মণিপুৰ আৰক্ষীয়ে গ্ৰেপ্তাৰ কৰিছে উত্তৰাখণ্ডৰ পৰা তিনিজন যুৱক । এই তিনিগৰাকীৰ বিৰুদ্ধে মণিপুৰৰ কেইবাজনো বিধায়কক কেন্দ্ৰীয় গৃহমন্ত্ৰী অমিত শ্বাহৰ পুত্ৰ বুলি অভিহিত কৰাৰ অভিযোগ উত্থাপন হৈছে । অভিযুক্তকেইজনে বিধায়কক মুখ্যমন্ত্ৰী বনোৱাৰ বিনিময়ত ৪ কোটি টকা দাবী কৰিছিল । মণিপুৰত যোৱা মাহত এন বীৰেণ সিঙে মুখ্যমন্ত্ৰীৰ পদৰ পৰা পদত্যাগ কৰিছিল, তাৰ পিছত ৰাজ্যখনত ৰাষ্ট্ৰপতিৰ শাসন জাপি দিয়া হয় ।

ঘটনাটো কি ?  

এন বীৰেণ সিঙৰ পদত্যাগৰ পিছত ৰাজ্যখনৰ বহু বিধায়কলৈ ফোন আহিছিল য’ত ফোন কৰাজনে নিজকে কেন্দ্ৰীয় গৃহমন্ত্ৰী অমিত শ্বাহৰ পুত্ৰ জয় শ্বাহ বুলি পৰিচয় দি কয় যে যদি তেওঁলোকে ৪ কোটি টকা দিয়ে তেন্তে তেওঁক মুখ্যমন্ত্ৰী বনাব পৰা যাব । এই সন্দৰ্ভত আৰক্ষীয়ে অভিযোগ পোৱাত তদন্ত আৰম্ভ কৰে । আৰক্ষীয়ে জনোৱা মতে, তদন্তৰ অন্তত উত্তৰাখণ্ডৰ পৰা তিনিজন অভিযুক্তক গ্ৰেপ্তাৰ কৰি তিনিওজনকে ইম্ফললৈ অনা হয় । অভিযুক্ত কেইটা উত্তৰ প্ৰদেশৰ নিধৌৰী কলনৰ বাসিন্দা উৱেইছ আহমেদ, দিল্লীৰ গাজীপুৰৰ বাসিন্দা গৌৰৱ নাথ আৰু প্ৰিয়ংশু পন্ট বুলি চিনাক্ত কৰা হৈছে ।

দুটা নিষিদ্ধ সংগঠনৰ ১০ জন সদস্যক গ্ৰেপ্তাৰ-

মণিপুৰৰ দুটা নিষিদ্ধ উগ্ৰপন্থী সংগঠনৰ সৈতে জড়িত ১০ জন লোকক আৰক্ষীয়ে গ্ৰেপ্তাৰ কৰিছে । বুধবাৰে আৰক্ষীয়ে জনোৱা মতে, নিষিদ্ধ সংগঠন কাংগলেইপাক কমিউনিষ্ট পাৰ্টিৰ অস্থায়ী শিবিৰৰ পৰা ৭ জন লোকক গ্ৰেপ্তাৰ কৰা হৈছে । ইম্ফল পশ্চিমৰ তেৰা উৰাক অঞ্চলৰ পৰা গ্ৰেপ্তাৰ কৰাহয় তেওঁলোকক । সন্দেহজনক লোককেইজনৰ পৰা অস্ত্ৰ-শস্ত্ৰ আৰু মোবাইল ফোন উদ্ধাৰ কৰা হৈছে । ইম্ফল ইষ্টৰ খুৰাই চিংগাবাম অঞ্চলৰ পৰা এই সংগঠনৰ সৈতে জড়িত আৰু দুজন লোকক আৰক্ষীয়ে গ্ৰেপ্তাৰ কৰে । মণিপুৰ আৰক্ষীয়ে নিষিদ্ধ সংস্থা প্ৰেপেকৰ সৈতে জড়িত এজন সন্দেহজনক লোককো গ্ৰেপ্তাৰ কৰিছে । মণিপুৰৰ কাকচিং আৰু বিষ্ণুপুৰ জিলাৰ লোকৰ পৰা ধন দাবীৰ লগত জড়িত আছিল সন্দেহযুক্ত লোক ।

শনিবাৰে কাংপোকপিত মণিপুৰ ৰাজ্যিক পৰিবহণৰ এখন বাছত আক্ৰমণৰ ঘটনা সংঘটিত হয় । ইম্ফলৰ পৰা পাহাৰীয়া অঞ্চললৈ আন্তঃজিলা বাছ সেৱা পুনৰ আৰম্ভ কৰাৰ পিছতে এই ঘটনা সংঘটিত হয় । উল্লেখ্য যে, মণিপুৰত জাতিগত সংঘৰ্ষ আৰম্ভ হোৱাৰ পিছৰে পৰা এই বাছ সেৱা স্থগিত ৰখা হৈছিল ।

