বাংলাদেশ ভ্ৰমণত আছে ভাৰতৰ বৈদেশিক সচিব বিক্ৰম মিশ্ৰী । সোমবাৰে তেওঁ বাংলাদেশৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছক সাক্ষাৎ কৰে । অন্তৱৰ্তীকালীন চৰকাৰৰ মুখ্য উপদেষ্টা ইউনুছৰ প্ৰেছ সচিবে এই বৈঠকৰ বিষয়ে নিশ্চিত কৰিছে ।

ইয়াৰ পূৰ্বে আজি মিছৰীয়ে বৈদেশিক সচিব পৰ্যায়ৰ বৈঠকত বাংলাদেশত সংখ্যালঘুসকলৰ সুৰক্ষা আৰু নিৰাপত্তা সম্পৰ্কে উদ্বেগ প্ৰকাশ কৰাৰ সময়ত “সাংস্কৃতিক, ধৰ্মীয় আৰু কূটনৈতিক সম্পদৰ ওপৰত আক্ৰমণৰ দুখজনক ঘটনা” বিষয়টো উত্থাপন কৰে । বৈদেশিক সচিবগৰাকীয়ে বাংলাদেশৰ বৈদেশিক সচিব মহম্মদ জাছিম উদ্দিনৰ সৈতে এই বৈঠকত মিলিত হয় ।

আগষ্ট মাহত প্ৰধানমন্ত্ৰী শ্বেখ হাছিনাৰ চৰকাৰ উৎখাত হোৱাৰ পিছত ভাৰতৰ এইটোৱেই প্ৰথম উচ্চ পৰ্যায়ৰ ভ্ৰমণ । মিশ্ৰীয়ে প্ৰকাশ কৰে যে নতুন দিল্লীয়ে ঢাকাৰ সৈতে ‘ইতিবাচক, গঠনমূলক আৰু পাৰস্পৰিকভাৱে লাভজনক’ সম্পৰ্ক গঢ়ি তুলিব বিচাৰে । জাছিম উদ্দিনক সাক্ষাৎ কৰাৰ পাছত মিশ্ৰীয়ে সাংবাদিকৰ আগত কয়, ‘আজিৰ আলোচনাই আমাৰ দুয়োৰে সম্পৰ্কৰ মূল্যায়নৰ সুযোগ দিছে । মোৰ সকলো আলোচনাপন্থীৰ সৈতে স্পষ্ট, সহজ আৰু গঠনমূলক মতামত বিনিময় কৰাৰ আজিৰ সুযোগৰ মই শলাগ লৈছো ।’

বিবৃতি জাৰি কৰি কি ক’লে বৈদেশিক মন্ত্ৰালয়ে-

ইয়াৰ উপৰিও অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছ আৰু বৈদেশিক পৰিক্ৰমা উপদেষ্টা মহম্মদ তৌহিদ হুছেইনক সাক্ষাৎ কৰে মিশ্ৰীয়ে । এই বৈঠকসমূহৰ সময়ত মিশ্ৰীয়ে গণতান্ত্ৰিক, সুস্থিৰ, শান্তিপূৰ্ণ, প্ৰগতিশীল আৰু সৰ্বাংগীন বাংলাদেশৰ প্ৰতি ভাৰতৰ সমৰ্থনৰ ওপৰত আলোকপাত কৰে বুলি নতুন দিল্লীৰ বৈদেশিক পৰিক্ৰমা মন্ত্ৰালয়ে এক বিবৃতিত প্ৰকাশ কৰে । বিবৃতিত কোৱা হৈছে যে, “তেওঁ পাৰস্পৰিক বিশ্বাস-সন্মান আৰু ইজনে সিজনৰ উদ্বেগ আৰু স্বাৰ্থৰ প্ৰতি পাৰস্পৰিক সংবেদনশীলতাৰ ওপৰত আধাৰিত কৰি বাংলাদেশৰ সৈতে এক ইতিবাচক আৰু গঠনমূলক সম্পৰ্ক গঢ়ি তোলাৰ ভাৰতৰ আকাংক্ষাৰ কথা দোহাৰে ।” তেওঁ কয় যে আগষ্টত বাংলাদেশত ৰাজনৈতিক পৰিৱৰ্তনৰ বাবে দিল্লীয়ে সম্পৰ্ক ব্যাহত হোৱাৰ কোনো কাৰণ দেখা নাই ।

বাংলাদেশত ধাৰাবাহিকভাৱে হিন্দুসকলক আক্ৰমণৰ লক্ষ্য কৰি লোৱা হৈছে । এই পৰিস্থিতি এতিয়াও উন্নত হোৱা নাই । ইয়াৰ মাজতে ভাৰতৰ বৈদেশিক সচিব বিক্ৰম মিশ্ৰীয়ে আজি ঢাকা ভ্ৰমণ কৰে । সোমবাৰে পুৱা ভাৰত আৰু বাংলাদেশৰ দ্বিপাক্ষিক সম্পৰ্কৰ বিষয়ে আলোচনা কৰিবলৈ তেওঁ ঢাকাত উপস্থিত হয় । চলিত বৰ্ষৰ আগষ্ট মাহত শ্বেখ হাছিনাৰ চৰকাৰ উৎখাত হোৱাৰ পিছত দুয়োখন দেশৰ মাজত সম্পৰ্ক উত্তেজনাপূৰ্ণ হৈ থকাৰ সময়তে এই ভ্ৰমণ কৰিছে ভাৰতৰ বৈদেশিক সচিবগৰাকীয়ে ।

