ইণ্ডিয়ান প্ৰিমিয়াৰ লীগ ২০২৫ৰ ৬২ সংখ্যক মেচত ৰাজস্থান ৰয়েলছে চেন্নাই ছুপাৰ কিংছক ৬ উইকেটত পৰাস্ত কৰে । এই ছিজনত ৰাজস্থান ৰয়েলছৰ এইখন অন্তিমখন মেচ আছিল, য’ত তেওঁলোকে শক্তিশালী ৰূপত জয়লাভ কৰি চলিত সংস্কৰণৰ পৰা বিদায় লয় । মাত্ৰ ১৭.১ অভাৰতে ৰাজস্থানে চেন্নাইয়ে দিয়া ১৮৮ ৰানৰ লক্ষ্যত উপনীত হয় ।

ৰাজস্থানৰ হৈ যশস্বী জয়ছোৱাল আৰু বৈভৱ সূৰ্যবংশীয়ে ইনিংছ আৰম্ভ কৰে । দুয়োজনে আক্ৰমণাত্মকভাৱে ৰান সংগ্ৰহ কৰে । যশস্বীয়ে ১৯টা বলত ৩৬ ৰান সংগ্ৰহ কৰে, য’ত ৫টা চাৰি আৰু দুটা ছয় আছিল । তেওঁক পেভিলিয়নৰ বাট দেখুৱাই অংশুল কাম্বোজে । ইয়াৰ পিছতে অধিনায়ক সঞ্জু চেমচনৰ সৈতে বৈভৱ সূৰ্যবংশীয়ে ইনিংছ চম্ভালে । দুয়োজনে একেলগে ১০ অভাৰত দলৰ স্ক’ৰ ৯৫ ৰানৰ ওপৰলৈ লৈ যায় ।

বৈভৱ সূৰ্য্যবংশীয়ে বিস্ফোৰক বেটিং কৰি মাত্ৰ ২৭টা বলত অৰ্ধশতক সম্পূৰ্ণ কৰে । তেওঁ চাৰিটা চাৰি আৰু চাৰিটা ৬ কোবাই মুঠ ৫৭ ৰান সংগ্ৰহ কৰে । ১৪ নং অভাৰত তেওঁ আউট হয় । সঞ্জু চেমছনেও ৪১ ৰানৰ বৰঙণি আগবঢ়ায় ।

শীৰ্ষ অৰ্ডাৰ আউট হোৱাৰ পিছত ধ্ৰুৱ জুৰেল আৰু শ্বিমৰন হেটমায়াৰে দায়িত্ব লয় আৰু সংযমেৰে বেটিং কৰি দলটোক জয়ৰ দিশে আগুৱাই লৈ যায় । ১৮ অভাৰৰ প্ৰথমটো বলত ৰাজস্থানে লক্ষ্য অৰ্জন কৰে । এই জয়ৰ লগে লগে ৰাজস্থান পইণ্ট তালিকাৰ নৱম স্থানত থকাৰ বিপৰীতে চেন্নাই অন্তিম স্থানত উপনীত হয় । চেন্নাইৰ বাবে এতিয়াও এখন মেচ বাকী আছে ।

ইয়াৰ পূৰ্বে ৰাজস্থানে টছত জয়লাভ কৰি প্ৰথমে বলিং কৰাৰ সিদ্ধান্ত লয় । চেন্নাই ছুপাৰ কিংছৰ আৰম্ভণি দুৰ্বল আছিল । দ্বিতীয় অভাৰতে যুধবীৰ সিঙে ডেভন কনৱে আৰু উৰভিল পেটেলক আউট কৰাত চেন্নাই আগতীয়াকৈ বিপৰ্যয়ৰ সন্মুখীন হয় । অৱশ্যে আয়ুষ ম্হাত্ৰেই আক্ৰমণাত্মক বেটিং কৰি ২০টা বলত ৪৩ ৰান সংগ্ৰহ কৰে যদিও ষষ্ঠ অভাৰত তেওঁ আউট হয় ।

