উচ্চতম ন্যায়ালয়ে অন্তৱৰ্তীকালীন আদেশৰ জৰিয়তে ৱাকফ (সংশোধনী) আইন, ২০২৫ৰ কিছুমান মূল বিধান স্থগিত ৰখাৰ প্ৰস্তাৱ আগবঢ়াইছে । উচ্চতম ন্যায়ালয়ে আদালতে ৱাকফ হিচাপে ঘোষণা কৰা সম্পত্তিৰ ডিন’টিফিকেশন, পদমৰ্যাদাৰ সদস্যৰ বাহিৰে আন অমুছলমান সদস্যক ৱাকফত অন্তৰ্ভুক্ত কৰা আৰু সংগ্ৰাহকসকলে পৰিদৰ্শনৰ সময়ত সম্পত্তিক অৱাকফ বুলি ঘোষণা কৰাৰ বিধানসমূহত স্থগিতাদেশ দিয়াৰ প্ৰস্তাৱ আগবঢ়ায় ।

এই আইনৰ বিৰুদ্ধে আবেদনৰ শুনানি গ্ৰহণ কৰি উচ্চতম ন্যায়ালয়ে কেন্দ্ৰীয় চৰকাৰৰ পৰা উত্তৰ বিচাৰিছে । কিন্তু তাৎক্ষণিকভাৱে এই আইনখন কাৰ্যকৰী কৰাত কোনো ধৰণৰ বাধা আৰোপ কৰা নাই । এই বিষয়ত সংঘটিত হিংসাত্মক ঘটনাক লৈ উচ্চতম ন্যায়ালয়ে উদ্বেগ প্ৰকাশ কৰে । একে সময়তে কেন্দ্ৰীয় চৰকাৰে এই বিধান নিষিদ্ধ কৰাৰ প্ৰস্তাৱৰ বিৰোধিতা কৰি কয় যে কোনো নিৰ্দেশনা জাৰি কৰাৰ পূৰ্বে উচ্চতম ন্যায়ালয়ে গোচৰৰ শুনানি গ্ৰহণ কৰিব লাগে ।

মুখ্য ন্যায়াধীশ সঞ্জীৱ খান্না, ন্যায়াধীশ সঞ্জয় কুমাৰ আৰু ন্যায়াধীশ কেভি বিশ্বনাথনৰ বিচাৰপীঠে কয় যে, আমাৰ অন্তৱৰ্তীকালীন আদেশে অংশটোৰ ভাৰসাম্য ৰক্ষা কৰিব । প্ৰথমে আমি আদেশত ক’ম যে আদালতে ৱাকফ হিচাপে ঘোষণা কৰা যিকোনো সম্পত্তি ডিন’টিফাইড নহ’ব, অৰ্থাৎ ইয়াক অৱাকফ হিচাপে গণ্য কৰা নহ’ব, সেয়া ব্যৱহাৰকাৰীয়ে ৱাকফ কৰাই হওক বা দলিলৰ জৰিয়তে হওক । দ্বিতীয়তে, সংগ্ৰাহকে যিকোনো সম্পত্তিৰ সন্দৰ্ভত নিজৰ তদন্তৰ কাৰ্য্যবিধি অব্যাহত ৰাখিব পাৰে, কিন্তু কাৰ্য্যবিধিৰ সময়ত সম্পত্তিটোক নন-ৱাকফ বুলি গণ্য কৰা উচিত বুলি আইনৰ ব্যৱস্থা কাৰ্যকৰী নহ’ব । তৃতীয়তে, ব’ৰ্ড আৰু কাউন্সিলত পদমৰ্যাদাৰ সদস্য নিযুক্তি দিব পাৰি, কিন্তু বাকী সকলো সদস্য মুছলমান হ’ব লাগিব ।

শুনানিৰ শেষত বিচাৰপীঠে অন্তৱৰ্তীকালীন আদেশ গৃহীত কৰাৰ ইংগিত দিছিল যদিও কেন্দ্ৰৰ হৈ হাজিৰ হোৱা ছলিচিটৰ জেনেৰেল তুষাৰ মেহতাৰ অনুৰোধত বৃহস্পতিবাৰেও বিষয়টো বিবেচনা কৰাৰ সিদ্ধান্ত লয় । উচ্চতম ন্যায়ালয়ে প্ৰস্তাৱ দিছিল যে বিভিন্ন উচ্চ ন্যায়ালয়ত ৱাকফ আইন, ১৯৯৫ক প্ৰত্যাহ্বান জনোৱাৰ সৈতে জড়িত আবেদনসমূহো উচ্চতম ন্যায়ালয়লৈ হস্তান্তৰ কৰা উচিত ।

