ভাৰতীয় বায়ুসেনাৰ এয়াৰ মাৰ্শ্বাল এ.কে. ভাৰতীয়ে সোমবাৰে সংবাদ মাধ্যমৰ ব্রিফিঙত কয় যে ভাৰতৰ যুদ্ধ সন্ত্ৰাসবাদীৰ বিৰুদ্ধে আৰু পাকিস্তানে হস্তক্ষেপ কৰাৰ সিদ্ধান্ত লোৱাটো দুখজনক । ১০ মে’ত ভাৰত আৰু পাকিস্তানৰ মাজত যুদ্ধবিৰতি চুক্তি হোৱাৰ দুদিন পিছত ১২ মে’ত নতুন দিল্লীত অনুষ্ঠিত তিনিও সেনাৰ যৌথ সংবাদমেলত তেওঁ এই মন্তব্য কৰে । এয়াৰ মাৰ্শ্বাল এ.কে. ভাৰতীয়ে কয়, ‘এয়া বেলেগ ধৰণৰ যুদ্ধ আছিল আৰু সেয়া হোৱাটো নিশ্চিত । ভগৱানে নকৰক, কিন্তু যদি আন এটা যুঁজ হয়, তেন্তে শেষৰখনতকৈ সম্পূৰ্ণ বেলেগ হ’ব । ই মেকুৰী আৰু নিগনিৰ খেল আৰু আমি সদায় প্ৰতিদ্বন্দ্বীক পৰাস্ত কৰিবলৈ এখোজ আগুৱাই থাকিব লাগিব ।’

ভাৰতৰ তিনিওটা সেনাই যৌথ সংবাদমেলত পাকিস্তানক সকীয়াই দিয়ে যে যদিহে পুনৰ এনেধৰণৰ দুঃসাহস কৰে তেন্তে আমি যেতিয়াই আৰু য’তেই বিচাৰো তাতেই আক্ৰমণ কৰিব পাৰো । উল্লেখ্য যে বিগত ৭ মে’ত ভাৰতে অপাৰেচন সিন্দুৰ আৰম্ভ কৰিছিল, য’ত ২২ এপ্ৰিলত পহলগামত সংঘটিত সন্ত্ৰাসবাদী আক্ৰমণৰ প্ৰতিক্ৰিয়া স্বৰূপে পাকিস্তান আৰু পাকক অধিকৃত কাশ্মীৰৰ ৯টা সন্ত্ৰাসবাদী শিবিৰক লক্ষ্য কৰি লোৱা হৈছিল । পৰৱৰ্তী দুদিন অৰ্থাৎ ৮ আৰু ৯ মে’ৰ নিশা পাকিস্তানে ড্ৰোন আৰু মিছাইলেৰে ভাৰত আক্ৰমণৰ ব্যৰ্থ প্ৰচেষ্টা চলাইছিল । নিজৰ শক্তিশালী বায়ু প্ৰতিৰক্ষা ব্যৱস্থাৰ সহায়ত ভাৰতে পাকিস্তানৰ প্ৰতিটো আক্ৰমণ বিফল কৰাই নহয়, দেশখনৰ ১১টা বিমান ঘাটিত নিখুঁত আক্ৰমণ চলাই আঁঠু ল’বলৈ বাধ্য কৰিছিল । ভাৰতৰ আক্ৰমণ ইমানেই নিখুঁত আৰু ফলপ্ৰসূ আছিল যে পাকিস্তানে যুদ্ধবিৰতিৰ বাবে ভিক্ষা কৰিবলৈ বাধ্য হয় ।

পাকিস্তান সেনাৰ ডি জি এম অ’ই ভাৰতীয় সেনাৰ ডি জি এম অ’ৰ সৈতে যোগাযোগ কৰি যুদ্ধবিৰতিৰ প্ৰস্তাৱ দিয়ে যিটো ভাৰতীয় সেনাই মানি লয় । কাৰণ ভাৰতৰ লক্ষ্য কেতিয়াও যুদ্ধলৈ যোৱা নাছিল, কেৱল সন্ত্ৰাসবাদী আন্তঃগাঁথনিক লক্ষ্য কৰি লোৱাটোৱেই আছিল, য’ত ভাৰত সম্পূৰ্ণ সফল হৈছিল । এয়াৰ মাৰ্শ্বাল এ কে ভাৰতীয়ে ৰামচৰিত মানসৰ কিছু শাৰী পাঠ কৰে আৰু কয় যে পাকিস্তানত প্ৰৱেশ কৰি সন্ত্ৰাসবাদীৰ আত্মগোপন কৰা ঠাইবোৰ উৰুৱাই দিয়াৰ আঁৰৰ বাৰ্তা এইটোৱেই আছিল ।

