ক্ৰিকেটৰ মক্কাত ইতিহাস ৰচিলে প্ৰটিয়াছে…

আই চি চি ৱৰ্ল্ড টেষ্ট চেম্পিয়নশ্বিপ (ডব্লিউ টি চি)ৰ তৃতীয় চক্ৰৰ (২০২৩-২৫)ৰ খিতাপ দখল কৰিছে দক্ষিণ আফ্ৰিকাই । ক্ৰিকেটৰ মক্কা হিচাবে পৰিচিত লণ্ডনৰ ঐতিহাসিক লৰ্ডছ ক্ৰিকেট খেলপথাৰত অনুষ্ঠিত ফাইনেলত দক্ষিণ আফ্ৰিকাই অষ্ট্ৰেলিয়াক ৫ উইকেটত পৰাস্ত কৰে । মেচখনত দক্ষিণ আফ্ৰিকাই জয়ৰ বাবে ২৮২ ৰানৰ লক্ষ্য লাভ কৰিছিল, যিটো খেলৰ চতুৰ্থ দিনটোত (১৪ জুন) দুপৰীয়াৰ আহাৰ গ্ৰহণৰ পূৰ্বে উপনীত হয় ।

ক্ৰিকেটৰ মক্কাত প্ৰটিয়াছৰ অভিলেখ-

২৭ বছৰৰ পাছত দক্ষিণ আফ্ৰিকাই আই চি চি খিতাপ দখল কৰিছে । ইয়াৰ পূৰ্বে ১৯৯৮ চনত (উইলছ ইণ্টাৰনেশ্যনেল কাপ) প্ৰথমবাৰৰ বাবে আই চি চি খিতাপ দখল কৰিছিল দলটোৱে । উল্লেখ্য যে এই মেচখনত অষ্ট্ৰেলিয়াই প্ৰথম ইনিংছত ২১২ ৰান আৰু দ্বিতীয় ইনিংছত ২০৭ ৰান সংগ্ৰহ কৰে । আনহাতে দক্ষিণ আফ্ৰিকাৰ প্ৰথম ইনিংছ ১৩৮ ৰানত সীমাবদ্ধ আছিল । প্ৰথম ইনিংছৰ ভিত্তিত অষ্ট্ৰেলিয়াই ৭৪ ৰানৰ অগ্ৰগতি লাভ কৰিছিল, যাৰ বাবেই দক্ষিণ আফ্ৰিকাৰ সন্মুখত ২৮২ ৰানৰ লক্ষ্য নিৰ্ধাৰণ কৰিছিল কেংগেৰু বাহিনীয়ে ।

বাভুমা-মাৰ্ক্ৰামে ঘূৰালে মেচৰ গতি-

ক্ৰিকেটৰ মক্কাত অনুষ্ঠিত হোৱা এই মেচখনত লক্ষ্য অনুসৰণ কৰি দক্ষিণ আফ্ৰিকাই দ্বিতীয় ইনিংছত ৭০ ৰান সংগ্ৰহ কৰি দ্বিতীয়টো উইকেট হেৰুৱাই । ইয়াৰ পৰাই এইডেন মাক্ৰাম আৰু অধিনায়ক টেম্বা বাভুমাই ক্ৰীজত দলৰ দায়িত্ব লয় । তৃতীয় উইকেটৰ বাবে দুয়োৰে মাজত ১৪৭ ৰানৰ অংশীদাৰিত্বই দক্ষিণ আফ্ৰিকাৰ বাবে জয় সহজ কৰি তোলে । এই অংশীদাৰিত্বৰ সময়ছোৱাত মাৰ্ক্ৰামে ১১টা চাৰিৰ সহায়ত ১০১টা বলত শতক সম্পূৰ্ণ কৰে । এয়া আছিল তেওঁৰ টেষ্ট কেৰিয়াৰৰ অষ্টমটো শতিক । লগে লগে আই চি চিৰ ইভেণ্টৰ ফাইনেলত শতক অৰ্জন কৰা প্ৰথমজন দক্ষিণ আফ্ৰিকাৰ বেটছমেন হিচাপে পৰিগণিত হয় মাৰ্ক্ৰাম ।