উচ্চতম ন্যায়ালয়ে আজি দিব পাৰে অন্তৱৰ্তীকালীন আদেশ-

আইনখনৰ বৈধতাক প্ৰত্যাহ্বান জনোৱা ৭২খনতকৈও অধিক আবেদনৰ গোট প্ৰায় দুঘণ্টা ধৰি শুনানি গ্ৰহণ কৰাৰ পিছত বুধবাৰে বিচাৰপীঠে এই সন্দৰ্ভত কোনো আদেশ প্ৰদান কৰা নাছিল । বৃহস্পতিবাৰে পুনৰ গোচৰৰ শুনানি গ্ৰহণ কৰি অন্তৱৰ্তীকালীন আদেশ গৃহীত কৰাৰ কথা বিবেচনা কৰিব বিচাৰপীঠে । বুধবাৰে কোনো পক্ষলৈ কোনো জাননী জাৰি কৰা হোৱা নাছিল ।

ৱাকফ আইনক লৈ চলি থকা ৰাজনৈতিক হুলস্থুলৰ মাজতে তামিলনাডুত পোহৰলৈ আহিছে এক চাঞ্চল্যকৰ ঘটনা । শেহতীয়াকৈ তামিলনাডুৰ আনাইকাট্টু তালুকৰ কট্টুকোলাই গাঁৱৰ ১৫০টা পৰিয়ালৰ মাজত হাহাকৰ সৃষ্টি হৈছে, কিয়নো এই লোকসকলে এক বিশেষ জাননী লাভ কৰিছে । এই জাননীত লিখা আছিল যে তেওঁলোকৰ গাঁৱৰ মাটি ৱাকফৰ সম্পত্তি হিচাপে ঘোষণা কৰা হৈছে ।

জাননীখনত কি কোৱা হৈছে ?

চৈয়দ আলী চুলতান শ্বাহে জাৰি কৰা জাননীখনত দাবী কৰা হৈছে যে কট্টুকোল্লাই গাঁৱৰ মাটিখিনি স্থানীয় দৰগাহৰ । গাঁওবাসীয়ে হয় তৎক্ষণাত খালী কৰক নহয় দৰগাহক কৰ দিবলৈ আৰম্ভ কৰক । এই জাননী পোৱা লোকসকলে চাৰিটা প্ৰজন্মৰ পৰা এই স্থানত বসবাস কৰি আহিছে আৰু তেওঁলোক জীৱিকাৰ বাবে খেতিৰ ওপৰত সম্পূৰ্ণৰূপে নিৰ্ভৰশীল ।

জাননী পোৱাৰ পিছতে গাঁওবাসীৰ মাজত হাহাকাৰ সৃষ্টি হয় আৰু ইয়াৰ বিৰুদ্ধে প্ৰতিবাদ সাব্যস্ত কৰে । গাঁওখনৰ বহু লোকৰ মাটিৰ লগত জড়িত চৰকাৰী নথি-পত্ৰ আছে । তেওঁলোক সকলোৱে ভেলোৰস্থিত আয়ুক্তৰ কাৰ্যালয়ত উপস্থিত হৈ নিৰাপত্তাৰ দাবী জনায় । তেওঁলোকে আশংকা কৰিছে যে এতিয়া তেওঁলোকক ইয়াৰ পৰা উচ্ছেদ কৰা হ’ব আৰু তেওঁলোকৰ জীৱিকাৰ একমাত্ৰ উপায় খেতি-বাতিও তেওঁলোকৰ পৰা কাঢ়ি লোৱা হ’ব ।

এই সন্দৰ্ভত গাঁওবাসীক আয়ুক্তৰ ওচৰলৈ লৈ যোৱা এগৰাকী ব্যক্তিয়ে কয় যে ভূমি সন্দৰ্ভত চৰকাৰে দিয়া সকলো নথি-পত্ৰ গাওঁবাসীৰ হাতত আছে আৰু ৩৩০/১ নম্বৰৰ জৰীপত মাটিখিনি ৱাকফ ভূমি হিচাপে ঘোষণা কৰা হৈছে ।

