উত্তৰ-পূৰ্বাঞ্চলৰ ৰাজ্যসমূহলৈ দুদিনীয়া ভ্ৰমণলৈ অহা কেন্দ্ৰীয় গৃহমন্ত্ৰী অমিত শ্বাহে দেওবাৰে কোকৰাঝাৰত সদৌ বড়ো ছাত্ৰ সন্থাৰ ৫৭ সংখ্যক বাৰ্ষিক সন্মিলনত ভাষণ প্ৰদান কৰে । এই কাৰ্যসূচীত অমিত শ্বাহে কয় যে বড়োলেণ্ড বছৰ বছৰ ধৰি হিংসাত্মক পৰিস্থিতিত থাকিল । কিন্তু এতিয়া ইয়াৰ যুৱক-যুৱতীসকলে বন্দুক এৰি ত্ৰিৰংগ উঠাইছে । লগতে অমিত শ্বাহে বড়োলেণ্ডৰ যুৱক-যুৱতীসকলক ২০৩৬ চনৰ অলিম্পিকৰ বাবে প্ৰস্তুতি চলাবলৈ আহ্বান জনায় । বড়ো ছাত্ৰ সন্থাক সম্বোধন কৰাৰ পাছত অমিত শ্বাহে গুৱাহাটীত উত্তৰ-পূবৰ ৰাজ্যসমূহৰ ৩খন নতুন অপৰাধমূলক আইনৰো পৰ্যালোচনা কৰে । য’ত মুখ্যমন্ত্ৰীসকলৰ লগতে বহু উচ্চপদস্থ বিষয়া উপস্থিত আছিল ।
অসম চি আই ডিৰ নতুন কিতাপ মুকলি-
দেওবাৰে কেন্দ্ৰীয় গৃহমন্ত্ৰী অমিত শ্বাহৰ অধ্যক্ষতাত গুৱাহাটীত উত্তৰ-পূবৰ ৰাজ্যসমূহত তিনিখন নতুন অপৰাধমূলক আইন ৰূপায়ণৰ সন্দৰ্ভত এখন পৰ্যালোচনা বৈঠক অনুষ্ঠিত হয় । বৈঠকৰ সময়ত গৃহমন্ত্ৰীয়ে অসমৰ অপৰাধ অনুসন্ধান বিভাগৰ (চি আই ডি) প্ৰস্তুত কৰা ‘New Criminal Laws: Standard Operating Procedures and Rules’ নামৰ গ্ৰন্থখনো মুকলি কৰে ।
এই বৈঠকত উত্তৰ-পূবৰ ৰাজ্যসমূহত আৰক্ষী, কাৰাগাৰ, আদালত, বিচাৰ আৰু ফৰেনছিক সম্পৰ্কীয় বিভিন্ন নতুন বিধানৰ কাৰ্যকৰীকৰণ আৰু বৰ্তমানৰ অৱস্থাৰ পৰ্যালোচনা কৰা হয় ।
বৈঠকত উত্তৰ-পূৰ্বাঞ্চলৰ ৭খন ৰাজ্যৰ মুখ্যমন্ত্ৰীকে ধৰি বিষয়াসকল উপস্থিত থাকে-
এই বৈঠকত অসম, অৰুণাচল প্ৰদেশ, মেঘালয়, মিজোৰাম, নাগালেণ্ড, ত্ৰিপুৰা আৰু ছিকিমৰ মুখ্যমন্ত্ৰী আৰু মণিপুৰৰ ৰাজ্যপালে অংশগ্ৰহণ কৰে । এই বৈঠকত কেন্দ্ৰীয় গৃহ মন্ত্ৰালয় আৰু ৰাজ্য চৰকাৰৰ কেন্দ্ৰীয় গৃহ সচিব, মুখ্য সচিব আৰু আৰক্ষী সঞ্চালক প্ৰধানকে ধৰি কেইবাগৰাকীও উচ্চপদস্থ বিষয়াও উপস্থিত থাকে ।
বড়োলেণ্ডৰ উন্নয়নৰ বাবে চৰকাৰে দিলে ১৫০০ কোটি টকা-
ইয়াৰ পূৰ্বে সদৌ বড়ো ছাত্ৰ সন্থাৰ সন্মিলনত অমিত শ্বাহে কয় যে ৩৫ লাখ জনসংখ্যা থকা বড়োলেণ্ডৰ উন্নয়নৰ বাবে কেন্দ্ৰীয় চৰকাৰে ১৫০০ কোটি টকা দিছে । লগতে তেওঁ কয় যে বড়ো চুক্তিৰ ৮২% বিধান কাৰ্যকৰী হৈছে, বাকীখিনি অহা দুবছৰত সম্পূৰ্ণ হ’ব ।
কংগ্ৰেছে ঠাট্টা কৰিছিল, এতিয়া বড়োলেণ্ডত শান্তি-
কংগ্ৰেছক লক্ষ্য কৰি অমিত শ্বাহে কয় যে কংগ্ৰেছে বি টি আৰত কেতিয়াও শান্তি নাহে বুলি কৈ আমাক ঠাট্টা কৰিছিল । কিন্তু এতিয়া বড়ো যুৱকে বন্দুকৰ সলনি ত্ৰিৰংগ কঢ়িয়াই লৈ ফুৰে, আৰু ২০২০ চনৰ জানুৱাৰী মাহত স্বাক্ষৰিত হোৱা বড়ো শান্তি চুক্তিৰ বাবেই এইটো সম্ভৱ হৈছে ।
