পহলগাম আক্ৰমণৰ প্ৰতিশোধ সম্পূৰ্ণ

অপাৰেচন সিন্দুৰক লৈ লোকসভাত চলি থকা বিতৰ্কৰ দ্বিতীয় দিনা কেন্দ্ৰীয় গৃহমন্ত্ৰী অমিত শ্বাহে কয় যে পহলগাম সন্ত্ৰাসবাদী আক্ৰমণৰ মূল অভিযুক্ত সন্ত্ৰাসবাদীক হত্যা কৰা হৈছে । ইয়াক নিৰ্মূল কৰিবলৈ আৰম্ভ কৰা হৈছিল ‘যৌথ অভিযান মহাদেৱ’ য’ত তিনিটা সন্ত্ৰাসবাদী নিহত হয় । নিহত সন্ত্ৰাসবাদীৰ নাম চুলেমান, জিব্ৰান আৰু আবু হামজা । পহলগাম সন্ত্ৰাসবাদী আক্ৰমণত জড়িত আছিল লস্কৰৰ সন্ত্ৰাসবাদী চুলেমান । ইয়াৰ বহু প্ৰমাণ আমাৰ হাতত আছে ।

অপাৰেচন মহাদেৱৰ বিষয়ে প্ৰকাশ কৰাৰ সময়ত কেন্দ্ৰীয় গৃহমন্ত্ৰী অমিত শ্বাহে কয় যে, “এটা যৌথ অভিযান মহাদেৱ য’ত ভাৰতীয় সেনা, চি আৰ পি এফ আৰু জম্মু-কাশ্মীৰ আৰক্ষীয়ে পহলগাম সন্ত্ৰাসবাদী আক্ৰমণৰ সৈতে জড়িত তিনিটা সন্ত্ৰাসবাদীক হত্যা কৰিছে । এই তিনিটা সন্ত্ৰাসবাদী বৈসাৰণত আছিল আৰু তিনিওটাই নিহত হৈছে ।”

১০৫৫ জন লোকক ৩ হাজাৰ ঘণ্টা ধৰি জেৰা-

অমিত শ্বাহে কয়, ‘২২ এপ্ৰিলত পহলগামত সংঘটিত সন্ত্ৰাসবাদী আক্ৰমণৰ পিছত আমি সিদ্ধান্ত লৈছিলো যে NIA-এ এই গোচৰৰ তদন্ত কৰিব । সন্ত্ৰাসবাদী আক্ৰমণৰ পিছত ২৩ এপ্ৰিলত এখন নিৰাপত্তা বৈঠক অনুষ্ঠিত হয় । সেই বৈঠকতে সিদ্ধান্ত লোৱা হৈছিল যে সন্ত্ৰাসবাদীয়ে কোনো মূল্যৰ বিনিময়ত পাকিস্তানলৈ পলায়ন কৰিব নোৱাৰিব । তাৰ পিছত আমি এটা দীঘলীয়া তদন্ত প্ৰক্ৰিয়া আৰম্ভ কৰিলোঁ ।“

তেওঁ কয়, “পৰ্যটকৰ পৰিয়ালৰ সদস্য, কেমেৰামেন, খচ্চৰ মালিককে ধৰি ১০৫৫ জন লোকক প্ৰায় ৩ হাজাৰ ঘন্টা দীঘলীয়া জেৰা কৰা হয় । তাৰ পিছত সন্ত্ৰাসবাদীৰ স্কেচ বনোৱা হৈছিল । তাৰ পিছত ২০২৫ চনৰ ২২ জুন তাৰিখে বছিৰ আৰু পাৰভেজক চিনাক্ত কৰা হৈছিল । ঘটনাৰ পিছদিনা একাংশই সন্ত্ৰাসবাদীক আশৰ্য় দিছিল । তাৰ পিছত তেওঁলোকক গ্ৰেপ্তাৰ কৰা হয় । সম্প্ৰতি তেওঁলোক জিম্মাত আছে ।”