পূৰ্বেও ঘটিছিল অনুৰূপ ঘটনা-

তামিলনাডুত এনে ঘটনা সংঘটিত হোৱাটো এয়া প্ৰথম নহয় । ইয়াৰ পূৰ্বে তামিলনাডু ৱাকফ ব’ৰ্ডে ১৫০০ বছৰীয়া চোলা যুগৰ মন্দিৰকে ধৰি প্ৰায় ৪৮০ একৰ মাটিৰ ওপৰত দাবী উত্থাপন কৰিছিল । কেইবাটাও প্ৰজন্ম ধৰি তাত বসবাস কৰা লোকসকলক কোৱা হৈছিল যে তেওঁলোকে ৱাকফ ব’ৰ্ডৰ পৰা আপত্তিহীন প্ৰমাণপত্ৰ (এন অ’ চি) নোলোৱাকৈ নিজৰ মাটি বিক্ৰী কৰিব নোৱাৰে । সংসদত ৱাকফ (সংশোধনী) বিধেয়ক সন্দৰ্ভত আলোচনাৰ সময়ত সংখ্যালঘু পৰিক্ৰমা মন্ত্ৰী কিৰেন ৰিজিজুৱে এই বিষয়টো উত্থাপন কৰিছিল ।

উল্লেখ্য যে সংসদৰ দুয়োখন সদনত ৱাকফ (সংশোধনী) বিধেয়ক গৃহীত হোৱাৰ পাছত ৰাষ্ট্ৰপতি দ্ৰৌপদী মুৰ্মুৱে অনুমোদন জনোৱাত এতিয়া ই আইনত পৰিণত হৈছে । কিন্তু এই আইনক প্ৰত্যাহ্বান জনাই বহু আবেদন উচ্চতম ন্যায়ালয়ত দাখিল কৰা হৈছে ।

পশ্চিমবংগৰ মুৰ্ছিদাবাদ জিলাত ৱাকফ (সংশোধনী) আইনৰ বিৰুদ্ধে চলি থকা প্ৰতিবাদত দুজন লোকৰ মৃত্যু হৈছে । ঘটনা সন্দৰ্ভত তথ্য দি আৰক্ষীয়ে কয় যে হিংসাত্মক পৰিস্থিতিত আক্ৰান্ত ছামছেৰগঞ্জ অঞ্চলৰ জাফৰাবাদৰ ঘৰত আহত পিতৃ-পুত্ৰক উদ্ধাৰ কৰা হৈছে । ইয়াৰ পিছত দুয়োকে চিকিৎসালয়লৈ লৈ যোৱা হয়, য’ত চিকিৎসকে তেওঁলোকক মৃত ঘোষণা কৰে ।

পৰিয়ালৰ অভিযোগ- দুষ্কৃতিকাৰীয়ে লুটপাত কৰাৰ পিছত ছুৰীৰে আঘাত কৰে

মৃতকৰ ঘৰত ডকাইতিৰ সময়ত দুষ্কৃতিকাৰীয়ে দুয়োকে কেইবাবাৰো চোকা অস্ত্ৰৰে আক্ৰমণ কৰাৰ অভিযোগ উত্থাপন কৰে পৰিয়ালৰ লোকে । এক সুকীয়া ঘটনাত ছামছেৰগঞ্জ ব্লকৰ ধুলিয়ানত আন এজন ব্যক্তি গুলীবিদ্ধ হোৱা বুলি আৰক্ষীয়ে জানিবলৈ দিয়ে । শুকুৰবাৰেও ৱাকফ আইনৰ বিৰুদ্ধে প্ৰতিবাদৰ সময়ত মুৰ্ছিদাবাদ জিলাৰ ছুটি আৰু ছামছেৰগঞ্জ অঞ্চলৰ পৰা বৃহৎ পৰিসৰৰ হিংসাত্মক ঘটনা সংঘটিত হোৱাৰ বাতৰি পোৱা গৈছে ।

আৰক্ষীয়ে গ্ৰেপ্তাৰ কৰিছে ১০০ৰো অধিক লোকক-

পশ্চিমবংগৰ মুৰ্ছিদাবাদ জিলাত ৱাকফ আইনৰ বিৰুদ্ধে প্ৰতিবাদক কেন্দ্ৰ কৰি দুদিন ধৰি হিংসাত্মক পৰিস্থিতিৰ সৃষ্টি হৈছে । প্ৰথমে ৮ এপ্ৰিলত আৰু তাৰ পিছত ১১ এপ্ৰিলত, য’ত এতিয়ালৈকে আৰক্ষীয়ে ব্যৱস্থা গ্ৰহণ কৰি ১০০ৰো অধিক লোকক গ্ৰেপ্তাৰ কৰিছে ।