আনহাতে, টেম্বা বাভুমাই হামষ্ট্ৰিঙৰ আঘাতৰ সৈতে যুঁজিও এক ডাঙৰ ইনিংছ খেলিবলৈ সক্ষম হয় । বাভুমাই ১৩৪টা বলত ৬৬ ৰান সংগ্ৰহ কৰে, য’ত পাঁচটা চাৰি আছিল । বাভুমাক ৰান আউট কৰে অধিনায়ক পেট কামিন্সে । ট্ৰিষ্টান ষ্টাবছ বিশেষ প্ৰদৰ্শনত আৰু ৮ ৰান সংগ্ৰহ কৰি মিচেল ষ্টাৰ্কৰ বলি হয় । ইয়াৰ পিছতে মাক্ৰাম আৰু ডেভিদ বেডিংহামে ৫ উইকেটৰ বিনিময়ত ৩৫ ৰানৰ অংশীদাৰিত্ব গঢ়ি দক্ষিণ আফ্ৰিকাক জয়ৰ ওচৰলৈ লৈ যায় । দক্ষিণ আফ্ৰিকাই জয়ী হ’বলৈ ৬ ৰান বাকী থকাৰ সময়তে মাক্ৰাম আউট হয় । মাক্ৰামক জোছ হেজলউডে আউট কৰে । মাৰ্ক্ৰামে ২০৭টা বলত ১৩৬ ৰান সংগ্ৰহ কৰে, য’ত ১৪টা চাৰি আছিল ।

উইকেট পতনঃ ৯-১ (ৰিয়ান ৰিকেলটন, ২.১ অভাৰ), ৭০-২ (ৱিয়ান মুল্ডাৰ, ১৭.৪ অভাৰ), ২১৭-৩ (টেম্বা বাভুমা, ৫৮.৬ অভাৰ), ২৪১-৪ (ট্ৰিষ্টান ষ্টাবছ, ৭০.৩ অভাৰ), ২৭৬-৫ (এইডেন মাৰ্ক্ৰাম, ৮০.৬ অভাৰ)

অষ্ট্ৰেলিয়াৰ দ্বিতীয় ইনিংছত ষ্টাৰ্কে বেটেৰে কৰিলে এই কাম-

অষ্ট্ৰেলিয়াৰ দ্বিতীয় ইনিংছৰ কথা ক’বলৈ গ’লে কেংগাৰু দলৰ স্ক’ৰ এসময়ত আছিল ৭টা উইকেটত ৭৩ ৰান । ইয়াৰ পিছতে উইকেটকীপাৰ বেটছমেন এলেক্স কেৰী আৰু মিচেল ষ্টাৰ্কৰ উজ্জ্বল বেটিঙৰ বাবে অষ্ট্ৰেলিয়াই ২০৭ ৰান সংগ্ৰহ কৰিবলৈ সক্ষম হয় । ষ্টাৰ্কে ১৩৬টা বলত ৫৮ (অপৰাজিত) ৰান সংগ্ৰহ কৰে, য’ত পাঁচটা চাৰি আছিল । আনহাতে এলেক্স কেৰীয়ে ৫টা চাৰিৰ সহায়ত ৫০টা বলত ৪৩ ৰান সংগ্ৰহ কৰে । দক্ষিণ আফ্ৰিকাৰ হৈ কাগিছ’ ৰাবাডাই দ্বিতীয় ইনিংছতো উজ্জ্বল বলিং কৰি ৪টা উইকেট দখল কৰে । আনহাতে লুংগি ঙিডিয়ে তিনিটা সফলতা লাভ কৰে ।