গগামিফাই অঞ্চলত বাহনলৈ শিলগুটি নিক্ষেপ-

বিগত বৰ্ষৰ ডিচেম্বৰ মাহত ৰাজ্য চৰকাৰে ইম্ফলৰ পৰা কাংপোকপি আৰু চুৰাচান্দপুৰলৈ ৰাজহুৱা বাছ সেৱা পুনৰ আৰম্ভ কৰাৰ চেষ্টা কৰিছিল । কিন্তু ইম্ফলৰ মইৰাংখোমৰ মণিপুৰ ৰাজ্যিক পৰিবহণ (এম এছ টি) ষ্টেচনত কোনো যাত্ৰী বাছখনত উঠা নাছিল । বিষয়াসকলে জনোৱা মতে, সেনাপতি জিলা অভিমুখে গৈ থকা বাছখন কাংপকপি জিলাৰ গামগামিফাই অঞ্চলত একাংশ লোকে শিলগুটি নিক্ষেপ কৰে । নিৰাপত্তা বাহিনীয়ে কন্দুৱা গেছ আৰু লাঠীচাৰ্জ কৰি উত্তেজিত লোকক ছত্ৰভংগ দিয়াৰ ফলত একাংশ প্ৰতিবাদকাৰী আহত হয় ।

আন্তঃজিলা বাছ সেৱা আৰম্ভ-

ইম্ফল বিমানবন্দৰৰ পৰা কোনো যাত্ৰী নোহোৱাকৈ পাহাৰীয়া জিলা চুৰাচান্দপুৰ আৰু সেনাপতিলৈ ৰাওনা হয় বাছ । এই বাছসমূহক কেন্দ্ৰীয় বাহিনীৰ বৃহৎ কনভয়ৰ দ্বাৰা নিৰাপত্তা প্ৰদান কৰা হৈছিল, য’ত সেনা জোৱানো আছিল । চুৰাচান্দপুৰ অভিমুখে যোৱা বাছখনে বিষ্ণুপুৰ জিলা পাৰ হৈ কোনো ধৰণৰ ষ্টপেজ নোহোৱাকৈ কংৱাইত উপস্থিত হয় । সেনাপতি জিলা অভিমুখে যোৱা বাছখনে কাংপকপি হৈ ইম্ফল জিলাৰ কংলাটংবিলৈ কোনো বাধাৰ সন্মুখীন হোৱা নাছিল । জনসাধাৰণৰ অসুবিধা নূন্যতম কৰি ৰাজ্যৰ পৰিস্থিতি স্বাভাৱিক কৰাৰ পদক্ষেপ হিচাপে ৰাজ্যিক পৰিবহণ বাছ সেৱা পুনৰ আৰম্ভ কৰা হয় ।

কঠোৰ ব্যৱস্থা গ্ৰহণৰ নিৰ্দেশ কেন্দ্ৰীয় গৃহমন্ত্ৰীৰ-

কেন্দ্ৰীয় গৃহমন্ত্ৰী অমিত শ্বাহে শেহতীয়াকৈ নিৰাপত্তা বাহিনীক নিৰ্দেশ দিছিল যে ৮ মাৰ্চৰ পৰা মণিপুৰৰ সকলো পথতে মানুহৰ মুক্ত চলাচল নিশ্চিত কৰাৰ লগতে বাধা সৃষ্টি কৰা সকলৰ বিৰুদ্ধে কঠোৰ ব্যৱস্থা গ্ৰহণ কৰিব লাগে । মণিপুৰৰ নিৰাপত্তা পৰিস্থিতিৰ পৰ্যালোচনাৰ বাবে এখন বৈঠকৰ অধ্যক্ষতা কৰি তেওঁ কয় যে কেন্দ্রই ৰাজ্যখনৰ স্থায়ী শান্তি পুনৰুদ্ধাৰৰ বাবে সম্পূৰ্ণ দায়বদ্ধ আৰু এই ক্ষেত্ৰত প্ৰয়োজনীয় সকলো সহায় আগবঢ়াইছে । উত্তৰ-পূব ৰাজ্যত ৰাষ্ট্ৰপতিৰ শাসন জাপি দিয়াৰ পিছত এইখনেই আছিল প্ৰথমখন বৈঠক । ২০২৩ চনৰ মে’ মাহৰ পৰা ৰাজ্যখনত অব্যাহত আছে জাতিগত হিংসা । এই হিংসাত দুশ পঞ্চাশজনৰো অধিক লোকে প্ৰাণ হেৰুৱাইছে ।