লোকসভাত বৃহস্পতিবাৰে মাজনিশা গৃহীত হ’ল ৱাকফ সংশোধনী বিধেয়ক । ১২ ঘণ্টাৰো অধিক সময় ধৰি চলি থকা মাৰাথন বিতৰ্কৰ অন্তত লোকসভাই ৱাকফ (সংশোধনী) বিধেয়ক ২০২৫ গৃহীত কৰে । এই বিধেয়কখনে ২৮৮ টা ভোট সপক্ষে আৰু ২৩২ টা বিৰোধী ভোট লাভ কৰে । আলোচনা সমাপ্ত হোৱাৰ পাছতে অধ্যক্ষ ওম বিৰলাই ভোটদান পৰিচালনা কৰে । এই সময়ছোৱাত বিধেয়কখনৰ সপক্ষে ২৮৮টা ভোট লাভ কৰাৰ বিপৰীতে বিপক্ষে ২৩২টা ভোট লাভ কৰে আৰু এইদৰে মাজনিশা ২ বজাত লোকসভাত ৱাকফ সংশোধনী বিধেয়কখন গৃহীত হয় । ইয়াৰ পূৰ্বে সদনত গৌৰৱ গগৈ, ওৱাইছিকে ধৰি বহু সদস্যই অনা সংশোধনী নাকচ কৰা হয় ।

আলোচনাৰ সময়ত শাসকীয় দলৰ সাংসদসকলে বিধেয়কখনক সমৰ্থন কৰাৰ বিপৰীতে বিৰোধী সাংসদসকলে ইয়াৰ তীব্ৰ বিৰোধিতা কৰে । এই সময়ছোৱাত বহু সময়ত বিশৃংখলতাও দেখা যায় । নিজৰ কথা উত্থাপন কৰাৰ পিছত এ আই এম আই এমৰ সাংসদ ওৱাইছিয়ে ৱাকফ বিল ফালি পেলায়, যাৰ ওপৰত শাসকীয় দলে প্ৰশ্ন উত্থাপন কৰে । বিজেপিৰ সাংসদ জগদম্বিকা পালে ইয়াক অসাংবিধানিক বুলি অভিহিত কৰে ।

লোকসভাত গৃহীত ৱাকফ বিধেয়ক, কি ক’লে ৰিজিজুৱে-

ভোটদানৰ পূৰ্বে বিধেয়কখনৰ ওপৰত হোৱা আলোচনাৰ প্ৰতি সঁহাৰি জনাই কেন্দ্ৰীয় সংখ্যালঘু পৰিক্ৰমা মন্ত্ৰী কিৰেন ৰিজিজুৱে বিৰোধীক তীব্ৰ আক্ৰমণ কৰে । কাৰণ অবিহনে অভিযোগ উত্থাপন কৰাটো ভুল বুলিও তেওঁ কয় । তেওঁ কয় যে, আমি সংসদৰ সদস্য, আমি ব্যৱহাৰ কৰা শব্দবোৰ বুজি পোৱা উচিত । একাংশ সদস্যই উত্থাপন কৰা কথাবোৰত যুক্তি আছে যদিও কিছুমান অযুক্তিকৰ কথাও কোৱা হৈছে । ইফালে বিৰোধী দলৰ একাংশ সাংসদে কয় যে যদি এই বিধেয়কখন অসাংবিধানিক তেন্তে তেওঁলোকে ক’ব লাগে যে ই কেনেকৈ অসাংবিধানিক ।

আলোচনাৰ প্ৰতিক্ৰিয়া প্ৰকাশ কৰি কিৰেন ৰিজিজুৱে কয় যে সংখ্যালঘু লোকৰ বাবে বিশ্বত ভাৰততকৈ সুৰক্ষিত স্থান নাই । এই দেশৰ গৰিষ্ঠসংখ্যক লোকে নিজকে ধৰ্মনিৰপেক্ষ বুলি গণ্য কৰে । বিৰোধীয়ে চৰকাৰক সমালোচনা কৰিব পাৰে, কিন্তু ভাৰতত সংখ্যালঘু নিৰাপদ নহয় বুলি কোৱাটো সঠিক নহয় । তেওঁ কয়, ‘মই নিজে সংখ্যালঘু আৰু ক’ব পাৰো যে সংখ্যালঘু ভাৰততকৈ ক’তো নিৰাপদ নহয় । প্ৰতিটো সংখ্যালঘু সম্প্ৰদায়ে এই দেশত মৰ্যাদাৰে জীৱন নিৰ্বাহ কৰে ।‘

