• July 20, 2026
Facebook-f Instagram Youtube Linkedin-in

চিকাৰ কৰিব শত্ৰুৰ বিমান… শ্বৰ্ট ৰেঞ্জ এয়াৰ ডিফেন্স চিষ্টেম ক্ৰয়ৰ বাবে নিবিদা জাৰি কৰিলে ভাৰতীয় সেনাই

May 4, 2025 ·

নেক্সট জেনেৰেচন ভেৰী শ্বৰ্ট ৰেঞ্জ এয়াৰ ডিফেন্স চিষ্টেম (VSHORADs-NG) ক্ৰয়ৰ প্ৰক্ৰিয়া আৰম্ভ কৰিছে ভাৰত চৰকাৰে । এই ব্যৱস্থাই দিন বা ৰাতি, সকলো বতৰত, আনকি বৰফে আবৃত্ত অঞ্চলতো আকাশী লক্ষ্যত আঘাত কৰিবলৈ সক্ষম হ’ব ।

প্ৰতিৰক্ষা মন্ত্ৰালয়ে Request for Proposal (RFP) অৰ্থাৎ ইয়াক ক্ৰয়ৰ বাবে নিবিদা জাৰি কৰিছে । এই নিবিদা শনিবাৰে ভাৰতীয় সেনাৰ ৱেবছাইটত প্ৰকাশ কৰা হয় । নিবিদাত উল্লেখ কৰা হৈছে যে মন্ত্ৰালয়ে ৪৮টা লঞ্চাৰ, ৪৮টা নাইট ভিজন ছাইট, ৮৫টা মিছাইল আৰু এটা মিছাইল টেষ্ট ষ্টেচন ব্যৱস্থা ক্ৰয় কৰিব বিচাৰিছে । এই সকলোবোৰ সামগ্ৰী ‘ক্ৰয় (ভাৰতীয়)’ শিতানত ক্ৰয় কৰা হ’ব । ইচ্ছুক ভাৰতীয় কোম্পানী সমূহক অংশগ্ৰহণৰ বাবে আমন্ত্ৰণ জনোৱা হৈছে ।

নিবিদা অনুসৰি আকাশী ক্ষেত্ৰত পৰিৱৰ্তিত ভাবুকিৰ প্ৰতি লক্ষ্য ৰাখি সেনাবাহিনীক ‘মেনপ’ৰ্টেবল’ (কান্ধত কঢ়িয়াই নিয়া) ক্ষেপণাস্ত্ৰ ব্যৱস্থাৰ প্ৰয়োজন । এই ক্ষেপণাস্ত্ৰ ব্যৱস্থা এনে পৰিস্থিতিৰ বাবে যেতিয়া আক্ৰমণ অতি ওচৰত থাকে আৰু শীঘ্ৰেই ধ্বংস কৰিব লাগে । এই মিছাইল ব্যৱস্থা ইনফ্ৰাৰেড হোমিং প্ৰযুক্তিৰ ওপৰত ভিত্তি কৰি নিৰ্মাণ কৰা হ’ব আৰু ই হ’ব ‘ফায়াৰ এণ্ড ফৰগেট’ অৰ্থাৎ লক্ষ্য কৰি পাহৰি যোৱা ।

এই ব্যৱস্থাত থাকিব ইনফ্ৰাৰেড মিছাইল, যিটো কান্ধৰ পৰা নিক্ষেপ কৰিব পৰা যাব । এই ব্যৱস্থাই দিন-ৰাতি যিকোনো পৰিস্থিতিত যুঁজাৰু বিমান, পৰিবহণ বিমান, হেলিকপ্টাৰ আৰু ড্ৰ’নক লক্ষ্য কৰি ল’ব পাৰিব ।

