ভাৰতীয় মূলৰ আমেৰিকান মহাকাশচাৰী সুনীতা উইলিয়ামছে মহাকাশত ৯ মাহ কটোৱাৰ পাছত ১৮ মাৰ্চত পৃথিৱীলৈ উভতি আহে । পৃথিৱীলৈ উভতি অহাৰ পিছত সোমবাৰে প্ৰথমবাৰৰ বাবে সংবাদ মাধ্যমক সম্বোধন কৰি মহাকাশত কটোৱা ৯ মাহৰ অভিজ্ঞতা ব্যক্ত কৰে তেওঁ ।

মহাকাশৰ পৰা উভতি অহাৰ পিছত সুনীতা উইলিয়ামছে প্ৰথম সাক্ষাৎকাৰত কয় যে আমাক ঘৰলৈ ঘূৰাই অনাৰ বাবে নাছা, বয়িং, স্পেচএক্স আৰু এই অভিযানৰ সৈতে জড়িত সকলোকে ধন্যবাদ জনাইছো । পৃথিৱীলৈ ঘূৰি অহা প্ৰায় দুসপ্তাহ হ’ল । এতিয়া আমাক সোধা হৈছে আমি কি কৰি আছো ?  গতিকে মই আপোনালোকক কওঁ যে আমি নতুন প্ৰত্যাহ্বানৰ বাবে প্ৰস্তুতি চলাইছো । নতুন মিছনৰ বাবে প্ৰস্তুতি ।

সুনীতা উইলিয়ামছে ক’লে যে আমি প্ৰথমবাৰৰ বাবে নতুন মহাকাশযানখনত আছিলো । আমাৰ সমগ্ৰ মনোযোগ আছিল যিটো মিছনৰ বাবে আমি মহাকাশ কেন্দ্ৰলৈ গৈছিলোঁ সেইটো সম্পূৰ্ণ কৰাত । আমি বহু ধৰণৰ মহাকাশ পৰীক্ষা কৰিলোঁ । আমি মহাকাশত আবদ্ধ হৈ থকা যেন কেতিয়াও অনুভৱ হোৱা নাছিল । পৃথিৱীত কি হৈ আছে আমি নাজানিছিলো ? এক প্ৰকাৰে আমি পৃথিৱীৰ চাৰিওফালে ঘূৰি থকা নাছিলোঁ কিন্তু পৃথিৱীখন আমাৰ চাৰিওফালে ঘূৰি আছিল । আমি নিশ্চিতভাৱে ঘৰলৈ উভতি আহিব পাৰিম বুলি একেবাৰে আত্মবিশ্বাসী আছিলো ।

উইলিয়ামছে কয় যে ১৮ মাৰ্চত তেওঁ ৯ মাহৰ পিছত প্ৰথমবাৰৰ বাবে পৃথিৱীত ভৰি দিছিল । গতিকে প্ৰথমে তেওঁৰ স্বামী আৰু পোহনীয়া কুকুৰবোৰক সাৱটি ধৰিব বিচাৰিছিল । খাদ্য এনেকুৱা বস্তু যিয়ে আমাক ঘৰৰ কথা মনত পেলাই দিয়ে । দেউতা নিৰামিষভোজী আছিল গতিকে ঘৰ পাই প্ৰথমে খাইছিলো এটা ভাল গ্ৰীল কৰা চীজ চেণ্ডুইচ ।

মহাকাশত আবদ্ধ হৈ থকাৰ বাবে সংবাদ মাধ্যমত চলি থকা বিভিন্ন আখ্যানৰ সন্দৰ্ভত উইলিয়ামছে কয় যে ই আন্তঃৰাষ্ট্ৰীয় মহাকাশ কেন্দ্ৰৰ কাৰ্যসূচী । আমি জানিছিলোঁ যে কথাবোৰ ভুল হ’ব পাৰে গতিকে আমি ইয়াৰ বাবে সাজু আছিলো । বহু লোকে অনুষ্ঠানটোৰ ওপৰত চকু ৰাখিছিল । আমাৰ উভতি অহাৰ উপযুক্ত সময় তেওঁলোকে জানিছিল । আমি সেই সিদ্ধান্তৰ বাবে অপেক্ষা কৰি আছিলো, যিটো একেবাৰে শুদ্ধ ।

