পশ্চিম বংগ, অসম, তামিলনাডু, কেৰালা আৰু পুডুচেৰীত এপ্ৰিল-মে’ মাহত বিধানসভা নিৰ্বাচন অনুষ্ঠিত হোৱাৰ সম্ভাৱনা আছে । ইয়াৰ পূৰ্বে আজি দাখিল কৰা মোদী চৰকাৰৰ বাজেটে এই ৰাজ্যকেইখনলৈ কি বাৰ্তা কঢ়িয়ালে জানক-
কেন্দ্ৰীয় বিত্তমন্ত্ৰী নিৰ্মলা সীতাৰমণে দেওবাৰে সংসদত ২০২৬-২৭ বৰ্ষৰ সাধাৰণ বাজেট দাখিল কৰে । পাঁচখন ৰাজ্যৰ বিধানসভা নিৰ্বাচনক লৈ চলি থকা ৰাজনৈতিক কুচকাৱাজৰ মাজতে বিত্তমন্ত্ৰীগৰাকীয়ে এই বাজেট দাখিল কৰে । সেয়েহে মোদী চৰকাৰৰ গুৰুত্ব আছিল নিৰ্বাচনীমুখী ৰাজ্যসমূহৰ ওপৰত ।
পশ্চিম বংগ, অসম, তামিলনাডু, কেৰালা আৰু পুডুচেৰীত এপ্ৰিল-মে’ মাহত বিধানসভা নিৰ্বাচন অনুষ্ঠিত হোৱাৰ সম্ভাৱনা আছে । বিশেষকৈ বিজেপিয়ে পশ্চিম বংগত টিএমচিৰ মুৰব্বী মমতা বেনাৰ্জীৰ ৰাজনৈতিক দুৰ্গত খহনীয়াৰ সৃষ্টি কৰাৰ লগতে অসমত ক্ষমতাৰ হেট্ৰিক নিশ্চিত কৰাত মনোনিৱেশ কৰিছে । ইফালে নিৰ্বাচনমুখী এই পাঁচখন ৰাজ্যত দলসমূহে ৰাজনৈতিক কুচকাৱাজ বৃদ্ধি কৰিছে ।
দক্ষিণ ভাৰতৰ তামিলনাডু আৰু কেৰালাত পদুম ফুলোৱাৰ সপোন দেখিছে বিজেপিয়ে । সেই বাবে মোদী চৰকাৰে উন্নয়নৰ নতুন গতিৰ সূচনা কৰি এই ৰাজ্যসমূহৰ ৰাজনৈতিক যুদ্ধত জয়ী হোৱাৰ এক শক্তিশালী পদক্ষেপ গ্ৰহণ কৰি আহিছে ।
বাজেটত কি পালে পশ্চিংম বংগই ?
কেন্দ্ৰীয় বিত্তমন্ত্ৰী নিৰ্মলা সীতাৰমণে সাধাৰণ বাজেট দাখিল কৰাৰ সময়ত বংগৰ আগন্তুক নিৰ্বাচনৰ প্ৰতি বিশেষ লক্ষ্য ৰাখে । বংগৰ ডাংকুনী (পূব)ৰ পৰা চুৰাট (পশ্চিম)লৈ নতুনকৈ প্ৰস্তাবিত ডেডিকেটেড ফ্ৰেইট কৰিডোৰ নিৰ্মাণৰ কতা বাজেটত ঘোষণা কৰিছে । ইয়াৰ ফলত বংগৰ পৰা গুজৰাটলৈ সামগ্ৰী পৰিবহণৰ সুবিধা হ’ব । লগতে গুজৰাটৰ পৰা বংগলৈ মালবাহী ৰে’লৰ চলাচল সহজ আৰু ক্ষীপ্ৰ হ’ব । ইয়াৰ ফলত দুয়োখন ৰাজ্যৰ মাজত বাণিজ্য বৃদ্ধি পাব ।