এই ব্যৱস্থা তিনিওটা বাহিনীয়ে (সেনা, নৌসেনা আৰু বায়ুসেনা) ব্যৱহাৰ কৰিব আৰু ইয়াক মাটি আৰু জাহাজত নিয়োগ কৰিব পাৰিব । ইয়াক দুটা ৰূপত ব্যৱহাৰ কৰা হ’ব – এটা মেনপৰ্টেবল চিংগল লঞ্চাৰ হিচাপে আৰু আনটো পেৰা ড্ৰপ অপাৰেচন হিচাপে । এই ব্যৱস্থাই পাহাৰ, সমভূমি, মৰুভূমি, সাগৰৰ পাৰ আদি প্ৰতিটো ভূখণ্ডত কাম কৰিবলৈ সক্ষম হ’ব । এই ব্যৱস্থাই -৩০ ডিগ্ৰীৰ পৰা ৫০ ডিগ্ৰী চেলছিয়াছলৈকে উষ্ণতাত কাম কৰিবলৈ সক্ষম হ’ব ।

ক্ষেপণাস্ত্ৰৰ সৰ্বোচ্চ ষ্ট্ৰাইক ৰেঞ্জ হ’ব ৬০০০ মিটাৰ বা তাতকৈ অধিক আৰু নূন্যতম ৰেঞ্জ ৫০০ মিটাৰৰ কম । এই ব্যৱস্থাটোৱে প্ৰতি ছেকেণ্ডত ৪০০ মিটাৰ বা তাতকৈ অধিক বেগত অহা লক্ষ্যকো আঘাত কৰিবলৈ সক্ষম হ’ব । এই ব্যৱস্থাটোৱে তিনি মিনিটৰ ভিতৰত পৰিবহণৰ পৰা ফায়াৰিং মোডলৈ ৰূপান্তৰিত কৰাৰ ক্ষমতা লাভ কৰিব । এই ব্যৱস্থাটো সামৰিক বাহন, জাহাজ, ৰে’ল আৰু বিমানেৰে পৰিবহণ কৰিব পাৰি, আৰু পেৰাচুটৰ দ্বাৰাও পেলাব পাৰি ।

‘টাৰ্গেট আৰু সময় সেনাই নিৰ্ধাৰণ কৰক’… উচ্চ পৰ্যায়ৰ বৈঠকত সেনাক সেউজ সংকেত দিলে প্ৰধানমন্ত্ৰী মোদীয়ে

April 29, 2025 ·

মঙলবাৰে প্ৰধানমন্ত্ৰী নৰেন্দ্ৰ মোদীয়ে প্ৰতিৰক্ষা মন্ত্ৰী ৰাজনাথ সিং, ৰাষ্ট্ৰীয় নিৰাপত্তা উপদেষ্টা অজিত ডোভাল আৰু তিনিওটা সশস্ত্ৰ বাহিনীৰ মুৰব্বীকে ধৰি প্ৰতিৰক্ষা বিভাগৰ শীৰ্ষ বিষয়াৰ সৈতে এক বৈঠকত মিলিত হয় । এই বৈঠকত অংশ লয় প্ৰতিৰক্ষা মুৰব্বী জেনেৰেল অনিল চৌহানে । প্ৰায় ডেৰ ঘণ্টা ধৰি চলে এই বৈঠক । দক্ষিণ কাশ্মীৰৰ পহলগামত সংঘটিত সন্ত্ৰাসবাদী আক্ৰমণৰ পিছত ভাৰতে প্ৰতিশোধৰ বিকল্পৰ কথা বিবেচনা কৰি থকাৰ সময়তে এই বৈঠক অনুষ্ঠিত হৈছে ।

বৈঠকত প্ৰধানমন্ত্ৰী মোদীয়ে কয় যে সন্ত্ৰাসবাদৰ বিৰুদ্ধে প্ৰবল আঘাত কৰাটো আমাৰ ৰাষ্ট্ৰীয় সংকল্প । প্ৰধানমন্ত্ৰীয়ে দেশৰ সশস্ত্ৰ বাহিনীৰ পেছাদাৰী সামৰ্থ্যৰ ওপৰত সম্পূৰ্ণ আস্থা প্ৰকাশ কৰে । প্ৰধানমন্ত্ৰীয়ে কয় যে সশস্ত্ৰ বাহিনীক কাৰ্য্যৰ পদ্ধতি, লক্ষ্য আৰু সময় নিৰ্ধাৰণৰ সম্পূৰ্ণ স্বাধীনতা প্ৰদান কৰা হৈছে ।

