শেহতীয়াকৈ অষ্ট্ৰেলিয়াৰ বিৰুদ্ধে অনুষ্ঠিত হোৱা পাঁচখনীয়া খেলৰ টেষ্ট শৃংখলাত ১-৩ ব্যৱধানত পৰাজয়ৰ সন্মুখীন হ’বলগীয়া হয় ভাৰতীয় দল । ইয়াৰ বাবে ভাৰতীয় দলটোৱে ১০ বছৰৰ পাছত বৰ্ডাৰ-গাভাস্কাৰ ট্ৰফী হেৰুৱাই । লগতে ভাৰতীয় দলটোৱে বিশ্ব টেষ্ট চেম্পিয়নশ্বিপ (WTC)ৰ চলিত চক্ৰৰ ফাইনেলত প্ৰৱেশটো ব্যৰ্থ হয় । অষ্ট্ৰেলিয়া ভ্ৰমণৰ অন্তত ভাৰতীয় ক্ৰিকেট নিয়ন্ত্ৰণ ব’ৰ্ডে ১১ জানুৱাৰী (দেওবাৰ)ত মুম্বাইত পুনৰীক্ষণ বৈঠক আহ্বান কৰে ।

বৈঠকত কোহলী-ৰোহিতৰ ভৱিষ্যত সন্দৰ্ভত আলোচনা হয়-

এই বৈঠকৰ উদ্দেশ্য আছিল অষ্ট্ৰেলিয়া ভ্ৰমণত টিম ইণ্ডিয়াৰ কি ভুল হ’ল সেই কথা পৰ্যালোচনা কৰা । এই পৰ্যালোচনা বৈঠকত অধিনায়ক ৰোহিত শৰ্মা, মুখ্য প্ৰশিক্ষক গৌতম গম্ভীৰ, বি চি চি আইৰ অধ্যক্ষ ৰজাৰ বিন্নি, সচিব দেৱজিৎ শইকীয়া আৰু উপাধ্যক্ষ ৰাজীৱ শুক্লাই অংশগ্ৰহণ কৰে । এই বৈঠক প্ৰায় ২ ঘণ্টা ধৰি চলে । এই সময়ছোৱাত মেনেজমেণ্টে নিউজীলেণ্ডৰ বিৰুদ্ধে ভাৰতীয় দলটোৰ প্ৰদৰ্শনৰ পৰ্যালোচনাও কৰে, য’ত ৰোহিত ব্ৰিগেডে ঘৰুৱা ক্ষেত্ৰত টেষ্ট শৃংখলাত ০-৩ ব্যৱধানত শোচনীয় পৰাজয়ৰ সন্মুখীন হ’বলগীয়া হৈছিল ।

সূত্ৰ অনুসৰি এই বৈঠকত ৰোহিত শৰ্মা আৰু বিৰাট কোহলীৰ প্ৰদৰ্শনৰ বিষয়ে আলোচনা কৰা হয় । বুজা গৈছে যে দুয়োজন খেলুৱৈকে খেলপথাৰত ভাল প্ৰদৰ্শন কৰিবলৈ কোৱা হৈছে । ইয়াৰ উপৰিও বৈঠকত ৰোহিত শৰ্মাৰ অধিনায়কত্ব সন্দৰ্ভতো আলোচনা কৰা হয় । বৈঠক সন্দৰ্ভত প্ৰকাশিত এক তথ্য অনুসৰি এক সূত্ৰই কয় যে, ‘এতিয়া একো হ’ব নোৱাৰি, কিন্তু চেম্পিয়নছ ট্ৰফীৰ পিছত অধিনায়কত্বৰ ক্ষেত্ৰত মেনেজমেণ্টে সিদ্ধান্ত ল’ব পাৰে । যদি কথাবোৰ সলনি নহয় তেন্তে অধিনায়কত্বৰ সন্দৰ্ভত কিছু ব্যৱস্থা লোৱা হ’ব পাৰে ।‘

