কেন্দ্ৰীয় গৃহমন্ত্ৰী অমিত শ্বাহে দেওবাৰে গুৱাহাটীৰ এখন হোটেলত উত্তৰ-পূব ৰাজ্যৰ মুখ্যমন্ত্ৰী আৰু ডি জি পিৰ সৈতে বৈঠকত মিলিত হয় । ইয়াত তিনিখন নতুন অপৰাধমূলক আইন ৰূপায়ণৰ পৰ্যালোচনা কৰা হয় । ৰাষ্ট্ৰপতি শাসনত থকা মণিপুৰৰ ৰাজ্যপাল অজয় কুমাৰ ভল্লাই এই বৈঠকত অংশগ্ৰহণ কৰে ।
কেন্দ্ৰীয় গৃহমন্ত্ৰী অমিত শ্বাহৰ সভাপতিত্বত গুৱাহাটীত নতুন অপৰাধ আইন ৰূপায়ণৰ সন্দৰ্ভত উত্তৰ-পূবৰ ৰাজ্যসমূহৰ মুখ্যমন্ত্ৰীসকলৰ বৈঠক অনুষ্ঠিত হৈছে বুলি অসমৰ মুখ্যমন্ত্ৰী কাৰ্যালয়ে ছ’চিয়েল মিডিয়া পোষ্টযোগে প্ৰকাশ কৰিছে । এই বৈঠকত উত্তৰ-পূব অঞ্চলৰ ৭ গৰাকী মুখ্যমন্ত্ৰীয়ে অংশগ্ৰহণ কৰাৰ বিপৰীতে মিজোৰাম, অৰুণাচল প্ৰদেশ আৰু মণিপুৰৰ বাহিৰে পাঁচখন ৰাজ্যৰ ডি জি পি উপস্থিত থাকে ।
উত্তৰ-পূৰ্বাঞ্চলৰ বহু ৰাজ্যৰ মুখ্য সচিবো ইয়াত উপস্থিত থাকে । ভাৰতীয় নাগৰিক সুৰক্ষা সংহিতা (বি এন এছ এছ), ভাৰতীয় ন্যায় সংহিতা (বি এন এছ) আৰু ভাৰতীয় প্ৰমাণ আইন (বি এছ এ) কাৰ্যকৰী সন্দৰ্ভত কেন্দ্ৰীয় গৃহমন্ত্ৰীক আপডেট দিবলৈ আঠখন ৰাজ্যৰ প্ৰতিখনেই উপস্থাপন কৰে ।
আন এগৰাকী বিষয়াই কয় যে এই বৈঠকৰ লক্ষ্য আছিল উত্তৰ-পূবৰ ৰাজ্যসমূহৰ আৰক্ষী, কাৰাগাৰ, আদালত, বিচাৰ আৰু ফৰেনছিক সম্পৰ্কীয় বিভিন্ন নতুন বিধানৰ কাৰ্যকৰীকৰণ আৰু বৰ্তমানৰ অৱস্থাৰ পৰ্যালোচনা কৰা । ইয়াৰ মাজতে শ্বাহে অসম চি আই ডিৰ দ্বাৰা প্রস্তুত আৰু অসম চৰকাৰে প্রকাশ কৰা ‘নতুন ফৌজদাৰী আইন: মানক পৰিচালনা পদ্ধতি আৰু নিয়ম’ নামৰ গ্রন্থখন উন্মোচন কৰে ৷