লোকসভাত কেন্দ্ৰীয় গৃহমন্ত্ৰী অমিত শ্বাহে কয়, “কালিৰ অভিযানত তিনিওটা সন্ত্ৰাসবাদী (চুলেমান, আফগান আৰু জিব্ৰাণ) নিহত হয় । যিসকলে সন্ত্ৰাসবাদীক খাদ্য যোগান ধৰিছিল তেওঁলোকক ইতিমধ্যে জিম্মাত লোৱা হৈছিল । যেতিয়া এই সন্ত্ৰাসবাদীৰ মৃতদেহ শ্ৰীনগৰলৈ অনা হৈছিল, তেতিয়া আমাৰ সংস্থাসমূহে আটক কৰা লোকসকলেও তেওঁলোকক চিনাক্ত কৰিছিল ।”

লগতে পঢ়ক : ভাৰতীয় সেনাৰ বৃহৎ সফলতা; পহলগাম আক্ৰমণৰ মাষ্টাৰমাইণ্ড হাছিম মুছা ফৌজী নিহত

শ্ৰীনগৰত পহলগাম আক্ৰমণত জড়িত সন্ত্ৰাসবাদী নিহত

পহলগাম সন্ত্ৰাসবাদী আক্ৰমণৰ প্ৰতিশোধ ল’লে ভাৰতীয় সেনাই । পহলগাম আক্ৰমণৰ তিনিমাহ পাছতেই ২৬জন নিৰীহ লোকক নিৰ্মমভাৱে হত্যা কৰা পাকিস্তানী সন্ত্ৰাসবাদীক ভাৰতীয় সেনাই হত্যা কৰিছে । তিনিটা পাকিস্তানী সন্ত্ৰাসবাদী চুলেমান, ইয়াছিৰ আৰু আলীৰ মৃতদেহ উদ্ধাৰ কৰা হৈছে, যাৰ ভিতৰত চুলেমান আৰু ইয়াছিৰ পহলগাম আক্ৰমণত জড়িত আছিল । ইয়াৰে চুলেমান তথা হাছিম মুছা (যি পূৰ্বে পাকিস্তানী সেনাবাহিনীৰ জোৱান আছিল)জম্মু-কাশ্মীৰৰ পহলগাম আক্ৰমণৰ মাষ্টাৰমাইণ্ড তথা লস্কৰ-ই-তৈবাৰ শীৰ্ষ অধিনায়ক আছিল । হাছিম মুছা কেৱল পহলগাম আক্ৰমণৰ মাষ্টাৰমাইণ্ডেই নহয়, সোণামাৰ্গ সুৰংগ আক্ৰমণৰো অপৰাধী আছিল এই সন্ত্ৰাসবাদীটো ।

নিহত সন্ত্ৰাসবাদী কেইটাৰ পৰা আমেৰিকা যুক্তৰাষ্ট্ৰত নিৰ্মিত কাৰ্বাইন, এ কে-৪৭, ১৭টা ৰাইফল গ্ৰেনেড আৰু অন্যান্য সামগ্ৰী উদ্ধাৰ কৰা হৈছে । ভাৰতীয় সেনাৰ বাবে এইটো এটা ডাঙৰ সফলতা । কিয়নো পহলগাম আক্ৰমণৰ সকলো সন্ত্ৰাসবাদী নিহত হৈছে, এতিয়া মাত্ৰ এটাহে বাকী আছে ।

ভাৰতীয় সেনাই এই সফলতা অপাৰেচন মহাদেৱৰ অধীনত অৰ্জন কৰিছে, এই অভিযান সন্ত্ৰাসবাদীৰ বিৰুদ্ধে আৰম্ভ হৈছে । ভাৰতীয় সেনাই জম্মু-কাশ্মীৰৰ শ্ৰীনগৰত তালাচী অভিযান চলাই আছিল, ইয়াত সন্ত্রাসবাদী আত্মগোপন কৰাৰ সম্ভাৱনা আছিল, যাৰ বাবে অপাৰেচন মহাদেৱ আৰম্ভ কৰা হৈছিল । এই অভিযানৰ অধীনত এই তিনিটা সন্ত্ৰাসবাদীক শ্ৰীনগৰত হত্যা কৰা হয় ।

