ৰাছিয়া আৰু ইউক্ৰেইনৰ মাজত যুদ্ধৰ অন্ত পেলাবলৈ আলোচনা অব্যাহত আছে । কিন্তু প্ৰকৃত বাকযুদ্ধ চলি আছে আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু ইউক্ৰেইনৰ ৰাষ্ট্ৰপতি জেলেনস্কিৰ মাজত । ইয়াৰ মাজতে মাৰ্কিন ৰাষ্ট্ৰপতি ট্ৰাম্পে ৰাছিয়াৰ সুৰত সুৰ মিলোৱা পৰিলক্ষিত হৈছে । ট্ৰাম্পে দাবী কৰিছে যে জেলেনস্কি এজন ব্যৰ্থ, অ-জনপ্ৰিয় আৰু অবৈধভাৱে ক্ষমতাত আছে । ট্ৰাম্পে জেলেনস্কিক মধ্যমীয়া সফল কমেডিয়ান বুলি অভিহিত কৰে । ইয়াৰ উপৰিও ২০২২ চনত ৰাছিয়াৰ আক্ৰমণৰ বাবে ট্ৰাম্পে জেলেনস্কিক দোষাৰোপ কৰিছে ।

বুধবাৰে ট্ৰুথ ছ’চিয়েলত এটা পোষ্টত ট্ৰাম্পে জেলেনস্কিক “নিৰ্বাচন অবিহনে একনায়কত্ববাদী” বুলি অভিহিত কৰে । ট্ৰাম্পৰ এই বক্তব্য লগে লগে ৰাছিয়াৰ সংবাদ মাধ্যমে গ্ৰহণ কৰে । মঙলবাৰে ছৌদি আৰৱত ইউক্ৰেইন যুদ্ধৰ অন্ত পেলোৱাৰ বিষয়ে আমেৰিকা আৰু ৰাছিয়াই আলোচনা কৰাৰ সময়তে ট্ৰাম্পৰ এই মন্তব্য প্ৰকাশ পাইছে । জেলেনস্কিয়ে ইয়াৰ বিৰুদ্ধে প্ৰতিবাদ কৰি কৈছিল যে ইউক্ৰেইনৰ অবিহনে কোনো সিদ্ধান্ত ল’ব নোৱাৰি ।

আমেৰিকাৰ ৰাষ্ট্ৰপতিৰ এই বক্তব্যৰ পিছত জেলেনস্কিয়ে প্ৰত্যুত্তৰ দি কয় যে ট্ৰাম্পক ভুল তথ্যই আগুৰি আছে । জেলেনস্কিয়ে কয় যে যদি কোনোবাই মোক আঁতৰাব বিচাৰে, তেন্তে তেওঁলোকে এতিয়াই কৰিব নোৱাৰিব ।’ জেলেনস্কিয়ে কয় যে ট্ৰাম্প ৰাছিয়াৰ পৰা অহা অপপ্ৰচাৰেৰে আগুৰি আছে আৰু ইয়াৰ প্ৰমাণ আমাৰ হাতত আছে ।

যুদ্ধৰ প্ৰথম অৱস্থাত জেলেনস্কিৰ জনপ্ৰিয়তা তুংগত আছিল যদিও সময়ৰ লগে লগে ২০২৪ চনত নিৰ্বাচন অনুষ্ঠিত হ’বলগীয়া আছিল যদিও ইউক্ৰেইনৰ সামৰিক আইন অনুসৰি ভোটদান হ’ব নোৱাৰে । আন্তঃৰাষ্ট্ৰীয় মানদণ্ড অনুসৰি ন্যায্য নিৰ্বাচন অনুষ্ঠিত কৰাটো প্ৰায় অসম্ভৱ, যিহেতু দেশখনৰ কমেও পঞ্চমাংশ ৰাছিয়াই দখল কৰিছে, লাখ লাখ ইউক্ৰেইনী দেশৰ বাহিৰত আছে আৰু হাজাৰ হাজাৰ লোকে যুঁজি আছে ।

আমেৰিকা যুক্তৰাষ্ট্ৰৰ ৪৭ সংখ্যক ৰাষ্ট্ৰপতি হিচাপে শপত লোৱাৰ পূৰ্বে ৰাছিয়াৰ ৰাষ্ট্ৰপতি ভ্লাদিমিৰ পুটিনে ডনাল্ড ট্ৰাম্পক অভিনন্দন জনায়, যিয়ে তেওঁৰ প্ৰশাসনৰ অধীনত আমেৰিকাৰ সৈতে উন্নত সম্পৰ্কৰ আশা ব্যক্ত কৰে । নিৰাপত্তা পৰিষদৰ সদস্যসকলৰ সৈতে এটা ভিডিঅ’ কলৰ সময়ত ৰাছিয়াৰ ৰাষ্ট্ৰপতিয়ে কয়, আমি ট্ৰাম্প আৰু তেওঁৰ দলৰ সদস্যসকলৰ এনে মন্তব্য শুনি আছো যে তেওঁলোকে ৰাছিয়াৰ সৈতে পোনপটীয়া সম্পৰ্ক পুনৰস্থাপন কৰিব বিচাৰে, যিটো আমাৰ দোষ অবিহনে পূৰ্বৰ চৰকাৰে বন্ধ কৰি দিছিল ।

পুটিনে কয়, আমি তেওঁলোকৰ বক্তব্য শুনি আছো যে তৃতীয় বিশ্বযুদ্ধ প্ৰতিহত কৰিবলৈ তেওঁ সকলো কৰিব লাগে । আমি নিশ্চিতভাৱে এনে ধৰণৰ দৃষ্টিভংগীক আদৰণি জনাইছো আৰু আমেৰিকা যুক্তৰাষ্ট্ৰৰ ৰাষ্ট্ৰপতি হিচাপে কাৰ্যভাৰ গ্ৰহণ কৰাৰ বাবে তেওঁক অভিনন্দন জনাইছো ।

ৰাছিয়াৰ ৰাষ্ট্ৰপতিগৰাকীয়ে আৰু কয় যে ইউক্ৰেইনৰ সৈতে সম্ভাৱ্য শান্তি চুক্তিৰ বিষয়ে আলোচনা কৰিবলৈ মস্কো সাজু । কিন্তু এয়া কেৱল সাময়িক যুদ্ধবিৰতি হ’ব নালাগে, বৰঞ্চ স্থায়ী শান্তি আৰু ৰাছিয়াৰ স্বাৰ্থৰ প্ৰতি লক্ষ্য ৰাখিব লাগে । উল্লেখযোগ্য যে ৰাষ্ট্ৰপতি হোৱাৰ পূৰ্বে ট্ৰাম্পে কেইবাবাৰো কৈছিল যে শপত গ্ৰহণ কৰাৰ চৌবিশ ঘণ্টাৰ ভিতৰতে ৰাছিয়া-ইউক্ৰেইন যুদ্ধৰ অন্ত পেলাব পাৰে ।