একেৰাহে অষ্টমবাৰৰ বাবে বিশ্বৰ আটাইতকৈ সুখী দেশ হিচাপে পৰিগণিত হৈছে ফিনলেণ্ড । ১৪৭খন দেশৰ এই ৰেংকিঙত ভাৰতে ১১৮ নম্বৰ স্থান লাভ কৰিছে । যোৱা বছৰ এই ৰেংকিঙত ভাৰত ১২৬ নম্বৰ স্থানত আছিল । এইদৰে ভাৰতৰ ৰেংকিঙত ৮টা স্থান উন্নত হৈছে । অৱশ্যে আশ্চৰ্যজনক কথাটো হ’ল এইবাৰো পাকিস্তানে এই তালিকাত ভাৰতক অতিক্ৰম কৰিছে । এই সূচকাংকত ১০৯ নম্বৰ স্থান লাভ কৰিছে পাকিস্তানে ।

অক্সফৰ্ড বিশ্ববিদ্যালয়ৰ ৱেলবিয়িং ৰিচাৰ্চ চেণ্টাৰে প্ৰকাশ কৰা ৱৰ্ল্ড হেপিনেছ ৰিপৰ্ট ২০২৫ অনুসৰি সুখ কেৱল অৰ্থনৈতিক বিকাশৰ দ্বাৰা নিৰ্ধাৰিত নহয়, মানুহৰ মাজত পাৰস্পৰিক বিশ্বাস আৰু সামাজিক বন্ধনেও ইয়াত ডাঙৰ ভূমিকা পালন কৰে । প্ৰতিবেদন অনুসৰি আন নৰ্ডিক দেশসমূহো পুনৰবাৰ সুখৰ ৰেংকিঙত শীৰ্ষত আছে । ফিনলেণ্ডৰ উপৰিও ডেনমাৰ্ক, আইচলেণ্ড আৰু ছুইডেন শীৰ্ষ চাৰিটা স্থানত আছে । নিজৰ জীৱনৰ ৰেটিং দিবলৈ কোৱাৰ সময়ত মানুহে দিয়া উত্তৰৰ ওপৰত ভিত্তি কৰি দেশসমূহৰ ৰেংকিং কৰা হৈছে । বিশ্লেষণ প্ৰতিষ্ঠান গ্যালাপ আৰু ৰাষ্ট্ৰসংঘৰ বহনক্ষম উন্নয়ন সমাধান নেটৱৰ্কৰ সৈতে অংশীদাৰিত্বৰে এই অধ্যয়ন কৰা হৈছে ।

কোনবোৰ দেশে হেপীনেছ ইনডেস্কত আধিপত্য বিস্তাৰ কৰিছে আৰু কোনবোৰ দেশ পিছ পৰি আছে ?

সুখী মানুহৰ ৰেংকিঙত আমেৰিকা এতিয়ালৈকে সৰ্বনিম্ন স্থানত উপনীত হৈছে । ৰেংকিঙৰ শীৰ্ষ ২০ স্থানত ইউৰোপীয় দেশৰ আধিপত্য আছে যদিও ইয়াৰ কিছু ব্যতিক্ৰম আছে । হামাছৰ সৈতে যুদ্ধ হোৱাৰ পিছতো ইজৰাইলৰ স্থান অষ্টম । কোষ্টা ৰিকা আৰু মেক্সিকোৱে প্ৰথমবাৰৰ বাবে সুখী দেশৰ শীৰ্ষ দহখন স্থানত প্ৰৱেশ কৰি ক্ৰমে ষষ্ঠ আৰু দশম স্থান লাভ কৰিছে । এই ৰেংকিঙত আমেৰিকাই ২৪ নম্বৰ স্থানত উপনীত হৈছে । ইয়াৰ পূৰ্বে ২০১২ চনত দেশখন ১১ নম্বৰ স্থানত আছিল ।

প্ৰতিবেদনত কোৱা হৈছে যে বিগত দুটা দশকত আমেৰিকাত অকলে খাদ্য খোৱা লোকৰ সংখ্যা ৫৩ শতাংশ বৃদ্ধি পাইছে । এই তালিকাত যুক্তৰাজ্যৰ স্থান ২৩ । এই ৰেংকিঙত আফগানিস্তানক বিশ্বৰ আটাইতকৈ অসুখী দেশ হিচাপে অভিহিত কৰা হৈছে । আফগান মহিলাসকলে কয় যে তেওঁলোকৰ জীৱন বিশেষভাৱে কঠিন । পশ্চিম আফ্ৰিকাৰ দ্বিতীয় অসুখী দেশ ছিয়েৰা লিয়ন, তাৰ পিছতে তলৰ পৰা তৃতীয় স্থানত আছে লেবানন ।

