“আমাৰ বিমান সাজু !” পাকিস্তানক তীব্ৰ কটাক্ষ আইচলেণ্ড ক্ৰিকেটৰ
পাকিস্তান ক্ৰিকেট দলক তীব্ৰ কটাক্ষ আইচলেণ্ড ক্ৰিকেট ব’ৰ্ডৰ ! আইচলেণ্ড ক্ৰিকেটে কয় যে যদি পাকিস্তানে টি-২০ বিশ্বকাপৰ পৰা আঁতৰি যায় তেন্তে তেওঁলোকৰ ঠাইত খেলিবলৈ সম্পূৰ্ণৰূপে সাজু ।
আইচিচি পুৰুষ টি-২০ বিশ্বকাপ ২০২৬ক লৈ চলি থকা বিতৰ্কৰ মাজতে আইচলেণ্ড ক্ৰিকেটে পাকিস্তানক লৈ ছ’চিয়েল মিডিয়াত এটা ধেমেলীয়া পোষ্ট শ্বেয়াৰ কৰে । প্ৰতিযোগিতাখনৰ পৰা বাংলাদেশ বাহিৰ হোৱা আৰু পাকিস্তান ক্ৰিকেট ব’ৰ্ডৰ ভাবুকিৰ বাবে অফ-ফিল্ড ড্ৰামা ক্ৰমাগতভাৱে বৃদ্ধি পোৱাৰ সময়ত এই পোষ্টটো কৰিছে আইচলেণ্ডে ।
আইচলেণ্ড ক্ৰিকেটে পাকিস্তানৰ অংশগ্ৰহণক লৈ সৃষ্টি হোৱা অনিশ্চয়তাৰ প্ৰতি নিজৰ অফিচিয়েল এক্স একাউণ্টৰ জৰিয়তে সঁহাৰি জনাইছিল । ধেমেলীয়া সুৰত আইচলেণ্ড ক্ৰিকেটে কয় যে যদি পাকিস্তানে টি-২০ বিশ্বকাপৰ পৰা আঁতৰি যায় তেন্তে তেওঁলোকৰ ঠাইত খেলিবলৈ সম্পূৰ্ণৰূপে সাজু ।
আইচলেণ্ড ক্ৰিকেটে নিজৰ পোষ্টত লিখিছে, “আমাক সঁচাকৈয়ে পাকিস্তানে টি-২০ বিশ্বকাপত খেলিব নে নাই সেই সন্দৰ্ভত সিদ্ধান্তৰ প্ৰয়োজন । ২ ফেব্ৰুৱাৰীত তেওঁলোকে আঁতৰি যোৱাৰ লগে লগে আমি টেক অফৰ বাবে সাজু হৈছো । একমাত্ৰ সমস্যাটো হ’ল ৭ ফেব্ৰুৱাৰীৰ ভিতৰত কলম্বোত উপস্থিত হোৱাৰ বিমানৰ সময়সূচীটো এটা ডাঙৰ সমস্যা । এনেও আমাৰ অপেনিং বেটছমেন টোপনি নহা অসুখত ভোগিছে ।”
আইচিচিক লৈ প্ৰশ্ন উত্থাপন পাকিস্তানৰ-
আইচলেণ্ড ক্ৰিকেটৰ এই ধেমেলীয়া মন্তব্যই ছ’চিয়েল মিডিয়াত তীব্ৰ গতিত ভাইৰেল হৈ পৰিছে । অৱশ্যে এই লঘু কৌতুকৰ আঁৰত এটা গুৰুতৰ বিষয় আছে । শেহতীয়াকৈ পাকিস্তান ক্ৰিকেট ব’ৰ্ডৰ অধ্যক্ষ মহছিন নাকৱীয়ে আন্তঃৰাষ্ট্ৰীয় ক্ৰিকেট পৰিষদক প্ৰশ্ন উত্থাপন কৰিছিল । বাংলাদেশে নিৰাপত্তাজনিত চিন্তাৰ উদ্ধৃতি দি ভাৰতলৈ যাবলৈ অস্বীকাৰ কৰাৰ পিছত বাংলাদেশক প্ৰতিযোগিতাখনৰ পৰা বাদ দিয়াৰ সমালোচনা কৰে তেওঁ ।
