শেহতীয়াকৈ বিগ বছ ১৮ত দেখা পোৱা অভিনেত্ৰী শিল্পা শিৰোদকাৰ ক’ভিডত আক্ৰান্ত বুলি জানিব পৰা গৈছে । সোমবাৰে ৫১ বছৰীয়া শিল্পাই নিজৰ ইনষ্টাগ্ৰাম হেণ্ডেলত এই খবৰটো শ্বেয়াৰ কৰি সকলোকে সজাগ হৈ থাকিবলৈ আহ্বান জনায় । তেওঁ লিখিছে, “বন্ধুসকল! মোৰ Covid test পজিটিভ ওলাইছে । নিৰাপদে থাকক আৰু মাস্ক পিন্ধক !” এই খবৰৰ প্ৰতিক্ৰিয়া প্ৰকাশ কৰি সোণাক্ষী সিনহাই মন্তব্য কৰে, “অ’ মাই গড!!! নিজৰ যত্ন লোৱা শিল্পা… সোনকালে সুস্থ হৈ উঠা ।”

মাত্ৰ কেইমাহমান পূৰ্বে শিল্পাই নিজৰ শাৰীৰিক ৰূপান্তৰৰ বাবে শিৰোনাম দখল কৰিছিল । অভিনেত্ৰীগৰাকীয়ে ২০২৪ চনৰ অক্টোবৰৰ পৰা ২০২৫ চনৰ জানুৱাৰীলৈকে তিনিমাহৰ ভিতৰত তেওঁৰ আকৰ্ষণীয় পৰিৱৰ্তন দেখুওৱা আগৰ আৰু পিছৰ ছবিসমূহ শ্বেয়াৰ কৰিছিল । অনুৰাগীসকলে তেওঁক প্ৰশংসা কৰি তেওঁৰ ফিটনেছ যাত্ৰাক “প্ৰেৰণাদায়ক” আৰু “নিজকে পুনৰ উদ্ভাৱন কৰিবলৈ কেতিয়াও দেৰি নহয় বুলি প্ৰমাণ” বুলি অভিহিত কৰে ।

বিগ বছ ১৮ত শিল্পাৰ যাত্ৰাৰ অন্ত পৰে গ্ৰেণ্ড ফিনালেৰ ঠিক আগতে । তেওঁৰ প্ৰস্থানে বহু অনুৰাগী আৰু সহযোগী প্ৰতিযোগীক আৱেগিক কৰি তুলিছিল । ছিজনৰ শীৰ্ষ ছয়গৰাকী ফাইনেলিষ্টৰ ভিতৰত আছিল কৰণ বীৰ মেহৰা, ভিভিয়ান ড্চেনা, চুম দৰং, এশা সিং, অবিনাশ মিশ্ৰ আৰু ৰজত দলাল । শিল্পা শিৰোদকাৰে নব্বৈৰ দশকত হম, খুদা গৱাহ, আখেন, বেৱাফা ছনামৰ দৰে জনপ্ৰিয় ছবিৰে জনপ্ৰিয়তা অৰ্জন কৰিছিল ।

টিভিৰ বিখ্যাত ৰিয়েলিটি শ্ব’ ‘ইণ্ডিয়ান আইডল ১২’ৰ বিজয়ী পৱনদীপ ৰাজনৰ এটা নতুন ভিডিঅ’ ছ’চিয়েল মিডিয়াত প্ৰচাৰ হৈছে । ৫ মে’ৰ গভীৰ নিশা এক বৃহৎ দুৰ্ঘটনাৰ বলি হোৱাৰ পিছত এতিয়া সুস্থিৰ হৈছে পৱনদীপ । এনে পৰিস্থিতিত তেওঁ এটা নতুন ভিডিঅ’ ছ’চিয়েল মিডিয়াত শ্বেয়াৰ কৰি অনুৰাগীক নিজৰ অৱস্থাৰ কথা জনাইছে । এই ভিডিঅ’টোত পৱনদীপক পুনৰবাৰ তেওঁৰ সুৰীয়া কণ্ঠত গান গোৱা দেখা গৈছে ।

উন্নত হৈছে স্বাস্থ্য-

ইনষ্টাগ্ৰামত শ্বেয়াৰ কৰা এই ভিডিঅ’টোত পৱনদীপ ৰাজনক হাস্পতালৰ কাপোৰ পিন্ধি বিচনাত বহি থকা দেখা গৈছে । তেওঁৰ লগত এগৰাকী পুৰুষ নাৰ্ছ থিয় হৈ আছে । পৱনদীপৰ হাতত এটা মুভমেণ্ট মেচিন আছে আৰু তেওঁক চাদৰেৰে ঢাকি থোৱা আছে । এই ভিডিঅ’টোত পৰ্দালৈ চাই পৱনদ্বীপে গাইছে প্ৰয়াত নাইটিংগেল লতা মংগেশকাৰৰ বিখ্যাত গীত ‘মেৰা ছায়া সাথ হোগা’ । কণ্ঠশিল্পীগৰাকীয়ে আকৌ এবাৰ গান গোৱা দেখি অনুৰাগীৰ মাজত বিয়পি পৰিছে সুখৰ জোৱাৰ ।

