দেওবাৰে পুৱা বিহাৰৰ কাটিহাৰ জিলাত সংঘটিত হয় এক বৃহৎ নাও দুৰ্ঘটনা । কাটিহাৰৰ অমদাবাদত গংগা নদীত এখন নাও ডুব যোৱাৰ ফলত বহু লোকৰ মৃত্যু হয় । নাওখনত মুঠ ১৭ জন লোক আছিল । এই ঘটনাত এতিয়াও বহু লোক নিৰুদ্দেশ হৈ আছে বুলি জানিব পৰা গৈছে ।

ঘটনাৰ পিছতে চাৰিজন লোকে সাঁতুৰি নিজৰ জীৱন ৰক্ষা কৰে । দক্ষিণ কৰিমুল্লাপুৰৰ মেঘু ঘাটৰ পৰা নাওখনত উঠি আটাইকেইজন লোক গদ্দাই দিয়াৰলৈ গৈ আছিল । নাও দুৰ্ঘটনাৰ তথ্য লাভ কৰাৰ লগে লগে এছ ডি আৰ এফ আৰু আৰক্ষী সেই স্থানত উপস্থিত হয় আৰু নিৰুদ্দেশ হোৱা লোককেইজনৰ সন্ধানত অভিযান অব্যাহত ৰাখিছে । স্থানীয় লোকসকলেও ঘটনাস্থলীত ভিৰ কৰা পৰিলক্ষিত হৈছে ।

ইফালে ঘটনাস্থলীৰ পৰা তিনিটা মৃতদেহ উদ্ধাৰ কৰা হৈছে । নিহতসকলৰ ভিতৰত ৬০ বছৰীয়া পৱন কুমাৰ, ৭০ বছৰীয়া সুধীৰ মণ্ডল আৰু এটি এবছৰীয়া শিশু আছে । এতিয়াও নিৰুদ্দেশ হৈ থকা লোকসকলৰ সন্ধানত অভিযান অব্যাহত ৰাখিছে এছ ডি আৰ এফে ।

গংগাৰ প্ৰবল প্ৰবাহৰ বাবে উদ্ধাৰ অভিযানত সমস্যা-

মণিহাৰীৰ মহকুমাধিপতি কুমাৰ সিদ্ধাৰ্থ, মহকুমা আৰক্ষী বিষয়া মনোজ কুমাৰ, অমদাবাদ থানাৰ মুৰব্বী কুন্দন কুমাৰ আৰু খণ্ড বিষয়াৰ লগতে স্থানীয় গাঁওবাসীয়ে সাহায্য আৰু উদ্ধাৰৰ কামত নিয়োজিত হৈ আছে । কিন্তু প্ৰবল সোঁত আৰু গভীৰতাৰ বাবে নিৰুদ্দেশ হোৱা লোকসকলক বিচাৰি উলিওৱাত অসুবিধা হৈছে ।

খেতি পথাৰত কাম কৰিবলৈ ওলাইছিল সকলো-

জানিব পৰা মতে, নাওখনত থকা লোকসকলে খেতিপথাৰ চাবলৈ আৰু খেতিৰ কাম কৰিবলৈ ডায়াৰা অঞ্চললৈ গৈছিল । কিন্তু নদীৰ ঢৌৱে তেওঁলোকৰ পুৱাটো শোকলৈ ৰূপান্তৰিত কৰিলে । নিৰুদ্দেশ হোৱা লোকসকলৰ পৰিয়ালৰ মাজত শোকাকুল পৰিৱেশৰ সৃষ্টি হৈছে । নাও দুৰ্ঘটনাত উদ্ধাৰ হোৱা লোকসকলক অমদাবাদ প্ৰাথমিক স্বাস্থ্য কেন্দ্ৰত ভৰ্তি কৰোৱা হৈছে ।