শ্ৰীনগৰৰ মহাদেৱ পাহাৰৰ সমীপৰ ডাচিগামত তিনিটা সন্ত্ৰাসবাদীক হত্যা কৰাৰ কথা সেনাই নিশ্চিত কৰিছে যদিও সন্ত্ৰাসবাদীকেইটাৰ পৰিচয় সন্দৰ্ভত একো কোৱা নাই । সেনাই আনুষ্ঠানিক বিবৃতিত কয়, ‘এই এনকাউণ্টাৰত তিনিটা সন্ত্ৰাসবাদী নিহত হয় । অভিযান চলি আছে ।’

মহাদেৱ পাহাৰৰ সমীপত সেনাই নিজৰ শিবিৰ পাতিছে, যাৰ জৰিয়তে সেনাই অঞ্চলটোৰ কাৰ্যকলাপৰ ওপৰত চকু ৰাখিছে । সেনা আৰু জম্মু-কাশ্মীৰ আৰক্ষীৰ চলিছিল যৌথ তালাচী অভিযান । এই অভিযানতে ধৰা পৰে সন্ত্ৰাসবাদী মুছাৰ গতিবিধি । পাহাৰৰ সমীপতে তম্বুত বাস কৰিছিল সন্ত্ৰাসবাদীয়ে । গুৰুত্বপূৰ্ণ কথাটো হ’ল সেনা আৰু সন্ত্ৰাসবাদীৰ মাজত এনকাউণ্টাৰ হোৱা ঠাইখন পাহাৰৰ ওপৰত আৰু তালৈ খোজকাঢ়িহে যাব পাৰি ।

চলিত বৰ্ষৰ ২৬ এপ্ৰিলত কাশ্মীৰৰ পহলগামৰ বৈছাৰণ উপত্যকাত ২৬জন নিৰীহ লোকক নিৰ্মমভাৱে হত্যা কৰিছিল সন্ত্ৰাসবাদীয়ে । সেই সময়ত এই লোকসকলে কাশ্মীৰৰ উপত্যকাৰ সৌন্দৰ্য উপভোগ কৰি আছিল আৰু হঠাৎ মুখত কাপোৰ বান্ধি থকা সন্ত্ৰাসবাদীয়ে তালৈ আহি মানুহক তেওঁলোকৰ ধৰ্মৰ বিষয়ে সুধি গুলীচালনা কৰিছিল । মূলতঃ পুৰুষক লক্ষ্য কৰি লোৱা হৈছিল এই আক্ৰমণত । ঘটনাৰ সময়ত তাত বহু পৰিয়াল উপস্থিত আছিল, যিয়ে এই ঘটনাটো কিমান ভয়ানক আছিল প্ৰকাশ কৰিছিল, য’ত কোনোবাই স্বামীক হেৰুৱাইছিল, কোনোবাই পিতৃক হেৰুৱাইছিল আৰু কোনোবাই পুত্ৰক হেৰুৱাইছিল ।

লস্কৰ-ই-তৈবাৰ সংযুক্ত গোট ৰেজিষ্টেন্স ফ্ৰণ্টে এই আক্ৰমণৰ দায়িত্ব স্বীকাৰ কৰে । এই আক্ৰমণৰ প্ৰতিক্ৰিয়া স্বৰূপে ভাৰতে ৬-৭ মে’ৰ মাজ নিশা অপাৰেচন সিন্দুৰ আৰম্ভ কৰি পাকিস্তানৰ ৯টা সন্ত্ৰাসবাদী ঘাটি ধ্বংস কৰে । ইয়াৰ পিছত পাকিস্তানে ভাৰতীয় সামৰিক ঘাটিসমূহক লক্ষ্য কৰি লোৱাৰ ব্যৰ্থ প্ৰচেষ্টা চলাইছিল । দুয়োখন দেশে ৩-৪ দিন ধৰি আক্ৰমণ প্ৰত্যাক্ৰমণ চলাইছিল, য’ত পাকিস্তানৰ সামৰিক ঘাটিসমূহৰ যথেষ্ট ক্ষতি হৈছিল । ১০ মে’ত দুয়ো দেশে যুদ্ধবিৰতিৰ বাবে সন্মতি প্ৰকাশ কৰে ।

লগতে পঢ়ক : কাৰ্গিল দিৱস ২০২৫ : ২৬ বছৰীয়া শৌৰ্য্য আৰু বিজয়ৰ সন্মান; ই কেৱল তাৰিখ নহয় এক আবেগৰ স্মৃতি