তেওঁ কয় যে যেতিয়ালৈকে সন্ত্ৰাসবাদী আৰু সন্ত্ৰাসবাদৰ মালিকে নিজৰ কাৰ্য্যৰ বাবে শাস্তি পোৱাৰ ভয় নকৰে তেতিয়ালৈকে ভাৰতে নিজৰ কাম বন্ধ নকৰে । এয়াৰ মাৰ্শ্বাল এ.কে. ভাৰতীয়ে আৰু কয়, ‘আমাৰ সকলো সামৰিক ঘাটি আৰু ব্যৱস্থা সম্পূৰ্ণৰূপে কাৰ্যক্ষম আৰু প্ৰয়োজন হ’লে ভৱিষ্যতে যিকোনো অভিযান সম্পন্ন কৰিবলৈ সম্পূৰ্ণৰূপে সাজু ।’

অপাৰেচন সিন্দুৰ আৰু ভাৰতে পাকিস্তানৰ বিমান আক্ৰমণক যিদৰে ৰোধ আৰু নিষ্ক্ৰিয় কৰিছিল সেই সম্পৰ্কে মন্তব্য কৰি এয়াৰ মাৰ্শ্বাল ভাৰতীয়ে কয় যে ভাৰতৰ যুদ্ধ প্ৰমাণিত ব্যৱস্থাই সময়ৰ পৰীক্ষাত থিয় দিছে । এয়াৰ মাৰ্শ্বাল এ.কে. ভাৰতীয়ে কয়, ‘আন এটা মূল কথা হৈছে আমাৰ থলুৱা বায়ু প্ৰতিৰক্ষা ব্যৱস্থা আকাশৰ শক্তিশালী প্ৰদৰ্শন । এটা শক্তিশালী বায়ু প্ৰতিৰক্ষা ব্যৱস্থা গঢ়ি তোলা আৰু প্ৰয়োজনৰ সময়ত ৰাষ্ট্ৰীয় প্ৰতিৰক্ষাৰ বাবে ইয়াক ব্যৱহাৰ কৰাটো সম্ভৱ হৈছে কেৱল যোৱা দশকত ভাৰত চৰকাৰৰ পৰা লাভ কৰা বাজেট আৰু নীতিগত সহায়ৰ বাবে । তেওঁ কয় যে পাকিস্তানে ব্যৱহাৰ কৰা ড্ৰোন আৰু মানৱবিহীন যুদ্ধ বিমানেৰে আমাৰ আকাশমাৰ্গত অনুপ্ৰৱেশ কৰাৰ অগণন প্ৰচেষ্টাও আমাৰ থলুৱাভাৱে বিকশিত হাৰ্ড-কিল কাউণ্টাৰ ইউ এ এছ ব্যৱস্থা আৰু সু-প্ৰশিক্ষিত ভাৰতীয় বায়ু প্ৰতিৰক্ষা কৰ্মীয়ে বিফল কৰে ।

সোমবাৰে অপাৰেচন সিন্দুৰক লৈ আজি তিনিও সেনাৰ ডিজি অপাৰেচনৰ প্ৰেছ ব্রিফিং অনুষ্ঠিত হয় ৷ এই সময়ছোৱাত ভাৰতীয় সেনাৰ সামৰিক অভিযানৰ সঞ্চালক প্ৰধান লেফটেনেণ্ট জেনেৰেল ৰাজীৱ ঘাইয়ে কয় যে আমাৰ এয়াৰ ডিফেন্স চিষ্টেম সাজু আছিল । পাকিস্তানে আমাৰ এয়াৰ ডিফেন্স গ্ৰীড ব্যৱস্থাত ভেদ কৰিব নোৱাৰিলে ।

