গণৰাজ্য দিৱসৰ সকলো প্ৰস্তুতি সম্পূৰ্ণ হৈছে । কৰ্তব্যৰ পথত পেৰেড কৰিবলৈ সম্পূৰ্ণ সাজু হৈছে সেনা জোৱানসকল । সমগ্ৰ দেশে অপেক্ষা কৰি আছে ২৬ জানুৱাৰী অৰ্থাৎ দেওবাৰৰ বাবে, যেতিয়া সমগ্ৰ দেশে ভাৰতৰ সাংস্কৃতিক আৰু বৈচিত্ৰ্যৰ আভাস দেখিব । ইয়াৰ সমান্তৰালকৈ কৰ্তব্য পথত ভাৰতৰ সামৰিক শক্তিও বিশ্ববাসীৰ আগত প্রদর্শন কৰা হ’ব ৷
গণৰাজ্য দিৱসৰ পেৰেডৰ বাহিৰেও জনসাধাৰণে যিটো বস্তুৰ ওপৰত চকু ৰাখে সেয়া হ’ল প্ৰতীকপট (Tableau) । বিভিন্ন ৰাজ্য আৰু মন্ত্ৰালয়ৰ প্ৰতীকপটৰ জৰিয়তে ভাৰতে নিজৰ গৌৰৱময় ইতিহাস আৰু সাফল্যসমূহ বিশ্ববাসীৰ আগত প্ৰদৰ্শন কৰে । এইবাৰ দেশৰ বিভিন্ন ৰাজ্য, কেন্দ্ৰীয় শাসিত অঞ্চল আৰু কেন্দ্ৰীয় মন্ত্ৰালয়ৰ পৰা মুঠ ২৬ টা প্ৰতীকপট প্ৰস্তুত কৰা হৈছে । ১৬খন ৰাজ্যৰ লগতে ১০টা মন্ত্ৰালয় আৰু বিভাগৰ অনন্য বিষয়বস্তু থকা প্ৰতীকপটে পেৰেডত অংশগ্ৰহণ কৰিব । কিন্তু গণৰাজ্য দিৱসৰ পেৰেডত কোনবোৰ ৰাজ্য আৰু মন্ত্ৰালয়ৰ টেবুল অন্তৰ্ভুক্ত হ’ব সেয়া নিৰ্বাচনৰ প্ৰক্ৰিয়াটো যথেষ্ট জটিল । জানক কেনেকৈ সম্পন্ন হয় এই প্ৰক্ৰিয়া ।
প্ৰতিৰক্ষা মন্ত্ৰালয়ে আয়োজন কৰে এই সমগ্ৰ অনুষ্ঠান-
গণৰাজ্য দিৱস উপলক্ষে প্ৰতিৰক্ষা মন্ত্ৰালয়ে পেৰেডকে ধৰি সকলো কাৰ্যসূচীৰ দায়িত্ব লয় । পেৰেডত কোনখন ৰাজ্যৰ প্ৰতীকপট অন্তৰ্ভুক্ত কৰা হ’ব সেইটো নিৰ্ধাৰণ কৰে প্ৰতিৰক্ষা মন্ত্ৰালয়ে । এই বাছনিও অতি সাৱধানে কৰা হয় । তেওঁলোকে সকলো ৰাজ্য, মন্ত্ৰালয় আৰু বিভাগৰ পৰা প্ৰতীকপটৰ বাবে আবেদন আহ্বান কৰে । ইয়াৰ প্ৰস্তুতি ছেপ্টেম্বৰ বা অক্টোবৰৰ পৰাই আৰম্ভ হয় ।
কমিটীয়ে লয় সিদ্ধান্ত-
প্ৰতিৰক্ষা মন্ত্ৰালয়ে প্ৰতীকপট নিৰ্বাচনৰ বাবে এখন সমিতি গঠন কৰে, য’ত সংগীত, স্থাপত্য, চিত্ৰকলা, নৃত্য পৰিচালনা আৰু ভাস্কৰ্য্যৰ ক্ষেত্ৰৰ বিশেষজ্ঞসকলক অন্তৰ্ভুক্ত কৰা হয় । এই সকলো বিশেষজ্ঞই সকলো আৱেদনৰ ওপৰত তীক্ষ্ণ দৃষ্টি ৰাখে আৰু ইয়াৰ বিষয়বস্তু, ডিজাইন আৰু ধাৰণা চায় । প্ৰথম পৰ্যায়ত প্ৰতীকপটটো স্কেচ হিচাপে উপস্থাপন কৰা হয় । অনুমতি পোৱাৰ পিছত দ্বিতীয় পৰ্যায়ত প্ৰতীকপটটো থ্ৰীডি মডেলত পঠিয়াবলৈ কোৱা হয়, ইয়াৰ অনুমোদন পোৱাৰ পিছত গণৰাজ্য দিৱসৰ পেৰেডত অন্তৰ্ভুক্ত হ’বলগীয়া প্ৰতীকপট প্ৰস্তুত কৰা হয় । প্ৰতিৰক্ষা মন্ত্ৰালয়ৰ বিশেষজ্ঞ সমিতিয়ে ইয়াৰ বাবে মানদণ্ড নিৰ্ধাৰণ কৰে । এই পৰীক্ষাত উত্তীৰ্ণ হোৱা প্ৰতীকপটকহে পেৰেডত অংশগ্ৰহণ কৰাৰ সুযোগ দিয়া হয় ।
প্ৰথমবাৰৰ বাবে থাকিব সেনাবাহিনীৰ সংযুক্ত প্ৰতীকপট-
প্ৰথমবাৰৰ বাবে গণৰাজ্য দিৱস উপলক্ষে সশস্ত্ৰ বাহিনীৰ তিনিটা শাখা অৰ্থাৎ সেনা, নৌসেনা আৰু বায়ুসেনাৰ যৌথ প্ৰতীকপট উপস্থাপন কৰা হ’ব । এই প্ৰতীকপটত পানী, স্থল আৰু বায়ুত থকা তিনিটা শক্তিৰ সমন্বিত কাৰ্য্যকলাপ প্ৰদৰ্শন কৰা হ’ব । তিনিওটা সেনাবাহিনীৰ যৌথ প্ৰতীকপট ‘শক্তিশালী আৰু নিৰাপদ ভাৰত’ৰ বিষয়বস্তুৰ ওপৰত ভিত্তি কৰি নিৰ্মাণ কৰা হ’ব ।