বিয়লি বিক্ৰম মিশ্ৰীয়ে বাংলাদেশৰ বৈদেশিক মন্ত্ৰী মহম্মদ জাছিম উদ্দিনৰ সৈতে প্ৰতিনিধি পৰ্যায়ৰ আলোচনাত মিলিত হয় ।

শ্বেখ হাছিনাৰ ভাৰত আগমনৰ লগে লগে হিন্দুসকলৰ ওপৰত হাৰাশাস্তি-

আগষ্ট মাহত শ্বেখ হাছিনাই বাংলাদেশ এৰি ভাৰতত আশ্ৰয় লোৱাৰ লগে লগে নতুন তত্ত্বাৱধায়ক চৰকাৰ আৰু ইয়াৰ মুৰব্বী ম. ইউনুছে ভাৰতক লক্ষ্য কৰি ল’বলৈ ধৰে । শ্বেখ হাছিনাই দেশ এৰি যোৱাৰে পৰা বাংলাদেশত হিন্দুসকলৰ ওপৰত অত্যাচাৰ আৰম্ভ হয় । মানুহৰ ঘৰ জ্বলাই দিয়া হয়, হত্যাকাণ্ড সংঘটিত হোৱাৰ লগতে মন্দিৰসমূহকো লক্ষ্য কৰি লোৱা হয় । ইফালে ইস্কনকো দেশখনত আক্ৰমণৰ লক্ষ্য কৰি লোৱা হৈছে । একাংশ সংগঠনে ইস্কনক সন্ত্ৰাসবাদী সংগঠন হিচাপে ঘোষণা কৰিবলৈ দাবী জনাইছে । আনকি কিছুদিন পূৰ্বে হিন্দুৰ সুপৰিচিত নেতা চিন্ময় কৃষ্ণ দাসকো গ্ৰেপ্তাৰ কৰা হৈছিল । তেওঁক গ্ৰেপ্তাৰৰ পিছৰে পৰা দেশখনত উত্তেজনা অব্যাহত আছে ।

দ্বিপাক্ষিক সম্পৰ্কৰ সকলো বিষয় আলোচনা কৰা হ’ব-

এতিয়া এই সকলোবোৰ চিন্তনীয় পৰিস্থিতিৰ মাজতে ভাৰতৰ বৈদেশিক সচিব বিক্ৰম মিশ্ৰী ঢাকাত উপস্থিত হৈছে । দুয়োখন দেশৰ বৈদেশিক সচিবৰ নেতৃত্বত গঠিত এই প্ৰতিনিধি দলটোৱে দুয়োখন দেশৰ মাজত স্থাপিত বৈদেশিক কাৰ্যালয়ৰ পৰামৰ্শ (এফ অ’ চি) ব্যৱস্থাত অংশগ্ৰহণ কৰি দ্বিপাক্ষিক সম্পৰ্কৰ সকলো বিষয়ৰ ওপৰত আলোচনা কৰাৰ সম্ভাৱনা আছে ।

বাংলাদেশৰ অন্তৱৰ্তীকালীন চৰকাৰৰ মুখ্য উপদেষ্টাৰ প্ৰেছ সচিব ছফিকুল আলমে যোৱা ৪ ডিচেম্বৰত কৈছিল যে দুয়োখন দেশৰ বৈদেশিক সচিবে পাৰস্পৰিক স্বাৰ্থৰ বিষয়ত আলোচনা কৰিব ।

তৌহীদ হুছেইনে জয়শংকৰক সাক্ষাৎ কৰে-

চলিত বৰ্ষৰ ছেপ্টেম্বৰ মাহত বাংলাদেশৰ অন্তৱৰ্তীকালীন চৰকাৰৰ বৈদেশিক উপদেষ্টা (মন্ত্ৰী) মহম্মদ তৌহীদ হুছেইনে নিউয়ৰ্কত ৰাষ্ট্ৰসংঘৰ সাধাৰণ পৰিষদৰ আঁৰত ভাৰতৰ বৈদেশিক পৰিক্ৰমা মন্ত্ৰী এছ জয়শংকৰক সাক্ষাৎ কৰিছিল । তেওঁলোকে এটা ভাল কৰ্ম সম্পৰ্ক বজাই ৰখাৰ সিদ্ধান্ত লৈছিল । লগতে ভাৰত আৰু বাংলাদেশৰ মাজত FOC আয়োজন কৰাৰ সিদ্ধান্ত লৈছিল ।