ৰবিচন্দ্ৰন অশ্বিন (১৩ ৰান) আৰু ৰবীন্দ্ৰ জাডেজা (১ ৰান)ও আগতীয়াকৈ পেভিলিয়নলৈ উভতি আহে । ইয়াৰ পিছতে ব্ৰেভিছ আৰু শিৱম ডুবেই ইনিংছৰ দায়িত্ব লয় আৰু দুয়োজনে ৫৯ ৰানৰ অংশীদাৰিত্ব গঢ়ে । ব্ৰেভিছে ৪২ ৰান কৰাৰ বিপৰীতে ডুবেই ৩৯ ৰান সংগ্ৰহ কৰে ।

অধিনায়ক মহেন্দ্ৰ সিং ধোনীয়ে ধৈৰ্য্যৰে বেটিং কৰি টি-২০ কেৰিয়াৰৰ ৩৫০ সংখ্যক ছয়কে ধৰি ১৬ ৰান সংগ্ৰহ কৰে যদিও অন্তিম অভাৰত আউট হয় । চেন্নাইয়ে নিৰ্ধাৰিত ২০ অভাৰত ১৮৭ ৰান সংগ্ৰহ কৰে ।

ৰাজস্থান প্লে অফৰ দৌৰৰ পৰা বাহিৰ হৈছে যদিও এই জয়ৰ সৈতে দলটোৱে চলিত ছিজনৰ অন্ত পেলায় । একে সময়তে চেন্নাই ছুপাৰ কিংছৰ হাতত এতিয়া মাত্ৰ এখন মেচ বাকী আছে, য’ত তেওঁলোকে নিজৰ সন্মান ৰক্ষাৰ চেষ্টা কৰিব ।

১৯ মে’ত ছানৰাইজাৰ্ছ হায়দৰাবাদ (এছ আৰ এইচ)ৰ বিৰুদ্ধে পৰাজয়ৰ পিছত লক্ষ্ণৌ ছুপাৰ জায়েন্টছ আই পি এল-২০২৫ প্লে অফৰ দৌৰৰ পৰা বাহিৰ হোৱা ৫ম দল হিচাপে পৰিগণিত হয় । ইতিমধ্যে এই প্লেটফৰ্মৰ বাবে গুজৰাট টাইটানছ (জি টি), ৰয়েল চেলেঞ্জাৰছ বেংগালুৰু (আৰ চি বি) আৰু পঞ্জাব কিংছ (পি বি কে এছ)য়ে তিনিটা স্থান বুকিং কৰিছে ।

প্লে অফৰ অন্তিম স্থান মুম্বাই ইণ্ডিয়ানছ বা দিল্লী কেপিটেলছে লাভ কৰিব । বুধবাৰে (২১ মে’) দুয়োটা দলে গুৰুত্বপূৰ্ণ মেচত মুখামুখি হ’ব, যিখন ১৭ মে’ত আই পি এল পুনৰ আৰম্ভ হোৱাৰ পিছত এম আইৰ প্ৰথমখন মেচ হ’ব ।

মুম্বাই ইণ্ডিয়ানছ (চতুৰ্থ স্থান): মেচ: ১২, পইণ্ট: ১৪, নেট ৰান ৰেট: ১.১৫৬

বাকী থকা মেচসমূহঃ দিল্লী কেপিটেলছ (ঘৰুৱা), পঞ্জাব কিংছ (জয়পুৰ)

দিল্লী কেপিটেলছ (পঞ্চম): মেচ: ১২, পইণ্ট: ১৩, নেট ৰান ৰেট: ০.২৬০

বাকী খেলসমূহঃ এম আই (ৱাংখেড়ে ষ্টেডিয়াম), পঞ্জাব কিংছ (জয়পুৰ)

