তিনিদিনীয়া ভ্ৰমণৰ বাবে ভাৰতত উপস্থিত হৈছে জাপানৰ প্ৰধানমন্ত্ৰী ছানায়ে টাকাইচি। কেন্দ্ৰীয় মন্ত্ৰী জিতেন্দ্ৰ সিঙে জাপানৰ প্ৰধানমন্ত্ৰী গৰাকীক বিমানবন্দৰত আদৰণি জনায়।
বুধবাৰে সন্ধিয়া জাপানৰ প্ৰধানমন্ত্ৰী ছানায়ে টাকাইচিয়ে তিনিদিনীয়া চৰকাৰী ভ্ৰমণসূচীৰে নতুন দিল্লীত উপস্থিত হয়। এই ভ্ৰমণকালত তেওঁ ১৬ সংখ্যক ভাৰত-জাপান বাৰ্ষিক সন্মিলনত অংশগ্ৰহণ কৰিব, য’ত দুয়োখন দেশে অৰ্থনৈতিক নিৰাপত্তা, নমনীয় যোগান শৃংখল, উদীয়মান প্ৰযুক্তি, প্ৰতিৰক্ষা, সামুদ্ৰিক নিৰাপত্তা আৰু বিনিয়োগৰ ক্ষেত্ৰত সহযোগিতা অধিক গভীৰ কৰাৰ সম্ভাৱনা আছে।দিল্লীত উপস্থিত হোৱাৰ পিছত তেওঁক কেন্দ্ৰীয় বিজ্ঞান আৰু প্ৰযুক্তি বিভাগৰ ৰাজ্যিক মন্ত্ৰী জীতেন্দ্ৰ সিঙে আদৰণি জনায়।
এক্সৰ এটা পোষ্টত বৈদেশিক পৰিক্ৰমা মন্ত্ৰালয়ৰ মুখপাত্ৰ ৰণধীৰ জয়ছোৱালে জাপানৰ প্ৰধানমন্ত্ৰীগৰাকীক তেওঁৰ চৰকাৰী ভাৰত ভ্ৰমণৰ আৰম্ভণিতে আদৰণি জনায় আৰু উল্লেখ কৰে যে এই ভ্ৰমণ ভাৰত আৰু জাপানৰ মাজৰ ‘বিশেষ কৌশলগত আৰু গোলকীয় অংশীদাৰিত্ব’ আগুৱাই নিয়াৰ ক্ষেত্ৰত এক গুৰুত্বপূৰ্ণ পদক্ষেপ। প্ৰধানমন্ত্ৰী নৰেন্দ্ৰ মোদীৰ আমন্ত্ৰণত ১ জুলাইৰ পৰা ৩ জুলাইলৈ অনুষ্ঠিত হোৱা এই ভ্ৰমণে টাকাইচিয়ে কাৰ্যভাৰ গ্ৰহণ কৰাৰ পিছত ভাৰত ভ্ৰমণৰ প্ৰথমটো আনুষ্ঠানিক ভ্ৰমণ।
ভ্ৰমণকালত তেওঁ প্ৰধানমন্ত্ৰী মোদীৰ সৈতে সন্মিলন পৰ্যায়ৰ বাৰ্তালাপত মিলিত হ’ব, ভাৰত-জাপান ব্যৱসায়িক মঞ্চত অংশগ্ৰহণ কৰিব আৰু দুয়োপক্ষই তেওঁলোকৰ বিশেষ কৌশলগত আৰু গোলকীয় অংশীদাৰিত্ব সম্প্ৰসাৰণ কৰাৰ লক্ষ্যৰে ব্যৱসায়িক নেতাসকলৰ সৈতে মতবিনিময় কৰিব।
প্ৰধানমন্ত্ৰী টাকাইচিয়ে অংশগ্ৰহণ কৰিবলগীয়া ভাৰত-জাপান ব্যৱসায়িক মঞ্চই দুয়োখন দেশৰ উদ্যোগ জগতৰ নেতাসকলক নতুন বিনিয়োগৰ সুযোগ অন্বেষণ কৰাৰ বাবে এক অতিৰিক্ত প্লেটফৰ্ম প্ৰদান কৰিব বুলি আশা কৰা হৈছে।
কূটনৈতিক সূত্ৰই প্ৰকাশ কৰা অনুসৰি, আলোচনাত থকা প্ৰস্তাৱসমূহৰ ভিতৰত কৃত্ৰিম বুদ্ধিমত্তা (Artificial Intelligence), ওড়িশাত এটা বৃহৎ পৰিসৰৰ সেউজ এমোনিয়া প্ৰকল্প, বায়’গেছৰ ক্ষেত্ৰত সম্প্ৰসাৰিত সহযোগিতা আৰু ‘পাৱাৰ এছিয়া’ (POWERR Asia)ৰ জৰিয়তে আঞ্চলিক নমনীয়তা শক্তিশালী কৰাৰ পদক্ষেপ অন্তৰ্ভুক্ত আছে।
লগতে পঢ়ক: ‘ৰাজনীতিবিদসকলে ৰাজনৈতিক ধেমালি সহ্য কৰিব জানিব লাগিব’; ৰাঘৱ চাড্ডাৰ আবেদনক লৈ আদালতৰ প্ৰতিক্ৰিয়া