উইকেটৰ পতনঃ ২৮-১ (উছমান খোৱাজা, ১০.২ অভাৰ), ২৮-২ (কেমেৰুন গ্ৰীণ, ১০.৪ অভাৰ), ৪৪-৩ (মাৰ্নাছ লাবুশ্বান, ১৭.৫ অভাৰ), ৪৮-৪ (ষ্টিভ স্মিথ, ১৮.৫ অভাৰ), ৬৪-৫ (বিউ ৱেবষ্টাৰ, ২২.৬ অভাৰ), ৬৬-৬ (ট্ৰেভিছ হেড, ২৩.৪ অভাৰ), ৭৩-৭ (পেট কামিন্স, ২৪.৫ অভাৰ), ১৩৪-৮ (এলেক্স কেৰী, ৩৮.২ অভাৰ), ১৪৮-৯ (নাথান লায়ন, ৪২.৪ অভাৰ), ২০৭-১০ (জোছ হেজলউড, ৬৪.৬ অভাৰ)

প্ৰথম ইনিংছত কামিন্সৰ আগত আত্মসমৰ্পণ আফ্ৰিকান বেটছমেনৰ-

প্ৰথম ইনিংছত দক্ষিণ আফ্ৰিকাৰ বেটছমেনৰ প্ৰদৰ্শন হতাশাজনক আছিল । ফলত সমগ্ৰ দক্ষিণ আফ্ৰিকাৰ দলটো ১৩৮ ৰানতে অল আইট হয় । দক্ষিণ আফ্ৰিকাৰ হৈ ডেভিদ বেডিংহামে সৰ্বাধিক ৪৫ ৰান সংগ্ৰহ কৰে, য’ত ৬টা চাৰি আছিল । একে সময়তে অধিনায়ক টেম্বা বাভুমাই ৮৪টা বলত চাৰিটা চাৰি আৰু এটা ছয়ৰ সহায়ত ৩৬ ৰানৰ ইনিংছ খেলে । অষ্ট্ৰেলিয়াৰ অধিনায়ক পেট কামিন্সে ৬টা উইকেট দখল কৰাৰ বিপৰীতে মিচেল ষ্টাৰ্কে দুটা সফলতা লাভ কৰে ।

উইকেটৰ পতন: ০-১ (এইডেন মাৰ্ক্ৰাম, ০.৬ অভাৰ), ১৯-২ (ৰিয়ান ৰিকেলটন, ৮.৪ অভাৰ), ২৫-৩ (ৱিয়ান মুল্ডাৰ, ১৫.২ অভাৰ), ৩০-৪ (ট্ৰিষ্টান ষ্টাবছ, ২০.২ অভাৰ), ৯৪-৫ (টেম্বা বাভুমা, ৩৯.২ অভাৰ), ১২৬-৬ (কাইল ভেৰিন, ৫১.৩ অভাৰ), ১২৬-৭ (মাৰ্কো জান্সেন, ৫১.৬ অভাৰ), ১৩৫-৮ (ডেভিদ বেডিংহাম, ৫৫.২ অভাৰ), ১৩৮-৯ (কেশৱ মহাৰাজ, ৫৬.৫ অভাৰ), ১৩৮-১০ (কাগিছ’ ৰাবাদা, ৫৭.১ অভাৰ)