প্ৰধানমন্ত্ৰী নৰেন্দ্ৰ মোদীয়ে স্পষ্টকৈ কয় যে আক্ৰমণৰ বাবে দায়ী সন্ত্ৰাসবাদী আৰু তেওঁলোকৰ মালিকক পৃথিৱীৰ শেষ কোণলৈকে বিচাৰি কঠোৰতম শাস্তি দিয়া হ’ব । তেওঁৰ ইংগিত পাকিস্তানৰ প্ৰতি আছিল, কাৰণ পাকিস্তানৰ বিৰুদ্ধে ভাৰতত সন্ত্ৰাসবাদ বিয়পোৱাৰ ইতিহাস আছে । ইয়াৰ পূৰ্বে সোমবাৰে প্ৰতিৰক্ষা মন্ত্ৰী ৰাজনাথ সিঙে প্ৰধানমন্ত্ৰী মোদীক তেওঁৰ বাসগৃহ ৭ নং লোক কল্যাণ মাৰ্গত সাক্ষাৎ কৰে । এই বৈঠকত  চি ডি এছ জেনেৰেল অনিল চৌহানে পহলগাম সন্ত্ৰাসবাদী আক্ৰমণৰ পিছত গ্ৰহণ কৰা কিছু সিদ্ধান্তৰ বিষয়ে ৰাজনাথ সিঙক অৱগত কৰে ।

কেন্দ্ৰীয় চৰকাৰক বিৰোধী দলৰ সমৰ্থন-

পহলগাম আক্ৰমণৰ পিছত চৰকাৰে সৰ্বদলীয় বৈঠকো আহ্বান কৰিছিল । বৈঠকত বিৰোধী দলসমূহে সন্ত্ৰাসবাদীৰ বিৰুদ্ধে চৰকাৰে গ্ৰহণ কৰা যিকোনো ব্যৱস্থা সম্পূৰ্ণ সমৰ্থন কৰিব বুলি কয় ।

পাকিস্তানে পুনৰ উলংঘা কৰিলে যুদ্ধবিৰতি… নিশা LoC ত গুলীচালনা, ভাৰতীয় সেনাই দিলে প্ৰত্যুত্তৰ

April 27, 2025 ·

শনিবাৰে নিশা জম্মু-কাশ্মীৰৰ নিয়ন্ত্ৰণ ৰেখাৰ কাষত টুটমাৰী গলি আৰু ৰামপুৰ ছেক্টৰৰ বিপৰীতে অৱস্থিত ভাৰতীয় চকীলৈ লক্ষ্য কৰি পাকিস্তানী সেনাই গুলীচালনা কৰে । লগে লগে ভাৰতীয় সেনাইও এই গুলীচালনাৰ প্ৰত্যুত্তৰ দিয়ে । ভাৰতীয় সেনাৰ তথ্য অনুসৰি এই ঘটনাত কোনো লোক আহত হোৱা নাই ।

২২ এপ্ৰিলত পহলগামত সংঘটিত হোৱা সন্ত্ৰাসবাদী আক্ৰমণৰ পিছত সৃষ্টি হোৱা উত্তেজনাময় পৰিস্থিতৰ মাজতে এই ঘটনা সংঘটিত হৈছে । এই আক্ৰমণৰ বাবে পাকিস্তান সমৰ্থিত উগ্ৰপন্থীক দোষাৰোপ কৰা হৈছে যদিও পাকিস্তানে কোনো ধৰণৰ জড়িততা অস্বীকাৰ কৰি স্বতন্ত্ৰ তদন্তৰ দাবী জনাইছে । এই আক্ৰমণৰ পিছত ভাৰতে পাকিস্তানৰ বিৰুদ্ধে বহু কঠোৰ সিদ্ধান্ত গ্ৰহণ কৰিছে ।