যদিহে মুম্বাই ইণ্ডিয়ানছ দিল্লীৰ হাতত পৰাস্ত হয় তেন্তে ১৪ পইণ্ট থকাৰ বিপৰীতে দিল্লীৰ হাতত ১৫ পইণ্ট থাকিব আৰু অন্তিম প্লে অফৰ স্থানৰ যুঁজ পঞ্জাব কিংছৰ বিৰুদ্ধে লীগৰ অন্তিমখন খেলত অনুষ্ঠিত হ’ব ।

যদিহে দিল্লীয়ে মুম্বাই ইণ্ডিয়ানছক পৰাস্ত কৰি তাৰ পাছত ২৪ মে’ত জয়পুৰত পঞ্জাব কিংছক পৰাস্ত কৰে তেন্তে দলটোৱে ১৭ পইণ্টেৰে প্লে অফৰ বাবে যোগ্যতা অৰ্জন কৰিব আৰু মুম্বাই দল বাহিৰ হ’ব । যি সৰ্বোচ্চ ১৬ পইণ্ট লাভ কৰিব পাৰে ।

কিন্তু যদি দিল্লী কেপিটেলছ দলে মুম্বাইক পৰাস্ত কৰি ১৫ পইণ্ট লাভ কৰে, কিন্তু পাঞ্জাব কিংছৰ হাতত পৰাস্ত হয়, তেন্তে মুম্বাই ইণ্ডিয়ানছে ১৬ পইণ্টেৰে যোগ্যতা অৰ্জন কৰিব পাৰে । আনহাতে ২৬ মে’ত জয়পুৰত যদি পঞ্জাব কিংছক পৰাস্ত কৰে তেন্তে দিল্লী কেপিটেলছক বাহিৰ কৰিব পাৰে ।

ইণ্ডিয়ান প্ৰিমিয়াৰ লীগ ২০২৫ৰ ৬০ সংখ্যক মেচত গুজৰাট টাইটানছে দিল্লী কেপিটেলছক ১০ উইকেটত পৰাস্ত কৰে । এই জয়েৰে গুজৰাটে ১২খন মেচত ১৮ পইণ্ট লাভ কৰি এতিয়া পইণ্ট তালিকাৰ শীৰ্ষত উপনীত হৈছে । গুজৰাটে প্লে অফৰ বাবেও যোগ্যতা অৰ্জন কৰিছে । ইয়াৰ লগতে আৰ চি বি আৰু পঞ্জাৱ দলৰ প্লে অফৰ টিকটো নিশ্চিত হৈছে । কিন্তু ৪ নম্বৰৰ বাবে মুম্বাই আৰু দিল্লীৰ মাজত হৈছে কঠিন যুঁজ ।

পইন্ট টেবুলৰ অৱস্থা-

১২খন মেচৰ পৰা ১৮ পইণ্ট লাভ কৰি শীৰ্ষস্থান দখল কৰি গুজৰাট দলে প্লে অফলৈ যোগ্যতা অৰ্জন কৰিছে । একে সময়তে আৰ চি বিয়ে ১২খন মেচত ১৭ পইণ্ট লাভ কৰাৰ লগতে প্লে অফতো নিজৰ স্থান নিশ্চিত কৰিছে । পঞ্জাৱেও ১২খন মেচত ১৭ পইণ্ট লাভ কৰিছে আৰু তেওঁলোকও প্লে অফৰ বাবে যোগ্যতা অৰ্জন কৰিছে । এতিয়া ৪ নম্বৰৰ যুঁজখন আকৰ্ষণীয় হৈ পৰিছে । মুম্বাই দলে ১২খন খেলত ১৪ পইণ্ট লাভ কৰাৰ বিপৰীতে দিল্লীয়ে ১২খন খেলৰ পৰা ১৩ পইণ্ট লাভ কৰিছে । অৰ্থাৎ এতিয়া দিল্লী আৰু মুম্বাইৰ মাজত যুঁজ হৈছে । কিন্তু মুম্বাইৰ ৰান ৰেট ভাল । অৰ্থাৎ বাকী দুখন মেচত প্লে অফৰ বাবে যোগ্যতা অৰ্জন কৰিবলৈ দুয়োটা দলে মৰণপণ যুঁজত অৱতীৰ্ণ হ’ব লাগিব ।

