২০ বছৰ পূৰ্বে আন্দামান আৰু নিকোবৰ দ্বীপপুঞ্জত সংঘটিত হোৱা ভয়ংকৰ ছুনামীৰ স্মৃতি এতিয়াও মানুহৰ মনত সতেজ হৈ আছে । এই ঘটনাত চাৰিশৰো অধিক লোকে প্ৰাণ হেৰুৱাই, আনহাতে তিনি হাজাৰৰো অধিক লোক নিৰুদ্দেশ হৈছিল । আন্দামান-নিকোবৰৰ কেম্পবেল বে আৰু কাৰ নিকোবৰৰ ধ্বংসস্তূপৰ দৃশ্য ইমানেই ভয়ংকৰ আছিল যে আজিও বিদ্যালয়, গীৰ্জা আৰু চৰকাৰী প্ৰতিষ্ঠান ধ্বংস হোৱাৰ ফলত জমা হোৱা ধ্বংসাৱশেষ দেখি মানুহে শংকিত হৈ পৰে ।
২০০৪ চনৰ ছুনামীত প’ৰ্ট ব্লেয়াৰৰ পৰা প্ৰায় ৫৩৫ কিলোমিটাৰ নিলগৰ নিকোবৰ জিলা আটাইতকৈ বেছি ক্ষতিগ্ৰস্ত হয় । ২০ বছৰ পূৰ্বে কাৰ নিকোবৰৰ তামালু গাঁৱত সংঘটিত হোৱা বিধ্বংসী দৃশ্য আজিও দেখা যায় । প্ৰতি বছৰে নিকোবাৰী জনজাতীয় দলে ইয়াত ‘মৃত্যুৰ ঘৰ’ত সমবেত হৈ ছুনামীত হেৰাই যোৱা পৰিয়াল, বন্ধু-বান্ধৱী আৰু আত্মীয়ক স্মৰণ কৰে ।
২০ বছৰ পূৰ্বৰ ভয়ানক ঘটনা-
তামালু গাঁৱৰ মুৰব্বী পল বেঞ্জামিনে স্মৰণ কৰি কয় যে, “খ্ৰীষ্টমাছ উদযাপনৰ পিছত আমি স্থানীয় গীৰ্জাত প্ৰাৰ্থনাৰ বাবে গোট খাইছিলো । আমি সকলোৱে উৎসৱৰ আনন্দত আছিলো । ২৬ ডিচেম্বৰৰ পুৱা প্ৰায় ৬ বজাত আমি দেখিলোঁ যে ঢৌবোৰ সাগৰৰ পাৰৰ পৰা তিনি কিলোমিটাৰ ভিতৰলৈ গৈছিল । ইয়াৰ পিছত হোৱা বিশাল ভূমিকম্পৰ ফলত সমগ্ৰ দ্বীপটো কঁপি উঠিল । প্ৰকৃতিৰ এনে খং আমি আগতে কেতিয়াও দেখা নাছিলোঁ । কোনো সতৰ্কবাণী ব্যৱস্থা নাছিল আৰু কেইমিনিটমানৰ ভিতৰতে আমি দেখিলোঁ সাগৰৰ বিশাল ঢৌ আমাৰ ফালে আহি আছে । ইয়াৰ পিছত আমি পাহাৰীয়া অঞ্চলত দৌৰি গৈ আমাৰ জীৱন ৰক্ষাৰ চেষ্টা কৰিলোঁ ।“
তেওঁ কয় যে ছুনামীৰ পিছত সকলোতে বিশৃংখল পৰিৱেশৰ সৃষ্টি হৈছিল । মানুহে নিৰাপদ ঠাই বিচাৰি আছিল । তাচ পাতৰ দৰে ভাঙি গৈছিল অট্টালিকাবোৰ । ভূমিকম্পৰ ভয়াৱহ কঁপনিৰ বাবে একাংশ লোক অচেতন হৈ পৰিছিল । পাকঘৰত থকা মোৰ পত্নীক উলিয়াই আনি আমি সকলোৱে পাহাৰীয়া অঞ্চলৰ হাবিত আশ্ৰয় লৈছিলো । ইয়াত মানুহে ৰেচন বিচাৰিছিল যাতে তেওঁলোকে নিজৰ সন্তানক খুৱাব পাৰে । আমাৰ খাবলৈ একো নাছিল । আমাৰ যি ৰেচন আছিল, আমি ল’ৰা-ছোৱালী আৰু ৰোগীৰ বাবে এৰি দিলোঁ । বাকী সকলোৱে নাৰিকল পানী খাই জীয়াই থাকিবলৈ বাধ্য হ’ল ।
কাচল দ্বীপত সন্ধানহীন হৈছিল ১৬৩৫ জন লোক-
চৰকাৰী তথ্য অনুসৰি প’ৰ্ট ব্লেয়াৰৰ পৰা ২৭৪ কিলোমিটাৰ দূৰত্বত অৱস্থিত কাৰ নিকোবৰত ছুনামীৰ ফলত ২৬৯ জন লোকৰ মৃত্যু হোৱাৰ বিপৰীতে ৫৮৩ জন লোক নিৰুদ্দেশ হয় । ইয়াৰ উপৰিও টেৰেছা দ্বীপত ৫৪ জন লোকৰ মৃত্যু হোৱাৰ বিপৰীতে ৬ জন নিৰুদ্দেশ হৈছিল । চৌৰাহাত ৪১ জন নিহত আৰু ১৭ জন নিৰুদ্দেশ, কেম্পবেল বেত ২০ জন নিহত আৰু ৫২০ জন নিৰুদ্দেশ । ইয়াৰ উপৰিও নিকোবৰ জিলাৰ কাচল দ্বীপত সৰ্বাধিক ১৬৩৫ জন লোক সন্ধানহীন হৈছিল । ইয়াত মৃত্যু হোৱা লোকৰ সংখ্যা আছিল এজন । লগতে কামোৰটা আৰু ট্ৰিংকেট দ্বীপত ক্ৰমে ২৯৫ আৰু ৭৫ জন লোক নিৰুদ্দেশ হৈছিল । ইয়াতো এজন লোকৰ মৃত্যু হৈছিল ।