উল্লেখ্য যে, পহলগামত সংঘটিত সন্ত্ৰাসবাদী আক্ৰমণৰ পিছত ভাৰতীয় সেনাবাহিনীয়ে অবিৰতভাৱে তৎপৰতা অব্যাহত ৰাখিছে আৰু তালাচী অভিযান অব্যাহত ৰাখিছে । শেহতীয়াকৈ কুলগাম জিলাৰ টাংমাৰ্গ অঞ্চলত নিৰাপত্তা বাহিনী আৰু সন্ত্ৰাসবাদীৰ মাজত সংঘৰ্ষ হৈছিল । অৱশ্যে সন্ত্ৰাসবাদী দলটো পলায়ন কৰিবলৈ সক্ষম হয় ।

কাশ্মীৰত সন্ত্ৰাসবাদী আৰু সমৰ্থকৰ বিৰুদ্ধে ডাঙৰ ব্যৱস্থা-

পহলগাম সন্ত্ৰাসবাদী আক্ৰমণৰ পিছতে কৰ্তৃপক্ষই কাশ্মীৰত উগ্ৰপন্থী আৰু সমৰ্থকৰ বিৰুদ্ধে ব্যাপক দমন চলাই তেওঁলোকৰ ঘৰ ভাঙি, আত্মগোপন কৰা স্থানত অভিযান চলাই আৰু শতাধিক সন্ত্ৰাসবাদী সহায়কক সোধা-পোছাৰ বাবে আটক কৰি ৰাখিছে ।

উধমপুৰত ভাৰতীয় সেনা আৰু সন্ত্ৰাসবাদীৰ মাজত সংঘৰ্ষ… এজন সেনা জোৱান শ্বহীদ

April 24, 2025 ·

উধমপুৰৰ দুদ্দু-বসন্তগড়ত সন্ত্ৰাসবাদী আৰু নিৰাপত্তাৰক্ষীৰ মাজত মুখামুখি সংঘৰ্ষৰ সৃষ্টি হৈছে । নিৰাপত্তা বাহিনীয়ে ঘেৰাও কৰিছে সন্ত্ৰাসবাদীক । তথ্য অনুসৰি এই সংঘৰ্ষত এজন সেনা জোৱান শ্বহীদ হৈছে । সন্ত্ৰাসবাদীৰ উপস্থিতিৰ তথ্য লাভ কৰাৰ পিছতে নিৰাপত্তা বাহিনীয়ে অঞ্চলটো ঘেৰাও কৰি তালাচী অভিযান আৰম্ভ কৰে । সন্ত্ৰাসবাদীয়ে নিৰাপত্তাৰক্ষীৰ ওপৰত গুলীচালনা কৰাৰ লগে লগে সেনা জোৱান সকলেও ইয়াৰ প্ৰত্যুত্তৰ দিয়ে । উল্লেখ্য যে জম্মু-কাশ্মীৰৰ পহলগামত সন্ত্ৰাসবাদী আক্ৰমণৰ পিছত সেনা আৰু নিৰাপত্তা বাহিনী সন্ত্রাসবাদীৰ সন্ধানত ব্যস্ত হৈ পৰিছে ।

