দুদিনীয়া ভ্ৰমণসূচীৰে অসমলৈ আহিব জাপানৰ প্ৰধানমন্ত্ৰী ছানাই তাকাইচি
দুদিনীয়া ভ্ৰমণসূচীয়ে অসমলৈ আহিব জাপানৰ প্ৰধানমন্ত্ৰী ছানাই তাকাইচি। এই ভ্ৰমণৰ সময়ত ভাৰতৰ প্ৰধানমন্ত্ৰী নৰেন্দ্ৰ মোদীৰ সৈতে গুৰুত্বপূৰ্ণ বৈঠক অনুষ্ঠিত হ’ব।
অসমবাসীৰ বাবে এটা ভালখবৰ আহিছে। অহা মাহত দুদিনীয়া ভ্ৰমণ সূচীৰে অসমলৈ আহিব জাপানৰ প্ৰধানমন্ত্ৰী ছানাই তাকাইচি। ভাৰত ভ্ৰমণৰ প্ৰথমটো চৰকাৰী কাৰ্যসূচী হিচাপে জাপানৰ প্ৰধানমন্ত্ৰী ছানাই তাকাইছি অসমলৈ অহাৰ সম্ভাৱনা আছে।জুলাই মাহৰ আৰম্ভণিতে এই ভ্ৰমণ হ’ব পাৰে।
দৰাচলতে গুৱাহাটীত অনুষ্ঠিত হ’ব ভাৰত-জাপান সন্মিলন।এই সন্মিলনত প্ৰধানমন্ত্ৰী নৰেন্দ্ৰ মোদীৰ উপস্থিতিত দুয়োখন দেশৰ মাজত কেইবাখনো গুৰুত্বপূৰ্ণ চুক্তি স্বাক্ষৰ হ’ব পাৰে। জাপানৰ প্ৰধানমন্ত্ৰী গৰাকীৰ অসম ভ্ৰমণক লৈ শনিবাৰে দিছপুৰত এখন গুৰুত্বপূৰ্ণ বৈঠক অনুষ্ঠিত হয়। মুখ্যমন্ত্ৰী ড০ হিমন্ত বিশ্ব শৰ্মাৰ অধ্যক্ষতাত অনুষ্ঠিত এই বৈঠকত অসম মন্ত্ৰীসভাৰ সকলো মন্ত্ৰী উপস্থিত থাকে।
ভ্ৰমণৰ সময়ত প্ৰধানমন্ত্ৰী তাকাইচিয়ে ভাৰতীয় নেতাসকলৰ সৈতে অৰ্থনৈতিক সহযোগিতা, বিনিয়োগ, আন্তঃগাঁথনি উন্নয়ন, প্ৰযুক্তি অংশীদাৰিত্ব আৰু অৰ্থনৈতিক নিৰাপত্তাকে ধৰি বিভিন্ন বিষয়ৰ ওপৰত আলোচনা কৰাৰ সম্ভাৱনা আছে।
যদিহে ভাৰত-জাপান সন্মিলনে চূড়ান্ত ৰূপ পায়, তেন্তে এই ভ্ৰমণে অসমৰ বাবে এক ডাঙৰ কূটনৈতিক মাইলৰ খুঁটি হিচাপে চিহ্নিত হ’ব আৰু ভাৰতৰ ‘এক্ট ইষ্ট পলিচী’ (Act East Policy) তথা জাপানৰ দৰে গুৰুত্বপূৰ্ণ আন্তঃৰাষ্ট্ৰীয় অংশীদাৰৰ সৈতে হোৱা সংযোগত উত্তৰ-পূৰ্বাঞ্চলৰ কৌশলগত গুৰুত্বক অধিক শক্তিশালী কৰিব।
৩ জুলাইত জাপানলৈ উভতি যাব ছানাই তাকাইচি। উল্লেখযোগ্য যে ‘কা’ আন্দোলনৰ সময়তে অসমলৈ অহাৰ কথা আছিল জাপানৰ প্রধানমন্ত্ৰীৰ। এতিয়া ছবছৰ পাছত অসমত হ’ব ভাৰত-জাপানৰ দ্বিপাক্ষিক বৈঠক।
লগতে পঢ়ক: অসম ভ্ৰমণলৈ ইউৰোপীয় ইউনিয়নৰ উচ্চস্তৰীয় প্ৰতিনিধি দল “টিম ইউৰোপ”