গব্বাত ভাৰতৰ শক্তিশালী অস্ত্ৰ হৈ পৰিব পাৰে এই ৫ জন খেলুৱৈ… ইয়াৰ পূৰ্বেও কেংগাৰু দলক পেলাইছে শলঠেকত
বৰ্তমান ভাৰতীয় দলটোৱে বৰ্ডাৰ-গাভাস্কাৰ ট্ৰফীৰ অধীনত অষ্ট্ৰেলিয়াৰ বিৰুদ্ধে ৫খনীয়া মেচৰ টেষ্ট শৃংখলা খেলি আছে । প্ৰথমখন টেষ্টত ভাৰতীয় দলে জয়লাভ কৰাৰ বিপৰীতে দ্বিতীয় টেষ্টত কেংগাৰু দলে সফলতা লাভ কৰে । এই শৃংখলাটো বৰ্তমান ১-১ ব্যৱধানত সমতাত আছে ।
এতিয়া শনিবাৰৰ পৰা (১৪ ডিচেম্বৰ) ব্রিছবেনৰ গাব্বা খেলপথাৰত অনুষ্ঠিত হ’ব শৃংখলাৰ তৃতীয়খন টেষ্ট । তৃতীয়খন টেষ্ট মেচৰ সময় সলনি হৈছে । এই টেষ্ট ভাৰতীয় সময় অনুসৰি পুৱা ৫:৫০ বজাৰ পৰা আৰম্ভ হ’ব । এই টেষ্ট মেচখনৰ টছ পুৱা ৫.২০ বজাত অনুষ্ঠিত হ’ব ।
গাব্বা খেলপথাৰত ভাৰতীয় দলৰ এইখন হ’ব অষ্টমখন টেষ্ট মেচ । পূৰ্বৰ ৭ খন টেষ্ট মেচত দলটোৱে মাত্ৰ ১ খন খেলত জয়লাভ কৰিছে । আনহাতে ৫ খনত পৰাজয়ৰ সন্মুখীন হ’বলগীয়া হৈছিল দলটো । এখন মেচ ড্ৰ’ হৈছে । এই খেলপথাৰত ভাৰতীয় দলটোৱে জয়লাভ কৰা একমাত্ৰ টেষ্টখন ২০২০-২১ বৰ্ষৰ অন্তিমখন টেষ্ট শৃংখলাৰ সময়ত অনুষ্ঠিত হৈছিল ।
শেষৰটো টেষ্ট শৃংখলাত ৪খন টেষ্ট মেচ অনুষ্ঠিত হৈছিল, য’ত ভাৰতীয় দলে অষ্ট্ৰেলিয়াক ২-১ ব্যৱধানত পৰাস্ত কৰিছিল । সেই সময়ছোৱাত গব্বা টেষ্টত ভাৰতীয় দলটোৱে কেংগাৰু দলক ৩ উইকেটত পৰাস্ত কৰিছিল । সেই শৃংখলাৰ আটাইতকৈ কঠিন মেচখন আছিল গাব্বা টেষ্ট । সেই সময়ছোৱাত উইকেটকীপাৰ বেটছমেন ঋষভ পন্ট, বেগী বলাৰ মহম্মদ চিৰাজ, অ’পেনাৰ শুভমন গীল আৰু স্পীন অলৰাউণ্ডাৰ ৱাশ্বিংটন সুন্দৰে জয়ৰ বাবে নিজৰ সকলোখিনি আগবঢ়াইছিল ।
কোহলী আটাইতকৈ শক্তিশালী অস্ত্ৰ হ’ব পাৰে-