ভিডিঅ’টো শ্বেয়াৰ কৰাৰ সময়ত পৱনদীপ ৰাজনে কেপচনত হাৰ্ট ইমোজি শ্বেয়াৰ কৰে । তেওঁৰ অনুৰাগীসকলে তেওঁৰ আশু আৰোগ্যৰ বাবে প্ৰাৰ্থনা কৰি কমেন্ট কৰে । এজন অনুৰাগীয়ে মন্তব্য কৰিছে, ‘চিকিৎসালয়ৰ কৰ্মচাৰীসকল ভাগ্যৱান । তেওঁলোকে আপোনাৰ সংগীত শুনিবলৈ সুযোগ পালে ।‘ আন এজনে লিখিছে, ‘ৰকষ্টাৰ, তুমি মোক কান্দিবলৈ বাধ্য কৰালা… আৰু লিখিবলৈ মোৰ কোনো ভাষা নাই ।’

চলচ্চিত্ৰ নিৰ্মাতা-অভিনেতা অনুৰাগ কাশ্যপ বৰ্তমান বিশেষ বিতৰ্কৰ বাবে চৰ্চাত আছে । শেহতীয়াকৈ তেওঁ ব্ৰাহ্মণ সম্প্ৰদায়ৰ বিষয়ে কিছু মন্তব্য কৰিছিল, তাৰ পিছত তেওঁ সমালোচনাৰ সন্মুখীন হ’বলগীয়া হয় । ইয়াৰ পিছতে এতিয়া অনুৰাগ কাশ্যপে ক্ষমা বিচাৰিছে । ছচিয়েল মিডিয়াত এটা দীঘলীয়া পোষ্ট লিখি ক্ষমা বিচাৰিছে চলচ্চিত্ৰ পৰিচালকজনে ।

ক্ষমা বিচাৰিলে অনুৰাগ কাশ্যপে-

অনুৰাগ কাশ্যপে লিখিছে, ‘খঙেৰে কাৰোবাক উত্তৰ দিওঁতে মোৰ মৰ্যদা পাহৰিলোঁ আৰু সমগ্ৰ ব্ৰাহ্মণ সম্প্ৰদায়ৰ বিষয়ে বেয়াকৈ ক’লো । সেই সমাজখন, যাৰ বহু লোক মোৰ জীৱনত আছিল, এতিয়াও আছে আৰু বহুত অৰিহণা যোগাইছে । আজি তেওঁলোক সকলোৱে মোৰ বাবে আঘাত পাইছে । মই সন্মান কৰা বহু বুদ্ধিজীৱীয়ে সেই খঙত কথা কোৱাৰ ধৰণত আঘাত পায় । এনে এটা কথা কৈ মই নিজেই বিষয়টোৰ পৰা বিচ্যুত হ’লোঁ ৷’

অনুৰাগে আৰু লিখিছে, ‘মই অন্তৰৰ পৰা ক্ষমা বিচাৰিছো । এই সমাজখনক মই এই কথা ক’ব বিচৰা নাছিলো, কিন্তু খঙত কাৰোবাৰ বেয়া মন্তব্যৰ প্ৰতি সঁহাৰি জনাই লিখিছিলোঁ । মই ক্ষমা বিচাৰিছোঁ । মোৰ কথা কোৱাৰ ধৰণ আৰু গালি-গালাজৰ বাবে মোৰ সকলো সতীৰ্থ বন্ধুৰ পৰা, মোৰ পৰিয়ালৰ পৰা আৰু সেই সম্প্ৰদায়ৰ পৰা মই ক্ষমা বিচাৰিছো । এতিয়া মই ইয়াৰ ওপৰত কাম কৰিম যাতে পুনৰ এনেকুৱা নহয় । মোৰ খঙৰ ওপৰত কাম কৰিম আৰু যদি বিষয়টোৰ ওপৰত কথা পাতিব লাগে তেন্তে সঠিক শব্দ ব্যৱহাৰ কৰিম । আশাকৰোঁ আপোনালোকে মোক ক্ষমা কৰিব ।’

উল্লেখ্য যে, শেহতীয়াকৈ ফুলে নামৰ এখন হিন্দী ছবি মুক্তি পাবলগীয়া আছিল । কিন্তু এই ছবিখনে জাতিবাদৰ প্ৰচাৰ কৰা বাবে মুক্তি পাব নোৱাৰিলে । ইয়াৰ পিছত অনুৰাগ কাশ্যপে চেন্সৰ ব’ৰ্ড আৰু ব্ৰাহ্মণ সমাজক লৈ ছ’চিয়েল মিডিয়াত বহু আপত্তিজনক মন্তব্য কৰে । ইয়াৰ পিছত অনুৰাগে বহু সমালোচনাৰ সন্মুখীন হ’বলগীয়া হয় ।