ইফালে বিত্তমন্ত্ৰীয়ে পশ্চিম বংগক উপহাৰ দিয়ে এখন তীব্ৰবেগী ৰে’ল । নিৰ্মলা সীতাৰমণে শিলিগুৰিৰ পৰা বাৰাণসী সংযোগী এক তীব্ৰবেগী ৰেল লাইন নিৰ্মাণ কৰাৰ কথা ঘোষণা কৰে । ইষ্ট ক’ষ্ট ইণ্ডাষ্ট্ৰিয়েল কৰিডৰো উন্নয়ন কৰা হ’ব, য’ত বংগৰ দুৰ্গাপুৰ এটা মূল আৰু সুসংযুক্ত কেন্দ্ৰত পৰিণত হ’ব । মোদী চৰকাৰে বংগক বিকাশৰ উপহাৰেৰে ৰাজনৈতিক সমীকৰণৰ ভাৰসাম্য ৰক্ষাৰ চেষ্টা চলাইছে যদিও মমতা বেনাৰ্জীয়ে কয় যে বাজেটত বংগই একো নাপালে ।
অসমত বিজেপিৰ হেট্ৰিক অৰ্জনৰ লক্ষ্য-
অসমত ১০ বছৰে ক্ষমতাত থকা বিজেপিয়ে এইবাৰ বিজয়ৰ হেট্ৰিকৰ লক্ষ্য লৈছে । গতিকে বিজেপিয়ে কোনো কাৰণতে অসম হেৰুৱাব নিবিচাৰে । সেহেয়ে নোদী চৰকাৰে বাজেটৰ জৰিয়তে অসমক আকৰ্ষণ কৰাৰ প্ৰয়াস কৰিছে । মানসিক স্বাস্থ্য আৰু ট্ৰমা কেয়াৰৰ বাবে অসমৰ তেজপুৰত NIMHANS 2 নিৰ্মাণৰ কথা বাজেটত ঘোষণা কৰে বিত্তমন্ত্ৰী নিৰ্মলা সীতাৰমনে ।
উত্তৰ-পূর্বাঞ্চলকো আকর্ষণ কৰিবলৈ প্রচেষ্টা চলাইছে মোদী চৰকাৰে ৷ ইয়াৰ বাবে অৰুণাচল প্ৰদেশ, ছিকিম, অসম, মণিপুৰ, মিজোৰাম আৰু ত্ৰিপুৰাত বৌদ্ধ চাৰ্কিট গঢ়ি তোলাৰ বাবে এখন আঁচনি আৰম্ভ কৰাৰ প্ৰস্তাৱ দিয়া হৈছে ।
তামিলনাডুৰ বাবে উন্নয়নৰ উপহাৰ-
মোদী চৰকাৰৰ ২০২৬-২৭ বাজেটত সম্পূৰ্ণৰূপে তামিলনাডুৰ ওপৰত গুৰুত্ব আৰোপ কৰা হয়, য’ত এপ্ৰিল মাহত অনুষ্ঠিত হ’ব বিধানসভা নিৰ্বাচন । ৰাজ্যখনৰ পৰা ডি এম কেক ক্ষমতাৰ পৰা উৎখাত কৰিবলৈ বিজেপিয়ে যৎপৰোনাস্তি চেষ্টা চলাইছে । সেয়েহে তামিলনাডুৰ ৰাজনৈতিক গতিশীলতাক আগবঢ়াবলৈ বাজেট ব্যৱহাৰ কৰা হৈছে । বিত্তমন্ত্ৰীয়ে তামিলনাডু, ওড়িশা, কেৰালা আৰু অন্ধ্ৰপ্ৰদেশত ৰেয়াৰ আৰ্থ মিনাৰেলছৰ বাবে বিশেষ কৰিডৰ নিৰ্মাণৰ কথা ঘোষণা কৰিছে । ইয়াক মিনাৰেল কৰিডৰ বুলিও কোৱা হৈছে ।
তামিলনাডু আৰু অন্ধ্ৰপ্ৰদেশৰ সীমান্তত অৱস্থিত পুলিকাট হ্ৰদৰ আশে-পাশে চৰাই নিৰীক্ষণৰ বাবে ব্যৱস্থা নিৰ্মাণ কৰা হ’ব । বাজেটত নাৰিকল, কাজু, ক’ক’ৰ দৰে উচ্চ মূল্যৰ শস্যৰ প্ৰচাৰৰ বাবেও আহ্বান জনোৱা হৈছে । ইয়াৰ দ্বাৰা তামিলনাডু আৰু কেৰালাৰ কৃষকসকল বিশেষভাৱে উপকৃত হ’ব । এই ঘোষণা তামিলনাডু, কেৰালাৰ দৰে উপকূলীয় ৰাজ্যৰ কৃষকৰ বাবে ৰাজনৈতিক আশীৰ্বাদ হিচাপে বিবেচিত হৈছে । ইয়াৰ পৰা বিজেপিয়ে ৰাজনৈতিক লাভালাভ অৰ্জন কৰিব পাৰিব নে নাই সেয়া হ’ব লক্ষ্যণীয় ।
