শীতকালীন অধিৱেশনৰ পৰা নিলম্বিত বিৰোধী বিধায়ক
অসম বিধানসভাৰ বিৰোধী দলৰ দুগৰাকী বিধায়কক চলি থকা শীতকালীন অধিৱেশনৰ বাকী সময়ছোৱাৰ বাবে মঙলবাৰে নিলম্বন কৰা হয় । বিশেষাধিকাৰ সমিতিৰ প্ৰতিবেদনৰ পৰামৰ্শৰ ভিত্তিত এই নিলম্বন কৰা হৈছে । ২০২৫ চনৰ ২৪ মাৰ্চত উপাধ্যক্ষ নোমল মমিনক বেয়া আচৰণ কৰাৰ অভিযোগ উত্থাপন হৈছিল এই দুয়োগৰাকী বিধায়ৰ বিৰু্দ্ধে ।
কংগ্ৰেছৰ বিধায়ক নুৰুল হুদা আৰু বাঘবৰৰ বিধায়ক শ্বেৰমান আলী আহমেদক নিলম্বনৰ পৰামৰ্শ দি বিশেষাধিকাৰ সমিতিৰ প্ৰতিবেদনৰ আধাৰত সংসদীয় পৰিক্ৰমা মন্ত্ৰী চন্দ্ৰ মোহন পাটোৱাৰীয়ে প্ৰস্তাৱ আগবঢ়ায় ।
মন্ত্ৰীগৰাকীয়ে কয় যে, “প্ৰিভিলেজ কমিটীয়ে নৰুল হুদাই মমিনক আক্ৰমণ কৰা বুলি ধৰা পেলাইছিল, আনহাতে শ্বেৰমান আসললী আহমেদে উপাধ্যক্ষৰ বিৰুদ্ধে গালি-গালাজ ব্যৱহাৰ কৰিছিল । সেয়েহে কমিটীয়ে দুয়োজন সদস্যক শীতকালীন অধিবেশনৰ বাকী সময়ছোৱাৰ বাবে নিলম্বন কৰাৰ পৰামৰ্শ দিছিল ।” ইয়াৰ পিছতে মন্ত্ৰী চন্দ্ৰমোহন পাটোৱাৰীয়ে গৃহীত কৰাৰ প্ৰস্তাৱ আগবঢ়ায় । কংগ্ৰেছে বিৰোধিতা কৰিলেও সদনে এই প্ৰস্তাৱ গৃহীত কৰে ।
অধ্যক্ষ বিশ্বজিৎ দৈমাৰীয়ে কয় যে প্ৰিভিলেজ কমিটীয়ে ইতিমধ্যে প্ৰতিবেদন দাখিল কৰিছে আৰু ইয়াৰ তথ্যক লৈ প্ৰশ্ন উত্থাপন কৰি লাভ নাই ।
মাৰ্চ মাহত শাসকীয় মিত্ৰজোঁটে অভিযোগ কৰিছিল যে বিৰোধী দলসমূহে প্ৰতিবাদ কৰি থকাৰ সময়তে সদনৰ ঠিক বাহিৰত থকা বিধানসভা ভৱনৰ কৰিড’ৰত হুডাই নোমল মমিনক আক্ৰমণ কৰিছিল । অৱশ্যে হুদা আৰু কংগ্ৰেছে এই অভিযোগ অস্বীকাৰ কৰে ।
সেই একেই মাহতে শ্বেৰমান আলী আহমেদে সদনত এটা বিষয় আলোচনা কৰি থাকোঁতে এটা আপত্তিজনক শব্দ ব্যৱহাৰ কৰিছিল, যিটো পিছলৈ আঁতৰাই দিয়া হৈছিল ।
উল্লেখ্য যে, মঙলবাৰৰ পৰা আৰম্ভ হোৱা পাঁচদিনীয়া শীতকালীন অধিৱেশন শনিবাৰে সামৰণি পৰিব ।
লগতে পঢ়ক : দ্বিতীয় বিবাহ কৰিলেই হ’ব জে’ল; বিধানসভাত উত্থাপন বহুবিবাহ বিৰোধী বিধেয়ক