তেওঁ কয় যে সন্ত্ৰাসবাদী ঘটনাৰ পদ্ধতিৰ পৰিৱৰ্তন হৈছে । আমাৰ সামৰিক বাহিনীৰ লগতে নিজৰ ৰক্ষা কৰিব নোৱাৰা আমাৰ নিৰীহ নাগৰিকসকলকো আক্ৰমণ কৰা হৈছিল । ২০২৪ চনত জম্মুৰ শিৱখোৰী মন্দিৰলৈ অহা তীৰ্থযাত্ৰীৰ ওপৰত হোৱা আক্ৰমণ আৰু চলিত বৰ্ষৰ এপ্ৰিল মাহত পহলগামত নিৰীহ পৰ্যটকৰ ওপৰত হোৱা আক্ৰমণ এই বিপজ্জনক ধাৰাটোৰ নিৰ্দিষ্ট উদাহৰণ । পহলগাম অহাৰ সময়লৈকে এই পাপৰ পাত্ৰ ভৰি পৰিছিল । ইয়াৰ পিছত কি হৈছিল সেই বিষয়ে আমি ইতিমধ্যে বিতংভাৱে কথা পাতিছো । আমি ষ্ট্ৰাইক কৰিলোঁ । আমি সম্পূৰ্ণৰূপে জানিছিলোঁ যে পাকিস্তানেও আক্ৰমণ কৰিব, গতিকে আমি আমাৰ বায়ু প্ৰতিৰক্ষাৰ বাবে সম্পূৰ্ণ প্ৰস্তুতি চলাইছিলোঁ ।

ৰাজীৱ ঘাইয়ে ক’লে যে আমি সাজু হৈ আছিলো । আমাৰ এয়াৰ ডিফেন্স চিষ্টেমো সাজু হৈ আছিল । আমাৰ বায়ু প্ৰতিৰক্ষা ব্যৱস্থাটো দেৱালৰ দৰে থিয় হৈ আছিল । আমি আক্ৰমণৰ সৈতে মোকাবিলা কৰাৰ প্ৰস্তুতি চলাইছিলোঁ ।

সংবাদমেলত এয়াৰ অপাৰেচনৰ ডিজি এয়াৰ মাৰ্শ্বাল এ কে ভাৰতীয়ে কয় যে আমাৰ যুঁজখন সন্ত্ৰাসবাদ আৰু সন্ত্ৰাসবাদীৰ বিৰুদ্ধে । সেইবাবেই আমি ৭ মে’ত সন্ত্ৰাসবাদীৰ আত্মগোপন স্থানত আক্ৰমণ কৰিছিলো যদিও পাকিস্তানী সেনাই সন্ত্ৰাসবাদীক সমৰ্থন কৰাটো উপযুক্ত বুলি ভাবি এই যুদ্ধখনক নিজৰ যুদ্ধ কৰি লোৱাটো দুৰ্ভাগ্যজনক । এই পৰিস্থিতিত আমাৰ প্ৰতিশোধমূলক ব্যৱস্থাটো অত্যন্ত প্ৰয়োজনীয় আছিল, ইয়াত যিমানেই ক্ষতি নহওক কিয় । ইয়াৰ বাবে তেওঁলোক নিজেই দায়ী ।

তেওঁ কয় যে আমি সীমান্ত পাৰ নোহোৱাকৈয়ে আক্ৰমণ চলাইছিলো । আমি পাকিস্তানৰ ক্ষেপণাস্ত্ৰ ধ্বংস কৰিছিলো । আমাৰ এয়াৰ ডিফেন্স গ্ৰীডত ভেদ কৰিব নোৱাৰিলে । আমি সন্ত্ৰাসবাদীৰ ওপৰত নিখুঁত আক্ৰমণ চলাইছিলো ।

ভাৰত আৰু পাকিস্তানৰ মাজত ঘোষণা হোৱা যুদ্ধবিৰতিৰ পিছত ভাৰতীয় সেনাই সংবাদ মাধ্যমৰ জৰিয়তে দশক দশক ধৰি সন্ত্ৰাসবাদক প্ৰশ্ৰয় দি অহা চুবুৰীয়া দেশখনৰ প্ৰকৃত চৰিত্ৰ পুনৰ এবাৰ উদঙাই দিছে । শনিবাৰে সন্ধিয়া কমোডৰ ৰঘু আৰ নাইৰ, কৰ্ণেল ছফিয়া কুৰেছী আৰু উইং কমাণ্ডাৰ ব্যোমিকা সিঙে এখন সংবাদমেল অনুষ্ঠিত কৰে । কমোডৰ ৰঘু আৰ নাইৰে কয়, বৈদেশিক সচিবে কোৱাৰ দৰে আমি সকলো সামৰিক অভিযান বন্ধ কৰাত একমতত উপনীত হৈছো । যোৱা কেইদিনমানৰ পৰিঘটনাসমূহৰ বিষয়ে আমি আপোনালোকক তথ্য দিছো । ইয়াৰ পিছতে সংবাদমেলত উপস্থিত থকা কৰ্ণেল ছফিয়া কুৰেশ্বীয়ে পাকিস্তানে প্ৰচাৰ কৰি থকা মিছা অপপ্ৰচাৰ উদঙাই দিয়ে ।