ইফালে চেন্নাই, ৰাজস্থান, হায়দৰাবাদ আৰু কে কে আৰ প্লে অফৰ দৌৰৰ পৰা সম্পূৰ্ণৰূপে বাহিৰ হৈছে । একে সময়তে লক্ষ্ণৌ দলে ১১খন খেলৰ পৰা ১০ পইণ্ট লাভ কৰিছে । অৰ্থাৎ দলটোৰ এতিয়াও ৩ খন মেচ বাকী আছে । লক্ষ্ণৌ প্লে অফৰ দৌৰত আছে যদিও বাকী সকলো খেলতে জয়ী হ’ব লাগিব আৰু লগতে দিল্লী আৰু মুম্বাই দুয়োখন মেচতে পৰাস্ত হোৱাৰ বাবে প্ৰাৰ্থনা কৰিব লাগিব ।

যদি মুম্বাই দুয়োখন মেচতে জয়ী হয় আৰু দিল্লীয়েও দুয়োখন মেচতে জয়লাভ কৰে, তেন্তে উন্নত ৰান ৰেটৰ ভিত্তিত মুম্বাই ইণ্ডিয়ানছে যোগ্যতা অৰ্জন কৰিব । একে সময়তে দিল্লী আৰু মুম্বাই এখনকৈ মেচত পৰাস্ত হ’লেও মুম্বাই দলে যোগ্যতা অৰ্জন কৰিব । এনে পৰিস্থিতিত প্ৰথমে দুয়োটা দলে নিজৰ বাকী থকা মেচত জয়ী হ’ব লাগিব আৰু দিল্লীয়ে মেচত ডাঙৰ ব্যৱধানত জয়ী হ’ব লাগিব ।

ভাৰত-পাকিস্তানৰ উত্তেজনাৰ বাবে পিছুৱাই দিয়া হৈছিল আই পি এল ২০২৫ । ইয়াৰ পিছত বহু বিদেশী খেলুৱৈ নিজৰ দেশলৈ উভতি যায় । এতিয়া ১৭ মে’ৰ পৰা পুনৰ আৰম্ভ হ’ব আই পি এল । ইয়াৰ মাজতে খবৰ আহিছিল যে আই পি এল ২০২৫ৰ বাকী থকা মেচবোৰত অষ্ট্ৰেলিয়াৰ খেলুৱৈয়ে খেলিব নোৱাৰিব । এতিয়া এই সন্দৰ্ভত ক্ৰিকেট অষ্ট্ৰেলিয়াই এটা ডাঙৰ আপডেট দিছে । ক্ৰিকেট অষ্ট্ৰেলিয়াৰ এই সিদ্ধান্তই আই পি এল দলসমূহক যথেষ্ট সকাহ দিব ।

মঙলবাৰে ক্ৰিকেট অষ্ট্ৰেলিয়াই কয় যে যদি অষ্ট্ৰেলিয়াৰ খেলুৱৈয়ে আই পি এল খেলিবলৈ যাব বিচাৰে তেন্তে যাব পাৰে । তেওঁলোকক ব’ৰ্ডে ৰখাব নোৱাৰে । তেওঁলোক যাব বিচাৰে নে নাযায় সেয়া খেলুৱৈৰ ওপৰত নিৰ্ভৰশীল । উল্লেখ্য যে অষ্ট্ৰেলিয়াই জুন মাহত বিশ্ব টেষ্ট চেম্পিয়নশ্বিপৰ ফাইনেল খেলিব লাগিব । এনে পৰিস্থিতিত এই খিতাপ মেচৰ বাবেও প্ৰস্তুতি চলাব লাগিব । এই কাৰণতে কোৱা হৈছিল যে আই পি এলৰ বাকী থকা মেচসমূহ কেংগাৰু খেলুৱৈসকলৰ বাবে খেলাটো কঠিন হ’ব ।