আৰোগ্যৰ কথা কওঁতে তেওঁ কয় যে বিশেষজ্ঞসকলে আমাৰ পুনৰ্বাসনৰ ওপৰত সম্পূৰ্ণৰূপে মনোনিৱেশ কৰিছে । পৃথিৱীলৈ ঘূৰি অহাৰ পিছৰে পৰা আমি বিশেষজ্ঞসকলে নিৰ্ধাৰিত প্ৰট’কল মানি চলি আহিছো । আমাৰ আৰোগ্য লাহে লাহে হৈ আছে ।

মহাকাশৰ পৰা ভাৰতক দেখাৰ অভিজ্ঞতা-

সুনীতা উইলিয়ামছে কয় যে ভাৰত অসাধাৰণ । আমি প্ৰতিবাৰেই হিমালয়ৰ ওপৰেৰে পাৰ হৈ যোৱাৰ সময়ত বাটচ উইলমাৰে হিমালয়ৰ অবিশ্বাস্য ফটো তুলিছিল । মহাকাশৰ পৰা হিমালয়ৰ দৃশ্য চমৎকাৰ । আমাৰ এনে লাগিছিল যেন ভাৰতত ঢৌ উঠিছে আৰু তললৈ বৈ আছে । ভাৰতৰ বহু ৰং আছে, পূবৰ পৰা পশ্চিমলৈ যোৱাৰ লগে লগে উপকূলত মাছ ধৰা নাওৰ বহৰে গুজৰাট আৰু মুম্বাইৰ আগমনৰ ইংগিত দিয়ে । দিনৰ ভাগত হিমালয় পৰ্বত দেখিলে আচৰিত লাগিছিল । ভাৰতত ডাঙৰ চহৰৰ পৰা সৰু চহৰলৈকে পোহৰৰ নেটৱৰ্ক দেখা যায়, যিটো ৰাতি অবিশ্বাস্য দেখা যায় ।

সৌৰজগতৰ আটাইতকৈ আচৰিত আৰু সুন্দৰ গ্ৰহ শনি গ্ৰহটো বিস্ময়কৰ আঙঠিৰ বাবে জনাজাত যদিও আচৰিত খবৰটো হ’ল এই আঙঠি কিছু সময়ৰ বাবে অদৃশ্য হৈ পৰিব । কিন্তু কিয় ?  এয়া স্থায়ী পৰিৱৰ্তন নে সাময়িক ?

বিজ্ঞানীসকলৰ মতে, “Ring Plane Crossing” নামৰ এটা জ্যোতিৰ্বিজ্ঞানৰ পৰিঘটনাৰ বাবে ২০২৫ চনৰ ২৩ মাৰ্চত শনিৰ আঙঠি পৃথিৱীৰ পৰা দেখা পোৱাটো বন্ধ হৈ যায়, কিন্তু আতংকিত হোৱাৰ প্ৰয়োজন নাই, এইটো এটা স্বাভাৱিক প্ৰক্ৰিয়া আৰু কিছু সময়ৰ পিছত এই আঙঠি পুনৰ দৃশ্যমান হ’ব । এই জ্যোতিৰ্বিজ্ঞানৰ পৰিঘটনাটো বিতংভাৱে জানক ।

শনিৰ আঙঠি কিয় নোহোৱা হৈ গৈছে ?

