অসমৰ কেইবাখনো জিলাত জল প্ৰলয়ত হাহাকাৰ অৱস্থাৰ সৃষ্টি হৈছে । বানৰ কবলত ৰাজ্যৰ ১২ খনকৈ জিলা ।

ৰাজ্যৰ শেহতীয়া বান পৰিস্থিতি ক্ৰমান্বয়ে অধিক অৱনতি ঘটা পৰিলক্ষিত হৈছে । ৰাজ্যখনৰ ১২ খন জিলাৰ ১.৭০ লাখতকৈও অধিক লোক এই প্ৰলয়ংকাৰী বানৰ কৱলত পৰিছে । বিগত ২৪ ঘণ্টাত শিৱসাগৰ জিলাৰ আমগুৰি অঞ্চলত বানৰ কবলত পৰি এজন লোকৰ মৃত্যু হয়, যাৰ ফলত চলিত বছৰ অসমত বানপানীত মৃত্যু হোৱা লোকৰ মুঠ সংখ্যা ৫ জনলৈ বৃদ্ধি পাইছে ।

অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ প্ৰতিবেদন অনুসৰি বিশ্বনাথ, কাছাৰ, ধেমাজি, ডিব্ৰুগড়, চৰাইদেউ, গোলাঘাট, তিনিচুকীয়া, লখিমপুৰ, কাৰ্বি আংলং, শিৱসাগৰ, ওদালগুৰি আৰু যোৰহাটকে ধৰি ১২ খন জিলাৰ ১.৭০ লাখতকৈও অধিক লোক বানৰ কবলত পৰিছে । ইফালে ১০৩৬২.৯০৪ হেক্টৰ কৃষিভূমি এতিয়া বাঢ়নী পানীৰ তলত ।

কেৱল চৰাইদেউ জিলাতে ২৩,৮৯১ জন লোক আৰু ধেমাজি জিলাত ২২,২১৪ জন লোক বানৰ কৱলত পৰিছে ।

বৃদ্ধি পাইছে নদীসমূহৰ জলস্তৰ-

অসমৰ লগতে চুবুৰীয়া ৰাজ্য নাগালেণ্ড আৰু অৰুণাচল প্ৰদেশৰ কেইবাটাও অংশত ধাৰাসাৰ বৰষুণৰ ফলত ব্ৰহ্মপুত্ৰ নদী আৰু ইয়াৰ উপনৈসমূহৰ পানীৰ স্তৰ বহু ঠাইত বৃদ্ধি পাবলৈ ধৰিছে ।

দিচাং নদী (চৰাইদেউ): কেন্দ্ৰীয় জল আয়োগৰ অনুসৰি, চৰাইদেউৰ দিচাংপানীত দিচাং নদীয়ে চৰম ৰূপ ধাৰণ কৰিছে । সোমবাৰে পুৱা ৯ বজাত নদীখনে পূৰ্বৰ সৰ্বোচ্চ বানৰ স্তৰ অতিক্ৰম কৰি ০.১০ মিটাৰ ওপৰেৰে (১০৬.৩৬ মিটাৰ উচ্চতাত) বৈ আছিল আৰু ইয়াৰ পানী ক্ৰমাৎ বাঢ়ি আছে ।

বুঢ়ীদিহিং নদী (ডিব্ৰুগড়): ডিব্ৰুগড়ৰ চেনিমাৰী (খোৱাং)ত বুঢ়ীদিহিং নদীৰ পৰিস্থিতি সংকটজনক । আজি পুৱা ৬ বজাত নদীখন বিপদসীমাতকৈ ০.৫৫ মিটাৰ ওপৰেৰে (১০২.৬৬ মিটাৰ উচ্চতাত) ওফন্দি বৈ আছিল ।

ব্ৰহ্মপুত্ৰ নদী (যোৰহাট): যোৰহাটৰ নিমাতীঘাটত ব্ৰহ্মপুত্ৰ নদীৰ জলস্তৰ ভয়াৱহভাৱে বৃদ্ধি পাইছে । আজি পুৱা ৬ বজাত নদীখনে বিপদসীমাৰ ০.৩৪ মিটাৰ ওপৰেৰে (৮৫.৮৮ মিটাৰ উচ্চতাত) অতিক্ৰম কৰি বৈ আছিল ।

গৌৰাং নদী (কোকৰাঝাৰ): কোকৰাঝাৰত গৌৰাং নদীৰ পানী ক্ৰমান্বয়ে বৃদ্ধি পাই স্বাভাৱিক সীমাৰ ওপৰেৰে বৈ আছে ।

