ইউক্ৰেইন যুদ্ধক লৈ ছৌদি আৰৱত বৈঠকত মিলিত হৈছে আমেৰিকা আৰু ৰাছিয়াৰ বিষয়া । মঙলবাৰে ৰিয়াধত অনুষ্ঠিত হোৱা বৈঠকত ৰাছিয়াক প্ৰতিনিধিত্ব কৰে বৈদেশিক মন্ত্ৰী চাৰ্গেই লাভৰভ আৰু ৰাষ্ট্ৰপতি ভ্লাদিমিৰ পুটিনৰ বৈদেশিক নীতি উপদেষ্টা ইউৰি উছাকোভে । আমেৰিকাৰ হৈ বৈদেশিক মন্ত্ৰী মাৰ্কো ৰুবিঅ’, ৰাষ্ট্ৰীয় নিৰাপত্তা উপদেষ্টা মাইক ৱাল্টজ আৰু পশ্চিম এছিয়াৰ বাবে ড’নাল্ড ট্ৰাম্পৰ বিশেষ দূত ষ্টিভ উইটকফ উপস্থিত থাকে । ইউক্ৰেইনক এই বৈঠকলৈ আমন্ত্ৰণ জনোৱা হোৱা নাই, যাৰ বাবে ইউৰোপে উদ্বেগ প্ৰকাশ কৰিছে ।
প্ৰকাশিত এক প্ৰতিবেদন অনুসৰি ছৌদি আৰৱত এই বৈঠকখন ইউক্ৰেইনত ৰাছিয়াই আক্ৰমণৰ তিনি বছৰৰ পিছত অনুষ্ঠিত হৈছে । শান্তি চুক্তিত আমেৰিকাৰ ভূমিকাৰ বাবে ইয়াক গুৰুত্বপূৰ্ণ বুলি বিবেচিত হৈছে । শেহতীয়াকৈ ৰাষ্ট্ৰপতি ড’নাল্ড ট্ৰাম্প আৰু ৰাষ্ট্ৰপতি ভ্লাদিমিৰ পুটিনৰ মাজত হোৱা ফোন বাৰ্তালাপৰ পিছতে আমেৰিকাৰ বিদেশ মন্ত্ৰালয় আৰু ৰাছিয়াৰ বিষয়াসকলৰ মাজত এই আলোচনা চলি আছে । ফোনত দুয়োজন নেতাই শীঘ্ৰেই ইউক্ৰেইন সন্দৰ্ভত শান্তি আলোচনা আৰম্ভ কৰিবলৈ সন্মত হয় ।
ইউৰোপ আৰু ইউক্ৰেইনৰ উদ্বেগ-
এই বৈঠকৰ দুটা পক্ষ ৰাছিয়া আৰু আমেৰিকা আৰু মধ্যস্থতাকাৰীৰ ভূমিকাত চৌদি আৰৱ । ইউক্ৰেইন আৰু ৰাছিয়াৰ মাজত চলি থকা যুদ্ধৰ অন্ত পেলোৱাৰ লক্ষ্যৰে এই আলোচনা অনুষ্ঠিত কৰা হৈছে যদিও এই আলোচনালৈ ইউক্ৰেইনক আমন্ত্ৰণ জনোৱা হোৱা নাই । ইউক্ৰেইনৰ ৰাষ্ট্ৰপতি জেলেনস্কিয়ে সোমবাৰে কয় যে কিয়েভে অংশগ্ৰহণ নকৰিলে তেওঁৰ দেশখনে বৈঠকৰ ফলাফল মানি নলয় ।
ইউৰোপীয় সংঘকো আলোচনাত অন্তৰ্ভুক্ত কৰা হোৱা নাই । ইউৰোপীয় নেতাসকলে ইয়াৰ ওপৰত আপত্তি জনাইছে আৰু যিকোনো শান্তি আলোচনাত তেওঁলোকৰ অংশগ্ৰহণৰ প্ৰয়োজনীয়তাৰ ওপৰত গুৰুত্ব আৰোপ কৰিছে । ন্যায্য আৰু স্থায়ী শান্তিৰ বাবে তেওঁলোকৰ উপস্থিতি প্ৰয়োজনীয় বুলিও কয় । ব্ৰিটিছ প্ৰধানমন্ত্ৰী কেইৰ ষ্টাৰমাৰে নিজৰ বিবৃতিত কয় যে ইউক্ৰেইন আৰু ৰাছিয়াৰ মাজত স্থায়ী শান্তিৰ বাবে আমেৰিকাৰ নিৰাপত্তাৰ নিশ্চয়তা প্ৰয়োজনীয় ।
ট্ৰাম্পে সলনি কৰিছে নীতি-
এই বৈঠকখন গুৰুত্বপূৰ্ণ কাৰণ ৰাষ্ট্ৰপতি ড’নাল্ড ট্ৰাম্প ক্ষমতালৈ অহাৰ পিছত আমেৰিকাৰ ৰাছিয়াক পৃথক কৰাৰ নীতিৰ পৰিৱৰ্তন হৈছে । ইয়াৰ পূৰ্বে ৰাছিয়াই ইউক্ৰেইনৰ ওপৰত আক্ৰমণ কৰাৰ পিছত আমেৰিকাই ইউক্ৰেইনক পৃথক কৰিবলৈ চেষ্টা কৰিছিল । এতিয়া দুয়োখন দেশৰ শীৰ্ষ বিষয়া আছে । এই কথোপকথনে ড’নাল্ড ট্ৰাম্প আৰু ভ্লাদিমিৰ পুটিনৰ মাজত বৈঠকৰ পথো মুকলি কৰিব পাৰে ।
পুটিনৰ বৈদেশিক নীতি উপদেষ্টা উছাকোভে কয় যে এই আলোচনা সম্পূৰ্ণ দ্বিপাক্ষিক । ইয়াৰ ভিতৰত ইউক্ৰেইনৰ বিষয়াসকলো অন্তৰ্ভুক্ত নহয় । অৱশ্যে ড’নাল্ড ট্ৰাম্পে ইউক্ৰেইনক আলোচনাত অন্তৰ্ভুক্ত কৰি ৰখাৰ আশ্বাস দিছে । কিন্তু ৰাছিয়া আৰু আমেৰিকাই যি ধৰণে আলোচনা কৰি আছে, সেইটোৱে ইউৰোপ আৰু ইউক্ৰেইনক চিন্তিত কৰি তুলিছে । ইউৰোপীয় দেশ আৰু ইউক্ৰেইনৰ অসন্তুষ্টিয়ে নাটোৰ ভৱিষ্যতত প্ৰভাৱ পেলাব বুলিও বহু বিশেষজ্ঞই আশংকা প্ৰকাশ কৰিছে ।
