দিল্লী আৰু ঢাকাৰ মাজত উত্তেজিত সম্পৰ্কৰ মাজতে প্ৰধানমন্ত্ৰী নৰেন্দ্ৰ মোদীয়ে বাংলাদেশৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছলৈ পত্ৰ লিখি স্বাধীনতা দিৱসৰ শুভেচ্ছা জনায় । দুয়োখন দেশৰ অংশীদাৰিত্বক আৰু অধিক আগুৱাই নিয়াৰ বাবে ভাৰতৰ দায়বদ্ধতাও তেওঁ পুনৰবাৰ উল্লেখ কৰে ।

প্ৰধানমন্ত্ৰীয়ে লিখিছে, “মহামহিম, বাংলাদেশৰ ৰাষ্ট্ৰীয় দিৱস উপলক্ষে আপোনাৰ লগতে বাংলাদেশবাসীলৈ মোৰ শুভেচ্ছা জ্ঞাপন কৰিছোঁ ।” প্ৰধানমন্ত্ৰীয়ে লিখিছে, “আমাৰ ভাগ-বতৰা কৰা ইতিহাস আৰু আমাৰ দ্বিপাক্ষিক অংশীদাৰিত্বৰ ভেটি স্থাপন কৰা ত্যাগৰ সাক্ষ্য হিচাপে এই দিনটো থিয় দিছে । বাংলাদেশৰ মুক্তিযুদ্ধৰ মনোভাৱে আমাৰ সম্পৰ্কক পথ প্ৰদৰ্শন কৰি আহিছে, যি বহু ক্ষেত্ৰত ফুটি উঠিছে, আমাৰ জনসাধাৰণৰ বাবে স্পষ্ট সুবিধা কঢ়িয়াই আনিছে ।”

প্ৰধানমন্ত্ৰীয়ে কয়, “শান্তি, স্থিতিশীলতা আৰু সমৃদ্ধিৰ বাবে আমাৰ উমৈহতীয়া আকাংক্ষাৰ পৰা অনুপ্ৰাণিত হৈ আৰু ইজনে সিজনৰ স্বাৰ্থ আৰু উদ্বেগৰ প্ৰতি পাৰস্পৰিক সংবেদনশীলতাৰ ভিত্তিত এই অংশীদাৰিত্বক অধিক বিকশিত কৰাৰ বাবে আমি প্ৰতিশ্ৰুতিবদ্ধ । মহামহিম, মোৰ সৰ্বোচ্চ বিবেচনাৰ আশ্বাস গ্ৰহণ কৰক ।”

উল্লেখযোগ্য যে ভাৰতৰ দীৰ্ঘদিনীয়া মিত্ৰ শ্বেখ হাছিনাৰ নেতৃত্বত আৱামি লীগ চৰকাৰখন এক বৃহৎ আন্দোলনৰ পিছত উফৰাই পেলোৱা হৈছে । ইয়াৰ পিছতে প্রাক্তন প্রধানমন্ত্রী শ্বেখ হাছিনা ভাৰতলৈ পলায়ন কৰিবলৈ বাধ্য হয় আৰু দুয়োখন দেশৰ সম্পর্কত উত্তেজনাৰ সৃষ্টি হৈছে ৷ ক্ষমতা পৰিবৰ্তনৰ পিছত গঠন হোৱা অন্তৱৰ্তীকালীন চৰকাৰৰ নেতৃত্বত আছে নোবেল বঁটা বিজয়ী তথা অৰ্থনীতিবিদ মহম্মদ ইউনুছে ।

সংখ্যালঘু লোকৰ ওপৰত আক্ৰমণৰ খবৰৰ মাজতে ভাৰতে বাংলাদেশৰ সৈতে নিজৰ উদ্বেগ ব্যক্ত কৰে । ইফালে, ঢাকাই এই আক্ৰমণ সাম্প্ৰদায়িক নহয় ৰাজনৈতিক উদ্দেশ্যপ্ৰণোদিত বুলি উল্লেখ কৰিছে । ভাৰতৰ বৈদেশিক মন্ত্ৰী ড০ এছ জয়শংকৰে কয় যে কেন্দ্ৰই অন্তৱৰ্তীকালীন চৰকাৰৰ সৈতে বিভিন্ন পৰ্যায়ত জড়িত হৈ আছে আৰু এনে বিষয় উত্থাপন কৰি যাব ।