দিখৌ নদী (শিৱসাগৰ): শিৱসাগৰ চহৰত দিখৌ নদীৰ বান পৰিস্থিতি অত্যন্ত ভয়াৱহ। সোমবাৰে পুৱা ৫ বজাত নদীখন বিপদসীমাতকৈ ১.৯৯ মিটাৰ উৰ্ধত (৯৪.৩৯ মিটাৰ উচ্চতাত) বাঢ়ি থকা প্ৰৱণতাৰে বৈ আছিল ।

ধনশিৰি (দক্ষিণ)(গোলাঘাট): গোলাঘাট জিলাৰ নুমলীগড়ত ধনশিৰি (দক্ষিণ) নদীও বিপদজনকভাৱে বৈ আছে ।

ক্ষয়-ক্ষতি আৰু উদ্ধাৰ অভিযান

উল্লেখ্য যে, চলিত বানৰ ঢৌত ৩০ টা ৰাজহ চক্ৰৰ অন্তৰ্গত মুঠ ৫৮০ খন গাঁও প্ৰভাৱিত হৈছে । বানাক্ৰান্ত অঞ্চলসমূহত উদ্ধাৰ কাৰ্য তীব্ৰতৰ কৰিবলৈ বাহিনী মোতায়েন কৰা হৈছে । উদ্ধাৰ আৰু সাহাৰ্য অভিযান খৰতকীয়া কৰি তোলাৰ লগতে নিয়োজিত কৰা হৈছে NDRF আৰু SDRF ।

লগতে পঢ়ক : উজনিৰ বান পৰিস্থিতি: ৰে’ল যাত্ৰীৰ বাবে বিশেষ ব্যৱস্থা

নামনি সোৱণশিৰি জলবিদ্যুৎ প্ৰকল্প (NHPC) কৰ্তৃপক্ষই বান্ধৰ আটাইকেইখন গেট খুলি পানী এৰি দিবলৈ বাধ্য হৈছে

অৰুণাচল প্ৰদেশত ধাৰাবাহিকভাৱে হৈ থকা নেৰা-নেপেৰা বৰষুণৰ ফলত সোৱণশিৰি নদীৰ জলপৃষ্ঠই ভয়াৱহ ৰূপ ধাৰণ কৰিছে । পৰিস্থিতি চম্ভালিব নোৱাৰি নামনি সোৱণশিৰি জলবিদ্যুৎ প্ৰকল্প (NHPC) কৰ্তৃপক্ষই বান্ধৰ আটাইকেইখন গেট খুলি পানী এৰি দিবলৈ বাধ্য হৈছে । যাৰ ফলত নামনি অংশত এক হাহাকাৰ পৰিস্থিতিৰ সৃষ্টি হৈছে ।

চাইৰেন বজাই জাৰি কৰা হৈছে হাই এলাৰ্ট

প্ৰকল্পটোৰ পৰা অস্বাভাৱিক হাৰত পানী এৰি দিয়াৰ লগে লগে নদীৰ দুয়োপাৰৰ অঞ্চলসমূহত তীব্ৰ আতংকই বিৰাজ কৰিছে । NHPC কৰ্তৃপক্ষই ইতিমধ্যে জৰুৰীকালীন চাইৰেন বজাই সমগ্ৰ অঞ্চলটোত হাই এলাৰ্ট জাৰি কৰিছে । যিকোনো মুহূৰ্ততে এক ভয়ংকৰ জলপ্লাৱনৰ সৃষ্টি হোৱাৰ আশংকা কৰা হৈছে ।

প্ৰশাসনৰ জৰুৰী আহ্বান: সোৱণশিৰি নদীৰ দাঁতিকাষৰীয়া তথা নৈ-পৰীয়া লোকসকলক অতি জৰুৰীভাৱে সতৰ্ক আৰু সাৱধান হৈ থাকিবলৈ নিৰ্দেশ দিয়া হৈছে । সম্ভাৱ্য বিপদৰ পৰা বাচিবলৈ বৰ্তমানৰ স্থান পৰিত্যাগ কৰি তৰিৎ গতিত সুৰক্ষিত তথা ওখ স্থানত আশ্ৰয় ল’বলৈ আহ্বান জনোৱা হৈছে ।

এই জিলাসমূহত অধিক ভয়াৱহ পৰিস্থিতিৰ আশংকা

NHPC-ৰ পানীয়ে নামনিৰ কেইবাখনো জিলালৈ বিপৰ্যয় নমাই অনাৰ পূৰ্ণ সম্ভাৱনা আছে । বিশেষকৈ তলত উল্লেখ কৰা অঞ্চলসমূহত সৰ্বোচ্চ সতৰ্কতা অৱলম্বন কৰিবলৈ কোৱা হৈছে: ধেমাজি, লখিমপুৰ, মাজুলী, বিহপুৰীয়া ।

