৰিজন প্ৰাক্তন সামৰিক বিষয়াক ইমৰাণ খানৰ ওচৰলৈ প্ৰেৰণ কৰিছে যাতে পিটিআইক অসীম মুনিৰৰ বিৰুদ্ধে প্ৰতিবাদ বন্ধ কৰিবলৈ আৰু সিন্ধত বিক্ষোভ বন্ধ কৰিবলৈ বুজাব পাৰে।
২০১৯ চনত পুলৱামা আক্ৰমণৰ পিছত, তেতিয়াৰ প্ৰধানমন্ত্ৰী ইমৰাণ খানে নিজৰ কাৰ্যকাল শেষ হোৱাৰ পূৰ্বেই আই এছ আইৰ মুৰব্বী অসীম মুনিৰক অপসাৰণ কৰিছিল।আই এছ আইৰ ইতিহাসত প্ৰথমবাৰৰ বাবে এনে সংঘটিত হয়।
ইয়াৰ পিছত অসীম মুনীৰ আৰু ইমৰাণ খানৰ সম্পৰ্ক অতি উত্তেজিত হৈ পৰে।এই শত্ৰুতাৰ বাবেই অসীম মুনিৰে ইমৰাণক জেললৈ পঠোৱাৰ কৌশল ৰচনা কৰিছিল বুলি বিশ্বাস কৰা হয়।এতিয়া একেজন অসীম মুনিৰে ইমৰাণ খানৰ পৰা সহায় বিচাৰিবলৈ বাধ্য হৈছে।
পেহেলগাম আক্ৰমণৰ পিছত ভাৰতৰ পৰা কঠোৰ ৰাজনৈতিক আৰু সামৰিক সংকেতে পাকিস্তানৰ আভ্যন্তৰীণ ৰাজনীতিত আলোড়নৰ সৃষ্টি কৰিছে।সিন্ধ, কৰাচী, লাহোৰৰ দৰে অঞ্চলত ছাইৰেন ব্যৱস্থা, বাংকাৰ নিৰ্মাণ আৰু ৰেড এলাৰ্টে জনসাধাৰণৰ মাজত শংকাৰ সৃষ্টি কৰিছে।
পাকিস্তান চৰকাৰে আশংকা কৰিছে যে দেশৰ ভিতৰতে বিদ্ৰোহৰ সূচনা হ’ব পাৰে, তেওঁলোকে বিশেষকৈ পিটিআই সমৰ্থক আৰু সিন্ধত আন্দোলনসমূহক ভয় কৰে।
সেইবাবেই অসীম মুনীৰ আৰু শ্বাহবাজ শ্বৰীফে ইমৰাণ খানক লক্ষ্যহিচাপে বাছি লৈছে, যাতে দেশত চলি থকা প্ৰতিবাদ শান্ত কৰিব পৰা যায়।