আচলতে শনিৰ নিজস্ব অক্ষ ২৬.৭ ডিগ্ৰী হেলনীয়া । শনিয়ে সূৰ্য্যক প্ৰদক্ষিণ কৰাৰ লগে লগে এই হেলনীয়া গুৰুত্বপূৰ্ণ হৈ পৰে । শনি গ্ৰহত এবছৰ পৃথিৱীত ২৯.৪ বছৰৰ সমান । শনি গ্ৰহে নিজৰ কক্ষপথত ঘূৰি থকাৰ লগে লগে ইয়াৰ আঙঠিৰ হেলনীয়াও ক্ৰমান্বয়ে সলনি হয় । এই আঙঠি যেতিয়া পৃথিৱীৰ লগত এটা লাইনত আহে তেতিয়া ইহঁতক অতি পাতল যেন লাগে বা একেবাৰে নোহোৱা হৈ যায় । ঠিক যেনেকৈ অতি পাতল বস্তু এটা কাষৰ পৰা চালে ইয়াক অদৃশ্য যেন লাগে ।

এয়া স্থায়ী পৰিৱৰ্তন নেকি ?

আচলতে এইটো এটা সাময়িক পৰিঘটনা । ২০২৫ চনৰ মাৰ্চ মাহত শনিৰ আঙঠিবোৰ পুনৰ দৃশ্যমান হ’ব যদিও ২০২৫ চনৰ নৱেম্বৰ মাহত পুনৰ অদৃশ্য হৈ পৰিব । ইয়াৰ পিছত ২০৩২ চনলৈকে সম্পূৰ্ণৰূপে স্পষ্টকৈ দেখা যাব । গতিকে এয়া কেৱল জ্যোতিৰ্বিজ্ঞানৰ ঘটনাৰ প্ৰভাৱ আৰু শনিৰ আঙঠিবোৰ সদায় থকাৰ দৰেই থাকিব ।

শনিৰ আঙঠিৰ গঠন-

শনিৰ আঙঠিবোৰ মূলতঃ বৰফ, ধূলি আৰু সৰু সৰু শিলৰ দ্বাৰা গঠিত । ১৭০,০০০ মাইল (২৭৩,৬০০ কিলোমিটাৰ)তকৈও অধিক বিস্তৃত, কিন্তু মাত্ৰ প্ৰায় ৩০ ফুট (১০ মিটাৰ) ডাঠ । এই আঙঠিবোৰ যেতিয়া পৃথিৱীৰ লগত একে শাৰীত থাকে তেতিয়া ইহঁতৰ প্ৰস্থ ইমানেই পাতল হৈ পৰে যে ইহঁতক প্ৰায় অদৃশ্য যেন লাগে ।

শনিৰ আঙঠিবোৰ সম্পূৰ্ণৰূপে নাইকিয়া হ’ব পাৰেনে ?

একাংশ বিজ্ঞানীৰ মতে শনিৰ আঙঠিবোৰ লাহে লাহে নোহোৱা হৈ যাব পাৰে । নাছাৰ এক অধ্যয়ন অনুসৰি “আঙঠি বৰষুণ” নামৰ প্ৰক্ৰিয়াৰ বাবে শনিৰ আঙঠিবোৰ লাহে লাহে নাইকিয়া হৈ আহিছে । এই প্ৰক্ৰিয়া শনিৰ চুম্বকীয় ক্ষেত্ৰৰ ফলত বৰফ আৰু ধূলিৰ কণা গ্ৰহটোৰ পৃষ্ঠত পৰি যায় । এই প্ৰক্ৰিয়া চলি থাকিলে ৩০ কোটি বছৰৰ পিছত শনিৰ আঙঠিবোৰ সম্পূৰ্ণৰূপে নাইকিয়া হৈ যাব পাৰে । অৱশ্যে এইটো অতি লেহেমীয়া প্ৰক্ৰিয়া আৰু বৰ্তমান আমি ইয়াক লৈ চিন্তা কৰাৰ প্ৰয়োজন নাই ।