ইণ্ডিয়ান প্ৰিমিয়াৰ লীগ ২০২৫ৰ ১৭ সংখ্যক মেচখন চেন্নাই ছুপাৰ কিংছ (চি এছ কে) আৰু দিল্লী কেপিটেলছ (ডি চি)ৰ মাজত অনুষ্ঠিত হয় । শনিবাৰে চেন্নাইৰ এম এ চিদাম্বৰম ষ্টেডিয়াম (চেপাউক)ত অনুষ্ঠিত হোৱা এই মেচখনত দিল্লী কেপিটেলছে ২৫ ৰানত জয়লাভ কৰে । দিল্লীয়ে আয়োজক দলটোক ১৮৪ ৰানৰ লক্ষ্য দিছিল যদিও ৫ উইকেটত ১৫৮ ৰানহে কৰিবলৈ সক্ষম হয় চেন্নাই । এই ষ্টেডিয়ামত ১৫ বছৰৰ পাছত চি এছ কেক পৰাস্ত কৰিছে দিল্লী কেপিটেলছে ।
ৰান সংগ্ৰহৰ বাবে সংগ্ৰাম চি এছ কেৰ-
চেন্নাই ছুপাৰ কিংছৰ হৈ মহেন্দ্ৰ সিং ধোনীয়ে ২৬টা বলত চাৰি আৰু ছয়ৰ সহায়ত অপৰাজিত ৩০ ৰান সংগ্ৰহ কৰে । আনহাতে বিজয় শংকৰে ৬৯ ৰানত অপৰাজিত হৈ থাকে । বিজয় শংকৰৰ ৫৪টা বলৰ ইনিংছত ৫টা চাৰি আৰু এটা ছয় আছিল । এই ছিজনত চাৰিখন মেচত চেন্নাই ছুপাৰ কিংছৰ এয়া আছিল তৃতীয়টো পৰাজয় । আনহাতে এইটো আছিল দিল্লীৰ একেৰাহে তৃতীয়টো জয় ।
লক্ষ্য অনুসৰণ কৰাৰ সময়তে চেন্নাই ছুপাৰ কিংছৰ আৰম্ভণি ভাল নাছিল আৰু ১৪ ৰানৰ স্ক’ৰত দুটা উইকেট হেৰুৱাইছিল দলটোৱে ৷ ৰাচিন ৰবিন্দ্ৰক (৩) ৰান আউট কৰে বেগী বলাৰ মুকেশ কুমাৰে । ইফালে, অধিনায়ক ৰুতুৰাজ গাইকোৱাদ (৫) বেগী বলাৰ মিচেল ষ্টাৰ্কৰ চিকাৰ হয় । ইয়াৰ পাছত বিপৰাজ নিগমে আনজন অ’পেনাৰ ডেভন কনৱে (১৩)ক কম সময়তে পেভিলিয়নৰ বাট দেখুৱাই ।
‘ইমপেক্ট চাব’ হিচাপে আহি শিৱম ডুবেই আগ্ৰাসী ৰূপ ধৰিবলৈ চেষ্টা কৰিছিল যদিও স্পীনাৰ বিপ্ৰজে ১৮ ৰানত তেওঁক আউট কৰে । ৰবীন্দ্ৰ জাডেজাই ভাল প্ৰদৰ্শন কৰিব বুলি আশা কৰা হৈছিল যদিও মাত্ৰ ২ ৰান সংগ্ৰহ কৰি তেওঁক কুলদীপ যাদৱৰ বলত উইকেট বিসৰ্জন দিয়ে । জাডেজা আউট হোৱাৰ সময়ত চেন্নাইৰ স্ক’ৰ আছিল ৫ উইকেটত ৭৪ ৰান । ইয়াৰ পৰা চেন্নাইক জয়ী হ’বলৈ আগ্ৰাসী বেটিঙৰ প্ৰয়োজন আছিল যদিও বিজয় শংকৰ আৰু এম এছ ধোনীয়ে বিশেষ একো কৰিব নোৱাৰিলে । দুয়োৰে মাজত ৮৪ ৰানৰ অংশীদাৰিত্ব আছিল ।
কে এল ৰাহুলৰ শক্তিশালী ইনিংছ…
টছত জয়ী হৈ প্ৰথমে বেটিং কৰাৰ পিছত দিল্লী কেপিটেলছে ৬ উইকেটত ১৮৩ ৰান সংগ্ৰহ কৰে । প্ৰথম অভাৰতে জেক ফ্ৰেজাৰ-মেকগাৰ্কৰ উইকেট হেৰুৱাই দিল্লী কেপিটেলছ আৰম্ভণিতে শলঠেকত পৰিছিল । জেকে একাউণ্ট খোলাত ব্যৰ্থ হৈ খলিল আহমেদৰ চিকাৰ হয় । ইয়াৰ পাছত অভিষেক পোৰেল আৰু কে এল ৰাহুলে মিলি দ্বিতীয় উইকেটৰ বাবে ৫৪ ৰান সংযোজন কৰি ইনিংছৰ দায়িত্ব লয় । স্পীনাৰ ৰবীন্দ্ৰ জাডেজাই পোৰেলক আউট কৰি এই অংশীদাৰিত্ব ভংগ কৰে । পোৰেলে ২০টা বলত ৩৩ ৰান সংগ্ৰহ কৰে, য’ত ৪টা চাৰি আৰু এটা ছয় আছিল ।
তাৰ পাছত দিল্লী কেপিটেলছৰ অধিনায়ক অক্ষৰ পেটেল ক্ৰীজলৈ আহে । চতুৰ্থ উইকেটত অক্ষৰ আৰু কে এল ৰাহুলৰ মাজত ৩৬ ৰানৰ অংশীদাৰিত্ব গঢ়ে । অক্ষৰক ২১ ৰানত নূৰ আহমেদে বল্ড কৰে । অক্ষৰ আউট হোৱাৰ পিছত সমীৰ ৰিজৱীয়ে কে এল ৰাহুলক সমৰ্থন কৰে । চতুৰ্থ উইকেটৰ বাবে দুয়োৰে মাজত ৫৬ ৰানৰ অংশীদাৰিত্বৰে দিল্লীক গতি প্ৰদান কৰে ।
এই অংশীদাৰিত্বৰ সময়তে কে এল ৰাহুলে ৩৩টা বলত অৰ্ধশতক সম্পূৰ্ণ কৰে । সমীৰ ৰিজৱীক ২০ ৰানত খলিল আহমেদে আউট কৰে । ৰিজৱীৰ পিছত দিল্লীয়ে শেষ অভাৰত কে এল ৰাহুল আৰু আশুতোষ শৰ্মা (১)ৰ উইকেট হেৰুৱাই । ৰাহুলে ৬টা চাৰি আৰু তিনিটা ছয়ৰ সহায়ত ৫১টা বলত ৭৭ ৰান সংগ্ৰহ কৰে । চেন্নাইৰ হৈ বেগী বলাৰ খলিল আহমেদে সৰ্বাধিক দুটা উইকেট দখল কৰে ।