অহা সপ্তাহত বেংককত অনুষ্ঠিত হ’বলগীয়া বিমষ্টেক সন্মিলনত প্ৰধানমন্ত্ৰী নৰেন্দ্ৰ মোদী আৰু বাংলাদেশৰ অন্তৱৰ্তীকালীন উপদেষ্টা মহম্মদ ইউনুছৰ মাজৰ বৈঠকৰ বাবে বাংলাদেশে প্ৰস্তুতি চলাইছে । বাংলাদেশে কয় যে তেওঁলোকে ভাৰতৰ সঁহাৰিৰ বাবে অপেক্ষা কৰি আছে । বাংলাদেশৰ বৈদেশিক সচিব মহম্মদ জাছিম উদ্দিনে কয় যে আমি এই বৈঠকৰ বাবে সম্পূৰ্ণ সাজু । ভাৰতৰ ইতিবাচক সঁহাৰিৰ বাবে আমি অপেক্ষা কৰি আছো ।

শেহতীয়াকৈ বাংলাদেশে ভাৰতলৈ এখন পত্ৰ প্ৰেৰণ কৰি ২ এপ্ৰিলৰ পৰা ৪ এপ্ৰিললৈ থাইলেণ্ডত অনুষ্ঠিত হ’বলগীয়া বিমষ্টেক সন্মিলনত প্ৰধানমন্ত্ৰী মোদী আৰু মহম্মদ ইউনুছৰ মাজত বৈঠকৰ প্ৰস্তাৱ দিছিল । ভাৰতে এই সন্দৰ্ভত এতিয়াও কোনো সঁহাৰি দিয়া নাই । অৱশ্যে প্ৰধানমন্ত্ৰী মোদীয়ে সন্মিলনত অংশগ্ৰহণ কৰিব নে নাই সেয়া এতিয়াও সিদ্ধান্ত লোৱা নাই । বাংলাদেশৰ বৈদেশিক সচিব জাছিম উদ্দিনে স্বীকাৰ কৰে ভাৰত-বাংলাদেশৰ সম্পৰ্কত উত্তেজনা আছে । দুয়োগৰাকী নেতাৰ মাজত দ্বিপাক্ষিক বৈঠক হ’লে সম্পৰ্ক উন্নত হ’ব পাৰে বুলিও তেওঁ কয় ।

বিমষ্টেকত অংশগ্ৰহণ কৰাৰ লগতে চীন ভ্ৰমণো কৰিব ইউনুছে-

বাংলাদেশৰ অন্তৱৰ্তীকালীন উপদেষ্টা মহম্মদ ইউনুছে ২ এপ্ৰিলৰ পৰা ৪ এপ্ৰিললৈ বেংককত অনুষ্ঠিত হ’বলগীয়া বিমষ্টেক শীৰ্ষ সন্মিলনত অংশগ্ৰহণ কৰিব । ইয়াৰ পূৰ্বে তেওঁ তিনিদিনীয়া চীন ভ্ৰমণো কৰিব । ইয়াত তেওঁ হাইনান প্ৰদেশত অনুষ্ঠিত হ’বলগীয়া ব’য়াও ফ’ৰাম ফৰ এছিয়া (বি এফ এ)ৰ বাৰ্ষিক সন্মিলনত অংশগ্ৰহণ কৰিব । বাংলাদেশৰ বৈদেশিক মন্ত্ৰালয়ে প্ৰকাশ কৰিছে যে মহম্মদ ইউনুছে চীনৰ ৰাষ্ট্ৰপতি জি জিনপিঙৰ সৈতে দ্বিপাক্ষিক বৈঠকত মিলিত হ’ব । এই সময়ত সীমান্তৰ সিপাৰে তিস্তা নদীৰ জলাশয়ৰ বিষয়টো আলোচনা কৰাৰ সম্ভক্ষাৱনা আছে । বৈদেশিক সচিবগৰাকীয়ে কয় যে এই ভ্ৰমণৰ এজেণ্ডাত তিষ্টা নাই । ই নেতাসকলৰ ইচ্ছাৰ ওপৰত নিৰ্ভৰ কৰিব ।

বাংলাদেশৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছে ভাৰতৰ সৈতে সম্পৰ্ক শক্তিশালী বুলি অভিহিত কৰি দুয়োখন দেশৰ মাজত ক্ৰমাৎ বৃদ্ধি পোৱা ভুল বুজাবুজি দূৰ কৰাৰ প্ৰচেষ্টাৰ ইংগিত দিয়ে । তেওঁ কয় যে বাংলাদেশ আৰু ভাৰতৰ মাজত সম্পৰ্ক শক্তিশালী আৰু ইয়াৰ ওপৰত কোনো প্ৰভাৱ পৰা নাই যদিও কিছু বিবাদৰ সৃষ্টি হৈছে, যাৰ কাৰণ তেওঁ ভুল তথ্য আৰু অপপ্ৰচাৰ বুলি কয় ।