ৰাবাডাৰ বিধ্বংসী বলিঙত প্ৰথম ইনিংছত অষ্ট্ৰেলিয়াৰ দুদৰ্শা-

টছত পৰাস্ত হৈ প্ৰথমে বেটিং কৰাৰ পিছত অষ্ট্ৰেলিয়াৰ দলটোৱে প্ৰথম ইনিংছত ২১২ ৰান সংগ্ৰহ কৰে । বিউ ৱেবষ্টাৰে সৰ্বাধিক ৭২ ৰান সংগ্ৰহ কৰে, য’ত ১১টা চাৰি আছিল । প্ৰাক্তন অধিনায়ক ষ্টিভ স্মিথে ৬৬ ৰান সংগ্ৰহ কৰে । স্মিথে নিজৰ ইনিংছত ১০টা চাৰি কোবাই । দক্ষিণ আফ্ৰিকাৰ হৈ বেগী বলাৰ কাগিছ’ ৰাবাডাই সৰ্বাধিক ৫টা উইকেট দখল কৰাৰ বিপৰীতে বাওঁহাতৰ পেচাৰ মাৰ্কো জেন্সেনে তিনিটা উইকেট লাভ কৰে । স্পীনাৰ কেশৱ মহাৰাজ আৰু এইডেন মাক্ৰামে এটাকৈ উইকেট দখল কৰে ।

উইকেটৰ পতনঃ ১২-১ (উছমান খোৱাজা, ৬.৩ অভাৰ), ১৬-২ (কেমেৰুন গ্ৰীণ, ৬.৬ অভাৰ), ৪৬-৩ (মাৰ্নাছ লাবুশ্বানে, ১৭.৬ অভাৰ), ৬৭-৪ (ট্ৰেভিছ হেড, ২৩.২ অভাৰ), ১৪৬-৫ (ষ্টিভ স্মিথ, ৪১.৬ অভাৰ), ১৯২-৬ (এলেক্স কেৰী, ৫১.১ অভাৰ), ১৯৯-৭ (পেট কামিন্স, ৫২.৪ অভাৰ), ২১০-৮ (ৱেবষ্টাৰ, ৫৪.৪ অভাৰ), ২১১-৯ (নাথান লায়ন, ৫৫.৫ অভাৰ), ২১২-১০ (মিচেল ষ্টাৰক, ৫৬.৪ অভাৰ)।

টেষ্ট ক্ৰিকেটৰ ইতিহাসত দক্ষিণ আফ্ৰিকা আৰু অষ্ট্ৰেলিয়াৰ মাজত ১০১খন খেল অনুষ্ঠিত হৈছে । এই সময়ছোৱাত অষ্ট্ৰেলিয়াই ৫৪খন খেলত জয়লাভ কৰিছে । আনহাতে দক্ষিণ আফ্ৰিকাই ২৬খন মেচত জয়লাভ কৰিছে । দুয়োখন দেশৰ মাজত ২১খন খেল ড্ৰ’ত সমাপ্ত হৈছে । অৰ্থাৎ পৰিসংখ্যাৰ ক্ষেত্ৰত কেংগাৰু দলটো আগবাঢ়ি আছে ।

লগতে পঢ়ক : কেৱল পৰাজয়… ২৭ বছৰে থকা ‘চ’ৰ্কাছ‘ অভিধা দূৰ কৰিবলৈ সক্ষম হ’বনে দক্ষিণ আফ্ৰিকা ?

এদিনীয়াৰ পৰা অৱসৰ ঘোষণা গ্লেন মেক্সৱেলৰ

অষ্ট্ৰেলিয়াৰ তাৰকা অল ৰাউণ্ডাৰ গ্লেন মেক্সৱেলে এদিনীয়া ক্ৰিকেটৰ পৰা অৱসৰ ঘোষণা কৰিছে । অৱশ্যে টি-২০ত খেলি থাকিব তেওঁ । ক্ৰিকেট অষ্ট্ৰেলিয়াই কয় যে ২০২৬ চনৰ টি-২০ বিশ্বকাপৰ বাবে প্ৰস্তুতি চলাবলৈ এদিনীয়া ফৰ্মেটৰ পৰা অৱসৰ লোৱাৰ কথা ঘোষণা কৰিছে মেক্সৱেলে ।