সূত্ৰটোৱে আৰু কয়, ‘বিৰাট কোহলীৰ ক্ষেত্ৰত যিমানদূৰলৈকে তেওঁ কিছু ৰান সংগ্ৰহ কৰাটোও প্ৰয়োজন । কিন্তু দুয়োজনেই টেষ্টৰ বাহিৰত থাকিব বুলি মই নাভাবো । চেম্পিয়নছ ট্ৰফীত প্ৰদৰ্শনৰ ওপৰত সকলো নিৰ্ভৰ কৰে । খেলুৱৈসকলে দ্বিপাক্ষিক শৃংখলা আৰু ঘৰুৱা প্ৰতিযোগিতাৰ পৰা আঁতৰি থকাত দল পৰিচালনা সুখী নহয় । সূত্ৰটোৱে জনোৱা মতে, এনে খেলুৱৈক বাছনি কৰা নহ’ব । ঘৰুৱা মেচত অংশগ্ৰহণ কৰিব লাগিব খেলুৱৈয়ে । খেলুৱৈ আৰু নিৰ্বাচকসকলকো এই সন্দৰ্ভত কঠোৰভাৱে অৱগত কৰা হৈছে ।

বেটছমেনৰ প্ৰদৰ্শনৰ ওপৰতো গুৰুত্বসহকাৰে আলোচনা-

সূত্ৰটোৱে আৰু কয়, ‘সভাত দলটোৰ প্ৰদৰ্শনৰ বিষয়ে বিতংভাৱে আলোচনা কৰা হৈছিল, বিশেষকৈ বেটিং লাইন আপৰ বিষয়ে । মেনেজমেণ্টে বুজিব বিচাৰিছিল যে ভাৰতীয় বেটছমেনসকলে শক্তিশালী লাইন আপ থকাৰ পিছতো কিয় ভাল প্ৰদৰ্শন কৰিবলৈ সক্ষম নহ’ল । লগতে মূল কাৰণ আৰু ইয়াৰ সমাধানৰ বিষয়েও আলোচনা কৰা হয় । সকলো কথা বিবেচনা কৰা হৈছে আৰু চেম্পিয়নছ ট্ৰফীৰ লগে লগে কিছু পদক্ষেপ গ্ৰহণ কৰা হ’ব । এজন সদস্যই লগতে কয় যে দলটোৱে ঘৰুৱা ক্ষেত্ৰত শৃংখলাত পৰাস্ত হৈছিল, যাৰ ফলত কিবা এটা ভুল হোৱা দেখা গৈছিল আৰু তেওঁ এই সন্দৰ্ভত স্পষ্টীকৰণ বিচাৰিছিল ।

অষ্ট্ৰেলিয়াৰ বিৰুদ্ধে বৰ্ডাৰ-গাভাস্কাৰ ট্ৰফীত ১-৩ ব্যৱধানত হোৱা পৰাজয় পাহৰি ভাৰতীয় দলটোৱে নতুন বছৰত নতুন অভিযানৰ বাবে প্ৰস্তুতি আৰম্ভ কৰিছে । ভাৰতীয় দলটোৱে এতিয়া ঘৰুৱা ক্ষেত্ৰত ইংলেণ্ডৰ বিৰুদ্ধে ৫ খন টি-২০ আৰু তিনিখন এদিনীয়া মেচৰ শৃংখলা খেলিব । এই শৃংখলা এতিয়া অতি বিশেষ হ’বলৈ গৈ আছে ।

দৰাচলতে টি-২০ ইণ্টাৰনেশ্যনেলৰ পৰা বিৰাট কোহলী আৰু ৰোহিত শৰ্মাই অৱসৰ লোৱাৰ পিছত যিকোনো ফৰ্মেটত ভাৰত আৰু ইংলেণ্ডৰ মাজত এইখন প্ৰথম ছিৰিজ হ’বলৈ গৈ আছে । এই টি-২০ শৃংখলাত ভাৰতীয় দলটোক নেতৃত্ব দিব সূৰ্যকুমাৰ যাদৱে ।

ৰোহিত আৰু কোহলীৰ অনুপস্থিতিত ইংলেণ্ডক পৰাস্ত কৰাৰ ডাঙৰ প্ৰত্যাহ্বান সূৰ্যকুমাৰৰ কান্ধত থাকিব । যদিও কোহলী আৰু ৰোহিতৰ অৱসৰৰ পিছত ভাৰতীয় দলটোৱে বহু টি-২০, এদিনীয়া আৰু টেষ্ট শৃংখলা খেলিছে, কিন্তু ইংলেণ্ডৰ বিৰুদ্ধে যিকোনো ফৰ্মেটত প্ৰথম মুখামুখি হ’বলৈ গৈ আছে দলটোৱে ।

