ভাৰত আৰু ইউৰোপীয় ইউনিয়নৰ মাজত বাণিজ্যিক আলোচনা
ভাৰত আৰু ইউৰোপীয় সংঘৰ মাজত মুক্ত বাণিজ্য চুক্তিৰ বাবে চলি থকা আলোচনাক গতি প্ৰদান কৰিবলৈ চলিত মাহৰ শেষৰ ফালে ব্ৰুছেলছ ভ্ৰমণ কৰিব বাণিজ্য আৰু উদ্যোগ মন্ত্ৰী পীয়ুষ গোৱেলে । এই সময়ছোৱাত মন্ত্ৰীগৰাকী ইউৰোপত উপস্থিত হৈ বাৰ্লিন গ্ল’বেল ডাইলগত অংশগ্ৰহণ কৰিব । ২৩ অক্টোবৰৰ পৰা ২৫ অক্টোবৰলৈ এই অনুষ্ঠান অনুষ্ঠিত হ’ব । ইয়াৰ পিছত ব্ৰুছেলছত ইউৰোপীয় ইউনিয়নৰ সৈতে বাণিজ্যিক আলোচনা অনুষ্ঠিত হ’ব । ইউৰোপীয় ইউনিয়নৰ বাণিজ্য আয়ুক্ত মাৰ’ছ চেফকোভিচক সাক্ষাৎ কৰিব গোৱেলে । ৬ অক্টোবৰৰ পৰা ১০ অক্টোবৰলৈকে দুয়োপক্ষৰ মাজত চলি থকা ১৪ সংখ্যক ৰাউণ্ডৰ আলোচনাৰ অন্ত পৰাৰ পিছতে গোৱেলৰ এই ভ্ৰমণ অনুষ্ঠিত হ’ব ।
ব্ৰুছেলছত ইউৰোপীয় আয়োগৰ বাণিজ্য সঞ্চালক প্ৰধান ছাবিন ৱেয়ান্দৰ সৈতেও বাণিজ্য সচিব ৰাজেশ আগৰৱালে আলোচনাত মিলিত হয় । ডিচেম্বৰৰ ভিতৰত আলোচনা সমাপ্ত কৰাৰ সিদ্ধান্ত লোৱাত দুয়োপক্ষৰ মাজত আলোচনা তীব্ৰতৰ হৈ পৰিছে ।
ইউৰোপ ভ্ৰমণৰ পিছত গোৱেলে নিউজীলেণ্ডলৈ যাত্ৰা কৰিব । মাৰ্চ মাহত দুয়োখন দেশে মুক্ত বাণিজ্য চুক্তিৰ আলোচনা আৰম্ভ কৰিছিল আৰু তিনি ৰাউণ্ডৰ আলোচনাত মিলিত হৈছে । ২০২২ চনৰ জুন মাহত ভাৰত আৰু ইউৰোপীয় সংঘই আঠ বছৰতকৈ অধিক সময়ৰ ব্যৱধানৰ অন্তত এক ব্যাপক মুক্ত বাণিজ্য চুক্তি, বিনিয়োগ সুৰক্ষা চুক্তি, ভৌগোলিক ইংগিতৰ চুক্তিৰ ওপৰত পুনৰ আলোচনা আৰম্ভ কৰে । বজাৰ মুকলিৰ স্তৰক লৈ হোৱা মতানৈক্যৰ বাবে ২০১৩ চনত এই আলোচনা স্থবিৰ হৈ পৰিছিল ।
লগতে পঢ়ক : হেনলি পাছপোৰ্ট ইনডেক্স ২০২৫: শীৰ্ষ ১০ৰ পৰা বাদ পৰিল আমেৰিকা; ভাৰতৰ স্থানো অৱনমিত