এই চাৰিজন ভাৰতীয় দলৰ বাবে পুনৰ এবাৰ এক শক্তিশালী অস্ত্ৰ হিচাপে প্ৰমাণিত হ’ব পাৰে । ইয়াৰ বাহিৰেও বিৰাট কোহলীৰ নামো এই তালিকাত আছে । এই খেলপথাৰত এতিয়ালৈকে কোহলীয়ে মাত্ৰ ১খন টেষ্টহে খেলিছে, য’ত তেওঁৰ প্ৰদৰ্শন ভা্ল নাছিল । কিন্তু পাৰ্থ টেষ্টৰ দ্বিতীয় ইনিংছত ১০০ ৰানৰ অপৰাজিত ইনিংছ খেলি তেওঁ নিজৰ ফৰ্ম প্ৰদৰ্শন কৰিছে ।
ইয়াৰ উপৰিও অষ্ট্ৰেলিয়াৰ মাটিত তেওঁৰ এক উৎকৃষ্ট অভিলেখ আছে । ঘৰুৱা ক্ষেত্ৰত কেংগাৰুৰ বিৰুদ্ধে দ্বিতীয় সৰ্বাধিক ৰান সংগ্ৰহকাৰী কোহলী । অষ্ট্ৰেলিয়াত এতিয়ালৈকে ১৫খন টেষ্ট খেলিছে, য’ত তেওঁ ৫২.৬৭ৰ উৎকৃষ্ট গড়ত ১৪৭৫ ৰান সংগ্ৰহ কৰিছে । এই সময়ছোৱাত তেওঁ ৭টা শতক আৰু ৪টা অৰ্ধশতক অৰ্জন কৰিছে ।
এইবাৰ এই ৪ জনে গাব্বাত কঢ়িয়াই আনিব পাৰে জয়-
ঋষভ পন্ট, শুভমন গীল, ৱাশ্বিংটন সুন্দৰ আৰু মহম্মদ চিৰাজে এই খেলপথাৰত এতিয়ালৈকে মাত্ৰ ১-১ টেষ্ট মেচহে খেলিছে । এইখনেই আছিল অন্তিমখন খেল, যত ভাৰতীয় দলটোৱে জয়লাভ কৰিছিল । সেই মেচখনত চাৰিওজনে গুৰুত্বপূৰ্ণ ভূমিকা পালন কৰিছিল । এনে পৰিস্থিতিত অনুৰাগীয়ে আশা কৰিছে যে এইবাৰো এই চাৰিজনে গাব্বাৰ খেলপথাৰত শক্তিশালী প্ৰদৰ্শন আগবঢ়াব ।
২০২১ চনৰ গাব্বা টেষ্টত অষ্ট্ৰেলিয়াই প্ৰথম ইনিংছত ৩৬৯ ৰান সংগ্ৰহ কৰাৰ পিছত ভাৰতীয় দলে ৩৩৬ ৰান সংগ্ৰহ কৰে । এনে পৰিস্থিতিত কেংগাৰু দলটোৱে ৩৩ ৰানৰ অগ্ৰগতি লাভ কৰিছিল । ইয়াৰ পিছত দ্বিতীয় ইনিংছত ২৯৪ ৰান সংগ্ৰহ কৰাৰ পিছত ৩২৮ ৰানৰ লক্ষ্য নিৰ্ধাৰণ কৰা হয় । প্ৰত্যুত্তৰত ভাৰতীয় দলে ৩ উইকেটত জয়লাভ কৰে ।
কেংগাৰুৰ বলাৰক প্ৰহাৰ কৰিছিল পণ্ট-গীলে
এই মেচখনত ঋষভ পন্টে প্ৰথম ইনিংছত ২৩ ৰান সংগ্ৰহ কৰিছিল । কিন্তু কঠিন পৰিস্থিতিৰ প্ৰতি লক্ষ্য ৰাখি পণ্টে দ্বিতীয় ইনিংছত ৮৯ ৰানৰ অপৰাজিত ইনিংছ খেলিছিল । শেষলৈকে তেওঁ দৃঢ়তাৰে থিয় দিছিল আৰু দলটোক জয়ৰ দিশত আগুৱাই নিয়াৰ পিছতহে উভতি আহিছিল । একেধৰণৰ অৱস্থা আছিল প্ৰথম ইনিংছত ৭ ৰান সংগ্ৰহ কৰা গীলৰ । কিন্তু দ্বিতীয় ইনিংছত তেওঁ ৯১ ৰানৰ উজ্জ্বল ইনিংছ খেলিছিল ।