হোৱাইট নাইট কৰ্পছৰ এটা ছ’চিয়েল মিডিয়া পোষ্টত কোৱা হৈছে, ‘চোৰাংচোৱাৰ খবৰৰ ভিত্তিত আজি উধমপুৰৰ বসন্তগড়ত জম্মু-কাশ্মীৰ আৰক্ষীৰ সৈতে যৌথ অভিযান আৰম্ভ কৰা হয় । যোগাযোগ স্থাপন হ’ল আৰু তীব্ৰ গুলীচালনা আৰম্ভ হয় । আমাৰ এজন সৈনিক প্ৰাৰম্ভিক এনকাউণ্টাৰত গুৰুতৰভাৱে আহত হৈছিল আৰু চিকিৎসাৰ অশেষ প্ৰচেষ্টা সত্ত্বেও পিছলৈ তেওঁ নিজৰ প্ৰাণ ত্যাগ কৰে । এতিয়াও এই অভিযান অব্যাহত আছে ।‘

আক্রমণকাৰীক নিষ্ক্ৰিয় কৰাৰ বাবে পহলগামৰ বৈছাৰণ অঞ্চলত নিৰাপত্তা বাহিনীয়ে ব্যাপক তালাচী অভিযান চলাইছে । সন্ত্ৰাসবাদীক ধৰিবলৈ ভাৰতীয় সেনাই পুঞ্চৰ লাছানা বনাঞ্চলত জম্মু-কাশ্মীৰ আৰক্ষীৰ বিশেষ অভিযান গোটৰ সৈতে যুটীয়া অনুসন্ধান অভিযান আৰম্ভ কৰিছে । জম্মু-কাশ্মীৰত বৃহৎ পৰিসৰৰ অনুসন্ধান অভিযান চলোৱা হৈছে ।

ভাৰতীয় সেনাৰ বাবে কিয় বিশেষ ১৫ জানুৱাৰী ? এই ঘটনাৰ লগত জড়িত হৈ আছে ইতিহাস…জানক ইয়াৰ গুৰুত্ব

January 14, 2025 ·

ভাৰতীয় সেনাৰ বীৰত্ব, নিস্বাৰ্থতা আৰু ত্যাগক সন্মান জনাই প্ৰতি বছৰে ১৫ জানুৱাৰীত ভাৰতীয় সেনা দিৱস পালন কৰা হয় । ইয়াক সেনা দিৱস পেৰেড বুলিও কোৱা হয় । ২০২৫ চনৰ ৭৭ সংখ্যক ভাৰতীয় সেনা দিৱসত সমগ্ৰ দেশতে বিশাল অনুষ্ঠান, সামৰিক পেৰেড আৰু সমাৰোহৰ জৰিয়তে এই ঐতিহাসিক অনুষ্ঠানটো উদযাপন কৰা হ’ব ।

এই বাৰ্ষিক উদযাপনত দেশৰ সাৰ্বভৌমত্ব আৰু অখণ্ডতা ৰক্ষা কৰা ভাৰতীয় সেনাৰ জোৱানসকলৰ বীৰত্ব, নিষ্ঠা আৰু ত্যাগক সন্মান জনোৱা হয় । এই দিৱসত ভাৰতীয় সেনাই ৰাষ্ট্ৰীয় নিৰাপত্তা ৰক্ষা আৰু ঐক্যৰ প্ৰসাৰৰ ক্ষেত্ৰত লোৱা গুৰুত্বপূৰ্ণ ভূমিকা সম্পৰ্কে চৰ্চা কৰাৰ দিন ।

ভাৰতীয় সেনা দিৱসৰ ইতিহাস-

এই দিনটোতে ১৯৪৯ চনৰ ১৫ জানুৱাৰীত ফিল্ড মাৰ্শ্বেল কে এম কেৰয়াপ্পা ব্ৰিটিছ জেনেৰেল ছাৰ ফ্ৰান্সিছ বুচাৰৰ ঠাইত ভাৰতীয় সেনাৰ প্ৰথম ভাৰতীয় কমাণ্ডাৰ-ইন-চীফ হয় । এই দিনটো স্বাধীনতাৰ পিছত ভাৰতৰ সামৰিক স্বায়ত্তশাসনৰ দাবীৰ প্ৰতীক, যি ভাৰতীয় নেতৃত্বক আদেশ হস্তান্তৰ কৰে ।

