ভূটানৰ সৈতে ক্ৰছ বৰ্ডাৰ ৰে’ল প্ৰকল্পৰ ঘোষণা ভাৰতৰ
সোমবাৰে ভাৰতে ভূটানৰ সৈতে দুটা নতুন ৰে’ল প্ৰকল্পৰ কথা ঘোষণা কৰে । চৰকাৰে কয় যে ভূটানৰ চহৰ ছামচে আৰু গেলেফুলৈ চাৰি হাজাৰ কোটিৰো অধিক ব্যয় সাপেক্ষে দুয়োখন দেশৰ সীমা অতিক্ৰম কৰা অথবা ক্ৰছ বৰ্ডাৰ ৰে’ল সংযোগ স্থাপন কৰা হ’ব ।
ৰে’ল মন্ত্ৰী অশ্বিনী বৈষ্ণৱ আৰু বৈদেশিক সচিব বিক্ৰম মিশ্ৰীয়ে সংবাদ মাধ্যমৰ আগত এই ৰে’ল প্রকল্পসমূহৰ কথা ঘোষণা কৰে ৷ মিশ্ৰীয়ে কয় যে দুয়োখন চৰকাৰে বানাৰহাট (পশ্চিম বংগ)ক সামচেৰ সৈতে আৰু কোকৰাঝাৰ (অসম)ক গেলেফুৰ সৈতে সংযোগ কৰা দুয়ো দেশৰ সীমা অতিক্ৰম কৰা ৰে’ল সংযোগ স্থাপনৰ বাবে সন্মতি প্ৰকাশ কৰিছে ।
তেওঁ কয় যে ভাৰত আৰু ভূটানৰ মাজত অসাধাৰণ বিশ্বাস, পাৰস্পৰিক সন্মান আৰু বুজাবুজিৰ সম্পৰ্ক আছে । যোৱা বছৰ প্ৰধানমন্ত্ৰী নৰেন্দ্ৰ মোদীৰ ভূটান ভ্ৰমণৰ সময়ত ৰে’ল সংযোগ স্থাপনৰ চুক্তি স্বাক্ষৰিত হৈছিল ।
বৈষ্ণৱে কয় যে এই প্ৰকল্পসমূহ ভাৰতীয় ৰে’লৱে নেটৱৰ্কৰ পৰা আৰম্ভ হ’ব । তেওঁ কয় যে প্ৰায় ৪,০৩৩ কোটি বিনিয়োগৰ প্ৰস্তাৱ দিয়া হৈছে । এই পদক্ষেপৰ অধীনত ৮৯ কিলোমিটাৰ দৈৰ্ঘৰ ৰে’লৱে নেটৱৰ্ক নিৰ্মাণ কৰা হ’ব বুলিও উল্লেখ কৰে ৰে’ল মন্ত্ৰীগৰাকীয়ে ।
লগতে পঢ়ক : জি এছ টি সংগ্ৰহে ভৰালে চৰকাৰী কোষাগাৰ… আগষ্ট মাহত অভিলেখ সংখ্যক সংগ্ৰহ
