আজি মহান গণিতজ্ঞ শ্ৰীনিবাস ৰামানুজনৰ ১৩৭ সংখ্যক জন্ম জয়ন্তী । তেওঁৰ স্মৃতিত ভাৰত চৰকাৰে ২২ ডিচেম্বৰ দিনটো ৰাষ্ট্ৰীয় গণিত দিৱস হিচাপে ঘোষণা কৰিছে । ৩২ বছৰ বয়সত মৃত্যু হোৱা এইগৰাকী মহান গণিতজ্ঞই বিশ্বক ৩৯০০ৰো অধিক গাণিতিক সূত্ৰ দি গৈছে, যিবোৰ এতিয়াও গাণিতিক গৱেষণা আৰু প্ৰযুক্তিবিদ্যাত ব্যৱহাৰ কৰা হয় । তেওঁৰ আটাইতকৈ বিখ্যাত আৰু ব্যৱহাৰিকভাৱে উপযোগী সূত্ৰটো pi (π)ৰ সৈতে জড়িত । এই দিৱসটোৱে কেৱল গণিতৰ ক্ষেত্ৰত তেওঁৰ অনন্য অৱদানক স্মৰণ কৰাই নহয়, আমাৰ দৈনন্দিন জীৱনত গণিতৰ গুৰুত্ব আৰু আধুনিক সমাজত ইয়াৰ ভূমিকাকো আলোকপাত কৰা হয় ।
ৰাষ্ট্ৰীয় গণিত দিৱস ২০২৪ : বিষয়বস্তু
২০২৪ চনৰ ৰাষ্ট্ৰীয় গণিত দিৱসৰ বিষয়বস্তু হৈছে: “গণিত: উদ্ভাৱন আৰু প্ৰগতিৰ বাবে দলং” (Mathematics: Bridge to innovation)। এই বিষয়বস্তুৱে প্ৰতিফলিত কৰে যে গাণিতিক নীতিয়ে বিজ্ঞান আৰু প্ৰযুক্তিৰ বহু বিকাশৰ ভেটি গঠন কৰে । ইয়াৰ লক্ষ্য হৈছে শিক্ষাৰ্থীসকলক অনুপ্ৰাণিত কৰা আৰু তেওঁলোকৰ সমস্যা সমাধানৰ দক্ষতা বৃদ্ধি কৰা যাতে তেওঁলোকে গণিতক উদ্ভাৱনৰ আহিলা হিচাপে বুজিব পাৰে ।
ৰাষ্ট্ৰীয় গণিত দিৱস: ইতিহাস
ৰাষ্ট্ৰীয় গণিত দিৱস ২০১২ চনৰ ডিচেম্বৰ মাহত ভাৰতৰ তদানীন্তন প্ৰধানমন্ত্ৰী ড° মনমোহন সিঙে আৰম্ভ কৰিছিল । শ্ৰীনিবাস ৰামানুজনৰ ১২৫ সংখ্যক জন্ম জয়ন্তীৰ স্মৃতিত এই পদক্ষেপ গ্ৰহণ কৰা হৈছিল । এই পদক্ষেপৰ লক্ষ্য আছিল ভাৰতীয় যুৱক-যুৱতীসকলক গণিতৰ ক্ষেত্ৰখন চেষ্টা কৰিবলৈ অনুপ্ৰাণিত আৰু প্ৰেৰণা যোগোৱা ।
শ্ৰীনিবাস ৰামানুজনৰ জন্ম-
১৮৮৭ চনৰ ২২ ডিচেম্বৰত তামিলনাডুৰ ইৰোড নামৰ ঠাইত শ্ৰীনিবাস ৰামানুজনৰ জন্ম হৈছিল । তেওঁৰ পৰিয়ালটো আৰ্থিকভাৱে দুৰ্বল আছিল যদিও সৰুৰে পৰা গণিতৰ প্ৰতি তেওঁৰ গভীৰ আগ্ৰহ আছিল । কোনো আনুষ্ঠানিক প্ৰশিক্ষণ অবিহনে ৰামানুজনে গণিতৰ আচৰিত জ্ঞান আৰু সামৰ্থ গঢ়ি তুলিছিল । ১২ বছৰ বয়সলৈকে তেওঁ ত্ৰিকোণমিতি আয়ত্ত কৰিছিল আৰু লগতে নিজাববীয়াকৈ বহুতো উপপাদ্যও বিকশিত কৰিছিল । তেওঁ গণিত বিষয়ত ইমানেই আকৰ্ষিত আছিল যে গণিতত সম্পূৰ্ণ নম্বৰ লাভ কৰিছিল যদিও আন বিষয়ত ফেইল কৰিছিল ।
উল্লেখ্য যে, ১৯২০ চনৰ ২৬ এপ্ৰিলত মাত্ৰ ৩২ বছৰ বয়সতে তেওঁৰ মৃত্যু হয় ।
আজিও তেওঁ কৰা গাণিতিক উদ্ভাৱনসমূহ গণিত আৰু পদাৰ্থ বিজ্ঞানৰ উন্নত ক্ষেত্ৰ যেনে কম্পিউটাৰ প্ৰগ্ৰেমিং, ক্ৰিপ্টোগ্ৰাফী, তাত্ত্বিক পদাৰ্থ বিজ্ঞান আৰু তথ্য বিশ্লেষণ আদিত উপযোগী । গণিতৰ গভীৰ আৰু জটিল তত্ত্বকো সৰল সূত্ৰত প্ৰকাশ কৰিব পৰা যায় বুলি ৰামানুজনে দেখুৱাইছে । ৰামানুজনৰ কৃতিত্ব, ৰামানুজনৰ নোটবুকৰ দৰে ৰচনা আজিও গণিতজ্ঞসকলৰ বাবে প্ৰেৰণাৰ উৎস হৈয়েই আছে । তেওঁৰ এই কৃতিত্বই দেখুৱাইছে যে প্ৰতিভা আৰু নিষ্ঠাই যিকোনো বাধা অতিক্ৰম কৰিব পাৰে ।