ভাৰতীয় সেনাৰ শিপা ব্ৰিটিছ ইষ্ট ইণ্ডিয়া কোম্পানীৰ সেনাৰ সৈতে সম্পৰ্কিত, যি পিছলৈ ব্ৰিটিছ ভাৰতীয় সেনাৰ অংশ হৈ পৰে । স্বাধীনতাৰ পিছত, ই ভাৰতীয় সেনা হৈ পৰে আৰু দেশক সুৰক্ষা দিয়া আৰু মানৱীয় সংকটত সহায় কৰাত গুৰুত্বপূৰ্ণ ভূমিকা পালন কৰি আহিছে ।

ভাৰতীয় সেনা দিৱসৰ তাৎপৰ্য

সামৰিক নেতৃত্বৰ ভাৰতীয়কৰণৰ বাবে এয়া এক ঐতিহাসিক মুহূৰ্ত । ই দেশৰ সাৰ্বভৌমত্ব ৰক্ষা কৰা সৈনিকসকলৰ সাহসিকতাক স্বীকাৰ কৰে । ভাৰতীয় সেনা হৈছে বৈচিত্ৰ্যৰ মাজত একতাৰ প্ৰতীক, কিয়নো দেশৰ সকলো অঞ্চলৰ পৰা কৰ্মী আহে । গেলেণ্ট্ৰি এৱাৰ্ড আৰু ইউনিট চাইটেচনৰ দৰে বঁটা প্ৰদান কৰা হয়। সেনা দিৱসৰ পেৰেডত উন্নত অস্ত্ৰ-শস্ত্ৰ আৰু সামৰিক প্ৰযুক্তিকে ধৰি ভাৰতৰ প্ৰতিৰক্ষা সামৰ্থ্য প্ৰদৰ্শন কৰা হয় । সেনা দিৱসৰ কুচকাৱাজত উন্নত অস্ত্ৰ আৰু সামৰিক প্ৰযুক্তিকে ধৰি ভাৰতৰ প্ৰতিৰক্ষা সামৰ্থ্য প্ৰদৰ্শন কৰা হয় ।

পুনেত উদযাপন কৰা হ’ব ভাৰতীয় সেনা দিৱস-

মহাৰাষ্ট্ৰৰ পুনেত ২০২৫ চনৰ ৭৭ সংখ্যক ভাৰতীয় সেনা দিৱস উদযাপন কৰি পৰম্পৰাৰ এক উল্লেখযোগ্য পৰিৱৰ্তন ঘটোৱা হ’ব । দিল্লীৰ পৰম্পৰাগত স্থানৰ পৰা ১৫ জানুৱাৰীত প্ৰথমবাৰৰ বাবে পুনেত সেনা দিৱস আয়োজন কৰা হ’ব । সেনা দিৱস ২০২৩ আৰু ২০২৪ত ক্ৰমে বেংগালুৰু আৰু লক্ষ্ণৌত উদযাপন কৰাৰ বিপৰীতে দিল্লীৰ বাহিৰত তৃতীয়বাৰৰ বাবে পুনেত সেনা দিৱসৰ অনুষ্ঠিত হ’ব ।

সেনা দিৱস উদযাপনত ভাৰতৰ সামৰিক ঐতিহ্যৰ ওপৰত আলোকপাত কৰা আৰু সেনাৰ ভৱিষ্যতৰ ৰোডমেপৰ বাবে এক দৃষ্টিভংগী উপস্থাপন কৰাৰ ওপৰত গুৰুত্ব দিয়া হ’ব । এক সমৃদ্ধ সামৰিক ইতিহাস থকা আৰু কেইবাটাও মুখ্য প্ৰতিৰক্ষা প্ৰতিষ্ঠানৰ বাসস্থান পুনেক এই গুৰুত্বপূৰ্ণ অনুষ্ঠানটোৰ স্থান হিচাপে বাছনি কৰা হৈছে ।