পৰাজয়ৰ পিছতেই বিপদ; চলন্ত অৱস্থাতে জ্বলি উঠিল গুজৰাট টাইটানছৰ বাছ
আই পি এল ২০২৬ চনৰ ফাইনেলত পৰাজয়ৰ পিছত গুজৰাট টাইটানছৰ দলটোৱে এক বৃহৎ দুৰ্ঘটনাৰ পৰা ৰক্ষা পৰে। খেলুৱৈ সকল উভতি অহাৰ সময়তে জ্বলি উঠিল বাছখন।
৩১ মে’ৰ তাৰিখটো শুভমন গিলৰ নেতৃত্বাধীন গুজৰাট টাইটানছৰ বাবে এটা দুঃস্বপ্ন বুলি প্ৰমাণিত হ’ল। প্ৰথমে দলটোৱে ফাইনেলত এক শোচনীয় পৰাজয়ৰ সন্মুখীন হ’বলগীয়া হয়, তাৰ পিছতে দলটোৰ সৈতে আন এক ডাঙৰ অনাহুত ঘটনা ঘটিল। পৰাস্ত হোৱাৰ পিছত আহমেদাবাদৰ নৰেন্দ্ৰ মোডী ষ্টেডিয়ামৰ পৰা নিজৰ হোটেললৈ উভতি অহাৰ সময়তে হঠাৎ জ্বলি উঠিল গুজৰাট দলৰ বাছখন,যাৰ ফলত হাহাকাৰ পৰিস্থিতিৰ সৃষ্টি হয়। খবৰ অনুসৰি, গুজৰাটৰ দলটোৱে ৰাষ্ট্ৰীয় পথতে অন্ততঃ এঘণ্টা ধৰি আবদ্ধ হৈ থাকিবলগীয়া হয়। অৱশ্যে আটাইকেইজন খেলুৱৈ আৰু সহায়ক কৰ্মচাৰীক সুৰক্ষিতভাৱে উলিয়াই অনা হয়।
জানিব পৰা মতে শ্বৰ্ট চাৰ্কিটৰ বাবেই বাছখনত বিজুতি ঘটি জুই লাগিছিল। ততাতৈয়াকৈ সকলোকে লৰালৰিকৈ বাহিৰলৈ উলিয়াই অনা হয়। কেৱল এই ৰাতিটোৱেই টাইটানছ দলটোৰ বাবে চিন্তাজনক নাছিল, বৰঞ্চ যোৱা কেইটামান দিনৰ পৰাই দলটোৰ ভাগ্য সুপ্ৰসন্ন নাছিল। খিতাপৰ যুঁজখনৰ পূৰ্বে তেওঁলোক সময়মতে আহমেদাবাদত উপস্থিত হ’ব পৰা নাছিল। উত্তৰ-পশ্চিম ভাৰতৰ বেয়া বতৰৰ বাবে গুজৰাটৰ চাৰ্টাৰ্ড ফ্লাইটখন প্ৰায় তিনি ঘণ্টা পলম হয় আৰু দলটোৱে শনিবাৰে গভীৰ নিশা আহমেদাবাদত উপস্থিত হয়।
ফাইনেলত আৰচিবী (RCB)ৰ হাতত ৫ উইকেটত পৰাজিত হোৱাৰ পিছত শুভমন গfলে দলটোক প্ৰশংসাৰে উপচাই পেলায়। তেওঁ কয়, “আমি বিজয়ৰ সীমা অতিক্ৰম কৰিব নোৱাৰিলোঁ, কিন্তু সদায় এনে কিছুমান কথা থাকে য’ত উন্নতিৰ থল থাকে। আনকি আমি ট্ৰফী জয় কৰা হ’লেও এটা দল হিচাপে আমাৰ এটাই অনুভৱ হ’লহেঁতেন যে এতিয়াও এনে কিছুমান কথা আছে যাৰ ওপৰত আমি কাম কৰাৰ প্ৰয়োজন আছিল।”
লগতে পঢ়ক: দ্বিতীয়বাৰৰ বাবে আৰ চি বিৰ শিৰত আই পি এলৰ ট্ৰফী ; গুজৰাট টাইটানছৰ স্বপ্নভংগ