বৃন্দাবনত সংঘটিত হোৱা নাও দুৰ্ঘটনাত মৃতকৰ সংখ্যা ১১জনলৈ বৃদ্ধি পাইছে

শুকুৰবাৰে মথুৰাৰ বৃন্দাবনত সংঘটিত হোৱা নাও দুৰ্ঘটনাত মৃতকৰ সংখ্যা ১১জনলৈ বৃদ্ধি পাইছে । ঘটনাটোৰ পিছতে সন্ধানহীন হৈ আছে ৪ জন । দুৰ্ঘটনাৰ পিছৰে পৰা সন্ধানহীন হোৱা লোকক বিচাৰি সাহায্য আৰু উদ্ধাৰ অভিযান অবিৰতভাৱে চলি আছে ।

এই ঘটনা সন্দৰ্ভত আৰক্ষী অধীক্ষকে জনায় যে শুকুৰবাৰে দুপৰীয়া প্ৰায় ৩ বজাত বৃন্দাবন আৰু মান্তৰ মাজত অৱস্থিত পণ্টুন দলঙৰ সমীপত সংঘটিত হয় নাও দুৰ্ঘটনা । ঘটনাৰ পিছৰে পৰা প্ৰশাসন আৰু উদ্ধাৰকাৰী দলে অভিযান চলাই আছে । তেওঁ আৰু জনায় যে এই মৰ্মান্তিক দুৰ্ঘটনাত এতিয়ালৈকে ১১ জন লোকৰ মৃত্যু নিশ্চিত হৈছে, আনহাতে প্ৰথম অৱস্থাত ৫ জন লোক নিৰুদ্দেশ হোৱা বুলি জানিব পৰা গৈছে । দুৰ্ঘটনাস্থলীৰ পৰা প্ৰায় ৮০০ মিটাৰ দূৰত্বত আন এটা মৃতদেহ উদ্ধাৰ কৰাত মৃত্যুৰ সংখ্যা ১১ জনলৈ বৃদ্ধি পাইছে ।

আৰক্ষীৰ তথ্য অনুসৰি মৃতদেহৰ যাৱতীয় আইনী প্ৰক্ৰিয়া সম্পূৰ্ণ হৈছে, মৰণোত্তৰ পৰীক্ষা চলি আছে । আৰক্ষী অধীক্ষকে জনোৱা মতে, চাৰিজন লোক নিৰুদ্দেশ হৈ আছে আৰু তেওঁলোকক বিচাৰি উলিয়াবলৈ অনুসন্ধান অভিযান অবিৰতভাৱে চলি আছে ।

দুৰ্ঘটনাৰ পিছৰে পৰা নদী আৰু ইয়াৰ আশে-পাশে থকা অঞ্চলসমূহৰ ওপৰত অবিৰত নিৰিক্ষণ অব্যাহত ৰাখিছে প্ৰশাসনে যাতে সন্ধানহীন হোৱা লোকসকলক যিমান পাৰি সোনকালে বিচাৰি উলিয়াব পৰা যায় ।

কেইবাটাও সংস্থাৰ দলক সাহায্য আৰু উদ্ধাৰ অভিযানৰ বাবে ঘটনাস্থলীত মোতায়েন কৰা হৈছে । এনডিআৰএফ-ৰ আঠটা দল, এছডিআৰএফ-ৰ পাঁচটা দল, প্ৰাদেশিক সশস্ত্ৰ কনিষ্টবলৰ তিনিটা প্লাটুন আৰু ৬ জন ডুবাৰু অহৰহ উদ্ধাৰ অভিযানত নিয়োজিত হৈ আছে ।

লগতে পঢ়ক : মথুৰাত শোকাৱহ ঘটনা; যমুনা নদীত নাও দুৰ্ঘটনাত ১০ জনৰ মৃত্যু