বিশ্বৰ ২০খন সুখী দেশ-

ফিনলেণ্ড, ডেনমাৰ্ক, আইচলেণ্ড, ছুইডেন, নেদাৰলেণ্ড, কোষ্টা ৰিকা, নৰৱে, ইজৰাইল, লাক্সেমবাৰ্গ, মেক্সিকো, অষ্ট্ৰেলিয়া, নিউজীলেণ্ড, চুইজাৰলেণ্ড, বেলজিয়াম, আয়াৰলেণ্ড, লিথুৱেনিয়া, অষ্ট্ৰিয়া, কানাডা ।

হেপীনেছ ইনডেস্কত আটাইতকৈ বেয়া ৰেংকিং-

আফগানিস্তান (নং ১৪৭) পুনৰবাৰ তালিকাৰ তলত । সুখৰ ক্ষেত্ৰত ছিয়েৰা লিয়ন (১৪৬ নং), লেবানন (১৪৫ নং), মালাউই (১৪৪ নং) আৰু জিম্বাবুৱে (১৪৩ নং) দেশৰ ভিতৰত আছে ।

ভাৰত-চীন সম্পৰ্কত প্ৰধানমন্ত্ৰী নৰেন্দ্ৰ মোদীৰ ইতিবাচক বক্তব্যক সোমবাৰে প্ৰশংসা কৰে চীনে । প্ৰধানমন্ত্ৰী মোদীয়ে পাৰস্পৰিক মতানৈক্যৰ পৰিৱৰ্তে আলোচনাক অগ্ৰাধিকাৰ দিয়াৰ কথা কৈছিল । চীনে কয় যে দুয়োখন দেশৰ সফলতাৰ একমাত্ৰ বিকল্প ‘হাতী’ আৰু ‘ড্ৰেগন’ৰ যৌথ নৃত্য ।

চীনৰ বৈদেশিক মন্ত্ৰালয়ৰ মুখপাত্ৰ মাও নিঙে প্ৰধানমন্ত্ৰী মোদীৰ সংবাদ মাধ্যমৰ বক্তব্যৰ প্ৰশংসা কৰে, যিটো তেওঁ আমেৰিকাৰ প’ডকাষ্ট হোষ্ট লেক্স ফ্ৰিডমেনৰ সৈতে হোৱা বাৰ্তালাপত প্ৰকাশ কৰিছিল । মাওৱে কয়, ‘ভাৰত-চীন সম্পৰ্কৰ সন্দৰ্ভত প্ৰধানমন্ত্ৰী মোদীয়ে শেহতীয়াকৈ দিয়া ইতিবাচক বক্তব্য চীনে লক্ষ্য কৰিছে । চীনে ইয়াৰ শলাগ লৈছে ।

মাও নিঙে লগতে কয় যে অক্টোবৰ মাহত ৰাছিয়াৰ কাজানত প্ৰধানমন্ত্ৰী মোদী আৰু ৰাষ্ট্ৰপতি জি জিনপিঙৰ মাজত এখন সফল বৈঠক হৈছিল, যিয়ে দ্বিপাক্ষিক সম্পৰ্কৰ উন্নতি আৰু বিকাশৰ বাবে কৌশলগত দিশ প্ৰদান কৰিছিল । দুয়োখন দেশে উমৈহতীয়া চুক্তিসমূহ মানি চলি গুৰুত্বপূৰ্ণ আদান-প্ৰদান শক্তিশালী কৰি ইতিবাচক ফলাফল লাভ কৰে ।

২০০০ বছৰতকৈও অধিক সময়ৰ ইতিহাসত দুয়োখন দেশৰ মাজত বন্ধুত্বপূৰ্ণ সম্পৰ্ক আছে: চীন

তেওঁ আৰু কয়, মই এই কথাত গুৰুত্ব দিব বিচাৰিছো যে ২০০০ বছৰতকৈও অধিক সময়ৰ ইতিহাসত দুয়োখন দেশৰ মাজত বন্ধুত্বপূৰ্ণ যোগাযোগ আছে । দুয়োখন দেশে ইখনে সিখনৰ পৰা শিকিছে, মানৱতাৰ সভ্যতামূলক সাফল্য আৰু প্ৰগতিত অৰিহণা যোগাইছে । তেওঁ লগতে কয় যে চীন আৰু ভাৰত বিশ্বৰ বৃহত্তম উন্নয়নশীল দেশ আৰু তেওঁলোকৰ উন্নয়ন ত্বৰান্বিত কৰাৰ লগতে ইখনে সিখনৰ সফলতাক বুজি পোৱা আৰু সমৰ্থন কৰাৰ বাবে একেলগে কাম কৰে । ই ২.৮ বিলিয়নতকৈও অধিক লোকৰ স্বাৰ্থৰ সেৱা কৰে আৰু অঞ্চলটোৰ অন্যান্য দেশৰ উমৈহতীয়া আকাংক্ষা পূৰণ কৰে ।