বাজেটত কেৰেলাই কি পালে-
তামিলনাডুৰ লগতে মোডী চৰকাৰে কেৰালাৰ ৰাজনৈতিক পৰিৱেশকো নিয়ন্ত্ৰণলৈ অনাৰ চেষ্টা চলাইছে । বিত্তমন্ত্ৰী নিৰ্মলা সীতাৰমণে বাজেটৰ জৰিয়তে কেৰালাক উন্নয়নৰ বতৰা দিছে । ওড়িশা, অন্ধ্ৰ প্ৰদেশ আৰু তামিলনাডুৰ মাজেৰে পাৰ হ’বলগীয়া ৰেয়াৰ আৰ্থ কৰিডৰত কেৰালাকো অন্তৰ্ভুক্ত কৰা হৈছে । ওড়িশা, কৰ্ণাটক আৰু কেৰালাৰ উপকূলীয় অঞ্চলত কাছ সংৰক্ষণৰ বাবে “টাৰ্টেল ট্ৰেইল” বিকশিত কৰা হ’ব ।
ইক’-টুৰিজিমঃ হিমাচল, উত্তৰাখণ্ড, জম্মু-কাশ্মীৰ, আৰাকু উপত্যকা আৰু পুডিগাই মালাইত বহনক্ষম পাহাৰীয়া পথ নিৰ্মাণ কৰা হ’ব । বন্যপ্ৰাণী পৰ্যটনৰ ভিতৰত ওড়িশা, কৰ্ণাটক আৰু কেৰালাৰ টাৰ্টল ট্ৰেলছ আৰু পুলিকাট হ্ৰদৰ চাৰিওফালে চৰাই নিৰীক্ষণৰ পথ অন্তৰ্ভুক্ত হ’ব । নাৰিকল, কাজু আৰু ক’ক’ৰ দৰে মূল্যৱান শস্যৰ বাবে সহায় কৰিলে কেৰেলাৰ কৃষকসকল উপকৃত হ’ব । চৰকাৰৰ বাজেটত স্বাস্থ্য খণ্ডক উন্নীত কৰাত গুৰুত্ব আৰোপ কৰা হৈছে, যাৰ ফলত কেৰালা উপকৃত হ’ব ৷
ব্যক্তিগত খণ্ডৰ সহযোগত পাঁচটা আঞ্চলিক চিকিৎসা হাব স্থাপন কৰা হ’ব বুলি বিত্তমন্ত্ৰীয়ে ঘোষণা কৰে । ইয়াৰ ভিতৰত থাকিব আয়ুষ কেন্দ্ৰ, চিকিৎসা পৰ্যটন আৰু নিদান কেন্দ্ৰ । স্বাস্থ্য পেছাদাৰী যেনে চিকিৎসক, নাৰ্ছ আৰু অন্যান্য চিকিৎসা কৰ্মচাৰীয়ে ইয়াত কৰ্মসংস্থাপন পাব । ইয়াৰ পৰা কেৰালাৰ দৰে ৰাজ্যই সৰ্বাধিক লাভৱান হ’ব, কিয়নো কেৰালাৰ বৃহৎ সংখ্যক লোক স্বাস্থ্য খণ্ডৰ সৈতে জড়িত । নাৰ্ছৰ পৰা চিকিৎসকলৈকে যথেষ্ট সংখ্যক লোক কেৰালাৰ ।
ইফালে কেন্দ্ৰীয় শাসিত অঞ্চল পুডুচেৰীৰ বাবে বাজেটত কোনো ঘোষণা কৰা হোৱা নাই ।
লগতে পঢ়ক : দেশত তিনিখন আয়ুৰ্বেদ প্ৰতিষ্ঠান আৰু ডিজাইন ইনষ্টিটিউট… বাজেটত শিক্ষা খণ্ডই কি লাভ কৰিলে ?
