ৱাকফ সংশোধনী বিধেয়ক ২০২৫ এতিয়া আইনত পৰিণত হৈছে । এই বিধেয়কখনত ৰাষ্ট্ৰপতি দ্ৰৌপদী মুৰ্মুৱে অনুমোদন জনাইছে । ৰাষ্ট্ৰপতিৰ অনুমোদনৰ পূৰ্বে দুয়োখন সদনে ৱাকফ বিধেয়কখন গৃহীত কৰে ।

চৰকাৰে এক অধিসূচনাযোগে কয় যে, ‘সংসদে গৃহীত কৰা ৱাকফ সংশোধনী আইনখনে ২০২৫ চনৰ ৫ এপ্ৰিলত ৰাষ্ট্ৰপতিৰ অনুমোদন লাভ কৰিছে আৰু ইয়াৰ জৰিয়তে সাধাৰণ তথ্যৰ বাবে প্ৰকাশ কৰা হৈছে : ৱাকফ (সংশোধনী) আইন, ২০২৫ ।’

শুকুৰবাৰে পুৱা ৰাজ্যসভাত দীৰ্ঘদিনীয়া বিতৰ্কৰ অন্তত শাসক আৰু বিৰোধীৰ মাজত উত্তপ্ত আদান-প্ৰদানৰ অন্তত ৱাকফ (সংশোধনী) বিধেয়কখন গৃহীত হয় । ৰাজ্যসভাত এই বিধেয়কখনৰ ওপৰত প্ৰায় ১৪ ঘন্টা বিতৰ্ক হৈ ১২৮টা ভোট সপক্ষে আৰু ৯৫টা বিপক্ষে ভোটদান কৰাৰ পিছতে বিধেয়কখন গৃহীত হয় । ইয়াৰ পূৰ্বে প্ৰায় ১২ ঘণ্টীয়া বিতৰ্কৰ অন্তত লোকসভাই অনুমোদন জনাইছিল, য’ত ২৮৮টা ভোট সপক্ষে আৰু ২৩২টা ভোট বিপক্ষে পৰিছিল ।

বিৰোধী দলসমূহৰ বিৰোধিতা-

দুয়োখন সদনত বিধেয়কখনৰ ওপৰত আলোচনাৰ সময়ত বিৰোধী দলসমূহে বিধেয়কখনক মুছলমান বিৰোধী আৰু অসাংবিধানিক বুলি অভিহিত কৰি তীব্ৰ আপত্তি উত্থাপন কৰে, আনহাতে চৰকাৰে ঐতিহাসিক সংস্কাৰে সংখ্যালঘু সম্প্ৰদায়ক উপকৃত কৰিব বুলি উত্তৰ দিয়ে । লগতে কয় যে, ৱাকফৰ সম্পত্তি পৰিচালনাৰ ক্ষেত্ৰত স্বচ্ছতা নিশ্চিত কৰা হ’ব ।

উচ্চতম ন্যায়ালয়ত ৪ খন আবেদন দাখিল-

শনিবাৰে এই আইনৰ বিধান কাৰ্যকৰী বা বলবৎ কৰাত নিষেধাজ্ঞা আৰোপ কৰি উচ্চতম ন্যায়ালয়ত আৰু দুখন আবেদন দাখিল কৰা হয় । এখন আৱেদন দাখিল কৰিছে দিল্লীৰ আম আদমি পাৰ্টিৰ বিধায়ক তথা ৱাকফত কেলেংকাৰী আৰু আত্মসাৎৰ অভিযোগত অভিযুক্ত আমনাতুল্লাহ খানে, আনহাতে আনখন আবেদন দাখিল কৰিছে এছ’চিয়েশ্যন ফৰ দ্য প্ৰটেকচন ইন দ্য মেটাৰ্ছ অৱ চিভিল ৰাইটছ নামৰ সংস্থাটোৱে ।

ইয়াৰ পূৰ্বে শুকুৰবাৰে কংগ্ৰেছৰ সাংসদ মহম্মদ জাভেদ আৰু এ আই এম আই এমৰ সভাপতি আছাদুদ্দিন ওৱেইছিয়ে উচ্চতম ন্যায়ালয়ত ৱাকফ (সংশোধনী) বিধেয়কখনৰ বৈধতাক প্ৰত্যাহ্বান জনাই কয় যে ই সাংবিধানিক বিধান উলংঘা কৰিছে ।

সমগ্ৰ দেশৰ ৱাকফ ব’ৰ্ডসমূহৰ জবাবদিহিতা আৰু স্বচ্ছতা নিশ্চিত কৰাৰ বাবে আজি দিনৰ ১২ বজাত লোকসভাত উত্থাপন কৰা হ’ব ৱাকফ সংশোধনী বিধেয়ক । ইয়াৰ জৰিয়তে বৰ্তমানৰ ৱাকফ আইনত পৰিৱৰ্তন কৰা হ’ব । বিজনেছ এডভাইজাৰী কমিটীয়ে বিধেয়কখনৰ সন্দৰ্ভত আলোচনাৰ বাবে আঠ ঘণ্টা সময় নিৰ্ধাৰণ কৰিছে ।

এই অধিৱেশনতেই দুয়োটা সদনত বিধেয়কখন গৃহীত কৰাৰ প্ৰচেষ্টা-

বিৰোধীকে ধৰি বহু মুছলমান সংগঠনে বিধেয়কখনৰ বিৰোধিতা কৰিছে যদিও এন ডি এৰ মিত্ৰ দলৰ সহায়ত বিধেয়কখন গৃহীত কৰাৰ প্ৰস্তুতি চলাইছে শাসকীয় বিজেপিয়ে । এই বিধেয়ক সন্দৰ্ভত চৰকাৰৰ লগত আছে তেলেগু দেশম পাৰ্টি আৰু জনতা দল-ইউ ।