যোৱাবাৰ টি-২০ বিশ্বকাপত হৈছিল সংঘৰ্ষ-

শেষবাৰৰ বাবে ভাৰতীয় দল আৰু ইংলেণ্ডৰ মাজত তীব্ৰ সংঘৰ্ষ হৈছিল ২০২৪ চনৰ টি-২০ বিশ্বকাপত । তাৰ পিছত এই দুটা দলে ছেমি ফাইনেলত মুখামুখি হৈছিল । তেতিয়া অধিনায়কত্ব ৰোহিত শৰ্মাৰ হাতত আছিল । ২০২৪ চনৰ ২৭ জুনত গায়ানাত অনুষ্ঠিত হোৱা সেই উত্তেজনাপূৰ্ণ খেলখনত ভাৰতীয় দলটোৱে জোছ বাটলাৰৰ অধিনায়কত্বত থকা ইংৰাজ দলটোক ৬৮ ৰানত পৰাস্ত কৰিছিল ।

এই জয়ৰ পাছত ভাৰতীয় দলটোৱে টি-২০ বিশ্বকাপৰ ফাইনেলত প্ৰৱেশ কৰে । য’ত তেওঁলোকে দক্ষিণ আফ্ৰিকাক ৭ ৰানত পৰাস্ত কৰি খিতাপ দখল কৰে । এনে পৰিস্থিতিত সেই বিজয় ভাৰতৰ বাবে অতি বিশেষ আছিল । ফাইনেলত জয়লাভ কৰাৰ পাছত অধিনায়ক ৰোহিত শৰ্মা আৰু বিৰাট কোহলীয়ে টি-২০ ইণ্টাৰনেশ্যনেলৰ পৰা অৱসৰ লোৱাৰ কথা ঘোষণা কৰে । ঠিক পিছদিনাই স্পীন অল-ৰাউণ্ডাৰ ৰবীন্দ্ৰ জাডেজাইও এই ফৰ্মেটৰ পৰা বিদায় লয় ।

ভাৰত আৰু ইংলেণ্ডৰ মাজত সমান প্ৰতিযোগিতা-

টি-২০ ইণ্টাৰনেশ্যনেলত ভাৰত আৰু ইংলেণ্ডৰ মাজত সদায় কঠোৰ প্ৰতিযোগিতা চলি আহিছে । এই পৰ্যন্ত দুয়োটা দলৰ মাজত মুঠ ২৪খন খেল অনুষ্ঠিত হৈছে, ইয়াৰে ভাৰতীয় দলটোৱে ১৩খন খেলত জয়লাভ কৰিছে । আনহাতে ইংলেণ্ডে ১১খন টি-২০ মেচত জয়লাভ কৰিছে । এইদৰে দুয়োৰে মাজত সমান প্ৰতিযোগিতা দেখা যায় ।

