প্ৰতিৰক্ষা মন্ত্ৰী ৰাজনাথ সিঙে শেহতীয়াকৈ ড্ৰ’ন আক্ৰমণত অসামৰিক অঞ্চলক লক্ষ্য কৰি লোৱাৰ সন্দৰ্ভত পাকিস্তান সেনাৰ বিৰুদ্ধে কঠোৰ ব্যৱস্থা ল’বলৈ ভাৰতীয় সেনাক নিৰ্দেশ দিয়া হৈছে।

জানিব পৰা মতে, ৰাজনাথ সিঙে কয় যে পাকিস্তান সেনাই নিয়ন্ত্ৰণ ৰেখাৰ ওচৰত ভাৰতীয় সাধাৰণ নাগৰিকক লক্ষ্য কৰি লৈছে, তেওঁলোকৰৰ বিৰুদ্ধে কঠোৰ আৰু শাস্তিমূলক ব্যৱস্থা গ্ৰহণ কৰিব লাগে।

ভাৰত-পাকিস্তানৰ উত্তেজনাৰ মাজতে, শনিবাৰে দিল্লীত প্ৰতিৰক্ষা মন্ত্ৰীয়ে প্ৰতিৰক্ষা মুৰব্বী আৰু তিনিওটা সেৱাৰ মুৰব্বীসকলৰ সৈতে বৈঠক অনুষ্ঠিত কৰি পৰিস্থিতিৰ বুজ ল’ব।

ভাৰতৰ প্ৰতিৰক্ষামন্ত্ৰী ৰাজনাথ সিঙে পহলগামত সন্ত্ৰাসবাদী আক্ৰমণৰ উত্তৰত ভাৰতীয় সেনাই পাকিস্তান আৰু ইয়াৰ দখল কৰা কাশ্মীৰত চলোৱা ‘অপাৰেচন সিন্দুৰ’ক লৈ প্ৰথমবাৰলৈ প্ৰতিক্ৰিয়া প্ৰকাশ কৰিছে।

তেওঁ কৈছিল যে, প্ৰধানমন্ত্ৰী নৰেন্দ্ৰ মোডীৰ নিৰ্দেশনাত ভাৰতীয় সেনাই দেশক গৌৰৱান্বিত কৰিছে।

প্ৰতিৰক্ষা মন্ত্ৰীগৰাকীয়ে কয় যে, ‘আপুনি সকলোৱে জানে যে যোৱা নিশা ভাৰতীয় সেনা বাহিনীয়ে নিজৰ বীৰ আৰু সাহস প্ৰদৰ্শন কৰি এক নতুন ইতিহাসৰ সৃষ্টি কৰিছে’।

‘ভাৰতীয় সেনাই নিখুঁত, সতৰ্কতা আৰু সংবেদনশীলতাৰে কাম কৰিছে।আমি নিৰ্ধাৰণ কৰা লক্ষ্যবোৰ নিখুঁতভাৱে আৰু পৰিকল্পিত কৌশল অনুসৰি ধ্বংস কৰা হৈছে’।

‘ভাৰতীয় সেনাই কোনো ধৰণৰ অসামৰিক স্থানত কোনো ধৰণৰ প্ৰভাৱ পেলাবলৈ নিদিয়াত সংবেদনশীলতা প্ৰদৰ্শন কৰিছে’।

তেওঁ লগতে কয়, ‘আমি হনুমান জীৰ সেই আদৰ্শ অনুসৰণ কৰিছো,যিটো তেওঁ অশোক বাটিকা ধ্বংস কৰি থাকোঁতে কৰিছিল –জিন মোহি মাৰা, তিন মোহি মাৰে। অৰ্থাৎ কেৱল সেই সকলক হে হত্যা কৰা হৈছিল যিসকলে আমাৰ নিৰীহক হত্যা কৰিছিল’।

‘আমি পাকিস্তানত কেৱল সন্ত্ৰাসবাদীৰ শিৱিৰতহে আঘাত কৰিছিলো। নিজৰ মাটিত হোৱা আক্ৰমণৰ প্ৰতি সঁহাৰি জনাবলৈ ভাৰতে, ৰাইট টু ৰেচপন পদ্ধতি ব্যৱহাৰ কৰিলে’।

‘আমি অতি চিন্তাশীল আৰু জুখি-মাখি এই পদক্ষেপটো গ্ৰহণ কৰিছো।আমাৰ সশস্ত্ৰ বাহিনীৰ বীৰত্বক প্ৰণাম জনাইছো।’

ভাৰতৰ প্ৰতিৰক্ষা মন্ত্ৰী ৰাজনাথ সিঙে দিল্লীৰ বক্কৰৱালা আনন্দ ধাম আশ্ৰমত অনুষ্ঠিত সনাতন সাংস্কৃতিক জাগৰণ মহোৎসৱত অংশগ্ৰহণ কৰে।

এই মঞ্চৰ পৰাই প্ৰতিৰক্ষা মন্ত্ৰীগৰাকীয়ে পেহেলগাম আক্ৰমণৰ বিষয়ে পাকিস্তানক সকীয়াই দি কয় যে, এজন প্ৰতিৰক্ষা মন্ত্ৰী হিচাপে সৈনিকৰ সৈতে মিলি দেশৰ সীমাৰ সুৰক্ষা সুনিশ্চিত কৰাৰ দায়িত্ব মোৰ আছে’।

‘ৰাষ্ট্ৰীয় সম্পত্তিক সুৰক্ষা দিয়াৰ দায়িত্ব সকলোৰে আছে। প্ৰধানমন্ত্ৰী মোদীৰ কাৰ্যকালত আপোনালোকে যি বিচাৰে সেয়াই হ’ব’।

তেওঁ লগতে কয় যে, ‘দেশৰ ওপৰত চকু দিয়া সকলক উচিত প্ৰত্যুত্তৰ দিয়া হ’ব। প্ৰধানমন্ত্ৰী নৰেন্দ্ৰ মোদীকো সকলোৱে ভালদৰে জানে’।

‘প্ৰধানমন্ত্ৰী গৰাকীয়ে শত্ৰুক কিদৰে উত্তৰ দিব লাগে সেই কথা ভালদৰে জানে। দেশে যি বিচাৰিছে সেয়াই হ’ব’। দেশবাসীক একপ্ৰকাৰৰ আশ্বাস প্ৰদান কৰিছে প্ৰতিৰক্ষা মন্ত্ৰীগৰাকীয়ে।