-কৰ্ণেল ছফিয়া কুৰেশ্বীয়ে পাকিস্তানৰ ভুৱা অভিযোগ উদঙাই দি কয়, এতিয়া মই আপোনালোকক পাকিস্তানৰ ভুল তথ্য অভিযানৰ বিষয়ে ক’ম । প্ৰথমতে, পাকিস্তানে নিজৰ জে এফ ১৭ বিমানেৰে আমাৰ এছ-৪০০ আৰু ব্ৰাহ্মছ মিছাইল বেছসমূহৰ ক্ষতিসাধন কৰা বুলি প্ৰচাৰ কৰিছিল, যিটো একেবাৰে ভুল ।

-কৰ্ণেল ছফিয়া কুৰেশ্বীয়ে কয় যে পাকিস্তানে কৈছে তেওঁলোকে আমাৰ বিমানবন্দৰ ছিৰছা, জম্মু, পাঠানকোট, বাথিণ্ডা, নলিয়া আৰু ভুজত আক্ৰমণ কৰিছে, এই দাবীও একেবাৰে মিছা ।

-পাকিস্তানৰ তৃতীয়টো গোকাট মিছা কথা উদঙাই দি কৰ্ণেল ছফিয়াই কয় যে চণ্ডীগড় আৰু বিয়াছত থকা আমাৰ অস্ত্ৰ-শস্ত্ৰগাৰত আক্ৰমণ কৰা পাকিস্তানৰ দাবীটোও একেবাৰে মিছা । আমি আপোনালোকক কৈছিলো যে এই সকলোবোৰ ঠিকেই, সঠিক অৱস্থাত আছে ।

-মছজিদ আক্ৰমণ সন্দৰ্ভত পাকিস্তানে প্ৰচাৰ কৰা মিথ্যা উদঙাই দি কৰ্ণেল ছফিয়া কুৰেশ্বীয়ে কয় যে, পাকিস্তানে ভাৰতীয় সেনাই মছজিদসমূহৰ ক্ষতিসাধন কৰা বুলি ভুৱা অভিযোগ উত্থাপন কৰিছে । মই স্পষ্টকৈ ক’ব বিচাৰো যে ভাৰত এখন ধৰ্মনিৰপেক্ষ দেশ আৰু আমাৰ সেনাবাহিনী ভাৰতৰ সাংবিধানিক মূল্যবোধৰ অতি সুন্দৰ প্ৰতিফলন ।

লগতে কৰ্ণেল ছফিয়া কুৰেশ্বীয়ে লগতে কয় যে আমি পাকিস্তানৰ সামৰিক আন্তঃগাঁথনিৰ ক্ষতি কৰিলোঁ । ভাৰতে পাকিস্তানৰ স্কাৰডু, জাকুবাবাদ, সৰগোডা, বুলাৰী বিমানবন্দৰৰ ব্যাপক ক্ষতিসাধন কৰে । পাকিস্তানৰ বায়ু প্ৰতিৰক্ষা ব্যৱস্থা আৰু ৰাডাৰ ব্যৱস্থা অসাৰ হৈ পৰে । পাকিস্তানৰ কমাণ্ড এণ্ড কণ্ট্ৰল লজিষ্টিক ইনষ্টলেশ্যন আৰু এল অ’ চিৰ ওচৰৰ ইয়াৰ সামৰিক আন্তঃগাঁথনি আৰু কৰ্মীসকল ইমানেই বেয়াকৈ ক্ষতিগ্ৰস্ত হয় যে পাকিস্তানৰ আক্ৰমণাত্মক আৰু প্ৰতিৰক্ষামূলক ক্ষমতা ধ্বংস হৈ পৰে । মই পুনৰ ক’ব বিচাৰিছো যে ভাৰতীয় সেনা সম্পূর্ণৰূপে প্রস্তুত আৰু সজাগ ৷ ভাৰতৰ সাৰ্বভৌমত্ব আৰু অখণ্ডতা ৰক্ষাৰ বাবে আমি সম্পূৰ্ণ উৎসৰ্গিত ।