জনসাধাৰণলৈ অনুৰোধ

নৈ-পৰীয়া ৰাইজক এই সময়ছোৱাত নদীৰ বুকুলৈ নাযাবলৈ, গৰু-মহ আদি পশুধনক সুৰক্ষিত স্থানলৈ স্থানান্তৰ কৰিবলৈ আৰু চৰকাৰী নিৰ্দেশনাসমূহ পালন কৰিবলৈ অনুৰোধ জনোৱা হৈছে । পৰিস্থিতিৰ ওপৰত জিলা প্ৰশাসন আৰু দুৰ্যোগ প্ৰশমন বাহিনীয়ে তীক্ষ্ণ নজৰ ৰাখিছে ।

লগতে পঢ়ক : আকৌ দিছে বৰষুণ, মহানগৰীত হাহাকাৰ পৰিস্থিতি!

মুখ্যমন্ত্ৰীৰ নিৰ্দেশত দুয়োগৰাকীয়ে মন্ত্ৰীয়ে পৰিস্থিতিৰ বুজ ল’বলৈ সোমবাৰে বান বিধ্বস্ত ধেমাজিত উপস্থিত হয়

ধেমাজিৰ ভয়াৱহ বান পৰিস্থিতি পৰিদৰ্শন মন্ত্ৰী কেশৱ মহন্ত আৰু সুশান্ত বৰগোহাঁইৰ । মুখ্যমন্ত্ৰী ড০ হিমন্ত বিশ্ব শৰ্মাৰ নিৰ্দেশ মৰ্মে ৰাজ্য চৰকাৰৰ দুয়োগৰাকীয়ে মন্ত্ৰীয়ে পৰিস্থিতিৰ বুজ ল’বলৈ সোমবাৰে বান বিধ্বস্ত ধেমাজিত উপস্থিত হয় । অসম-অৰুণাচল প্ৰদেশ সীমান্তত ধাৰাবাহিক বৰষুণৰ ফলত সৃষ্টি হোৱা বান আৰু গৰাখহনীয়া পৰিস্থিতি সন্দৰ্ভত জোনাইত জিলা দুৰ্যোগ ব্যৱস্থাপনা কৰ্তৃপক্ষৰ এক পৰ্যালোচনা বৈঠকতো অংশগ্ৰহণ কৰে দুয়োগৰাকীয়ে ।

মন্ত্ৰী সুশান্ত বৰগোহাঁই আৰু কেশৱ মহন্তৰ অধ্যক্ষতাত অনুষ্ঠিত এই বৈঠকত প্ৰভাৱিত অঞ্চলসমূহত চলি থকা সাহায্য আৰু পুনৰ্বাসন কাৰ্যসূচীৰ পৰ্যালোচনা কৰা হয় । মন্ত্ৰীদ্বয়ে জিলা প্ৰশাসনৰ বিষয়াসকলক অত্যাৱশ্যকীয় সামগ্ৰী, স্বাস্থ্য সেৱা আৰু আশ্ৰয় শিবিৰত থকা পৰিয়ালসমূহক সময়মতে সহায় আগবঢ়োৱাৰ বাবে নিৰ্দেশ দিয়ে ।

লগতে, তেওঁলোকে বান পৰিস্থিতিৰ ওপৰত তীক্ষ্ণ নজৰ ৰাখিবলৈ আৰু ফলপ্ৰসূ দুৰ্যোগ ব্যৱস্থাপনাৰ বাবে বিভাগসমূহৰ মাজত সমন্বয় শক্তিশালী কৰিবলৈ বিষয়াসকলক কঠোৰ নিৰ্দেশ দিয়ে ।

এই পৰ্যালোচনা বৈঠকত সাংসদ প্ৰদান বৰুৱা আৰু বিধায়ক প্ৰশান্ত ফুকন, ভূৱন পেগু তথা জীৱন গগৈৰ লগতে জিলা প্ৰশাসনৰ জ্যেষ্ঠ বিষয়া আৰু দুৰ্যোগ ব্যৱস্থাপনা কৰ্তৃপক্ষৰ সদস্যসকলে অংশগ্ৰহণ কৰে ।

অব্যাহত থকা ধাৰাষাৰ বৰষুণ আৰু নদীৰ জলস্তৰ বৃদ্ধি পোৱাৰ সময়তে এই বৈঠক অনুষ্ঠিত হৈছে, যাৰ প্ৰতি লক্ষ্য ৰাখি ৰাজ্য চৰকাৰে সমগ্ৰ অসমৰ বানাক্ৰান্ত অঞ্চলসমূহত সাহায্য আৰু উদ্ধাৰ অভিযান তীব্ৰতৰ কৰি তুলিছে ।

লগতে পঢ়ক : শিৱসাগৰৰ খহনীয়া প্ৰতিৰোধৰ বাবে চৰকাৰৰ বৃহৎ প্ৰকল্পৰ পৰিকল্পনা