শনিবাৰে (২১ ডিচেম্বৰ) কুৱেইটত অনুষ্ঠিত ২৬ সংখ্যক আৰবীয়ান গাল্ফ কাপৰ মুকলি সভাত মুখ্য অতিথি হিচাপে অংশগ্ৰহণ কৰে প্ৰধানমন্ত্ৰী নৰেন্দ্ৰ মোদীয়ে । এই উপলক্ষে তেওঁ কুৱেইটৰ আমিৰ শ্বেইখ মাছাল আল আহমদ আল-জাবেৰ আল-ছাবাহক সাক্ষাৎ কৰে । এই ফুটবল প্ৰতিযোগিতাৰ আয়োজনৰ প্ৰশংসা কৰি প্ৰধানমন্ত্ৰী মোদীয়ে অংশগ্ৰহণ কৰা সকলো দেশকে শুভেচ্ছা জনায় । আৰবীয়ান গাল্ফ কাপত গাল্ফ ক’অপাৰেচন কাউন্সিল (জি চি চি)ৰ সদস্য ৰাষ্ট্ৰ, ইৰাক আৰু য়েমেনৰ দৰে আঠখন দেশে অংশগ্ৰহণ কৰিছে ।
প্ৰধানমন্ত্ৰী নৰেন্দ্ৰ মোদীৰ এই ভ্ৰমণ বিশেষভাৱে ঐতিহাসিক কাৰণ ৪৩ বছৰৰ পাছত কুৱেইটলৈ কোনো ভাৰতীয় প্ৰধানমন্ত্ৰীয়ে ভ্ৰমণ কৰিছে । দুদিনীয়া ভ্ৰমণৰ প্ৰথম দিনাই প্ৰধানমন্ত্ৰী মোদীয়ে ‘হালা মোদী’ নামৰ এক বিশেষ অনুষ্ঠানত ভাৰতীয় সম্প্ৰদায়ক সম্বোধন কৰে । তেওঁ বিশ্বৰ প্ৰগতিৰ ক্ষেত্ৰত ভাৰতীয় সম্প্ৰদায়ৰ অৱদানৰ প্ৰশংসা কৰে আৰু ভাৰতক “বিশ্বৰ দক্ষতা ৰাজধানী” হিচাপে গঢ়ি তোলাৰ সম্ভাৱনাৰ ওপৰত আলোকপাত কৰে ।
ভাৰতীয় সম্প্ৰদায়ৰ সৈতে মত বিনিময় কৰে প্ৰধানমন্ত্ৰী মোদীয়ে-
কুৱেইটত ভাৰতীয় জনগোষ্ঠীক সম্বোধন কৰি প্ৰধানমন্ত্ৰী মোদীয়ে কয় যে ভাৰতৰ প্ৰতিভা, প্ৰযুক্তি আৰু পৰম্পৰাই কুৱেইটত এক বিশেষ স্থানৰ সৃষ্টি কৰিছে । ভাৰতীয় বৈদেশিক সেৱাৰ এগৰাকী ১০১ বছৰীয়া প্ৰাক্তন বিষয়া আৰু ৰামায়ণ আৰু মহাভাৰত আৰবীলৈ অনুবাদ কৰা দুজন কুৱেইট নাগৰিককো সাক্ষাৎ কৰে তেওঁ । ইয়াৰ উপৰিও তেওঁ ১৫০০ ভাৰতীয় নাগৰিকৰ শ্ৰম শিবিৰ পৰিদৰ্শন কৰি তেওঁলোকৰ সমস্যাৰ বুজ লয় ।
আগন্তুক বৈঠকত প্ৰধানমন্ত্ৰীৰ চকু-
তথ্য অনুসৰি প্ৰধানমন্ত্ৰীগৰাকীয়ে তেওঁৰ ভ্ৰমণৰ দ্বিতীয় দিনা কুৱেইটৰ আমিৰ, ক্ৰাউন প্ৰিন্স আৰু প্ৰধানমন্ত্ৰীক সাক্ষাৎ কৰিব । এই ভ্ৰমণক ভাৰত আৰু কুৱেইটৰ মাজত সম্পৰ্ক আৰু অধিক সুদৃঢ় কৰাৰ বাবে এক গুৰুত্বপূৰ্ণ পদক্ষেপ হিচাপে বিবেচিত হৈছে ।
