মণিপুৰ চৰকাৰে শনিবাৰে অশান্ত ৯খন জিলাত মোবাইল ইন্টাৰনেট সেৱাৰ ওপৰত নিষেধাজ্ঞা ৯ ডিচেম্বৰলৈ বৃদ্ধি কৰে । ইম্ফল পশ্চিম, ইম্ফল পূৱ, কাকচিং, বিষ্ণুপুৰ, থৌবাল, চুৰাচান্দপুৰ, কংপোকপি, ফেৰজাৱাল আৰু জিৰিবাম জিলাৰ প্ৰচলিত আইন-শৃংখলাৰ পৰিস্থিতি পুনৰীক্ষণ কৰি এই সিদ্ধান্ত লোৱা হৈছে বুলি গৃহ মন্ত্ৰালয়ে জাৰি কৰা নিৰ্দেশত প্ৰকাশ কৰিছে ।

নিৰ্দেশত কোৱা হৈছে যে জনস্বাৰ্থত ৯ ডিচেম্বৰৰ সন্ধিয়া ৫.১৫ বজালৈ ভিছাট আৰু ভি পি এনকে ধৰি মোবাইল ইন্টাৰনেট আৰু মোবাইল ডাটা সেৱা স্থগিত ৰখা হ’ব । অৱশ্যে, “ৰাজ্য চৰকাৰৰ দ্বাৰা অনুমোদিত” বিষয়বোৰ ৰেহাই দিয়া হৈছে । জিৰি আৰু বৰাক নদীৰ পৰা তিনিগৰাকী মহিলা আৰু তিনিটা শিশুৰ মৃতদেহ উদ্ধাৰ হোৱাৰ পিছত ৰাজ্যখনত হিংসাত্মক ঘটনা সংঘটিত হোৱাৰ পিছত ১৬ নৱেম্বৰত এই জিলাসমূহত ইণ্টাৰনেট সেৱা স্থগিত ৰখা হৈছিল ।

স্বাস্থ্য সুবিধা, শিক্ষানুষ্ঠান আৰু বিভিন্ন কাৰ্যালয়ৰ সমস্যাৰ প্ৰতি লক্ষ্য ৰাখি চৰকাৰে ১৯ নৱেম্বৰত ব্ৰডবেণ্ড সেৱাৰ ওপৰত নিলম্বন প্ৰত্যাহাৰ কৰে । অৱশ্যে ৱাইফাই বা হটস্পট শ্বেয়াৰ কৰাৰ অনুমতি নাছিল ।

AFSPAৰ বিৰুদ্ধে ৰেলী বাহিৰ হ’ব-

অল মণিপুৰ ইউনাইটেড ক্লাবছ অৰ্গেনাইজেশ্যনৰ নেতৃত্বত ইম্ফল ভেলীৰ পাঁচটা নাগৰিক সংগঠনে সশস্ত্ৰ বাহিনী বিশেষ ক্ষমতা আইন (AFSPA) অব্যাহত ৰখাৰ বিৰুদ্ধে মঙলবাৰে এক সমদল উলিয়াব আৰু মণিপুৰত শান্তি পুনৰুদ্ধাৰৰ দাবী উত্থাপন কৰিব । এই সংগঠনসমূহৰ আহ্বায়ক প্ৰতাপ লীছাংথেমে কয় যে আন্তঃৰাষ্ট্ৰীয় মানৱ অধিকাৰ দিৱস উপলক্ষে মঙলবাৰে আফছপাৰ বিৰুদ্ধে আৰু ৰাজ্যখনৰ স্বাভাৱিক অৱস্থা পুনৰ ঘূৰাই অনাৰ বাবে এক সমদল উলিওৱা হ’ব ।

লীছাংথেমে সকলো ৰাইজক সেইদিনা কাম বন্ধ কৰি ৰেলীত যোগদান কৰিবলৈ আহ্বান জনাইছে । এই সমাৱেশৰ অধীনত প্ৰায় পাঁচ কিলোমিটাৰ দূৰত্ব অতিক্ৰম কৰা হ’ব । পইৰেই লিমাৰোল মীৰা পাইবি আপুনবা মণিপুৰ, সদৌ মণিপুৰ স্বেচ্ছাসেৱী সন্থা, মানৱ অধিকাৰ সমিতি (COHR) মণিপুৰ ছাত্ৰ ফেডাৰেচনে ইয়াত অংশগ্ৰহণ কৰিব ।

মণিপুৰত জব্দ অস্ত্ৰ আৰু গোলাবাৰুদ-

মণিপুৰৰ থৌবাল জিলাত নিৰাপত্তাৰক্ষীয়ে জব্দ কৰিছে অস্ত্ৰ আৰু গোলাবাৰুদ । আৰক্ষীৰ মতে, শুকুৰবাৰে পেচি চিংলাকৰ পাদদেশত অভিযান চলাই জব্দ কৰা হয় এই গোলাবাৰুদসমূহ । জব্দ কৰা অস্ত্ৰ-শস্ত্ৰ আৰু গোলাবাৰুদৰ ভিতৰত আছে এটা এছ এম জি কাৰ্বাইন, মেগজিন, তিনিটা হেণ্ড গ্ৰেনেড, চাৰিটা কাৰ্টিজ আৰু এটা ৰেডিঅ’ চেট ।