মুখ্য ন্যায়াধীশ সঞ্জীৱ খান্না, ন্যায়াধীশ সঞ্জয় কুমাৰ আৰু ন্যায়াধীশ কে ভি বিশ্বনাথনৰ বিচাৰপীঠে আজি দিনৰ ২ বজাত উচ্চতম ন্যায়ালয়ত ৱাকফ (সংশোধনী) আইন, ২০২৫ৰ বিৰুদ্ধে দাখিল কৰা আবেদনৰ শুনানি গ্ৰহণ কৰিব । মঙলবাৰে শুনানিৰ পূৰ্বে সংখ্যালঘু পৰিক্ৰমা মন্ত্ৰী কিৰেন ৰিজিজুৱে নতুন ৱাকফ আইনখনৰ প্ৰতি আইনী প্ৰত্যাহ্বানৰ কথা উল্লেখ কৰি কয় যে, “মই নিশ্চিত যে উচ্চতম ন্যায়ালয়ে কোনো আইনগত বিষয়ত হস্তক্ষেপ নকৰে ।” ৰিজিজুৱে কয়, ক্ষমতা বিভাজন সংবিধানত ভালদৰে সংজ্ঞায়িত কৰা হৈছে । আমি ইজনে সিজনক সন্মান কৰা উচিত । কাইলৈ যদি চৰকাৰে ন্যায়পালিকাৰ ওপৰত হস্তক্ষেপ কৰে তেন্তে সেয়া ভাল নহ’ব ।
লক্ষণীয় যে এ আই এম আই এমৰ নেতা আছাদুদ্দিন ওৱেইছি, আপ নেতা আমনাতুল্লাহ খান, ধৰ্মীয় নেতা মৌলানা আৰ্ছাদ মাদানী, আৰ জে ডি নেতা মনোজ ঝা আৰু অল ইণ্ডিয়া মুছলিম পাৰ্চনেল ল ব’ৰ্ড আৰু জমিয়ত-ই-উলামা-ই-হিন্দকে ধৰি বহু মুছলমান সংগঠনে উচ্চতম ন্যায়ালয়ত আৱেদন দাখিল কৰিছে ।
কেন্দ্ৰ আৰু বিজেপি শাসিত ৰাজ্য চৰকাৰ- ৰাজস্থান, মহাৰাষ্ট্ৰ, হাৰিয়ানা, মধ্যপ্ৰদেশ, ছত্তীশগড় আৰু অসমেও আৱেদন দাখিল কৰিছে । কেন্দ্ৰই উচ্চতম ন্যায়ালয়ক কোনো ৰায়দানৰ পূৰ্বে নিজৰ পক্ষৰ শুনানি গ্ৰহণ কৰিবলৈ আহ্বান জনাইছে ।