বিধেয়কখন মুছলমান আৰু ইছলাম বিৰোধী নহয়ঃ কিৰেন ৰিজিজু

ৰিজিজুৱে কয় যে এই বিধেয়কখন মুছলমান আৰু ইছলাম বিৰোধী নহয় । এয়া সম্পূৰ্ণ সাংবিধানিক । যদি এই বিধেয়কখন ইতিমধ্যে আছে তেন্তে ই কেনেকৈ অসাংবিধানিক হ’ব পাৰে ? প্ৰতিটো ভূমি দেশৰ মাটি । তেওঁ বিৰোধীক তৰ্ক অবিহনে অভিযোগ নকৰিবলৈ স্পষ্টকৈ কয় । কিৰেন ৰিজিজুৱে আলোচনাৰ প্ৰতিক্ৰিয়া প্ৰকাশ কৰাৰ পিছত ৱাকফ বিধেয়কখনৰ ওপৰত ভোটদান কৰা হয় য’ত ২৮৮টা ভোটৰ সপক্ষে আৰু ২৩২টা বিপক্ষে ভোটদান হয় । এইদৰে বিধেয়কখন লোকসভাত গৃহীত হয় ।

লোকসভাত উত্থাপন হৈছে ৱাকফ সংশোধনী বিধেয়ক । এই বিধেয়কখন দাখিল কৰাৰ লগে লগে কংগ্ৰেছে লোকসভাত হুলস্থুলীয়া পৰিৱেশৰ সৃষ্টি কৰে । কংগ্ৰেছে অভিযোগ কৰে যে কালি (১ এপ্ৰিল) বিয়লি তেওঁলোকে বিধেয়কখন লাভ কৰিছিল, যাৰ বাবে তেওঁলোকে সংশোধনী দিবলৈ সময় নাপালে । ইফালে কংগ্ৰেছে উত্থাপন কৰা এই অভিযোগৰ ততাতৈয়াকৈ প্ৰত্যুত্তৰ দিয়ে গৃহমন্ত্ৰী অমিত শ্বাহে ।

কে চি বেণুগোপালে দৰ্শালে আপত্তি-

কংগ্ৰেছত সাংসদ কে.চি. বেনুগোপালে কয়, “আপুনি সদনত যিখন বিধেয়ক (ৱাকফ সংশোধনী বিধেয়ক) আনিছে, অন্ততঃ সদস্যসকলৰ সংশোধনী কৰাৰ অধিকাৰ থাকিব লাগে । আপুনি বলপূৰ্বকভাৱে আইন জাপি দিছে । সংশোধনীৰ বাবে সময় দিব লাগে । সংশোধনীৰ বাবে বহু ব্যৱস্থা আছে ।”

গৃহমন্ত্ৰী অমিত শ্বাহে দিলে উত্তৰ-

 বেনুগোপালৰ এই বক্তব্যৰ প্ৰত্যুত্তৰ দি গৃহমন্ত্ৰী অমিত শ্বাহে কয়, ‘মই সদনৰ সন্মুখত উত্থাপন হোৱা পইণ্ট অৱ অৰ্ডাৰৰ মূল কথা ৰাখিব বিচাৰো । ভাৰত চৰকাৰৰ কেবিনেটে এখন বিধেয়ক অনুমোদন কৰি সদনত দাখিল কৰে । ইয়াক যুটীয়া সংসদীয় সমিতিলৈ প্ৰেৰণ কৰা হয়, যাৰ বাবেও বিৰোধীয়ে অনুৰোধ জনায় । এই বিধেয়কখন বিবেচনা কৰি কমিটীয়ে মতামত দিলে । তাৰ পিছত এই মতামত পুনৰ মন্ত্ৰীসভালৈ প্ৰেৰণ কৰা হ’ল ।‘

তেওঁ পুনৰ কয় যে, কেবিনেটে জে পি চিৰ পৰামৰ্শ গ্ৰহণ কৰি সংশোধনী সদনত দাখিল কৰে কিৰেন ৰিজিজুৱে । কেবিনেটে অনুমোদন দিলেহে এয়া সম্ভৱ, গতিকে ইয়াত কোনো পইণ্ট অৱ অৰ্ডাৰ আছে বুলি মই বিশ্বাস নকৰো । আপোনাৰ অনুৰোধ আছিল যে জে পি চি গঠন হওক । যদি কমিটীয়ে কোনো সালসলনি নকৰে তেন্তে ইয়াৰ কি লাভ ?  আমাৰ কমিটীয়ে কংগ্ৰেছৰ দৰে কেৱল ছীল-মোহৰ মৰাৰ কাম নকৰে, আলোচনাৰ অন্তত সঠিক সিদ্ধান্ত গ্ৰহণ কৰি প্ৰয়োজনীয় সালসলনি কৰে ।‘

কেন্দ্ৰীয় চৰকাৰে যোৱা বছৰৰ আগষ্ট মাহত লোকসভাত এই বিধেয়ক উত্থাপন কৰিছিল । কিন্তু পিছত সৰ্বসন্মতিক্ৰমে এই বিধেয়কখন যুটীয়া সংসদীয় সমিতি (জে পি চি)লৈ প্ৰেৰণ কৰা হয় । প্ৰায় ছমাহ ধৰি বিধেয়কখনৰ সংশোধনৰ বাবে দিয়া পৰামৰ্শসমূহ জে পি চিয়ে বিবেচনা কৰি ২৭ জানুৱাৰীত সংসদত পুনৰ উত্থাপন কৰাত অনুমোদন জনায় ।