২০১২ চনৰ পৰা আৰম্ভ হৈছিল গ্লেন মেক্সৱেলৰ এদিনীয়া কেৰিয়াৰ । ১৪৯খন এদিনীয়া মেচত অষ্ট্ৰেলিয়াক প্ৰতিনিধিত্ব কৰা এই কিংবদন্তি খেলুৱৈগৰাকীয়ে ৫.৪৬ ইকনমিৰে বলিঙত মুঠ ৩৯৯০ ৰান সংগ্ৰহ কৰি ৭৭টা উইকেট দখল কৰিছে । ২০১৫ আৰু ২০২৩ চনৰ বিশ্বকাপ বিজয়ী দলৰ অংশ হিচাপেও তেওঁ আছিল । এই ফৰ্মেটত মেক্সৱেলৰ নামত চাৰিটা শতক আৰু ২৩টা অৰ্ধশতক আছে ।

গ্লেন মেক্সৱেলৰ ২০১ ৰানৰ অপৰাজিত ইনিংছ-

৩৬ বছৰীয়া খেলুৱৈগৰাকীয়ে ২০২৩ চনৰ বিশ্বকাপৰ সময়ত আফগানিস্তানৰ বিৰুদ্ধে ২০১ ৰানৰ অপৰাজিত ইনিংছ খেলিছিল । এই ফৰ্মেটত এয়া গ্লেন মেক্সৱেলৰ কেৰিয়াৰৰ অন্যতম শ্ৰেষ্ঠ ইনিংছ আছিল । বলিঙৰ ক্ষেত্ৰতো তেওঁ বিপক্ষৰ বেটছমেনৰ বাবে সমস্যা হিচাপে প্ৰমাণিত হৈছে । তেওঁ চাৰিবাৰকৈ এটা ইনিংছত ৪টা উইকেট দখল কৰিছে । ফিল্ডিঙতো তেওঁৰ প্ৰদৰ্শন অতুলনীয় আছিল । এই ফৰ্মেটত তেওঁৰ নামত ৯১টা কেচ আছে ।

গ্লেন মেক্সৱেলৰ প্ৰতিক্ৰিয়া-

অৱসৰ লোৱাৰ সিদ্ধান্তৰ বিষয়ে প্ৰকাশ কৰি মেক্সৱেলে কয়, ‘আৰম্ভণিতে অকালতে আৰু অভাৱনীয়ভাৱে নিৰ্বাচিত হোৱাটো মোৰ মনত আছে । অষ্ট্ৰেলিয়াৰ হৈ কেইখনমান মেচ খেলি গৌৰৱ অনুভৱ কৰিছো । তেতিয়াৰ পৰাই মই উত্থান-পতনৰ মাজেৰে পাৰ হৈ আহিছো, যেনে দলৰ বাহিৰত থকা, ঘূৰি অহা, কিছুমান বিশ্বকাপত খেলা আৰু ভাল দলৰ অংশ হোৱা ।’

দক্ষিণ আফ্ৰিকাৰ ক্ৰিকেটাৰ হেইনৰিখ ক্লাচেনেও ল’লে সন্যাস-

দক্ষিণ আফ্ৰিকাৰ তাৰকা উইকেটকীপাৰ বেটছমেন হেইনৰিখ ক্লাচেনে আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰিছে । ক্লাচেনে ইনষ্টাগ্ৰামত এটা আৱেগিক পোষ্ট শ্বেয়াৰ কৰি এই কথা নিশ্চিত কৰিছে । ২০২৪ চনৰ জানুৱাৰী মাহত ক্লাচেনে টেষ্ট ক্ৰিকেটৰ পৰা অৱসৰ গ্ৰহণ কৰিছিল যদিও টি-২০ আন্তঃৰাষ্ট্ৰীয় আৰু এদিনীয়াত সক্ৰিয় আছিল । চলিত বৰ্ষৰ এপ্ৰিল মাহত ক্ৰিকেট দক্ষিণ আফ্ৰিকাৰ (চি এছ এ) কেন্দ্ৰীয় চুক্তিৰ বাবে তেওঁক অৱহেলিত কৰা হৈছিল ।