ক্ৰিকেট অষ্ট্ৰেলিয়াই আই পি এললৈ ঘূৰি অহা খেলুৱৈসকলৰ ব্যক্তিগত সিদ্ধান্তক সন্মান জনাইছে । সোমবাৰে বি চি চি আইয়ে সিদ্ধান্ত লয় যে ১৭ মে’ৰ পৰা ৬টা স্থানত পুনৰ আৰম্ভ হ’ব আই পি এলৰ এই ছিজন । ৩ জুনত অনুষ্ঠিত হ’ব লীগৰ ফাইনেল । প্লে অফৰ খেলৰ স্থান এতিয়াও ঘোষণা কৰা হোৱা নাই ।

ইয়াৰ ফলত অষ্ট্ৰেলিয়া আৰু দক্ষিণ আফ্ৰিকাৰ টেষ্ট ক্ৰিকেটাৰসকলৰ বাবে এক দ্বিধাদ্বন্দ্বৰ সৃষ্টি হৈছে কিয়নো অহা ১১ জুনৰ পৰা লৰ্ডছত দুয়োটা দলৰ মাজত ডব্লিউ টি চি ফাইনেল অনুষ্ঠিত হ’ব । এটা বিবৃতিত ক্ৰিকেট অষ্ট্ৰেলিয়াই কয় যে শনিবাৰৰ পৰা আই পি এল পুনৰ আৰম্ভ হোৱাৰ ঘোষণাৰ পিছত ক্ৰিকেট অষ্ট্ৰেলিয়াই সিদ্ধান্ত লৈছে যে খেলুৱৈসকলে ভাৰতলৈ উভতি যোৱা বা নোযোৱাৰ ব্যক্তিগত সিদ্ধান্তক সন্মান কৰিব । ইয়াত আৰু কোৱা হৈছে যে, আমি নিৰাপত্তাৰ ব্যৱস্থাৰ সন্দৰ্ভত বি চি চি আই আৰু অষ্ট্ৰেলিয়া চৰকাৰৰ সৈতে যোগাযোগত আছো ।

ভাৰত-পাকিস্তানৰ উত্তেজনাৰ মাজত বন্ধ হৈ থকা আই পি এল ২০২৫ প্ৰতিযোগিতাখন ১৫ মে’ৰ পৰা পুনৰ আৰম্ভ হোৱাৰ সম্ভাৱনা আছে । নিজৰ দেশলৈ উভতি যোৱা অষ্ট্ৰেলিয়ান খেলুৱৈসকলকো এই বিষয়ে অৱগত কৰা হৈছে । বি চি চি আইৰ উপাধ্যক্ষ ৰাজীৱ শুক্লাই নিশ্চিত কৰিছে যে আজি এখন গুৰুত্বপূৰ্ণ বৈঠক অনুষ্ঠিত হ’ব য’ত স্থানকে ধৰি সকলো দিশ পুনৰ বিবেচনা কৰা হ’ব ।

অষ্ট্ৰেলিয়াকে ধৰি সকলো দেশৰ খেলুৱৈয়ে আই পি এল স্থগিত ৰখাৰ পিছত ভাৰত এৰি গৈছে, কিছুমানে নিজৰ দেশলৈ উভতি যোৱাৰ বিপৰীতে বহুতে পৰ্যটনৰ বাবে আন দেশলৈ গৈছে । বিদেশী খেলুৱৈসকলো প্ৰতিযোগিতাখন পিছুৱাই দিয়াৰ এটা ডাঙৰ কাৰণ আছিল, কিয়নো তেওঁলোকে এই মানসিক চাপৰ পৰিস্থিতিত থাকিব বিচৰা নাছিল । কিন্তু এতিয়া ভাৰত আৰু পাকিস্তানৰ মাজত উত্তেজনা কমি অহাৰ লগে লগে খেলুৱৈসকলক কোৱা হৈছে যে শীঘ্ৰে প্ৰতিযোগিতাখন আৰম্ভ হ’ব পাৰে ।