বাংলাদেশ আৰু ভাৰতৰ সম্পৰ্ক গভীৰ- মহম্মদ ইউনুছ

এটা নিউজ চেনেলৰ সৈতে হোৱা এক সাক্ষাৎকাৰত ইউনুছে কয় যে বাংলাদেশ আৰু ভাৰতৰ মাজত ঐতিহাসিক, ৰাজনৈতিক আৰু অৰ্থনৈতিক সম্পৰ্ক ইমানেই গভীৰ যে ইয়াক সলনি কৰাটো কঠিন । তেওঁ কয়, ‘বাংলাদেশ-ভাৰতৰ সম্পৰ্ক যে ভাল হ’ব নোৱাৰে, তাত কোনো প্ৰশ্নই উত্থাপন নহয় । আমাৰ সম্পৰ্ক অতি ঘনিষ্ঠ আৰু আমাৰ পাৰস্পৰিক নিৰ্ভৰশীলতা অতি উচ্চ । অৱশ্যে কিছুমান সমস্যা হৈছে, যিবোৰক মই মাজতে অহা ডাৱৰৰ দৰে বৰ্ণনা কৰিছো । এই ডাৱৰবোৰ বেছিভাগেই অপপ্ৰচাৰৰ পৰাই উদ্ভৱ হৈছে আৰু কাৰ উৎস সেইটো আনৰ ওপৰত এৰি দিছো ।’

ভুল বুজাবুজিবোৰ দূৰ কৰাৰ প্ৰয়াস কৰা হৈছে- ইউনুছ

অন্তৱৰ্তীকালীন চৰকাৰী মুৰব্বীগৰাকীয়ে লগতে কয় যে বাংলাদেশ আৰু ভাৰতৰ মাজত থকা ভুল বুজাবুজি দূৰ কৰাৰ বাবে প্ৰচেষ্টা চলোৱা হৈছে আৰু দুয়োখন দেশৰ মাজত সহযোগিতা পুনৰ শক্তিশালী হ’ব । তেওঁ কয় যে বাংলাদেশ আৰু ভাৰতৰ মাজত অহৰহ আলোচনা চলি আছে । ‘ভাৰতীয় প্ৰতিনিধি ইয়ালৈ আহিছে আৰু আমাৰ বিষয়াসকল তালৈ গৈ আছে ।’ প্ৰথম সপ্তাহতে প্ৰধানমন্ত্ৰী নৰেন্দ্ৰ মোদীৰ সৈতেও ব্যক্তিগতভাৱে কথা পাতিছিলো ।

২০২৫ চনৰ শেষৰ ফালে নিৰ্বাচন সম্ভৱ হ’ব পাৰে- ইউনুছ

যোৱা বছৰৰ আগষ্ট মাহত বাংলাদেশত ছাত্ৰ নেতৃত্বাধীন ব্যাপক প্ৰতিবাদৰ সময়ত ১০০০ৰো অধিক লোক নিহত হোৱাৰ ফলত ভাৰত-বাংলাদেশৰ সম্পৰ্ক তীব্ৰতৰ হৈ পৰিছিল । ইয়াৰ পিছত বাংলাদেশত শ্বেখ হাছিনাৰ চৰকাৰৰ পতন ঘটি অন্তৱৰ্তীকালীন চৰকাৰ গঠন হয়, যাৰ বাবে ভাৰতে বাংলাদেশৰ হিন্দু আৰু অন্যান্য সংখ্যালঘু সম্প্ৰদায়ক আক্ৰমণ কৰাৰ বাবে সমালোচনা কৰে ।

১৬ বছৰ বাংলাদেশৰ প্ৰধানমন্ত্ৰী হিচাপে থকা শ্বেখ হাছিনা ২০২৪ চনৰ আগষ্ট মাহত ভাৰতলৈ পলায়ন কৰে আৰু তেতিয়াৰ পৰাই ভাৰতত বসবাস কৰি আহিছে । ইফালে বাংলাদেশৰ ৰাজনৈতিক দলসমূহে আগতীয়াকৈ নির্বাচনৰ দাবী উত্থাপন কৰি গণতান্ত্ৰিক শাসন ঘূৰাই অনাৰ কথাও কৈছে ৷ ২০২৫ চনৰ শেষৰ ফালে নিৰ্বাচন সম্ভৱ হ’ব পাৰে বুলি কয় ইউনুছে, কিন্তু তেওঁ নিজেই নিৰ্বাচনত প্ৰতিদ্বন্দ্বিতা নকৰে বুলি স্পষ্ট কৰি দিয়ে ।