আৱেগিক হৈ পৰিল ক্লাচেন-

৩৩ বছৰীয়া হেইনৰিখ ক্লাচেনে ইনষ্টাগ্ৰামত লিখিছে, ‘মোৰ বাবে এইটো এটা দুখৰ দিন, মই আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ সিদ্ধান্ত লৈছো । মোৰ আৰু মোৰ পৰিয়ালৰ ভৱিষ্যতৰ বাবে কি ভাল সেইটো নিৰ্ণয় কৰিবলৈ মোৰ বহু সময় লাগিছিল । সঁচাকৈয়ে কঠিন সিদ্ধান্ত আছিল যদিও একে সময়তে মই ইয়াৰ ওপৰত সম্পূৰ্ণ সন্তুষ্ট । আৰম্ভণিৰে পৰাই মোৰ দেশক প্ৰতিনিধিত্ব কৰাটো মোৰ বাবে আটাইতকৈ ডাঙৰ সন্মান ।’

ক্লাচেনৰ কেৰিয়াৰ-

সোঁহতীয়া বেটছমেন হেইনৰিখ ক্লাচেনে ২০১৮ চনৰ ফেব্ৰুৱাৰী মাহত ভাৰতৰ বিৰুদ্ধে এদিনীয়া আৰু টি-২০ত অভিষেক ঘটায় । ২০১৯ চনত ৰাঁচীত ভাৰতৰ বিৰুদ্ধে তেওঁৰ টেষ্ট অভিষেকো ঘটিছিল । হেইনৰিখ ক্লাচেনে দক্ষিণ আফ্ৰিকাৰ হৈ ৪খন টেষ্ট, ৬০খন এদিনীয়া আৰু ৫৮খন টি-২০ মেচত অংশগ্ৰহণ কৰিছে ।

টেষ্ট ক্ৰিকেটত হেইনৰিখ ক্লাচেনে ১৩.০০ গড়ে ১০৪ ৰান সংগ্ৰহ কৰিছে । এদিনীয়াত তেওঁ ২১৪১ ৰান সংগ্ৰহ কৰিছিল, য’ত ৪ শতক আৰু ১১টা অৰ্ধশতক আছে । এদিনীয়াত ক্লাচেনৰ গড় আছিল ৪৩.৬৯ আৰু ষ্ট্ৰাইক ৰেট আছিল ১১৭.০৫ । ক্লাচেনে টি-২০ত গড়ে ২৩.২৫ আৰু ষ্ট্ৰাইক ৰেট ১৪১.৮৪ ৰে ১০০০ ৰান সংগ্ৰহ কৰিছে । টি-২০ আন্তঃৰাষ্ট্ৰীয় মেচত ক্লাচেনে ৫টা অৰ্ধশতক অৰ্জন কৰিছে ।

আই পি এলত ছানৰাইজাৰ্ছ হায়দৰাবাদৰ অংশ হিচাপে আছে হেইনৰিচ ক্লাচেন । ক্লাচেনে ২০২৫ চনৰ আই পি এলত ১৪খন মেচ খেলিছিল, য’ত তেওঁ ৪৪.২৭ গড়ে ৪৮৭ ৰান সংগ্ৰহ কৰিছিল । এই সময়ছোৱাত ক্লাচেনে ১টা শতক আৰু ১টা অৰ্ধশতক অৰ্জন কৰে । ২০২৫ চনৰ ২৫ মে’ত কলকাতা নাইট ৰাইডাৰ্ছৰ বিৰুদ্ধে  ক্লাচেনে ৩৭টা বলত শতক অৰ্জন কৰে ।

লগতে পঢ়ক : এইবাৰ আইপিএলে লাভ কৰিব নতুন চেম্পিয়ন; আৰ চি বি-পাঞ্জাৱৰ মাজত খিতাপৰ যুঁজ