জম্মু-শ্ৰীনগৰ ৰে’ল লাইন শীঘ্ৰে কাৰ্যক্ষম হ’বলৈ সাজু হৈছে । কেন্দ্ৰীয় ৰে’ল মন্ত্ৰী অশ্বিনী বৈষ্ণৱে এক্সৰ এটা পোষ্টত এই তথ্য প্ৰকাশ কৰিছে । দৰাচলতে আটাইতকৈ প্ৰত্যাহ্বানজনক কাটৰা-বেনিহাল ট্ৰেকত ট্ৰায়েল ট্ৰেইনখনৰ সফল পৰীক্ষণ হৈছে । বিশেষ কথাটো হ’ল ১১০০ ফুটতকৈও অধিক উচ্চতাৰ চেনাব দলঙত এই ৰে’লখন ঘণ্টাত ১১০ কিলোমিটাৰ বেগত চলিছিল । এই সফল পৰীক্ষাৰ তথ্য কেন্দ্ৰীয় মন্ত্ৰীগৰাকীয়ে তেওঁৰ ছ’চিয়েল মিডিয়া পোষ্টৰ জৰিয়তে শ্বেয়াৰ কৰিছে ।

ৰেল পথত শেষৰটো ট্ৰায়েল ৰান সফল-

চি আৰ এছ দীনেশ চান্দ দেশৱালৰ মতে, কাটৰ পৰা বেনিহাললৈ এই ৰে’লপথটো প্ৰত্যাহ্বানৰে ভৰপূৰ । এইটো ১৮০ ডিগ্ৰী ক্লাইম্বিং ট্ৰেক যদিও ইয়াত ট্ৰায়েল ট্ৰেইনখনৰ সফলতাৰে পৰীক্ষা কৰা হৈছে । বুধবাৰে এই ৰে’লখনে পুৱা ১০:৩০ বজাত কাটৰা ষ্টেচনৰ পৰা ওলাই মাত্ৰ ডেৰ ঘণ্টাৰ ভিতৰতে তীব্ৰ বেগেৰে বেনিহাল ষ্টেচনত উপস্থিত হয় । এই ট্ৰেকত এইটোৱেই আছিল শেষৰটো ট্ৰায়েল ৰাণ, যিটো সফল হয় । তেওঁ কয় যে কাশ্মীৰলৈ পোনপটীয়া ৰে’ল সেৱা আৰম্ভ কৰাৰ সিদ্ধান্ত লোৱাৰ পূৰ্বে সকলো ট্ৰায়েল ৰানৰ পৰা সংগ্ৰহ কৰা তথ্য বিশ্লেষণ কৰা হ’ব ।

ৰে’লমন্ত্ৰীয়ে ক’লে এই কথা-

কেন্দ্ৰীয় ৰে’ল মন্ত্ৰী অশ্বিনী বৈষ্ণৱে দেশৰ আটাইতকৈ ওখ দলঙত চলি থকা এই পৰীক্ষামূলক ৰে’লৰ ভিডিঅ’ শ্বেয়াৰ কৰি নিজৰ টুইটাৰ একাউণ্টত এটা ভিডিঅ’ পোষ্ট কৰিছে । এই পোষ্টটোত তেওঁ লিখিছে, ‘চেনাব দলঙত ঘণ্টাত ১১০ কিলোমিটাৰ বেগত ট্ৰায়েল ট্ৰেইনৰ সফল পৰীক্ষা, সঁচাকৈয়ে এয়া এক ঐতিহাসিক দিন । শীঘ্ৰে কাৰ্যক্ষম হ’বলৈ সাজু হৈছে জম্মু-শ্ৰীনগৰ ৰে’লপথ ।‘

ৰে’ল মন্ত্ৰীগৰাকীয়ে শ্বেয়াৰ কৰা ভিডিঅ’ পোষ্টটোত এই দলঙৰ মাজেৰে ৰে’লখন তীব্ৰ বেগেৰে পাৰ হোৱা দেখা গৈছে । এই ৰে’লখনৰ গতিবেগ আছিল ঘণ্টাত ১১০ কিলোমিটাৰ । ইয়াৰ পিছতে কাশ্মীৰ আৰু দেশৰ বাকী অংশৰ মাজত প্ৰত্যক্ষ ৰেল সেৱা আগতীয়াকৈ আৰম্ভ হোৱাৰ আশা বাঢ়িছে । কেৱল চেনাব দলঙেই নহয়, এই ৰে’লপথৰ অঞ্জি খাদ্দ দলঙো প্ৰত্যাহ্বানমূলক, য’ত এই ৰে’লখন একে গতিৰে চলা দেখা গৈছিল । উল্লেখ্য যে চেনাব দলং দেশৰ সৰ্বোচ্চ তথা ওখ দলঙৰ শীৰ্ষত আছে আৰু সমুদ্ৰপৃষ্ঠৰ পৰা ইয়াৰ উচ্চতা ৩৫৯ মিটাৰ বা ১১৭৮ ফুট আৰু দৈৰ্ঘ্য ১৩১৫ মিটাৰ (৪,৩১৪ ফুট) । ই ৩২৪ মিটাৰ উচ্চতাৰ পেৰিছৰ আইফেল টাৱাৰতকৈও ওখ । ইয়াৰ আনুমানিক ব্যয় ১৪,০০০ কোটি টকা ।

যোৱা মাহত ৰে’লপথত ৬টা ট্ৰায়েল ৰাণ-

উল্লেখযোগ্য যে বুধবাৰে কাটৰা-বেনিহাল ট্ৰেকত চূড়ান্ত ট্ৰায়েল ৰাণৰ পূৰ্বে যোৱা মাহত বিভিন্ন ছেকচনত মুঠ ৬টা ট্ৰায়েল ৰাণ সম্পূৰ্ণ হৈছিল । অৱশ্যে উত্তৰ চক্ৰৰ ৰে’ল সুৰক্ষা আয়ুক্ত দীনেশ চান্দ দেশৱালে কেতিয়া ৰে’ল সেৱা আৰম্ভ কৰিব পাৰি সেই সন্দৰ্ভত কোনো তথ্য দিয়া নাই যদিও তেওঁৰ মতে এতিয়ালৈকে সকলো পৰীক্ষা সন্তোষজনক হৈছে ।