অষ্ট্ৰেলিয়াৰ ৱেবছাইট ক’ডস্প’ৰ্টছৰ প্ৰতিবেদনত প্ৰকাশ পাইছে যে ১৫ মে’ বৃহস্পতিবাৰৰ পৰা আই পি এল পুনৰ আৰম্ভ হ’ব পাৰে, এই তথ্য অষ্ট্ৰেলিয়াৰ খেলুৱৈসকলক দিয়া হৈছে । এই সন্দৰ্ভত আজি বি চি চি আইৰ এখন গুৰুত্বপূৰ্ণ বৈঠক অনুষ্ঠিত হ’ব, য’ত গভৰ্নিং কাউন্সিল আৰু বিষয়াসকলে পৰিস্থিতিৰ ওপৰত আলোচনা কৰি চূড়ান্ত সিদ্ধান্ত ল’ব পাৰে ।

আজি বি চি চি আইৰ বৈঠক-

বি চি চি আইৰ উপাধ্যক্ষ ৰাজীৱ শুক্লাই কয়, “যুদ্ধবিৰতিৰ নতুন পৰিঘটনাৰ লগে লগে ​​১১ মে’ত বি চি চি আই, আই পি এল গভৰ্নিং কাউন্সিল আৰু বিষয়াসকলৰ বৈঠকত পৰিস্থিতিৰ বিষয়ে আলোচনা হ’ব । আমি প্ৰতিযোগিতাৰ সময়সূচী পুনৰীক্ষণ কৰি ইয়াক সম্পূৰ্ণ কৰাৰ সৰ্বোত্তম উপায়ৰ বিষয়ে সিদ্ধান্ত লম । যুদ্ধবিৰতিৰ সময়ত প্ৰথমে নিৰ্ধাৰণ কৰা স্থানসমূহকে ধৰি সকলো দিশকে পুনৰ বিবেচনা কৰা হ’ব । অতি সোনকালে চূড়ান্ত সিদ্ধান্ত লোৱা হ’ব ।”

কিমান মেচ বাকী আছে ?

ধৰমশালাত অনুষ্ঠিত পঞ্জাব কিংছ বনাম দিল্লী কেপিটেলছৰ খেলখন মাজভাগত বন্ধ কৰি দিয়া হয়, তাৰ পিছতে আই পি এল পিছুৱাই দিয়াৰ সিদ্ধান্ত লোৱা হয় । এতিয়া পুনৰ আই পি এল আৰম্ভ হ’লে এই মেচখনো অনুষ্টিত হোৱাৰ সম্ভাৱনা আছে ।  এই মেচকে ধৰি চলিত আই পি এলৰ লীগ পৰ্যায়ত এতিয়াও ১৩খন খেল বাকী আছে । তিনিটা দল (চি এছ কে, আৰ আৰ, এছ আৰ এইচ) দৌৰৰ বাহিৰত থকাৰ সময়ত প্লে অফৰ বাবে কোনো দলে যোগ্যতা অৰ্জন কৰা নাই ।

পইণ্ট তালিকাত ১৬-১৬ পইণ্টেৰে ক্ৰমে প্ৰথম আৰু দ্বিতীয় স্থানত আছে গুজৰাট (জি টি) আৰু বাংগালুৰু (আৰ চি বি) । ১৫ পইণ্টেৰে তৃতীয় স্থানত আছে পঞ্জাব কিংছ আৰু ১৪ পইণ্টেৰে চতুৰ্থ স্থানত আছে মুম্বাই ইণ্ডিয়ানছ । দিল্লী (ডি চি), কলকাতা (কে কে আৰ) আৰু লক্ষ্ণৌ (এল এছ জি)ও প্লে অফৰ দৌৰত আছে ।