টি-২০ত ভাৰত বনাম ইংলেণ্ড-

মুঠ মেচ : ২৪

ভাৰতৰ জয়লাভ : ১৩

ইংলেণ্ডৰ জয়লাভ : ১১

ইংলেণ্ডৰ ভাৰত ভ্ৰমণ ২০২৫-

টি২০ ছিৰিজঃ

১ম টি২০- ২২ জানুৱাৰী, কলকাতা

২য় টি২০- ২৫ জানুৱাৰী, চেন্নাই

৩য় টি২০- ২৮ জানুৱাৰী, ৰাজকোট

৪ৰ্থ টি২০- ৩১ জানুৱাৰী, পুনে

৫ম টি২০- ২ ফেব্ৰুৱাৰী, মুম্বাই

এদিনীয়া ছিৰিজ-

প্ৰথম এদিনীয়া, ০৬ ফেব্ৰুৱাৰী, নাগপুৰ

দ্বিতীয় এদিনীয়া, ০৯ ফেব্ৰুৱাৰী, কটক

তৃতীয় এদিনীয়া, ১২ ফেব্ৰুৱাৰী, আহমেদাবাদ

টেষ্ট ফৰ্মেটৰ পৰা অৱসৰ লোৱা সন্দৰ্ভত অৱশেষত নিজৰ মৌনতা ভংগ কৰিছে ভাৰতৰ অধিনায়ক ৰোহিত শৰ্মাই । উল্লেখ্য যে ছিডনী টেষ্ট মেচত দলৰ মূল একাদশৰ পৰা বাহিৰত আছে হিটমেন । তেওঁৰ পৰিৱৰ্তে এই টেষ্টত অধিনায়কৰ দায়িত্ব দিয়া হৈছে যশপ্ৰীত বুমৰাহক । ইয়াৰ পিছতেই টেষ্ট ক্ৰিকেটৰ পৰা ৰোহিত শৰ্মাই অৱসৰ গ্ৰহণ কৰিব বুলি জল্পনা-কল্পনাৰ সৃষ্টি হৈছিল । কিন্তু এতিয়া টেষ্ট ফৰ্মেটৰ পৰা অৱসৰ সন্দৰ্ভত ৰোহিতে এটা ডাঙৰ মন্তব্য দিছে ।

ছিডনী টেষ্টত এক সাক্ষাৎকাৰত ৰোহিতে অৱসৰ সন্দৰ্ভত প্ৰতিক্ৰিয়া প্ৰকাশ কৰে আৰু পোনপটীয়াকৈ নিশ্চিত কৰে যে তেওঁ এতিয়াও টেষ্ট ক্ৰিকেটৰ পৰা অৱসৰ লোৱাৰ সিদ্ধান্ত লোৱা নাই । ৰোহিতে নিজৰ বিবৃতিত কয় যে, “এতিয়া ৰান অহা নাই, কিন্তু ৫ মাহৰ পিছতো যে নাহে তাৰ কোনো নিশ্চয়তা নাই । মই কঠোৰ পৰিশ্ৰম কৰিম ।”

ৰোহিতে অৱসৰ সন্দৰ্ভত কয়, “চাওক, মই ফৰ্মত নাই । ছিডনী টেষ্টৰ পৰা আঁতৰি অহাটো মোৰ নিজৰ সিদ্ধান্ত আছিল । কিন্তু মই অৱসৰৰ কথা ভবা নাই । মোৰ বেটে বৰ্তমান কাম কৰা নাই । মই এজন দুটা সন্তানৰ পিতৃ, মই বুদ্ধিমান, মই জানো কি কৰিব লাগে আৰু কেতিয়া কৰিব লাগে । দলৰ আউট অৱ ফৰ্ম বেটছমেনে ইমান গুৰুত্বপূৰ্ণ মেচ খেলাৰ সুযোগ পাব নালাগে, গতিকে মই বাহিৰত বহিবলৈ সিদ্ধান্ত লৈছো ।”

ভাৰতীয় কিংবদন্তি ক্ৰিকেটাৰ ৰোহিতে আৰু কয় যে, “বাহিৰত লেপটপ, কলম আৰু কাগজ লৈ বহি থকা মানুহে অৱসৰ কেতিয়া হ’ব আৰু মই কি সিদ্ধান্ত ল’ব লাগিব সেইটো সিদ্ধান্ত ল’ব নোৱাৰে ।”

উল্লেখ্য যে বিগত কিছুদিনৰ পৰা ৰোহিতে টেষ্টত ভাল প্ৰদৰ্শন আগবঢ়াব পৰা নাই, যাৰ বাবে অৱসৰৰ কথা চৰ্চালৈ আহিছে । ভাৰতত নিউজীলেণ্ডৰ বিৰুদ্ধে খেলা টেষ্ট ছিৰিজতো ৰোহিতে বিশেষ প্ৰদৰ্শন কৰিব পৰা নাছিল । ইয়াৰ বাহিৰেও বৰ্ডাৰ-গাভাস্কাৰ ছিৰিজত ৫ ইনিংছত মাত্ৰ ৩১ ৰানহে কৰিবলৈ সক্ষম হৈছে ৰোহিতে ।

ৰোহিতে এতিয়া টেষ্ট ক্ৰিকেটৰ পৰা আঁতৰি আহিব বুলি কোৱা সকলো জল্পনা-কল্পনাৰ অন্ত পেলাইছে । উল্লেখ্য যে এতিয়া বৰ্ডাৰ-গাভাস্কাৰ ছিৰিজৰ পিছত জুন মাহত ইংলেণ্ডৰ বিৰুদ্ধে টেষ্ট ছিৰিজ খেলিবলৈ গৈ আছে ভাৰতীয় দলটোৱে ।