মুখ্যমন্ত্ৰী ড০ হিমন্ত বিশ্ব শৰ্মাই কয় যে বিগত ১০ বছৰত অসমে আন্তঃগাঁথনি, স্বাস্থ্য, শিক্ষা আৰু অন্যান্য খণ্ডত দ্ৰুত অগ্ৰগতি লাভ কৰিছে । তেওঁ আছিয়ান, বিমষ্টেক, ইউৰোপীয় আদি দেশৰ ৰাষ্ট্ৰদূত, উচ্চায়ুক্ত, উদ্যোগ জগতৰ নেতা আৰু অন্যান্য অংশীদাৰসকলক অসমত বিনিয়োগ কৰিবলৈ আহিবলৈ আহ্বান জনায় । অহা ২৪ ফেব্ৰুৱাৰীত অসমত অনুষ্ঠিত হ’বলগীয়া ‘এডভান্টেজ আছাম ছামিট ২.০‘ত অংশগ্ৰহণৰ বাবে সকলো কূটনীতিবিদক আমন্ত্ৰণ জনায় মুখ্যমন্ত্ৰীয়ে । এই অনুষ্ঠানত ৮০০০ শিল্পীয়ে ঝুমুৰ নৃত্য প্ৰদৰ্শন কৰিব । অনুষ্ঠানত প্ৰধানমন্ত্ৰী নৰেন্দ্ৰ মোদীকে ধৰি অন্যান্য অতিথিসকলো উপস্থিত থাকিব ।
৩৬খন দেশৰ ৰাষ্ট্ৰদূত, উদ্যোগ জগতৰ দ্বিগজ নেতা আৰু অন্যান্য অংশীদাৰসকলৰ সৈতে হোৱা এক ঘূৰণীয়া মেজ মেলত মুখ্যমন্ত্রীগৰাকীয়ে কয় যে ৰাজ্যত এক লাখ কোটি টকাৰ নতুন আন্তঃগাঁথনি প্রকল্প আহি আছে ৷ ইয়াৰ ভিতৰত ব্ৰহ্মপুত্ৰৰ ওপৰত আৰু তিনিখন নতুন দলং, ছিংগাপুৰ চৰকাৰৰ সহায়ত গুৱাহাটীৰ চাৰিওফালে এখন ছেটেলাইট চহৰ, গুৱাহাটীৰ পৰা ভূটানৰ গেলেফুলৈ ৰে’লপথ ইত্যাদি । সেউজ শক্তিৰ গুৰুত্বৰ বিষয়ে ব্যাখ্যা কৰি শৰ্মাই কয় যে চৰকাৰে সদায় স্বচ্ছ আৰু সেউজ শক্তি আৰু নবীকৰণযোগ্য শক্তিৰ ওপৰত গুৰুত্ব আৰোপ কৰি আহিছে ।
তেওঁ কয় যে, চৰকাৰে বিচাৰে যে অসমলৈ অহা সকলো উদ্যোগে সেউজ শক্তিৰ উৎসৰ পৰা তেওঁলোকৰ শক্তি আহৰণ কৰক, যাৰ ভিতৰত আছে জাগীৰোডৰ টাটা অৰ্ধপৰিবাহী প্ৰকল্প । অসম দেশৰ অন্যতম শক্তিশালী বিকাশৰ ইঞ্জিন আৰু ১২.৫ শতাংশ হাৰত বৃদ্ধি পাইছে । তেওঁ কয়, শক্তিশালী অৰ্থনীতিৰ উপৰিও ৰাজ্যখন এক শৈক্ষিক কেন্দ্ৰ, আই আই টি, এইমছ, আই আই এম, টাটা ইনষ্টিটিউট অৱ ছ’চিয়েল ছায়েন্স, কেইবাখনো ৰাজ্যিক আৰু কেন্দ্ৰীয় বিশ্ববিদ্যালয়ৰ লগতে আগন্তুক প্ৰকল্পকে ধৰি বহু প্ৰতিষ্ঠিত সংস্থান আছে ।
অসমত প্ৰয়োজনীয় দক্ষতা আৰু সামৰ্থ্য আছেঃ মুখ্যমন্ত্ৰী
অসমত প্ৰয়োজনীয় দক্ষতা আৰু সামৰ্থ্য আছে বুলি মুখ্যমন্ত্ৰীয়ে কয় । ইয়াত বিনিয়োগ কৰিবলৈ ইচ্ছুক লোকসকলে দেশৰ আন যিকোনো ৰাজ্যৰ দ্বাৰা আগবঢ়োৱা একেই উৎসাহ পোৱাটো নিশ্চিত কৰাৰ উপায় আছে । ৰাজ্যখনত দ্ৰুত ঔদ্যোগীকৰণ অনাৰ বাবে উৎপাদন সম্পৰ্কীয় উদগণিৰ বাবে চৰকাৰে ২৫ হাজাৰ কোটি টকাৰ পুঁজি সৃষ্টি কৰিব বুলি মুখ্যমন্ত্ৰীয়ে প্ৰকাশ কৰে । তেওঁ কয়, আহক আৰু অসমৰ উন্নয়নৰ কাহিনীৰ অংশীদাৰ হওক ।
গুৱাহাটীৰ চাৰিওফালে প্ৰতিৰক্ষা কৰিডৰ নিৰ্মাণৰ প্ৰস্তুতি-
মুখ্যমন্ত্ৰীয়ে কয় যে তেওঁৰ চৰকাৰে গুৱাহাটীৰ সংলগ্ন নগাঁৱৰ অঞ্চলসমূহক প্ৰতিৰক্ষা কৰিডৰ হিচাপে ঘোষণা কৰাৰ বাবে প্ৰতিৰক্ষা মন্ত্ৰালয়ৰ সৈতে সক্ৰিয়ভাৱে আলোচনা কৰি আছে । চৰকাৰে দক্ষতা বিকাশৰ ওপৰত যথেষ্ট গুৰুত্ব আৰোপ কৰাৰ লগতে উত্তৰ-পূব দক্ষতা কেন্দ্ৰৰ অধীনত ১০ হাজাৰ যুৱক-যুৱতীক দক্ষ কৰি তোলা হৈছে ।