ভাৰত আৰু পাকিস্তানৰ মাজত চলি থকা উত্তেজনাৰ মাজতে দুয়োখন দেশৰ মাজত যুদ্ধবিৰতি ঘোষণা কৰা হৈছে । ভাৰতৰ পৰাক্ৰমৰ আগত নতশিৰ হৈ যুদ্ধবিৰতিৰ প্ৰস্তাৱ দিয়ে পাকিস্তানে । ইয়াৰ পাছতে ভাৰতে যুদ্ধবিৰতিৰ বাবে সন্মতি প্ৰকাশ কৰে । এই কথা সামাজিক মাধ্যমৰ জৰিয়তে প্ৰথমে নিশ্চিত কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে । এনে পৰিস্থিতিত এতিয়া ভাৰতীয় ক্ৰিকেট নিয়ন্ত্ৰণ ব’ৰ্ডে শীঘ্ৰে ইণ্ডিয়ান প্ৰিমিয়াৰ লীগ (আই পি এল) ২০২৫ পুনৰ আৰম্ভ কৰাৰ সন্দৰ্ভত আনুষ্ঠানিক ঘোষণা কৰিব পাৰে ।

উল্লেখ্য যে শেহতীয়াকৈ ভাৰত আৰু পাকিস্তানৰ মাজত ক্ৰমাৎ বৃদ্ধি পোৱা উত্তেজনাৰ বাবে শুকুৰবাৰে এসপ্তাহৰ বাবে আই পি এল স্থগিত ৰখা হৈছিল । অৱশ্যে এই প্ৰতিযোগিতাখন পুনৰ কেতিয়াৰ পৰা আৰম্ভ হ’ব সেই সন্দৰ্ভত সিদ্ধান্ত ল’ব পৰা নগ’ল । কিন্তু এতিয়া শেহতীয়া পৰিস্থিতিৰ পিছত অনুমান কৰা হৈছে যে বি চি চি আইয়ে অতি সোনকালে এই সন্দৰ্ভত কিছু নিৰ্দেশনা জাৰি কৰিব পাৰে ।

৫৭ খন মেচ খেলা হৈছে, ৫৮ সংখ্যক মেচ মাজভাগত স্থগিত-

২০২৫ চনৰ আই পি এলত মুঠ ৫৭খন মেচ অনুষ্ঠিত হয় । ৮ মে’ত ধৰমশালাত পঞ্জাব কিংছ (পি বি কে এছ) আৰু দিল্লী কেপিটেলছ (ডি চি)ৰ মাজত ৫৮ সংখ্যক মেচখন অনুষ্ঠিত হৈছিল যদিও মাত্ৰ ১০.১ অভাৰৰ অন্তত খেলখন বন্ধ হৈ পৰে । এই মেচখন পুনৰ অনুষ্ঠিত হ’ব নে নহয় সেয়া এতিয়াও সিদ্ধান্ত লোৱা হোৱা নাই । ৮ মে’ত যেতিয়া মেচখন বন্ধ হৈছিল তেতিয়া পঞ্জাব কিংছে ১০.১ অভাৰত ১ উইকেট হেৰুৱাই ১২২ ৰান সংগ্ৰহ কৰিছিল । প্ৰিয়ংশ আৰ্য্যই ৫টা চাৰি আৰু ৬টা ছয়ৰ সহায়ত ৩৪টা বলত ৭০ ৰান সংগ্ৰহ কৰে । প্ৰভসিমৰণ সিঙে ২৮টা বলত ৫০ ৰান আৰু শ্ৰেয়াছ আয়েৰে ০ ৰান সংগ্ৰহ কৰি অপৰাজিত হৈ আছিল ।

এতিয়া লীগ পৰ্যায়ত মাত্ৰ ১২খন মেচ বাকী আছে, তাৰ পিছত প্লে অফৰ ৪খন মেচ থাকিব । পূৰ্বৰ সূচী অনুসৰি কোৱালিফায়াৰ ১ আৰু এলিমিনেটৰ হায়দৰাবাদত অনুষ্ঠিত হ’ব, আনহাতে কোৱালিফায়াৰ ২ আৰু ফাইনেল কলকাতাত অনুষ্ঠিত হ’ব ।