মন্ত্ৰী জয়ন্ত মল্লবৰুৱা আৰু বিধায়ক অখিল গগৈৰ বাক-বিতণ্ডাই উত্তাল কৰি তোলে বিধানসভাৰ বাজেট অধিৱেশনৰ দ্বিতীয়টো দিন
অসম বিধানসভাৰ বাজেট অধিৱেশনৰ আজি দ্বিতীয়টো দিন । দ্বিতীয়টো দিনৰ আৰম্ভণিৰে পৰাই ছিণ্ডিকেটৰ প্ৰসংগক লৈ উত্তপ্ত হৈ পৰে সদন । ছিণ্ডিকেট প্ৰসংগক লৈ মন্ত্ৰী জয়ন্ত মল্লবৰুৱা আৰু বিধায়ক অখিল গগৈৰ মাজত তীবে্ৰ বাক-বিতণ্ডাৰ সৃষ্টি হয় । দুয়োগৰাকীৰ বাক যুদ্ধত বহুসময় ধৰি স্থবিৰ হৈ পৰে সদনৰ কাম-কাজ ।
শিৱসাগৰৰ বিধায়ক অখিল গগৈয়ে মন্ত্ৰী জয়ন্ত মল্লবৰুৱাৰ বিৰুদ্ধে ছিণ্ডিকেট চলোৱাৰ অভিযোগ উত্থাপন কৰাৰ পিছতে মন্ত্ৰীগৰাকীয়ে উভতি ধৰি প্ৰত্যুত্তৰ দিয়ে । মন্ত্ৰী মল্লবৰুৱাই কোনো তথ্য নোহোৱাকৈ বিধানসভাত কথা নকবলৈ বিধায়ক অখিল গগৈক সকীয়াই দিয়ে ।
বিধায়ক অখিল গগৈক প্ৰত্যাহ্বান জনাই মন্ত্ৰী জয়ন্ত মল্লবৰুৱাই অখিল গগৈক যদি কোনো তথ্য আছে তেন্তে বিধানসভাৰ অধ্যক্ষক দাখিল কৰিবলৈ কয় । যদি তেওঁ তথ্য দাখিল কৰিব নোৱাৰে তেন্তে অখিল গগৈয়ে বিধানসভাত ক্ষমা খুজিব লাগিব বুলিও দাবী কৰে মন্ত্ৰী জয়ন্ত মল্লবৰুৱাই ।
অখিল গগৈক উভতি ধৰি মন্ত্ৰী জয়ন্ত মল্লবৰুৱাই কয়-“বিধানসভাত এনেই থিয় হৈ যিটি কথা নক’ব । যদি আপোনাৰ হাতত কিবা তথ্য আছে বিধানসভাৰ অধ্যক্ষৰ ওচৰত দাখিল কৰক আমি তাৰ উত্তৰ দিম । যদি দিব নোৱাৰে বিধানসভাত ক্ষমা খুজিব লাগিব । বিধানসভাক অপমান কৰাৰ অধিকাৰ আপোনাক দিয়া নাই । টিভিত ওলাবৰ বাবে যি মন যায় তাকেই ক’ব সেয়া হ’ব নোৱাৰে ।“
লগতে অখিল গগৈৰ ‘ দোকান বন্ধ কৰি আছোঁ‘ বুলিও বিধায়কগৰাকীক কটাক্ষ কৰে মন্ত্ৰী জয়ন্ত মল্লবৰুৱাই । মন্ত্ৰীগৰাকীয়ে অখিল গগৈক কটাক্ষ কৰি কয়- “আপোনাৰ দোকান বিলাক লাহে লাহে বন্ধ কৰি আছোঁ চিন্তা কৰিব নালাগে । অখিল গগৈয়ে তিতকাৰী মাৰিছে কাৰণ তেওঁ ছিণ্ডিকেট বন্ধ হোৱাটো নিবিচাৰে । কাৰণ এইবিলাক কাম হ’লে তেওঁ মাজে মাজে মহলৰ পৰা পইচা পাই থাকে সেয়া বন্ধ হৈ যাব ।“
লগতে পঢ়ক : অসমত ৩.১৪ লাখ হেক্টৰ বনভূমি বেদখলৰ কৱলত! বিধানসভাত তথ্য দাঙি ধৰিলে বনমন্ত্ৰী জয়ন্ত মল্লবৰুৱাই
