আন্তঃৰাষ্ট্ৰীয় ক্ৰিকেট পৰিষদ তথা আই চি চিৰ নতুন অধ্যক্ষৰ দায়িত্ব গ্ৰহণ কৰিছে জয় শ্বাহে । ইয়াৰ লগতে তেওঁৰ নামত এক বিশেষ কৃতিত্বও পঞ্জীয়ন হৈছে । আই চি চিৰ অধ্যক্ষ হোৱা আটাইতকৈ কম বয়সীয়া ব্যক্তি হিচাপে পৰিগণিত হৈছে শ্বাহ । তেওঁৰ বৰ্তমান বয়স মাত্ৰ ৩৬ বছৰ । এই গুৰুত্বপূৰ্ণ পদ গ্ৰহণ কৰাৰ পূৰ্বে তেওঁ বি চি চি আইৰ সচিব হিচাপে কাৰ্যনিৰ্বাহ কৰি আছিল ।
গ্ৰেগ বাৰ্কলেৰ স্থান ললে জয় শ্বাহে-
আই চি চিৰ প্ৰাক্তন অধ্যক্ষ গ্ৰেগ বাৰ্কলেৰ ঠাই লৈছে জয় শ্বাহে । বাৰ্কলে নিউজীলেণ্ডৰ আছিল । উল্লেখ্য যে শ্বাহ দেশৰ হৈ এই গুৰুত্বপূৰ্ণ পদত অধিষ্ঠিত হোৱা পঞ্চমজন ব্যক্তি । তেওঁৰ পূৰ্বে জগমোহন ডালমিয়া, শৰদ পাৱাৰ, শশাংক মনোহৰ আৰু উদ্যোগপতি এন শ্ৰীনিবাসনে এই পদত শোভা বঢ়াইছিল ।
জয় শ্বাহৰ সন্মুখত চেম্পিয়নছ ট্ৰফী প্ৰথম প্ৰত্যাহ্বান-
দেশৰ গৃহমন্ত্ৰী অমিত শ্বাহৰ পুত্ৰ জয় শ্বাহৰ সন্মুখত প্ৰথম প্ৰত্যাহ্বান হৈছে আগন্তুক আই চি চি চেম্পিয়নছ ট্ৰফী । এই সমস্যাৰ পৰা তেওঁ কেনেকৈ মুক্তি পায় সেয়া চাবলৈ যথেষ্ট আকৰ্ষণীয় হ’ব । কাৰণ পি চি বিয়ে এই বিষয়ত অটল যে ভাৰতে পাকিস্তান ভ্ৰমণ কৰিব লাগে, আনহাতে টিম ইণ্ডিয়াই নিৰাপত্তা সম্পৰ্কীয় সমস্যাৰ বাবে পাকিস্তানলৈ যাব নিবিচাৰে ।
ইয়াৰ পূৰ্বে আই চি চিৰ অধ্যক্ষ নিৰ্বাচিত হোৱাৰ পিছত শ্বাহে কৈছিল- ‘মোক আই চি চিৰ অধ্যক্ষ হিচাপে নিৰ্বাচিত কৰাৰ বাবে সকলোকে ধন্যবাদ । সমগ্ৰ বিশ্বতে ক্ৰিকেটৰ প্ৰচাৰৰ বাবে কাম কৰিম । বৰ্তমান সকলো ফৰ্মেট আগুৱাই নিয়াৰ প্ৰয়োজন আছে । গেমটোত কিছু নতুন প্ৰযুক্তি অন্তৰ্ভুক্ত কৰিম । মোৰ প্ৰচেষ্টা সদায় এই খেলখন জনপ্ৰিয় কৰি তোলাৰ বাবেই থাকিব ।‘