সংসদীয় পৰিক্ৰমা মন্ত্ৰী কিৰেন ৰিজিজুৱে কয় যে এই অধিবেশনতে এই বিধেয়কখন দুয়োটা সদনত গৃহীত কৰাৰ উদ্দেশ্য চৰকাৰৰ । বিজেপি, কংগ্ৰেছকে ধৰি বহু দলে নিজৰ সাংসদৰ উপস্থিতি নিশ্চিত কৰিবলৈ হুইপ জাৰি কৰিছে । বুধবাৰে লোকসভাৰ সাংসদসকলক সমগ্ৰ দিনটো সদনত উপস্থিত থাকিবলৈ নিৰ্দেশ দিয়াৰ বিপৰীতে ৰাজ্যসভাৰ সাংসদসকলক বৃহস্পতিবাৰে দিনটো সদনত উপস্থিত থাকিবলৈ নিৰ্দেশ দিয়া হৈছে ।

বিতং আলোচনাৰ অন্তত পৰৱৰ্তী অধিবেশনত দাখিল কৰিবলৈ দাবী জনাইছে বিৰোধীয়ে-

ইয়াৰ পূৰ্বে সোমবাৰে লোকসভা আৰু বি এ চিৰ বৈঠকত বিধেয়কখনক লৈ বিৰোধীয়ে হুলস্থুলৰ সৃষ্টি কৰে । এই হুলস্থুলৰ বাবেই প্রশ্ন ঘণ্টাৰ পাছত দুঘণ্টাৰ বাবে লোকসভাৰ কার্যসূচী স্থগিত ৰখা হয় ৷ একে সময়তে বি এ চিৰ বৈঠকত বিৰোধীয়ে ১২ ঘণ্টীয়া আলোচনা আৰু বিশদ আলোচনাৰ অন্তত পৰৱৰ্তী অধিবেশনত উপস্থাপন কৰাৰ দাবী জনায় । এই দাবী মানি নোলোৱাৰ পিছত বিৰোধী সদস্যই সভা বৰ্জন কৰে ।

সাংসদৰ উপস্থিতি নিশ্চিত কৰিবলৈ হুইপ জাৰি-

সহযোগী দলৰ বাহিৰেও বিজেপিয়ে একাংশ নিৰপেক্ষ দলৰ সৈতে আলোচনাত মিলিত হৈছে । এন ডি এৰ সকলো সদস্য দল একত্ৰিত হৈছে । টি ডি পিৰ তিনিটা সংশোধনী আৰু মিত্ৰশক্তিৰ পৰামৰ্শ চৰকাৰে মানি লৈছে । সমৰ্থনত টি ডি পিয়ে হুইপ জাৰি কৰিছে । একে সময়তে গৃহমন্ত্ৰী অমিত শ্বাহৰ সৈতে জে ডি ইউৰ সাংসদ সঞ্জয় ঝা আৰু লালন সিঙৰ বৈঠকৰ অন্তত দলটোৱে বিধেয়কখনৰ সমৰ্থনত নিজৰ সাংসদসকলৰ উপস্থিতি নিশ্চিত কৰিবলৈ হুইপ জাৰি কৰে ।

দুয়োখন সদনত চৰকাৰৰ সৈতে সংখ্যাবল :

লোকসভা- এন ডি এৰ ২৯৩ জন সদস্য । যিটো সংখ্যাগৰিষ্ঠতকৈ ২১ জন বেছি । ৫ জন নিৰ্দলীয় আৰু অন্যান্য দলীয় সাংসদো চৰকাৰৰ লগত আছে ।

ৰাজ্যসভা (বৰ্তমান ২৩৬ জন সদস্য)- সংখ্যাগৰিষ্ঠতাৰ সংখ্যা ১১৯ । বিজেপিৰ সদস্য ৯৮, এন ডি এৰ সদস্য ১১৫ । ৬জন মনোনীত সদস্যৰে চৰকাৰৰ কাম হ’ব । এ আই এ ডি এম কেৰ চাৰিজন সদস্য, তিনিজন নিৰ্দলীয় আৰু সৰু দলৰ এজনেও যোগদান কৰিব পাৰে ।

এইবোৰ গুৰুত্বপূৰ্ণ পৰিৱৰ্তন হ’ব-

-ৱাকফৰ সম্পত্তিৰ বিবাদৰ ওপৰত ন্যায়াধিকৰণৰ সিদ্ধান্ত চূড়ান্ত নহয়; ভুক্তভোগীয়ে উচ্চ ন্যায়ালয়লৈ যোৱাৰ অধিকাৰ পাব ।

-ৱাকফ ব’ৰ্ডে দান অবিহনে কোনো সম্পত্তিৰ ওপৰত নিজৰ অধিকাৰ সাব্যস্ত কৰিব নোৱাৰে । ইয়াৰ পূৰ্বে কেৱল ব’ৰ্ডে ইয়াৰ ওপৰত কৰা দাবীৰ বাবেই সম্পত্তি ৱাকফ হৈ পৰিছিল ।

-ৱাকফ ব’ৰ্ডত মহিলা আৰু অন্য ধৰ্মৰ সদস্যকো প্ৰৱেশৰ অনুমতি দিয়া হ’ব । পুৰণি নিষেধাজ্ঞা আঁতৰাই দিয়া হ’ল ।

-ৱাকফৰ সম্পত্তি জৰীপ আৰু নিৰ্ধাৰণ কৰাৰ অধিকাৰ সংগ্ৰাহকৰ আছে ।