ছিৰাজে এনেদৰে অষ্ট্ৰেলিয়াক পৰাস্ত কৰিছিল-
ফাষ্ট বলাৰ ছিৰাজে গাব্বাত খেলা শেষ টেষ্টৰ প্ৰথম ইনিংছত মাত্ৰ ১ উইকেটহে দখল কৰিছিল । কিন্তু দ্বিতীয় ইনিংছত যেতিয়া কেংগাৰু দলটোৱে ৩৩ ৰানৰ অগ্ৰগতিৰে ডাঙৰ লক্ষ্য নিৰ্ধাৰণ কৰিবলৈ ওলাই আহিছিল, তেতিয়া ছিৰাজে তেওঁলোকৰ পৰিকল্পনা নষ্ট কৰিছিল । ছিৰাজে বিস্ফোৰক ৰূপত ৫টা উইকেট দখল কৰি কেংগাৰু দলৰ মেৰুদণ্ড ভাঙি পেলায় ।
দ্বিতীয় ইনিংছত ১৯.৫ অভাৰত ৭৩ ৰানত ৫ উইকেট দখল কৰে চিৰাজে । তেওঁ মাৰ্নাছ লাবুশ্বেন, ষ্টিভ স্মিথ, মেথিউ ৱেড, মিচেল ষ্টাৰ্ক আৰু জছ হেজলউডক আউট কৰিছিল । অৰ্থাৎ মিডল অৰ্ডাৰ ধ্বংস কৰাৰ সমান্তৰালকৈ চিৰাজে কেংগাৰুৰ নিম্ন ক্ৰমৰ বেটিং অৰ্ডাৰকো ধ্বংস কৰিছিল ।
সুন্দৰে স্থান পালে আশ্চৰ্যকৰ প্ৰদৰ্শন কৰিব-
স্পীন অলৰাউণ্ডাৰ ৱাশ্বিংটন সুন্দৰক যোৱাবাৰ গাব্বাত হোৱা জয়ৰ প্ৰকৃত নায়ক বুলি গণ্য কৰিব পাৰি । দৰাচলতে যেতিয়া ভাৰতীয় দলটোৱে লক্ষ্য অনুসৰণ ওলাই আহিছিল তেতিয়া ১৮৬ ৰানত ৬টা উইকেট হেৰুৱাইছিল । সেই কঠিন পৰিস্থিতিত সুন্দৰে ৬২ ৰান আৰু শ্বাৰ্দুলে ৬৭ ৰান সংগ্ৰহ কৰি ভাৰতীয় দলটোক জয়ৰ দিশে আগুৱাই লৈ যায় ।
দুয়োজনে ২১৭টা বলত ১২৩ ৰানৰ মেচ বিজয়ী অংশীদাৰিত্ব গঢ়ি তুলিছিল । চলিত শৃংখলাত শ্বাৰ্দুল দলত নাই । আনহাতে ভাৰতীয় প্লেইং-১১ত স্থান পোৱাটো সুন্দৰৰ বাবে কঠিন হৈ পৰিছে । কিন্তু ভাৰতীয় অধিনায়ক ৰোহিত শৰ্মাই যদি সুন্দৰৰ ওপৰত আস্থা প্ৰকাশ কৰে, তেন্তে এইবাৰো তেওঁ নিজৰ পুৰণি যাদু দেখুৱাব পাৰিব । যোৱা গাব্বা টেষ্টত স্পীন বলিংতো সুন্দৰ কাম কৰিছিল আৰু ৪টা উইকেট দখল কৰিছিল ।
