তিনিদিনীয়া ভ্ৰমণ সূচীৰে নতুন দিল্লীত উপস্থিত হয় জাপানৰ প্ৰধানমন্ত্ৰী ছানায়ে টাকাইচি। প্ৰধানমন্ত্ৰী নৰেন্দ্ৰ মোদীয়ে তেওঁক আদৰণি জনায়। দুয়োগৰাকী নেতাই বাণিজ্য, প্ৰতিৰক্ষা, শক্তি, প্ৰযুক্তি, ভাৰত-প্ৰশান্ত মহাসাগৰীয় অঞ্চলৰ ক্ষেত্ৰত সহযোগিতা বৃদ্ধিকে ধৰি কেইবাটাও গুৰুত্বপূৰ্ণ বিষয়ৰ ওপৰত আলোচনা কৰিব।

প্ৰধানমন্ত্ৰী নৰেন্দ্ৰ মোদীয়ে বুধবাৰে জাপানৰ প্ৰধানমন্ত্ৰী ছানায়ে টাকাইচিক ভাৰতলৈ আদৰণি জনাই কয় যে, দেশলৈ তেওঁৰ এই প্ৰথম ভ্ৰমণত তেওঁক আতিথ্য প্ৰদান কৰিবলৈ পাই “নথৈ আনন্দিত” হৈছো। ইয়াৰ লগতে তেওঁ ভাৰত-জাপান বিশেষ কৌশলগত আৰু গোলকীয় অংশীদাৰিত্বক অধিক শক্তিশালী কৰাৰ উদ্দেশ্যে আলোচনাৰ বাবে অপেক্ষা কৰি থকা বুলিও প্ৰকাশ কৰে।

তিনিদিনীয়া চৰকাৰী ভ্ৰমণসূচীৰে নতুন দিল্লীত উপস্থিত হোৱা ছানায়ে টাকাইচিৰ আগমনৰ পিছতেই এক্সত কৰা এটা পোষ্টত প্ৰধানমন্ত্ৰী মোদীয়ে কয় যে দুই নেতাৰ মাজত দ্বিপাক্ষিক আৰু আঞ্চলিক বিষয়সমূহ সামৰি এক ব্যাপক আলোচনা অনুষ্ঠিত হ’ব।

প্ৰধানমন্ত্ৰীয়ে তেওঁৰ পোষ্টত কয়, “প্ৰধানমন্ত্ৰী ছানায়ে টাকাইচি, ভাৰতলৈ আপোনাক আন্তৰিক আদৰণি জনাইছো। আপোনাৰ প্ৰথম ভাৰত ভ্ৰমণত আপোনাক আতিথ্য দিবলৈ পাই আমি আনন্দিত হৈছোঁ আৰু কাইলৈ আমাৰ মাজত হ’বলগীয়া এক ব্যাপক আলোচনাৰ বাবে মই অপেক্ষা কৰি আছোঁ, যিয়ে ভাৰত-জাপান বিশেষ কৌশলগত আৰু গোলকীয় অংশীদাৰিত্বক অধিক গভীৰ কৰি তুলিব।” তেওঁ লগতে কয়, “আমাৰ যৌথ প্ৰচেষ্টাৰ জৰিয়তে আমি ইণ্ডো-পেচিফিক (ভাৰত-প্ৰশান্ত মহাসাগৰীয় অঞ্চল) আৰু তাৰ বাহিৰতো শান্তি, স্থিৰতা আৰু সমৃদ্ধি আগুৱাই লৈ যোৱা কাৰ্য অব্যাহত ৰাখিম।”

প্ৰধানমন্ত্ৰী মোদীৰ আমন্ত্ৰণ ক্ৰমে ১ জুলাইৰ পৰা ৩ জুলাইলৈকে তিনিদিনীয়া চৰকাৰী ভ্ৰমণসূচীৰে জাপানৰ প্ৰধানমন্ত্ৰী ছানায়ে টাকাইচি দিনৰ ভাগত নতুন দিল্লীত উপস্থিত হয়।

অৱতৰণ কৰাৰ কিছু সময় পিছতেই ছানায়ে টাকাইচিয়ে কয় যে প্ৰধানমন্ত্ৰী মোদীৰ সৈতে হ’বলগীয়া আলোচনাত অৰ্থনৈতিক নিৰাপত্তা আৰু শক্তি নিৰাপত্তা অন্যতম মূল বিষয় হ’ব। এক্সত কৰা এটা পোষ্টত তেওঁ কয়, “মই ভাৰতৰ ৰাজধানী দিল্লীত উপস্থিত হৈছোঁ। জাপানৰ প্ৰধানমন্ত্ৰী হিচাপে প্ৰায় তিনি বছৰৰ ভিতৰত এয়া মোৰ প্ৰথম ভাৰত ভ্ৰমণ হ’ব আৰু ব্যক্তিগতভাৱে এইখন দেশলৈ মোৰ এইয়া একেবাৰে প্ৰথম ভ্ৰমণ। অৰ্থনৈতিক নিৰাপত্তা আৰু শক্তি নিৰাপত্তাকে ধৰি জৰুৰী বিষয়সমূহক কেন্দ্ৰ কৰি প্ৰধানমন্ত্ৰী মোদীৰ সৈতে হ’বলগীয়া আলোচনাত, বৰ্তমানৰ আন্তঃৰাষ্ট্ৰীয় পৰিস্থিতিৰ প্ৰতি লক্ষ্য ৰাখি জাপান আৰু ভাৰতৰ মাজৰ কৌশলগত সহযোগিতামূলক সম্পৰ্কক গভীৰ কৰা, পাৰস্পৰিক পৰিপূৰক সহযোগিতা বৃদ্ধি কৰা আৰু জাপান-ভাৰত ‘বিশেষ কৌশলগত গোলকীয় অংশীদাৰিত্ব’ক অধিক শক্তিশালী কৰাৰ লক্ষ্য লৈছোঁ।”

এই ভ্ৰমণকালত ছানায়ে টাকাইচিয়ে ১৬ সংখ্যক ভাৰত-জাপান বাৰ্ষিক সন্মিলনত অংশগ্ৰহণ কৰিব, য’ত দুই নেতাই দ্বিপাক্ষিক সহযোগিতাৰ সকলো দিশ পৰ্যালোচনা কৰাৰ লগতে পাৰস্পৰিক স্বাৰ্থজড়িত আঞ্চলিক আৰু গোলকীয় বিষয়সমূহৰ ওপৰত মত বিনিময় কৰাৰ সম্ভাৱনা আছে।

লগতে পঢ়ক: তিনিদিনিয়া ভ্ৰমণসূচীৰে ভাৰতত উপস্থিত জাপানৰ প্ৰধানমন্ত্ৰী ছানায়ে টাকাইচি