মহছিন নাকৱীয়ে যুক্তি দিছিল যে বাংলাদেশ আই চি চিৰ পূৰ্ণ সদস্য আৰু পাকিস্তানৰ দৰেই ৰেহাই লাভ কৰিব লাগিছিল । এই প্ৰতিযোগিতাত পাকিস্তানী দলৰ খেলসমূহ শ্ৰীলংকাত অনুষ্ঠিত হোৱাৰ কথা । আইচিচিয়ে নিজৰ সিদ্ধান্তৰ পক্ষ লৈ কয় যে আভ্যন্তৰীণ আৰু বাহ্যিক নিৰাপত্তা সংস্থাৰ প্ৰতিবেদনত ভাৰতত বাংলাদেশী খেলুৱৈ, বিষয়া বা অনুৰাগীৰ বাবে কোনো সুনিৰ্দিষ্ট বা বিশ্বাসযোগ্য ভাবুকি পোৱা নাই । ইয়াৰ পিছতো বাংলাদেশে অংশগ্ৰহণ নকৰাৰ সিদ্ধান্তৰ পিছত আইচিচিয়ে ইয়াৰ ঠাইত স্কটলেণ্ডক প্ৰতিযোগিতাখনত অন্তৰ্ভুক্ত কৰে ।
মহছিন নাকৱীৰ এই বক্তব্যত পাকিস্তানেও শেষ মুহূৰ্তত প্ৰতিযোগিতা বৰ্জন কৰিব পাৰে নেকি সেই সন্দৰ্ভত জল্পনা-কল্পনাৰ সৃষ্টি হয় । অৱশ্যে পিচিবিয়ে ১৫ জনীয়া পাকিস্তানী দলটো এদিন পিছত ঘোষণা কৰে । জানিব পৰা মতে আইচিচিয়ে পাকিস্তানক স্পষ্টভাৱে সকীয়াই দিছে যে যদি বাংলাদেশৰ দৰে পদক্ষেপ গ্ৰহণ কৰে তেন্তে কঠোৰ নিষেধাজ্ঞাৰ সন্মুখীন হ’ব লাগিব । এনে যিকোনো সিদ্ধান্তই পাকিস্তানী ক্ৰিকেটত দীৰ্ঘম্যাদী নেতিবাচক প্ৰভাৱ পেলাব পাৰে ।
বৰ্তমান পাকিস্তানে ভাৰতত অনুষ্ঠিত হ’ব লগা আইচিচি প্ৰতিযোগিতাত “হাইব্ৰিড মডেল”ৰ অধীনত খেলিব । এইবাৰ দলটোৰ সকলো খেল শ্ৰীলংকাত অনুষ্ঠিত হোৱাৰ কথা । মহছিন নাকৱীয়ে ধাৰাবাহিকভাৱে জোৰ দি আহিছে যে বাংলাদেশকো একেধৰণৰ ৰেহাই দিয়া উচিত আছিল । বহুতে তেওঁৰ এই বক্তব্যক ভাৰতৰ ওপৰত পৰোক্ষ কটাক্ষ বুলি ব্যাখ্যা কৰিছে । ভাৰত আৰু পাকিস্তানৰ বহু প্ৰত্যাশিত খেলখন অহা ১৫ ফেব্ৰুৱাৰীত কলম্বোত অনুষ্ঠিত হ’ব ।
লগতে পঢ়ক : নিউজীলেণ্ডক ‘ক্লীন ছুইপ’ কৰাৰ লক্ষ্য ভাৰতীয় দলৰ, বিশাখাপট্টনমত আজি চতুৰ্থ টি-২০