বুধবাৰে মণিপুৰৰ চন্দেল জিলাত অসম ৰাইফলছ আৰু উগ্ৰপন্থীৰ মাজত এক ভয়াৱহ সংঘৰ্ষত কমেও ১০ উগ্ৰপন্থী নিহত হয় । এই অভিযান এতিয়াও চলি আছে । ম্যানমাৰ সীমান্তৰ নিউ ছামতাল গাঁৱৰ সমীপত সন্দেহযুক্ত সশস্ত্ৰ উগ্ৰপন্থীৰ চলাচল সম্পৰ্কে লাভ কৰা গোপন তথ্যৰ পিছত সেনাই এই অভিযান আৰম্ভ কৰে ।

ছ’চিয়েল মিডিয়া প্লেটফৰ্ম ‘এক্স’ত এই তথ্য প্ৰকাশ কৰি ভাৰতীয় সেনাৰ ইষ্টাৰ্ণ কমাণ্ডে জনোৱা মতে, ১৪ মে’ত স্পিয়াৰ কৰ্পছৰ অধীনত খেংজয় তহচিলৰ নিউ ছামতাল গাঁৱত অসম ৰাইফলছৰ এটা ইউনিটে এই অভিযান আৰম্ভ কৰে । এই অঞ্চলটো ভাৰত-ম্যানমাৰ আন্তঃৰাষ্ট্ৰীয় সীমান্তৰ ওচৰত, যিটো প্ৰায়ে উগ্ৰপন্থী কাৰ্যকলাপৰ কেন্দ্ৰবিন্দু হৈ আছে ।

সেনাবাহিনীৰ মতে, “অপাৰেচনৰ সময়ত যেতিয়া জোৱানসকলে অঞ্চলটো ঘেৰাও কৰিছিল, তেতিয়া সন্দেহযুক্ত উগ্ৰপন্থীয়ে তেওঁলোকৰ ওপৰত গুলীচালনা আৰম্ভ কৰে । প্ৰত্যুত্তৰত জোৱানসকলে সংযম আৰু কৌশলেৰে গুলীচালনা কৰিছিল । এই এনকাউণ্টাৰত ১০ উগ্ৰপন্থী নিহত হৈছে ।” লগতে সেনাই জনোৱা মতে, বৃহৎ পৰিমাণৰ অস্ত্ৰ-শস্ত্ৰ আৰু গুলীও উদ্ধাৰ কৰা হৈছে ।

জানিব পৰা মতে অঞ্চলটোত আৰু অধিক উগ্ৰপন্থীয়ে আত্মগোপন কৰাৰ সম্ভাৱনাৰ প্ৰতি লক্ষ্য ৰাখি এতিয়াও এই তালাচী অভিযান অব্যাহত আছে । অভিযানৰ সময়ত কোনো জোৱান হতাহত হোৱাৰ খবৰ পোৱা নাই । মণিপুৰত চলি থকা হিংসাৰ মাজতে এই কাৰ্যক নিৰাপত্তা বাহিনীয়ে এক গুৰুত্বপূৰ্ণ সফলতা বুলি গণ্য কৰিছে ।

মণিপুৰৰ পূব ইম্ফল জিলাত মেইটেই সংগঠন আৰম্বাই টেংগোলেৰ সদস্য আৰু নিষিদ্ধ ইউনাইটেড নেচনেল লিবাৰেচন ফ্ৰণ্টৰ সদস্যৰ মাজত সংঘৰ্ষৰ সৃষ্টি হয় । ইয়াৰ ফলত চাৰিজন উগ্ৰপন্থী আহত হয় । আৰক্ষীৰ জিম্মাত লোৱা হৈছে আহত ইউ এন এল এফ (পাম্বাই)ৰ চাৰিজন উগ্ৰপন্থী । বৰ্তমান চিকিৎসালয়ত চিকিৎসাধীন হৈ থকা অৱস্থাত তেওঁলোকৰ অৱস্থা বিপদ মুক্ত বুলি জানিব পৰা গৈছে ।

শনিবাৰে বিয়লি আৰম্বাই টেংগোলে গোটৰ প্ৰায় ১৫-২০ জন সদস্যই কংপাল চিংগাংবাম লেইকাইত থকা ইৰেংবাম নন্দকুমাৰ সিং (৫৬) নামৰ ইউ এন এল এফৰ উগ্ৰপন্থীৰ ঘৰত প্ৰৱেশ কৰি ইম্ফল উপত্যকাৰ সংগঠনটোৰ উগ্ৰপন্থীক আক্ৰমণ কৰে বুলি আৰক্ষীয়ে জনায় । ঘৰটোত উপস্থিত থকা ইউ এন এল এফ (পাম্বাই)ৰ চাৰিজন উগ্ৰপন্থীক লাঠিৰে প্ৰহাৰ কৰা হয় ।

তেওঁ কয় যে দুয়োপক্ষৰ পৰা কেইবাটাও ৰাউণ্ড গুলীচালনা হয় । জিম্মাত লোৱা হৈছে ইউ এন এল এফ (পাম্বাই)ৰ চাৰিজন উগ্ৰপন্থী । আনহাতে আক্ৰমণকাৰী ঘটনাস্থলীৰ পৰা পলায়ন কৰিবলৈ সক্ষম হয় ।

শনিবাৰে নিশা নিৰাপত্তা বাহিনীয়ে জিলাখনৰ খুৰাই অঞ্চলৰ আৰম্বাই টেংগোলৰ এটা কাৰ্যালয়ত অভিযান চলাই তিনিখন চাৰিচকীয়া বাহন, ১৫ গ্ৰাম সন্দেহযুক্ত হেৰ’ইন, ৮খন বুলেটপ্ৰুফ প্লেট, তিনিটা বেতাঁৰ হেণ্ডছেট, এটা ইনছাছৰ বেয়নেট, দুখন তৰোৱাল আৰু অন্যান্য আপত্তিজনক নথি-পত্ৰ জব্দ কৰে । এই পৰ্যন্ত আৰাম্বাই টেংগোলেৰ কোনো সদস্যক গ্ৰেপ্তাৰ কৰা হোৱা নাই ।

ইফালে কুকি অধ্যুষিত চুৰাচান্দপুৰ জিলাত ভুৱা আৰু উত্তেজনামূলক বাতৰি প্ৰচাৰৰ বাবে হোৱাটছএপ গ্ৰুপ আৰু ছ’চিয়েল মিডিয়া চেনেলৰ বিৰুদ্ধে ৬খন এফ আই আৰ ৰুজু কৰিছে আৰক্ষীয়ে । আন চেনেলৰ বিৰুদ্ধেও আইনী ব্যৱস্থা লোৱাৰ সকীয়নি দিছে আৰক্ষীয়ে ।